संवाहक नेपालभाषा बुलेटिन ने.सं. ११४० न्हूदँ समारोह समितिया नायः पदय् रमेश महर्जन ल्यल

0
42

कृष्ण प्रजापति
० मोहनी न्यायेकेत स्वनिगलं १२ लख मनूत पिहाँ वन ।
० ब्वाकासा त्याकाः अनिष जुल लिगलिगकोटया जुजु ।
० राजीनामा स्वीकृत जूसां नं महरां सरकारी निवास मत्वःतूनि । व
० सुस्त मनस्थितिया मिसा सिनाच्वंगु अवस्थाय्, बलात्कार याःगु आशंका ।

ने.सं. ११४० न्हूदँ तःजिक हनेगु नितिं नेपाल संवत न्हूदँ राष्ट्रिय समारोह समिति ११४० या नायःया नितिं नांजाःम्ह उद्योगपति व्यवसायी व समाजसेवी लिसें नेपाल मण्डल टेलिभिजनया नायः व तःभुखाय् लिपा सम्पदा संरक्षणया नितिं यलया पिलाछेँ पुनःनिर्माण समितिया नायः रमेश महर्जनयात ल्यःगु दु ।
ने.सं. ११४० समिति दुजः मुँज्यां सर्वसम्मतिं वय्कः महर्जनयात नायः पदय् ल्यःगु खः ।
थौं बिहिवाः सुथय् छगू ज्याझ्वःया दथुइ ने.सं. ११३९ समारोह समितिया नायः सत्यभामा माथेमां व समारोह समितिया सल्लाहाकार समितिया कजि लक्ष्मीदास मानन्धर लिसें दुजःपिन्सं वय्कः महर्जनयात खादा न्ययेकाः लसकुस यानाः न्हूदँ समारोह समिति ११४० या लसताय् जुइगु थीथी ज्याझ्वः सुथां लाक्क न्ह्याकेत भिंतुना देछाःगु खः ।
उगु ज्याझ्वलय् न्हूम्ह नायः महर्जनं नेपाल संवतयात सम्मान यायेगु कथंया ज्याझ्वः यायेगु बचं बियादिसें थुकिया नितिं थःपिन्सं सकल हनेबहःपिनिगु सल्लाह सुझाब कयाः ज्या न्ह्याकेगु विचाः प्वंकादीगु खः ।
अथेहे, थौंया मुँज्यां न्हूदँ तःजिक हनेत थीथी उपसमिति नीस्वंगु दु । न्हूम्ह नायः महर्जनया सभापतित्वय् जूगु उगु मुँज्यां नेपालभाषा मंकाः खलःया नायःयात न्हूदँया लसताय् जुइगु थीथी ज्याझ्वलय् विशिष्ट पाहाँकथं ब्वनेगु निर्णय याःगु दु ।
उगु मुँज्यां न्हूदँया कार्य्विधि कथं आर्थिक समिति, संचार समिति, प्रतिनिधिमण्डल समिति, मञ्च माइक व्यवस्थापन समिति, मिसा समन्वय समिति, ने.सं. न्हिल्याः पिथना समिति, नासः पूजा व प्रसाद ग्रहण ज्याझ्वः समिति, न्हूदँया नारा समिति, क्लब समन्वय समिति, विशिष्ट तुच्चा ज्याझ्वः समिति, सांस्कृतिक महोत्सव समन्वय समिति, स्वयंसेवक समिति, सांस्कृतिक बाजं समन्वय समिति, देय् न्यंकं न्हूदँ समारोह समन्वय समिति नीस्वंगु दु ।
अथेहे, गैर नेवाः प्रतिनिधि, खलः पुचः प्रतिनिधि नं ल्यःगु दु । थ्वहे झ्वलय् १५ म्ह दुजः दूगु व्यवस्थापन समिति नं नीस्वंगु दु । मोहनी धुंकाः व्यवस्थापन समितिया मुँज्या च्वनाः न्हूदँ तःजिक हनेगु नितिं मुँज्या च्वनीगु जूगु दु ।
०००
मोहनी नखः न्यायेकेगु नितिं स्वनिगलं थ्यंमथ्यं आःतकया दुने ज्ञद्द लख मनूत पिहाँ वंगु दु ।
महानगरीय ट्राफिक प्रहरी महाशाखाया कथं थ्वहे असोज ५ गतेनिसें आःतकया दुने ११ लख ९१ हजार ९८८ म्ह मनूत स्वनिगलं पिहाँ वंगु दु । अथेहे, ७ लख ६९ हजार मनूत स्वनिगः दुहाँ वःगु दु ।
महाशाखाया प्रमुख प्रहरी बरिष्ठ उपरीक्षक भीमप्रसाद ढकालं यात्रु दुहाँ वयेगु क्रम धाःसा बुलुहुँ म्हो जुजुं वनाच्वंगु दु धकाः जानकारी ब्यूगु दु । ढकालया कथं थ्व अवधिइ १ लख ३७ हजार सवारी पिहाँ वंगु व १ लख १७ हजार दुहाँ वःगु दु ।
आःतक मोहनीया नितिं १ लख २७ हजार ३०६ म्ह मनूतसें अग्रिम टिकट बुकिङ याःगु प्रमुख ढकालं जानकारी ब्यूगु दु । प्रहरीं थ्वहे असोज न्हापांगु वाःनिसें नखःचखः केन्द्रीत विशेष सुरक्षा योजना कार्यान्वयनय् हःगु दु । वहे योजना कथं स्वनिगलय् ३०० गू सिबें अप्वः थासय् सवारी जाँच जुयाः वयाच्वंगु व द्वःछिसिबें अप्वः ट्राफिक प्रहरी खटेयाःगु दु ।
थीथी क्षेत्रय् मापसे विरुद्ध कडाइया लिसें जाँच जुयाच्वंगु महाशाखाया प्रवक्ता रविराज पौडेलं धाःगु दु । राजधानी दुहाँ वइगु नाका व व्यापारिक केन्द्रय् विशेष निगरानी अप्वयेकूगु प्रहरीं जानकारी ब्यूगु दु ।
नागढुंगा क्षेत्रय् गाडीया जामयात ध्यानय् तयाः प्रहरी निरीक्षकया हे नेतृत्वय् ट्राफिक व्यवस्थापन मिलेयाःगु पौडेलं धाःगु दु ।
पौडेलं नखःचखतय् अप्वः भाडा काइगु व यात्रुपिन्त दुःख बिइपिनिगु निगरानी व कारवाहीया नितिं सादा पोशाकय् प्रहरी परिचालन यानागु जानकारी ब्यूगु दु ।
अभियानया हुनिं महाशाखां ताःहाकःगु दूरीया सवारीइ अनिवार्य निम्ह चालक मतःगु १५ गः व ओभरलोड याःगु ४० गः सवारीयात कारवाही याःगु दु ।
थ्वहे झ्वलय् स्वनिगलय् ट्राफिक नियम उल्लंघन याःगु १४ हजार ८४८ गः सवारी साधनयात कारवाही यानागु महाशाखां जानकारी ब्यूगु दु,
०००
झिक्वःगु लिगलिगे ब्वाकासाया उपाधि पर्वतया अनिष थापां त्याकूगु दु । १३.८ किलोमिटर दूरी ५७ मिनेट ५५ सेकेण्डय् पार यानाः थापां उपाधि त्याकूगु खः ।
ब्वाकासा त्याकेधुंकाः अनिष थापायात बिहिवाः हे श्रीपेच व पगरी पुइकाः लिगलिगे जुजु घोषित याःगु खः । पालुङटार नगरपालिकाया मेयर दिपकबाबु कँडेलं धाःगु दु, ‘श्रीपेच लिसें अनिषयात मोटरय् तयाः नगर परिक्रमा याकेगु जुइ । जुजु दयेकाः थौं चच्छि थ्वहे लिगलिगकोटय् तयेगु जुइ ।’
थापायात ६० हजार तका नगद सिरपाःया लिसें ट्रफी, मेडल व दसिपौ नं लःल्हाःगु खः । दच्छितक लिगलिगकोटया दूत जुइगु कथं ब्याज नं उपलब्ध याकेगु जुइ ।
कासाय् नेपाली सेनाया खगेन्द्र बहादुर भाट ल्यू लाःगु खः । १ घण्टा ८ सेकेण्डय् भाटं निर्र्धारित दूरी पार याःगु खः । वं ३५ हजार तका नगद सिरपाः त्याकूगु खः ।
१ घण्टा १ मिनेट ३४ सेकेण्डय् निर्धा्रित दूरी पार यानाः नेपाली सेनाया हे रामजी बस्नेत लियाँल्यू लाःगु खः । वं नगद सिरपाः २५ हजार तका दां त्याकूगु खः ।
१६६ म्ह सहभागी उगु ब्वाकासा झिगूगु थाय् तकं लाःपिं सहभागीपिन्त सिरपाःया ब्यवस्था याःगु खः ।
पालुङटार नगरपालिका, नेपाली सेना व लिगलिगकोट विकास अभियानया मंकाः ग्वसालय् कासा जूगु खः ।
बिहिवाः सुथय् ८ः३० ता इलय् चेपे व मर्स्याङ्दी खुसिया दोभान चेपेघाटं न्ह्याःगु ब्वाकासा लिगलिगकोट दरबार थ्यंकाः क्वचाःगु खः ।
मिसापाखे बडडााडापाखें लिगलिगकोट तकया ५ किलोमिटर दुरीया खुल्ला ब्वाकासा नं जूगु खः ।
स्थानीय लिगलिगबास िव छात्रछात्रानिसें ४० दँसिबें च्वय् च्वंगु उमेर समुहया नितिं नं ब्यागलं ब्यागलं ब्वाकासा जूगु खः ।
कासाया नितिं नगरपालिकां १३ लख व खेलकुद परिषद व टुरिजम बोर्डया पाखें ५–५ लख तका दा. ग्वाहालि ब्यूगु खः ।
लिगलिगकोटयात पर्यटकीय थाय् कथं विकास यानाः पर्यटन प्रबर्द्धन यायेगु आज्जुया लिसें कासा यानाः वयाच्वंगु लिगलिगकोट विकास अभियानया नायः पूर्णबहादुर रानां धाःगु दु ।
थुगु दँ कासाया सिरपाः रणसिंह दल गणं उपलब्ध याकूगु गणपति उज्ज्वल केसीं जानकारी ब्यूगु दु ।
०००
“सचिवालय बैठकं सांसद पदं नं राजीनामा बिइगु खँ वःगु न्यनागु खः । प्रतिनिधिसभा सदस्यपाखें राजीनामा बिइगु बारे छुं विचाः याःगु मदुनि,
सभामुख पदं राजीनामा ब्यूम्ह बलात्कारी द्वपं लाःम्ह कृष्णबहादुर महरां सरकारी निवास धाःसा त्वःतूगु मदुनि । महरा बालुवाटारय् च्वंगु सरकारी निवासय् हे च्वनाच्वंगु धाःगु दु ।
महराया प्रेस संयोजक डिल्ली मल्लं सरकारी निवासय् हे दूगु जानकारी ब्यूगु दु ।
यौन दुराचारया द्वपं लायेधुंकाः महरां मंगलवाः राजीनामा ब्यूगु खः । सर्त्लिसेंया राजीनामा ब्यूगुलिं विरोध जुइधुंकाः महरां गोप्य रुपं बुधवाः हाकनं मेगु राजीनामा पौ लःल्हाःगु खः ।
उपसभामुख शिवमाया तुम्बाहाम्फें महराया राजीनामा अस्वीकृत यायेधुंकाः महरां भाषा भिंकाः मेगु राजीनामा पौ लःल्हाःगु खः ।
सत्तारुढ दल नेकपाया सचिवालय बैठकं सांसद पदपाखें तकं राजीनामा बिइत ब्यूगु सुझाबयात महरां अटेर याःगु दु । सोमवाः च्वंगु सचिवालय बैठकं सभामुख व सांसद पदं राजीनामा बिइत सुझाब ब्यूगु खः
महराया प्रेस संयोजक मल्लं धाःगु दु, “सचिवालय बैठकं सांसद पदं नं राजीनामा बिइगु खँ वःगु न्यनागु खः । प्रतिनिधिसभा सदस्यपाखें राजीनामा बिइगु बारे छुं विचाः याःगु मदुनि ।
०००
जनकपुरधाम महात्तरीया गौशालाय् सुस्त मनस्थितिया छम्ह मिसाया सीम्ह लुयावःगु दु ।
मियाया सीम्ह गौशाला नगरपालिका–१० थापा त्वालय् च्वंगु मरहा खुसि सिथय् बिहिवाः सुथय् लुयावःगु प्रहरीं जानकारी ब्यूगु दु ।
सीम्ह मिसा गौशाला नगरपालिका–१० निवासी २२ दँया शर्मिला दनुवार खः । सुस्त मनस्थितिया उम्ह मिसा लिपांगु इलय् उखेथुखे चाःहिलेगु यानाच्वंम्ह खः ।
महोत्तरी प्रहरी प्रमुख एसपी श्यामकृष्ण अधिकारीं मिसाया छ्यनय् घाःपाः जुयाच्वंगुलिं सुनां हत्या याःगु खनेदूगु धाःगु दु ।
बलात्कार जू मजूगु बारे धाःसा मेडिकल रिपोर्ट मवःतले तक छुं धायेमफइगु अधिकारीं धाःगु दु ।
अधिकारीं धाःगु दु, “मेडिकल रिपोर्ट वयेधुंकाः बलात्कार जूगु खः कि मखु धैगु सीदइ । घटनाया अनुसन्धान जुयाच्वंगु दु ।
०००
सभामुख कृष्णबहादुर महरायात बलात्कारया द्वपं ब्यूम्ह मिसा रोशनी शाहीयात भाःतम्ह चित्रजंग शाहीं सम्बन्ध विच्छेद याःगु दु । रोशनीया भाःत चित्रजंग शाहीया कथं थः व कलाःया दथुइ सम्बन्ध विच्छेद जूगु जानकारी ब्यूगु दु । इमिसं सम्बन्ध विच्छेदया पतिइ ल्हाःचिं तःगु दु ।
सम्बन्ध विच्छेदया पतिइ धयातःगु दु, “प्रिय जनपिं, आपालं उतारचढावया दथुइ बितेजूगु जिमिगु साथसाथ २८ दँ दिंत फुत । ईया गतिलिसें असहमति असन्तुष्टि वइगु जुयाच्वन । अय्सां लसतां हे ब्यागलं च्वनेगु क्वःछिनागु दु । कानूनी प्रक्रिया निरन्तरताया लिसें ।”
उगु सम्बन्ध विच्छेद पतिइ रोशनी शाही व वया भाःत चित्रजंग शाहीं ल्हाःचिं तयातःगु दु । अथेहे, रोशनी शाहीया सुरक्षाया नितिं नेपाल प्रहरीं प्रहरी सहायक निरीक्षकया कमाण्डय् छगू पुचः परिचालन याःगु दु । संसद सचिवालयया स्वास्थ्य शाखाय् अनमी पदय् ज्या यानाच्वंम्ह रोशनी शाहीं विवादास्पद अभिव्यक्ति बिइधुंकाः प्रहरीं वया सुरक्षाया नितिं प्रहरी पुचः परिचालन याःगु खः । वं डिप्रेसनया वासः नयाच्वंगुलिं न्ह्याग्गु नं जुइफु धासें वया सुरक्षाया नितिं प्रहरी परिचालन याःगु येँ प्रहरी प्रमुख प्रहरी बरिष्ठ उपरीक्षक उत्तमराज सुवेदीं जानकारी ब्यूगु दु ।
छुं ई न्ह्यः विष तकं नःगुलिं शाहीया सुरक्षाया ध्यान बिइमाःगु जूगुलिं प्रहरी पुचः परिचालन यायेमाःगु प्रहरीं दाबी याःगु दु । प्रहरीं शाहीया मेडिकल परीक्षणया निति. तःक्वःमछि आग्रह याःगु जूसां नं वं मेडिकल याःमवनेगु अडान काःगु दु ।
प्रहरीं उगु घटनाबारे छु जूगु खः धकाः अनुसन्धानया नितिं ग्वाहालि यायेत आग्रह याःगु जूसां नं शाहीं गुबलें छु, गुबलें छु धाइगु जूगुलिं समस्या वःगु प्रहरीं जानकारी ब्यूगु दु । शाहीं गुबलें महरा थःगु कोथाय् वःगु धाइगुसा गुबलें वहे मवःगु धाइगु जूगुलिं अनुसन्धानय् लिच्वः लाःगु अनसन्धान अधिकारीपिन्सं धाःगु दु ।
सरकारं पार्टीयात हे कलंक याइगु कथंया हर्कत महरापाखें जू मजूगु विषयस छानविन यायेत प्रहरी प्रधान ज्याकुथियात निर्देशन बिइधुंकाः प्रहरीया पुचलं थीथी कोणपाखें अनुसन्धान न्ह्याकूगु खः ।
प्रहरीं सभामुख महराया गाडी गुबले वंगु खः धैगु सीसीटिभ िफुटेज तकं स्वःगु दु । पीडित धाःम्ह शाहीया कोथाय् वनाः अय्लाःया बोटल, गिलास व महराया त्वःधूगु सुलचं (चश्मा) हःगु खः । कोथाया मुचुल्का कायेत महानगरीय प्रहरी वृत्त बानेश्वर, महानगरीय प्रहरी परिसर येँ व महानगरीय अपराध महाशाखाया अनुसन्धान अधिकृतपिं खेटजूगु खः ।
०००
अरनिको व्यावसायिक प्रर्वद्धन तथा सांस्कृतिक समाजया नायः अजरमान जोशीं बैंक तथा वित्तीय संस्थां यलय् कला व संस्कृति नाप परम्परा जर्गेना यायेगु नितिं विशेष ग्वाहालि यायेमाःगु खँय् बः बियादीगु दु,
प्रयागपोखरीइ च्वंगु एनआईसी बैंकया उलेज्या यानादिसें नायः जोशीं थथे धयादीगु खः ।
बैंक तथा वित्तीय संस्थां सामाजिक दायित्व अन्तर्गत यलय् कला, संस्कृति, भाषा नापं परम्परा जर्गेना ज्या यायेगु नितिं बः बियादीगु खः ।
उगु ज्याझ्वलय् एनआईसी एसिया बैंक प्रदेश ल्याः ३ या उपप्रमुख लक्ष्मण चालिसें बैंकं यलया उद्यमी व्यवसायी, सर्वसाधारण, हस्तकला व्यवसायीया आकांक्षायात ध्यान तयाः ज्या यायेगु नितिं प्रतिबद्धता प्वकादीगु खः ।

https://sambahak.com/wp-content/uploads/2019/05/gyalmu-jee-ko-badai.png
Loading...