संवाहक नेपालभाषा बुलेटिन अपराधया सुचं हइपिं ‘घुमुवा प्रहरी’ हे लुटपाटय् संलग्न

0
46

कृष्ण प्रजापति
० थःहे कर्मचारी गिरफ्तार यायेत प्रहरीं ११ न्हु ई काल ।
० सभामुख महराया राजीनामा सुचं संसदय् तिकल ।
० १० न्हु दत ः रसुवाय् ‘हाइकिङ’ वंपिं निम्ह पर्यटक मलुनि । व
० ‘जनविश्वास त्याकेगु खःसा महरायात कारवाही याः’ –नेता प्रकाशमान
लुँ लुटपाटय् दुथ्याःगु आशंकाय् प्रहरीं संगठनया हे छम्ह अधिकृतयात गिरफ्तार याःगु दु । महानगरीय प्रहरी परिसर येँपाखें प्रहरी सहायक निरीक्षक(असई) प्रितम लामायात गिरफ्तार याःगु खः ।
येँ प्रहरीया प्रवक्ता व डिएसपी होविन्द्र बोगटीं लामायात गिरफ्तार याःगु पुष्टि याःगु दु । वं धाःगु दु, “जिमिसं मंगलवाः न्हिनय् गिरफ्तार यानागु खः । विस्तृत अनुसन्धान आः न्ह्याइगु जूगु दु ।”
अदालत विदा जूगुलिं वया म्याद थप जूगु मदु । यो प्रहरीया घुमुवा लामाया सुचंया आधारय् स्वक्वःतक लुा व छक्वः ल्वाभः नं बरामद जूगु खः,
तर, ३ असोजय् वया हे संलग्नताय् बौद्धपाखें लुँ लुटेजूगु उजुरी लायेधुंकाः लामा फरार जूगु खः । लुटपाटय् दुथ्याःगु पुचःया छम्ह दुजलं छ्यलीगु मोटरसाइकल लामाया नामय् जूगु सीदूगु खः ।
प्रकरणय् दुथ्याःम्ह लिखु–तामाकोशी गाउँपालिकाया राकेश तामाङ गिरफ्तार यायेधुंकूगु दुसा मेमेपिनिगु मालेगु ज्या जुयाच्वंगु प्रहरीं धाःगु दु ।
पुचःयात छम्ह व्यवसायीया ६०० ग्राम लुँ लुटेयाःगु द्वपं लाःगु दु ।
०००
यौन दुर्व्यवहारया द्वपं लायेधुंकाः कृष्णबहादुर महरां सभामुख पदं राजीनामा ब्यूगु सुचं संसद सचिवालय दुने तिकूगु दु ।
उपसभामुखया निर्देशन कथं प्रतिनिधिसभा नियमावलीया नियम २११ इा उपनियम २ कथं सुचं तिकूगु सचिवालयया सचिव भरतराज गौतमं धाःगु दु ।
महरां मंगलवाः उपसभामुख शिवमाया तुम्बाहाम्फे न्ह्यःने राजीनामा ब्यूगु खः । वं राजीनामा पतिइ ‘छानबिन मजुतले तकया नितिं’ राजीनामा बियागु न्ह्यथनातःगु खः । तर संसद सचिवालयया सुचं दुने थुकिया विषयस छुं न्ह्यथनातःगु मदु ।
थ्व सुचंलिसे सभामुखया पद खालि जूगु दुसा न्हूगु निर्वाचनया नितिं लँपु चाःगु दु ।
जबकी महराया निजी सचिवालयं छानविन प्रक्रिया पूवनेधुंकाः हाकनं जिम्मेवारीइ लिहाँ वइगु दाबी याःगु दु ।
०००
उत्तरी रसुवाया तामाङ सम्पदा पदमार्ग (हाइकिङ)य् वंपिं निम्ह पर्यटक १० न्हुनिसें बेपत्ता जुयाच्वंगु दु ।
पदमार्गय् पिहाँ वंपिं नेदरल्याण्डया २७ दँया थोमस व कोरियाया ४२ दँया सिसुङ १० न्हुनिसें तनाच्वंगु दु । प्रहरीया कथं असोज ५ गते सुथय् तामाङ पदमार्ग अन्तर्गत थुमन क्षेत्रय् खनेदुपिं इपिं वधुंकाः तनाच्वंगु दु ।
जिल्ला प्रहरी ज्याकुथि रसुवां पर्यटक सम्पर्क्विहीन जुइधुंकाः इमित मालेगु नितिं प्रहरी नायव उपरीक्षक भागेन्द्र पुरुष ढकालया नेतृत्वय् छगू पुचः परिचानल जूगु जानकारी ब्यूगु दु । पर्यटकपिं मालेगु नितिं खटेजूम्ह ढकालं थुमन क्षेत्र जःखःपाखें इपिं बेपत्ता जूगु खनेदूगुलिं उगु लागा जःखः मालेगु ज्या जुयाच्वंगु जानकारी ब्यूगु दु ।
पर्यटक प्रहरी चौकी स्याफ्रुबेँसीया अभिलेख कथं उपिं पर्यटक भाद्र २७ गते रसुवाया स्याफ्रुबोसीइ बास च्वनाः वंगु भाद्र २८ गतेनिसें तामाङ सम्पदा पदमार्गपाखे वंगु खः ।
तामाङ सम्पदामार्ग उत्तरी रसुवाया गोल्जुङ, गतलाङ, पार्वतीकुण्ड, चिलिमे, तातोपानी, नाकथली, थुमन व बृद्धिमया भूभागं मान्यता काःगु व उगु क्षेत्रय् तच्वकं वःगु वा व प्रतिकुल मौसमयात हाकुतिनाः मालेगु ज्याय् सुरक्षाकर्मी परिचालन जुयाच्वंगु प्रमुख जिल्ला अधिकारी अर्जुन भण्डारीं धाःगु दु ।
अथेहे, सशस्त्र प्रहरी बल २० नम्बर गुल्म धुञ्चेया प्रहरी अधिकृत व जवान तकं मालेगु ज्याय् व उद्धारय परिचालन जूगु सशस्त्र प्रहरी निरीक्षक होमनाथ नेपालं धाःगु दु ।
०००
नेपाली कांग्रेसया नेता प्रकाशमान सिंहं कृष्णबहादुर महरायात कारवाही यानाः जनविश्वास त्याकेत सरकारयात सुझाब ब्यूगु दु ।
निर्मला पन्तया दोषी लुइके मफयाः जनविश्वास तंकेधुंकुम्ह सरकार व प्रहरी प्रशासनयात महरा प्रकरण हाकनं विश्वास आर्जन यायेगु ह्वताः जूगु सिंहया धापू खः ।
बुधवाः येँय् ग्वसाः ग्वःगु छगू ज्याझ्वलय् पूर्व उपप्रधानमन्त्री तकं जुइधुंकूम्ह नेता सिंहं देशय् कानूनी राज्य दु धैगु स्थापित यायेगु नितिं व निर्मला पन्तया केसय् गुमेजुइधुंकूगु विश्वास हाकनं त्याकेगु नितिं थ्व ज्याय् सरकार व प्रशासनं पलाः न्ह्याकेमाः धकाः धाःगु दु ।
कानून फुक्कसिगु नितिं समान जूगु धासें नेता सिंहं अनुसन्धानय् दुथ्याःपिं प्रहरीपिन्त दबाब व प्रभावय् मलाःसे चनाखो जुयाः ज्या यायेत सुझाव ब्यूगु दु । अनुसन्धानया झ्वलय् दोषी खनेदुपिन्त ढाकछोप यायेमज्यूगु सिंहया धापू दु ।
नेता सिंहं धाःगु दु, “सभामुखया व्यक्तित्व न्ह्यब्वयेत वय्कः चुके जुइधुंकूगु दु । नेकपाया नेता जुयाः लाक्वपाक्व न्ह्याग्गु याये दइला ?” मिसापिन्त दुव्र्यवहार यायेगुला ? ढाकछोप यानाः कानूनसिबें च्वय् नेकपाया नेता कार्यकर्ता जुइगुला श्र थ्व जुइफइ मखु ।”
छम्ह मिसा कर्मचारीं यौन दुव्र्यवहारया द्वपं बिइधुंकाः नेकपा नेता महरां सभामुख पदं मंगलवाः राजीनामा ब्यूगु खः । तर महराया राजीनामा ‘जिं दायेथें याये, छ ख्वयेथें या’ धाःथें जक जूगु सिंहं टिप्पणी याःगु दु ।
नेता सिंहं न्ह्यसः तःगु दु, “संविधानया गुगु धारा कथं राजीनामा यायेमाल ? जनतायात भ्रमय् तये ला मजिल नि ।”
नेता प्रकाशमान सिंहं महरा सभामुख पदं जक मखु कि सांसद पदं नं लिचिलेमाःगु धाःगु दु ।
०००
नेपाल प्रहरीं अवैध लुँलिसें निम्हेसित गिरफ्तार याःगु दु । महानगरीय प्रहरी वृत्त कीर्तिपुरपाखें सादा पोशाखय् खटेजूपिं प्रहरी पुचलं नवलपरासीया ४० दँया ध्रुवबहादुर दर्लामी व बाग्लुङया २५ दँया नीरबहादुर परियारयात मंगलवाः सनिलय् गिरफ्तार याःगु खः ।
वृत्तया प्रमुख, प्रहरी नायव उपरीक्षक छेदिलाल कामतीं त्रिभुवन विमानस्थल जुयाः लुँ हयाच्वंगु अवस्थाय् इमित गिरफ्तार यानागु जानकारी ब्यूगु दु । कीर्तिपुर वृत्तया प्रमुख कामती धाःगु दु, ‘त्रिभुवन विमानस्थलं पास जुयाः चाःबही हयेधुंकूगु अवस्थाय् गिरफ्तार यानागु खः ।’
गिरफ्तारी लाःपिंके प्रहरीं १६ तोला १४ लाल लुँ बरामद याःगु खः । उगु लुँया मू १२ लख तका बराबर जुगु प्रहरीं जानकारी ब्यूगु दु । गिरफ्तारी लाःपिं निम्हेसित थप अनुसन्धान व कारवाहीया नितिं राजश्व ज्याकुथि छ्वःगु कीर्तिपुर प्रहरी वृत्तं धाःगु दु ।
०००
नेपाल प्रहरीं अवैध लुँ लिसें निम्ह सित ज्वंगु दु । महानगरीय प्रहरी वृत्त कीर्तिपुर पाखें सादा पोशाकया प्रहरी टोलीं नवलपरासीया ४० दँया धुब्रबहादुर दर्लामी व बाग्लुङका २५ दँया नीरबहादुर परियारयात मङ्गलबाः बहनिं ज्वंगु खः ।
वृत्तया प्रमुख, प्रहरी नायब उपरीक्षक छेदुलाल कामती त्रिभुवन विमानस्थल जुयाः लुा हयाच्वंगु अवस्थाय् उमित ज्वनाःगु खँ धाःगु दु । त्रिभुवन विमानस्थलं लुँ पास यानाः चावहिल हःगु अबस्थाय् थथे ज्वंगु खः ।
प्रहरी थथे ज्वपिनीगु पाखें १६ तोला १४ लाल लुँ बरामाद याःगु खः ।
०००

छम्ह मिसायात सामूहिक बलात्कार याःगु द्वपनय ्स्वम्ह सित मङ्गलबाः इलाका प्रहरी कार्यालय इटहरीं ज्वंगु दु । उगु घटनाय् संलग्न जुपिं निम्ह बिसें वंगु दु । थथे ज्वपिं सुन्दरहरैचा–१२ या बसचालक विकास कसई, झापा सुरुङ्गा–४ या सुरज थापा व सिरहाका सुजेन्द्र भुजेल जुगु सुनसरीका प्रहरी नायब उपरीक्षक विनोद शर्मा जानकारी ब्यूगु दु ।
यगु घटनाय् संलग्न मोरङ बेलबारीया नितेश घिमिरे व ताके धइम्ह सुमन फरार जुयाच्वंगु जिल्ला प्रहरी कार्यालय नं धाःगु दु । इटहरीइ सोमबाः चान्हयय् न्याम्ह मिजंतय्ग् पुचलं छम्ह मिसायात सामूहिक बलात्कार याःगु प्रहरी न्हयथंगु दु । इटहरीया धरान–विराटनगर सडकखण्डया साथी पेट्रोलपम्प सःतिक लाःगु थासय् मिसायातबलात्कार याःगु प्रहरीया धापू दु ।
धरान पाखें को१ख ४६२६ नंको बसय् तयाः इटहरी हये धुंकाः सडकय् पालंपा बलात्कार याःगु प्रहरीं न्हयथंगु दु । थथे सडक कुनाय् छम्ह मिसायात सामूहिक बलात्कार याःगु विषयलय् स्थानीयवासी प्रहरीयात जानकारी ब्यूगुलिं उमित ज्वनेत ताः लाःगु खँ जिल्ला प्रहरी कार्यालय न्हयथंगु दु ।
०००
नेपालभाषा ख्यलय् प्रगतिशील साहित्य, संस्कृति व विचाःया नितिं छगू इलय् नांजाःगु संस्था गथु पुचः पुनर्ग्ठित यानाः हाकनं न्ह्याकीगु जूगु दु । आः थुकियात छगू फोरमया रूपय् पुनर्ग्ठित यानाः न्ह्याकेगु सहमति पुचःया पुलांम्ह नायः कवीन्द्र शेखर रिमालया पहलय् च्वंगु पुलांपिं दुजः, जःपिनिगु छगू मुना ज्याझ्वलय् जूगु खः । कुलेश्वरय् करूणारत्नया छेँय् जूगु थुगु मुना व सहलह ज्याझ्वलय् भाजुपिं मिलन तुलाधर, केशव स्थापित, बालकृष्ण प्रजापति, किरण सायमि, विजय स्यस्यः, केशरत्न शाक्य, रति जोशीपिसं पुचः पुनर्ग्ठित यानाः न्ह्याकेगु सम्बन्धय् थःथःगु विचाः प्वंकादीगु खः ।
थुगु मुनाय् सहलह जूकथं पुचःयात पुनर्ग्ठित यानाः न्ह्याकेत ज्याभाला पुलांम्ह नायः भाजु कवीन्द्र शेखर रिमालं कयादीगु दु । न्हूगु परिवेशय् पुचःयात न्ह्याकेत थीथी सम्भावित लँपुया बारे नं सहलह जूगु दु,
०००
भारतया मनसुनी वर्षाया कारणं १४० मनू सीगु दु । भारतीय उद्धारकर्मीतय् उगु जानकारी बिउगु दु । बिहार राज्यया राजधानी पटनाया विद्यालय व अस्पतालय् लिसें सतकय् लः जायाच्वंगु दु । भारतीय जलवायु विज्ञान विभागया कथं विहार क्षेत्रय् सन् १९९४ थुखेया थ्व दकलय् अप्वः वा वःगु खः । विभागं मनसुनी वर्षा लिबाःगु व थ्व ताः ई तक च्वनाच्वंगुलिं विहार जलमग्न जूगु खँ धाःगु दु ।
प्यन्हुया दुने जक उत्तर प्रदेशय् १११ म्ह र बिहारय् २८ म्हेसिया ज्यान वंगु खं भारतीय सरकारी अधिकारीतय्सं धाःगु दु । उकथं हे जेल दुने खुसिबाः दुहां वनेवं उत्तर प्रदेशया बल्लिया जिल्लास्थित कारागारय् च्वंपिं ९०० कैदीयात मेथाय् सारे यायेमाःगु दु । भारतीय अधिकारीतय् कथं करिब २० लाख जनसंख्या दुगु पटनाय् मनूतय्त अस्थायी डुंगाया ग्वाहालि उद्धार याःगु खः ।
वाः वयेगु क्रम दीधुंकूसां नं शहरया आपालं धयाथें भूभाग डुबानय् लानाच्वंगु दु । स्कुल व पसःत फुक्कं बन्द जुयाच्वंगु दु । वा वयाः अस्पतालया वार्ड तकं डुबानय् लाःगु खँ भारतीय अधिकारीपिंसं धाःगु दु । स्थानीय वासिन्दायात उद्धारकर्तातय्सं नसा ज्वलं इनेगु ज्या याःगु दु ।
सामान्यतया भारतय् जुननिसें मनसुनी वर्षा जुइगु याः, तर थुगु दँय् लिबाक मनसुनी वर्षा जूगु खँ भारतीय अधिकारपिंसं धाःगु दु । भारतीय जलवायु विज्ञान विभागया कथं थुगु दँय् मनसुनी वर्षा औसत स्वयां अप्वः जूगु दु ।
०००
साउदी अरबया युवराजं इरानयात नियन्त्रणय् मतल धाःसा चिकंया भाः बिचाः हे मयाः कथं थहां वनीगु ख्याच्वः बियादीगु दु । युवराज मोहम्मद बिन सलमानं इरान व साउदी अरब दथुइ युद्ध जुल धाःसा उकिं विश्वस अर्थतन्त्रयात हे तहसनहस यानाबीगु ख्याच्वः नं बियादीगु दु ।निवाः न्ह्यः साउदीया चिकं प्रशोधन केन्द्रय् ड्रोन आक्रमण जुइवं साउदी व इरान दथुइ तनाव ब्वलनाच्वंगु दु ।
साउदी इरानं हे आक्रमण याःगु द्वपं बियाच्वंगु दुसा इरानं धाःसा उकियात अस्वीकार याना वयाच्वंगु दु । अमेरिकी समाचार च्यानल सिबिएसयात अन्तर्वार्ता बिसें युवराज सलमानं धयादीगु दु, ‘यदि इरानयात पनेत विश्वं बल्लाःगु व सुदृढ कारबाही मयात धाःसा झीसं झन् तनाव तच्वया वंगु स्वयेमाली, उकिं विश्वया हितयात जोखिमय् लाकेफु ।’
चिकंया भाः झीसं जीवनय् बिचाः हे मयाःकथं थहां वनीगु ख्याच्वः बिसें वय्कलं धयादीगु दु, ‘तनाव अप्वया वन धाःसा चिकंया आपूर्ति अवरुद्ध जुइ, गुकिं यानाः झीसं जीवनकालय् खं हे मखं कथं व बिचाः हे मयाःकथं चिकंया भाः थहांवनीगु जुइ ।’थ्व झ्वलय् वय्कलं मध्यपूर्वं विश्वय् ३० प्रतिशत चिकंया आपूर्ति जुयाच्वंगु, २० प्रतिशत व्यापार व ४ प्रतिशत कुल गार्हस्थ उत्पादन (जीडीपी) दुगु तथ्यांक नं न्ह्यब्वयादीगु खः ।
‘थ्व स्वंगुलिं रोके जुलकि छु जुइ कल्पना यानादिसँ । अथे धयागु विश्वया अर्थतन्त्र पूवंक हे भताभुंग जुइगु खः, खालि साउदी अरब वा मध्यपूर्वया देय्या जक जुइगु मखु’ वय्कलं धयादीगु दु ।वंगु सेप्टेम्बर १४ य् साउदीया चिकं प्रशोधन केन्द्र झिंच्यागः ड्रोन व न्हय्गः क्रूज क्षेप्यास्त्र कयेकाः आक्रमण जूगु खः । थ्व आक्रमणया जिम्मा हुथि विद्रोहीतय्सं काःगु खः ।
हुथि विद्रोहीतय्त इरानं समर्थन याना वयाच्वंगु दु । हुथिं जिम्मेवारी काःसां अमेरिका व साउदीं धाःसा थ्व आक्रमण इरानं हे याःगु दाबी याना वयाच्वंगु दु । साउदी अरब व अमेरिकां ड्रोन व क्षेप्यास्त्र यमनं वःगु मखसे मेगु हे दिशां वःगु खँ धयाच्वंगु दु । थ्व आक्रमण लिपा हे चिकंया भाः थहां वनेधुंकूगु खः । तर अमेरिकां थःथाय् तयातःगु स्टकयात पितबिसे. तच्वकं भाः थकायेके मबिउगु खः ।

https://sambahak.com/wp-content/uploads/2019/05/gyalmu-jee-ko-badai.png
Loading...