संवाहक नेपालभाषा बुलेटिन थौं मोहनीया न्हापांगु दिं, ख्वपया पीगनय् नवरात्री मेला न्ह्यात

0
57

कृष्ण प्रजापति
० बिराट नेपालभाषा साहित्य सम्मेलन थुगुसी तलेजु बैंक्वटय् जुइगु ।
० संविधान संशोधन मजूसा सरकार त्वःतेगु जुइ ः अशोक राई ।
० नक्कली फेसबुक अकाउन्टप्रति मुख्यमन्त्रीया ध्यानाकर्षण । व
० ज्ञानेन्द्र शाहीयात चितवनय् ग्यानापुक्क आक्रमण, अस्पताल भर्ना यात ।
नःला स्वने पारुया दिं थौं कौलाथ्व पारु आइतवाः सुथनिसें हे ख्वपया थीथी शक्तिपीठ (पीगं) य् भक्तजनपिनिगु भीड जूगु दु ।
थौं पारुनिसें ख्वपय् नवरात्री मेला तकं न्ह्याःगु दु । ख्वपया थीथी ९ गू पीगनय् थौंनिसें सुथ व सनिल यानाः न्हिइ निक्वः मेला जुइ ।
विशेष यानाः बहनीया इलय् भव्य मेला जुइगु जूगुलिं नवरात्री मेला नं धायेगु यानातःगु खः ।
नवरात्री मेलाय् ख्वपया पीगंमध्ये न्हापांगु दिं थौं पारु ब्रम्हायणी, निन्हुया दिं महेश्वरी, स्वन्हुया दिं कुमारी, प्यन्हुया दिं भद्रकाली, न्यान्हुया दिं बाराही, खुन्हुया दिं इन्द्रायणी, न्हयन्हुया दिं महाकाली, च्यान्हुया दिं महालक्ष्मी व गुन्हुया दिं त्रिपुरासुन्दरी लिसें दकले लिपांगु दिं मोहनीया दिं हाकनं ब्रम्हायणीइ भव्य मेला जुइगु याइ ।
सुथय् देगलय् पूजा याइपिनिगु भीड जुइसा सनिलय् मेला स्वयेत त्वाःत्वालं बाजागाजाया लिसें द्वलंद्वः भक्तजनपिं देगलय् वनीगु जूगुलिं थुकिया रौनक चान्हय् तकं जुइ ।
नवरात्रीया लिपांगु दिं नवमि व दसमिया दिनय् धाःसा ख्वप लिसें येँ, यल, काभ्रेपलाञ्चोक लिसें थीथी जिल्लापाखें मेला स्वयेत वःपिं भक्तजनपिनिगु भीड जुइ ।
०००
हलिं नेवाः गुथि गःछेँ कचा किपूया ग्वसालय् सनिवाः न्हय्क्वःगु नेपालभाषा साहित्य गोष्ठी जुल । गोष्ठीया मूपाहां लोककवि राजभाई जकःमिं समालोचना विना साहित्यया विकास जुइमखुगु खँ कनादिसें बुलुहुँ बुलुहुँ संख्यात्मक व गुणात्मक रुपं नेपालभाषा कविताया लागाय् तब्या जुजुं वनाच्वंगु व विश्वय् स्लाइङ प्रबृत्तिया धार सुरु जुइ धुंकूगुलिं आः कवितापाखें कविं पाठक व श्रोतायात तकसं प्रभावित यायेमाः धयादिल । वय्कलं खँग्वःया शक्ति २० प्रतिशत, सःया प्रभाव ३० प्रतिशत दइ, तर म्हया हाउभाउपाखें कविताया प्रभाव ल्याः ५० प्रतिशत जुइगुलिं उकियात ध्यान तयेमाः धयादिल ।
हलिं नेवाः गुथिया नायः जुजुमान महर्जनं हलिं नेवाः गुथिपाखें थीथी समसामयिक विषयय् गोष्ठी व जनचेता ब्वलंकेगु ज्या यानागु खँ कनादिसें गःछेँ कचापाखें जुयाच्वंगु थुगु ज्याझ्वः नं उकिया तिरन्तरता खः धयादिल । किपू नगरपालिकाया कार्यबाहक मेयर हर्ष महर्जनं सम्पदा जोगे यायेगु ताः तयाः भाषा, कला व संस्कृतिइ किपू नगरपालिकां लगानी यानाच्वनागु खँ कनादिल । अन पाठ जूगु स्वंगू दर्जन कवितायात कयाः समालोचन यानादिसें समालोचक डा. चन्द्रमान बज्राचार्यं नेपालभाषा कविता लागा शब्द कम भाव अप्वः दुगु म्हो जक दुगुलिं भावयात हे अप्वः याये फयेके धयादिल । वय्कलं कविन्द्रलाल प्रधान व शम्भूराम ‘मान्छे’या कवितायात आधुनिक कविताया दुग्यंगु कविता कथं सम्बोधन यानादिल ।
हलि नेवाः गुथि गःछेँ कचाया दुजः व ज्याझ्वःया कजि बुद्धिलाल ज्यापुया सभापतित्वय् जूगु उगु ज्याझ्वलय् छ्याञ्जे अमिता मजर्हनं लसकुस यानादीगु खःसा झिंप्यदँया सुजना महर्जननिसें चय्प्यदँया जेष्ठ नागरिक शिवप्रसाद श्रेष्ठं नं कविता पाठ यानादीगु खः । कमला महर्जनं न्ह्याकादीगु उगु ज्याझ्वलय् रत्नशोभा महर्जन, बीरप्रसाद भन्सारी नापं इन्द्रेणी सांस्कृतिक समाजपाखें थीथी नेवाः म्ये नं न्ह्यब्वये ज्या जूगु खः ।
०००
बिराट गुथिया ग्वसालय् वइगु कउलाथ्व द्वादशि असोज २३ गते बिहिवाः कुन्हु न्याय्च्याक्वःगु बिराट नेपालभाषा साहित्य सम्मेलन थुगुसी टुरिजम मार्केटया तलेजु बैंक्वेट राममन्दिरय् जुइगु जूगु दु । डा. योगेन्द्र प्रधानं मूपाहांया थासं उलेज्या यानादीगु उगु ज्याझ्वः दथुइ नेपालभाषा विषय कयाः एम. ए. नियमित पास यानादीम्ह उत्कष्ट विद्यार्थी पाटन संयुक्त क्याम्पसया राकेश महर्जन व नेपालभाषा विषय कयाः एसईई परीक्षाय् उत्कृष्ट जुयादीम्ह जगतसुन्दर ब्वनेकुथिया विद्यार्थी सुकुन्दा श्रेष्ठयात थुगुसीया बिराट पदक लःल्हाइगु ज्याझ्वः दु ।
बिराट नेपालभाषा साहित्य सम्मेलन गुथिया नायः महेन्द्रगोपाल कर्माचार्यया सभापतित्वय् जुइगु उगु ज्याझ्वलय् मू वक्ता साहित्यकार डा. पुष्पराज राजकर्णिकार जुयादीगु ज्याझ्वः दु । जातीय स्वतन्त्रतायात क्वत्यला राष्ट्रया उत्थान जुइ फइमखु धइगु नारा थ्वयेका न्याय्च्यादँ न्ह्यःनिसें ख्वपय् न्ह्यानाच्वंगु थुगु ज्याझ्वः दथुइ ह्याउँबाला नांगु बिराटया ख्वाःपौया ल्याः २७ नं विमोचन जुइगु ज्याझ्वः तयातःगु दु । बिराटं उगु सम्मेलनय् नेपालभाषाया प्रगतिशील रचना दुथ्याकेत इनाप याःगु दु ।
०००
समाजवादी पार्टीया बरिष्ठ नेता अशोक राई नं संविधान संशोधन मजूसा थःपिनिगु पार्टीं संघीय सरकार त्वःतेगु धाःगु दु ।
आइतवाः बुटवलय् ग्वसाः ग्वःगु छगू ज्याझ्वलय् नेता राई नं संविधान संशोधनया मुद्दाय् सरकार सुम्क न्वःमवासे च्वनाच्वंगु धासें असन्तुष्टि प्वंकूगु खः । प्रत्यक्ष निर्वा्चित राष्ट्रपति, पहिचान लिसेंया संघीयता लिसेंया विषयत संविधान संशोधन जुइमाःगु नेता राईया माग खः ।
समाजवादी पार्टीया नेता राई नं जनताया चाहना कथं सरकार संचालन जुइमफुगु द्वपं ब्यूगु दु ।
भ्रष्टाचार, घुसखोरी अप्वःगु व थ्व रोकथाम मयाःसा जनता निरास जुयाः सतकय् क्वाहाँ वयेफूगु नेता राईया विश्लेषण दु ।
थःपिनिगु पार्टी सरकारय् दुसां नं गलत ज्याया विरोध यायेगु नेता राई नं धाःगु दु ।
०००
कर्णाली प्रदेशया मुख्यमन्त्री महेन्द्रबहादुर शाहीया नामं नक्कली फेसबुक अकाउन्ट चायेकास् चरित्र हत्या यायेगु कुतः जुयाच्वंगुलिं मुख्यमन्त्री व मन्त्रिपरिषदया ज्याकुथिं थःपिनिगु ध्यानाकर्षण जूगु जानकारी ब्यूगु दु ।
मुख्यमन्त्री शाहीया प्रमुख स्वकीय सचिव खेमबहादुर सिंहं थौं आइतवाः छगू प्रेस वक्तव्य सार्वजनिक यासें उगु नक्कली फेसबुक अकाउन्टया भ्रमय् मच्वनेत आग्रह याःगु दु ।
स्वकीय सविच सिंहं सार्वजनिक याःगु वक्तव्यय् धयातःगु दु, “सामाजिक संजालया दुरुपयोग याानाः माननीय मुख्यमन्त्रीजुया चरित्रहत्या यायेगु व थःगु व्यक्तिगत स्वार्थ पूवंकेगु आज्जुया लिसें नक्कली आइडीपाखें थीथी व्यक्ति व निकायस च्याट सम्पकृपाखें अवाञ्छित निर्देशन व मार्ग यायेगु यानाच्वंगु सीदूगु दु, थुज्वःगु क्रियाकलापया भ्रमय् मच्वनेत सरकारी व गैरसरकारी निकाय, शुभचिन्तक व आम जनसमुदायपिन्त इनाप यानाच्वना ।”
स्वकीय सचिवालयं नक्कली फेसबुक आइडी छ्यस्म्ह मनू म्हसीका कानूनी कारवाहीया प्रक्रिया न्ह्यःने यंकेत सम्बन्धित निकायस जानकारी बिइधुनागु जानकारी ब्यूगु दु ।
मुख्यमन्त्रीया व्यक्तिगत फेसबुक अकाउन्टया लिंक महेन्द्र डट शाही डट १६५ जूगुलिं थ्वबाहेक वय्कस्या नां स्वानास् चलेयानातःगु मेमेगु आइडीया विश्वास मयायेत आग्रह याःगु दु ।
०००
‘नेपाःया नितिं नेपाःमि’ अभियानया अभियन्ता ज्ञानेन्द्र शाहीयात निर्घात रुपं कुटपिट याःगु दु ।
अभियानं भरतपुरय् च्वंगु चोविसकोठीइ ‘भ्रष्टाचार, बेथिति व लुटतन्त्रया विरोधय् नागरिक खबरदारी’ सभा यायेत्यंगु खः । सभाय् ज्ञानेन्द्र शाहीलिसें बरिष्ठ अभिवक्ता सुरेन्द्र भण्डारी व थीथी अभियन्तापिन्सं सम्बोधन याइगु धाःगु खः ।
न्हिनसिया १२ ता इलय् ज्याझ्वः न्ह्याकेगु कथं तयारी जुयाच्वंगु इलय् सत्तारुढ नेपाल कम्युनिष्ट पार्टी (नेकपा) आबद्ध युवापिनिगु छगू पुचः उगु सभा जुइगु थासय् थ्यंकूगु खः । इमिसं ‘ज्ञानेन्द्र शाही मुर्दावाद, राजावादीतय्त बहिष्कार यायेनु’ लिसेंया नारा थ्वयेकूगु खः । ज्याझ्वः जुइगु थाय् लिक्क च्वंपिं प्रहरी तत्काल थ्यंकल व मनूत तितरवितर यात ।
स्थानीय प्रशासनं ज्याझ्वः यायेमते धायेधुंकाः अभियानया न्ह्यलुवाःपिं नं लिच्यूगु खः ।
सुंसुं अभियन्ता विमानपाखें येँय् लिहाँ वःगु खःसा ज्ञानेन्द्र शाहीया पुचः गाडीपाखें वयाच्वंगु इलय् चौविसकोठीया होटल ग्लोबलय् जक थ्यंगु खः, युवापिनिगु पुचलं आक्रमण यात । हाइस गाडीइ तोडफोड यात ।
ल्हातय् ल्वहँ अप्पा, व रड ज्वनावःपिं युवापिन्सं ज्ञानेन्द्र शाहीयात लक्षित यानाः लाक्वपाक्व क्ययेकुगु गाडी च्वनावःपिन्स. धाःगु दु । गाडी च्वनावःम्ह छम्हेस्यां ‘ल्वहँतं का ल्वहँतं क्ययेकल, रडं तकं दाल’ धकाः धाःगु दु ।
छुं ई लिपा प्रहरी थ्यंकल । आक्रमणकारी युवापिं धाःसा बिस्युं वन । प्रहरीं नेकपा आवद्ध छम्हेसित धाःसा गिरफ्तार याःगु दु ।
प्रहरीया ग्वाहालिं घाःपाः जूगु ज्ञानेन्द्र शाहीयात चितवन मेडिकल कलेजया आकस्मिक कक्षय् भर्ना याःगु खः । शाहीया ल्हाःया लिसें म्हगःया थीथी थासय् नं धाःपाः जूगु दुसा सिटी स्क्यान लिसेंया परीक्षण याःबलय् तच्वःगु दुघाः खनेमदूगु अस्पतालया प्रमुख कार्यकारी निर्देशक प्रताप देवकोटां जानकारी ब्यूगु दु ।
चितवनय् प्राथमिक वासः लिपाः शाहीयात येँय् छ्वयाहःगु दु । मेगु वासः यायेगु नितिं व जिल्लाया शान्ति सुरक्षा मस्यनेमा धैगु मनसाय न. शाहीयात येँय् छ्वयाहःगु जिल्ला प्रहरी ज्याकुथि चितवनया प्रवक्ता एकनारायण कोइरालां जानकारी ब्यूगु दु ।
०००
मध्यपुर थिमि बचत तथा ऋण सहकारी संस्था लि.या झिंनिक्वःगु तःमुँज्या ३ नम्बर प्रदेशया आन्तरिक मामला तथा कानूनमन्त्री शालीकराम जमकट्टेलं उलेज्या यानादिल । उगु ज्याझ्वलय् वय्कलं ख्वीम्ह जेष्ठ नागरिकतय्त हनेज्या यानादिल । नापं लाय्कू भैलः पुचः, बज्राचार्य धाः बाजं खलः, मध्यपुर गुंला बाजं खलः, मध्यपुर गुंला बाजं वाचुननि त्वाः प्रजापति पुचः नापं थीथी संघ संस्थाया प्रतिनिधि व उत्कृष्ट बचत कर्तात ल्ययाः हनेज्या यानादिल । ज्याझ्वःया मूपाहां मन्त्री जमकट्टेलं आः झी गरिब व अभाव ग्रष्ट देश कथं मखु कि उन्नत व समृद्ध देशया रुपं न्ह्याय् धस्वाकेगु ई वयाच्वंगु खँ कनादिल ।
संस्थाया अध्यक्ष कृष्णकाजी मानन्धरया सभापतित्वय् जूगु उगु ज्याझ्वलय् मध्यपुर थिमि नगरपालिकाया उपमेयर अञ्जनादेवी मधिकर्मिं जेष्ठ नागरिक नापं थीथी विधाय् उत्कृष्ट बचतकर्तातय्त सिरपा व दसि पौ लःल्हानादीगु खः । ज्याझ्वलय् संस्कृतिविद् तुल्सीहरि प्रजापति, लेखा समितिं न्ह्यब्वःगु प्रतिवदेन सुन्दर श्रेष्ठ, कोषाध्यक्ष प्रेमसुन्दर श्रेष्ठ व अध्यक्ष कृष्णकाजी श्रेष्ठं प्रस्तुत यानादीगु प्रतिवदेनयात सर्वसम्मतं पारित याःगु दु ।
०००
टुरिष्ट बसपाखें भन्सार छलेयानाः हःगु ५५ लख तका बराबरया कापः महानगरीय प्रहरी प्रभाग बुढानिलकण्ठं बरामद याःगु दु ।
प्रभागया प्रहरी निरीक्षक भुपेन्द्र गिरी नेतृत्वया पुचलं विष्णुमतीइ दिकातःगु बाछख ६९३९ ल्याःया टुरिष्ट बसपाखें अवैध काफ बरामद याःगु खः ।
प्रहरीया कथं बसया छत क्वय् फल्स बटम दयेकास् ४१ पाः तुयुगु बोराय् तयातःगु अवस्थाय् भन्सार छलीया कापः लुयावःगु खः । उगु बोराय् ३७०४ पाः थीथी रंगया रेडिमेट सर्ट लुयावःगु जानकारी ब्यूगु दु ।
खानतलासी व बरामदी मुचुल्का तयार यानाः प्रहरीं आवश्यक कारवाहीया नितिं महानगरीय प्रहरी वृत्त, महाराजगञ्ज छ्वःगु दु । अवैध कापःया मालिक सु खस् धैगु सीमदुनि ।
०००
खुसि चुइका बराहपोखरी गाउँपालिका–६ मौवाबोटेया ५६ दँया दलबहादुर विश्वकर्मा सिइगु दु । छु न्हिं न्हयः निसें मदिक वा वयाच्वंगु कारणं दुक्चेङ्वा खुसिं शनिबाः तच्वकं खुसिबाः वयाः विश्वकर्मायात चुइका यंकुगु खः ।
खुसि छिइगु झ्वलय् विश्वकर्मायात थ्यमथ्यं १०० मिटर क्वय् सिमाय् थानाच्वंगु स्थिति लुइकुगु खः ।
०००
भारतीय प्रधानमन्त्री नरेन्द्र मोदीं भारतं विश्वयात युद्ध मखुसे बुद्ध बियागु धाःगु दु ।
शुक्रवाः संयुक्त राष्ट्रसंघया महासभायात सम्बोधन यासें मोदीं भारतं विश्वयात शान्तिया सन्देश बियागु धाःगु दु ।
महासभायात हिन्दी भासं १७ मिनेट सम्बोधन याःम्ह मोदीं धाःगु दु, “दकले तःधंगु बलिदान यदि गुगु नं देसं ब्यूगु दुसा व भारतं खः । जिपिं व देसया बासिन्दा खः, गुगु देसं विश्वयात युद्ध मखु, बुद्ध ब्यूगु दु, शान्तिया सन्देश ब्यूगु दु । उकिं, जिमिगु सलय् आतंकविरुद्ध विश्वयात सतर्क याकेगु गम्भीरता दु व आक्रोश नं दु ।”
सम्बोधनया झ्वलय् मोदीं आतंकवाद विश्वया नितिं खतरा जूगु धाःगु दु ।
भारतीय प्रधानमन्त्री मोदीं आतंकवाद छुं छगू देसया नितिं जक मजुसे मुक्कं विश्व समुदायया नितिं तःधंगु हाथ्या जूगु धाःगु दु । मोदीं आतंकवादविरुद्ध छप्पं जुइत विश्व समुदाययात अपिल याःगु दु ।

https://sambahak.com/wp-content/uploads/2019/05/gyalmu-jee-ko-badai.png
Loading...