संवाहक नेपालभाषा बुलेटिन नेकपां न्हूदँया न्हि खुन्हु बसन्तपुलिइ वनेत कार्यकर्तायात निर्देशन बिल

0
40

कृष्ण प्रजापति
० येँ महानगरया मेयर विद्यासुन्दर शाक्ययात नं डेंगु ज्वर, अस्पताल भर्ना ।
० त्रिभुवन विमानस्थल महाप्रबन्धक पदं राजकुमार क्षेत्रीयात चिइकल ।
० येँया धुम्बाराहीइ १५ किलो नक्कली वहःलिसें लुँ ब्यवसायी ज्वन । व
० स्थलमार्गं नेपाः दुहाँ वइपिं भारतीयपिनिगु सर्वेक्षण याइगु ।
नेपाल कम्युनिष्ट पार्टी (नेकपा)या येँ महानगरया सकल नेता कार्यकर्ता समर्थक सुभेच्छुकपिन्त कार्तिक १२ गते सुथय् ७ बजे नेपाल सम्बत ११४० न्हूदँ क्यनिगु लसताय् येँया बसन्तपुलिं न्ह्याइगु साँस्कृतिक ¥यालीइ ब्वति कायेत निर्देशन ब्यूगु दु ।
म्हिगः जूगु नेकपाया येँ महानगर कमिटीया अगुवा कार्यकर्ता भेलाय् येँ जिल्ला इन्चार्ज साबित्रा भुसालं थुकथं निर्देशन वियादीगु खः ।
नेतृ भुसालं पार्टी केन्द्रीय समितिया ग्वसालय् बिजया दशमि, नेपाल संबत ११४०, स्वन्ति व छठया लसताय् असोज २९ गते भृकुति मण्डपय् जुइगु भिन्तुना कालबिल व चियापानय् नं ब्वति कायेत सकलसित इनाप याःगु दु ।
भेलां नेपाल सम्बत् ११४० न्हूदँ समारोह समिति निस्वनेगु निर्णय नं याःगु दु ।
भेलाय् प्रदेश सभा दुजःपिं बसन्त मानन्धर, नारायण सिलवाल, पार्टी जिल्ला नायः हिमाल शर्मा, महानगर कमिटीया नायः निर्मल देउलां नुगः खँ प्वंकुगु खः ।
०००
देसय् महामारीया रुपं डेंगु ल्वय् ब्वलनाच्वंगु दु । लिपांगु इलय् अतिकं ग्यानापुक खनेदूगु डेंगुया शिकार सर्वसाधारणनिसें मन्त्री तक नं जूगु दु
थ्वहे झ्वलय् आः नकतिनि जक बिहिवाः येँ महानगरपालिकाया मेयर विद्यासुन्दर शाक्ययात नं डेंगुया संक्रमण जूगु दु ।
डेंगुया संक्रमणया लक्षण खनेदयेधुंकाः येँ महानगरपालिकाया मयेयर शाक्य वासः यायेगु नितिं येँया त्रिपुरेश्वरय् च्वंगु ब्लू क्रस अस्पतालय् विहिवाः भर्ना जूगु दु ।
मेयर शाक्ययात ज्वरो खनेदयेधुंकाः अस्पतालय् भर्ना याःगु खः । मेयर शाक्ययात डा. खगेन्द्र बहादुर श्रेष्ठया पुचलं वासः यानाच्वंगु व सामान्य ज्वरो जूसां नं रिपोर्टय् डेंगु पोजेटिभ खनेदूगु श्रोतं जानकारी ब्यूगु दु ।
येँ महानगरपालिकाया मेयर शाक्य विरामी जूसां नं वया सचिवालयं आःतक शाक्यया स्वास्थ्य बारे छुं जानकारी सार्वजनिक याःगु मदुनि ।
०००
नेपाल नागरिक उड्डयन प्राधिकरणं त्रिभुवन अन्तर्रा्ष्ट्रिय विमानस्थलय् महाप्रबन्धक हिलाबुला याःगु दु ।
प्राधिकरणं विमानस्थलया महाप्रबन्धक राजकुमार क्षेत्रीयात बिहिवाः सनिलय् सचिवालय सालाकाःगु खः ।
स्रोतया कथं चिनियाँ राष्ट्रपति सी जिनपिङया आसन्न नेपाल भ्रमणबारे सुचं लीक याःगु द्वपनय् क्षेत्रीयात कारवाही याःगु खः ।
प्राधिकरणया सुचं अधिकृत त्रिलोचन पौडेलं धाःसा नियमित प्रशासनिक प्रक्रिया कथं विमानस्थलया नेतृत्व हिलाबुला जूगु दाबी याःगु दु,
सुरेशमान सिंहयात निमित्त महाप्रबन्धकया जिम्मेवारी ब्यूगु दु ।
०००
येँया लुँहिति (सुन्धारा)या गुलाव ब्राण्डया मिठाई उद्योगं स्वस्थ्य मापदण्डसिबें अप्वः हानिकारक रंग ल्वाकछ्यानास् मिठाई उत्पादन यानाच्वंगु पुष्टि जूगु दु ।
खाद्य प्रविधि व गुण नियन्त्रण विभागं लच्छि ई बिकाः याःगु मिठाई परीक्षणय् रंगया मात्रा अतिकं जूगु विभागया महानिर्देशक डा. मनिता जोशी बैद्यं जानकारी ब्यूगु दु ।
शालिमार हसिपटालिटी एण्ड फुड्स प्रा.लि.पाखें उत्पादन जुइगु गुलाव ब्राण्डया मिक्स मिठाईस रंगया मात्रा ३१० पीपीएम अप्वः खनेदूगु खः । विभागया बरिष्ठ खाद्य अनुसन्धान अधिकृत मोहनकृष्ण महर्जनया कथं मिठाईस २०० पीपीएम सिबें अप्वः रंगया मात्रा दयेमज्यू ।
वंगु भाद्र १५ गते कृषि व पशुपन्छी विकास राज्यमन्त्री लिसें विभागया पुचलं याःगु अनुगमनय् मिठाई भण्डारपाखें नमूना मुंकूगु खः । उगु नमूना संकलनया पूर्ण ल्याब परीक्षणं क्यंगु नतिजाया आधारय् मिठाई पसःयात खाद्य ऐन २०२३ कथं दूषित खाद्य पदार्थ अन्तर्गत कारवाही न्ह्यःने यंकेगु महानिर्देशक वैद्यं जानकारी ब्यूगु दु ।
०००
प्रहरीं १५ किलो नक्कली वहःलिसें छम्हेसित ज्वंगु दु । ज्वंम्ह धादिङ छेँ दुम्ह यलया महालक्ष्मी–११ इमाडोल च्वनाः वयाच्वंम्ह ३३ दँया राज सापकोटा खः ।
महानगरीय प्रहरी वृत्त, महाराजगञ्जया डिएसपी उमेश लम्सालया कथं सक्कली वहः धकाः मिइत्यंगु अवस्थाय् सापकोटायात ज्वनागु खः ।
लम्सालया कथं सापकोटां इमाडोलय् तिलहरी ज्वेलर्स चलेयानाः वयाच्वंगु दु । पीडितया उजुरी लिपा सापकोटायात येँया धुम्बाराहीपाखें ज्वनाः अनुसन्धान न्ह्याकागु डिएसपी लम्सालं धाःगु दु ।
०००
सरकारं स्थालमार्गं नेपाः दुहाँ वइपिं भारतीय नागरिकपिन्त पर्यटकया मान्यता बिइमखु । थुज्वःपिं भारतीयया छुं तथ्यांक नं सरकारयाके मदु । आः धाःसा पर्यटन बोर्डं स्थलमार्ग. वइपिं भारतीय पर्यटकपिनिगु सर्वेक्षण याइगु जूगु दु ।
भन्सार विभागलिसेया समन्वयस बोर्डं थुज्वःगु सर्वेक्षण यायेत्यंगु खः । थुगु हे दँ सर्वेक्षण प्रतिवेदन तयार जुइगु बोर्डं जानकारी ब्यूगु दु ।
सरकारं सन् २०२० यात भ्रमण दँ घोषणा यासें २० लख पर्यटक दुकायेगु आज्जु तःगु दु । भ्रमण दँयात लक्षित यानाः सरकारं पर्यटकीय तथ्यांक यकिन यायेगु ज्यायात थुगु दँ प्राथमिकता ब्यूगु दु ।
आःतक पर्यटन उद्योगय् विदेशं वइपिं पर्यटकया ल्याः बाहेक मेगु आपालं तथ्यांक अनुमानया भरय् जक दयेकीगु यानाच्वंगु खः । खासयानाः होटल, नेपाल राष्ट्र बैंक, अध्यागमन विभागथें जाःगु सरोकारवाला निकायं बिइगु ब्यागलं ब्यागलं तथ्यांकयात संस्कृति, पर्यटन व नागरिक उड्डयन मन्त्रालयं विश्लेषण जक यायेगु ज्या यानाच्वंगु दु । थ्व समस्या चिइकेत पर्यटनया थःगु हे स्याटलाइट अकाउन्ट्स निर्माणय् मन्त्रालयं पलाः न्ह्याकुगु दु ।
पर्यटन बोर्डया कथं चालु आर्थिद दँ दुने टुरिजम स्याटलाइट अकाउन्ट्स तयार यायेत माःगु समन्वयात्मक जया जुइगु जूगु दु । थुकिया नितिं संयुक्त राष्ट्रसंघीय विश्व पर्यटन संगठनं बोर्डयात ग्वाहालि यानाच्वंगु दु ।
केन्द्रीय तथ्यांक विभागं नं बोर्डयात थुगु ज्याय् ग्वाहालि याइगु जूगु दु । मेखे पर्यटकंं याइगु खर्चया यकिन तथ्यांक निर्माणय् तकं बोर्डं नेपाल राष्ट्र बैंकलिसे सहकार्यया योजना दयेकूगु दु ।
टुरिजम स्याटेलाइट एकाउण्ट्स अन्तर्रा्ष्ट्रिय मापदण्ड कथंया १० गू तालिका दइ । वमध्ये थुगु दँ ८ गू तालिकायात माmगु तथ्यांकत तयार यायेगु योजना बोर्डया दु ।
बोर्डं आन्तरिक पर्यटकया तक. सर्वेक्षणया तयारी याःगु दु । चालु आर्थिक दँ दुने आन्तरिक पर्यटक सम्बन्धी तथ्यांक मुंकेगु व विश्लेषण जुइगु जूगु दु ।
लिपांगु इलय् आपालं गन्तव्य आन्तरिक पर्यटकया हुनिं चलायमान जूसां नं आन्तरिक पर्यटकया योगदानबारे तथ्यांक उपलब्ध मदु ।
आन्तरिक पर्यटक सर्वेक्षणया नितिं जक पर्यटन बोर्डं ९० लख तका दां बजेट विनियोजन याःगु दु । थुज्वःगु सर्वेक्षण न्हापांगुखुसि जुइत्यंगु खः ।
०००
नेपाल आयल निगमं मोहनीया इलय् छुं नं कथंया इन्धनया अभाव मजुइगु स्पष्ट याःगु दु । छुं दिं न्ह्यःनिसें स्वनिगः व देशया मू शहरय् इन्धन खपत अप्वःगु धासें निगमं अभावया आशंकाय् असुरक्षित भण्डारण मयायेत उपभोक्तापिन्त आग्रह तकं याःगु दु ।
निगमया प्रमुख कार्यकारी निर्देशक सुरेन्द्र पौड्यालं निगमं थःपिनिगु फुक्क डिपोय् भण्डारण क्षमता कथं इन्धन भण्डारण याःगु धाःगु दु । मोहनीया इलय् नं पाईपलाईनपाखें पेट्रोलियम ढुवानी नियमित जुइगु जूगुलिं अभाव मजुइगु खँ धाःगु दु ।
बुधवाःनिसें २० हजार किलोलिटर चिकं पाईपलाईनं क्वाहाँ वयाच्वंगु पौडेलं जानकारी ब्यूगु दु । अथेहे, पाईपलाईनया हुनिं विस्थापित थ्यंमथ्यं ३०० ट्यांकरय् नं इन्धन जायेकाः स्ट्याण्डबाई तयेगु याःगु दु । थुकिया लिसें डिपोतय्के इन्धन थ्यंकाः लिहाँ वइगु फुक्क ट्यांकरय् पूर्ण रुपं इन्धन जायेकाः तयेगु निगमं जानकारी ब्यूगु दु ।
सामान्य अवस्थाय् न्हिथं ५०० किलोमिटर पेट्रोल खपत जुइगु स्वनिगलय् बुधवास् ३०० किलोलिटर अप्वः माग वःगु निगमं धाःगु दु ।
अथेहे, निगमं थःगु डिपोतय्त नं माःगु इलय् न्ह्याग्गु नं इलय् ज्याकुथि चायेकेगु कथं व्यवस्था मिलेयायेत पौ छ्वःगु दु ।
थुकिया लिसें निगम. मोहनीया नितिं ब्यागलं टिम नीस्वंगु दु । थ्व टिम मोहनी मन्यायेकूसे देय् न्यंकं निगमया ज्याय् खटेजुइ । इमित स्वन्तिइ बिदा बिइ ।
०००
नेपाः राष्ट्रिय पार्टीया ग्वसालय् नेपाःया शिक्षा नीतियात कयाः छगू अन्तक्र्रिया ज्याझ्वः जुल । वंगु असार १२ गते थनया नेपाः ब्यांक्वेटय् उगु अन्तक्र्रिया जूगु खः । ‘नेपाःया सामाजिक व आर्थिक विकासया निंतिं शिक्षाय् हयेमाःगु समसामयिक परिवर्तन’ विषयय् जूगु अन्तक्र्रिया ज्याझ्वलय् पुलांम्ह राजदूत नापं त्रिभुवन विश्वविद्यालयया पुलांम्ह उपकुलपति प्रा. डा. केदारभक्त माथेमां मूवक्ताकथं थःगु न्वचु बियादीगु खः ।
नेपाःया शिक्षा नीतियात कयाः दुवालयेगु झ्वलय् प्रा. डा. माथेमां नेपाःया शिक्षा नीति तसकं नाजुक अवस्थाय् लानाच्वंगु खँ धयादिल ।
नेपाःया सामुदायिक ब्वनेकुथिइ अध्यापन जुयाच्वंगु गुणस्तरहीन शिक्षायात कयाः वय्कलं नर्वे, फिनल्याण्ड थेंज्याःगु सम्पन्न देय्या ९० प्रतिशत स्वयां अप्वः सामुदायिक ब्वनेकुथि दुगु खँ न्ह्यथँसें नेपालय् थिकेक शुल्क कयाः ५० प्रतिशत स्वयां अप्वः निजी ब्वनेकुथि चले यायेवं गुकथं समाजवाद हये फइ धकाः न्ह्यसः तयादिल ।
वय्कलं मू न्वचुइ ब्वनेकुथित दक्वं निजीकरण जुया वनाच्वंगु खँयात कयाः दुःख नं दुःख प्वंकादिल । प्रा. डा. माथेमाया मू न्वचुयात कयाः पुलांम्ह मुख्य सचिव तीर्थमान शाक्य, केशवराज राजभण्डारी, पुलांम्ह गभर्नर कृष्णबहादुर मानन्धर, स्टाफ कलेजया पुलांम्ह कार्यकारी निर्देशक डा. शंकार प्रसाद राजभण्डारी लगायतया व्यक्तित्वपिंसं टिप्पणी यासें थीथी न्ह्यसः नं तयादीगु खः ।
आपालं बुद्धिजीविपिनिगु उपस्थिति दुगु ज्याझ्वलय् जनकवि दुर्गालाल श्रेष्ठ, विष्णु चित्रकार, पवनराज मास्केपिंसं नं न्ह्यसः तयादीगु खः । ज्याझ्वः नेपाः पार्टीया नायः डा. विजयप्रकाश सैंजूया सभापतित्वय् जूगु खः ।
०००
फ्रान्सया राजधानी पेरिसय् च्वंगु प्रहरी मुख्यालय दुने छम्ह मनुखं चक्कु प्रहार यानाः प्यम्ह प्रहरीया हत्या याःगु दु । प्रहरीं आक्रमणकारीयात नं स्यानाब्यूगु दु ।
आक्रमणकारी प्रहरी मुख्यालयया हे कर्मचार िजूगु तर नां सार्वजनिक मयाःगु बीबीसीं धाःगु दु । फ्रान्सया मिडियाया कथं थ्यंमथ्यं २० दँनिसें पेरिस पुलिस फोर्सया प्रशासनिक पदय् ज्या यानाच्वंम्ह आक्रमणकारी थ्यंमथ्यं ४५ दँयाम्ह खः । व आक्रकमणकारी जासुसी विभागय् ज्या यानाच्वंम्ह खः ।
घटनालिपा सेन्ट्रल पेरिसय् च्वंगु इला डी ला क्षेत्रयात प्रहरीं घेराबन्दी याःगु दु ।
आक्रमणलिपा राष्ट्रपति इमानुयल म्याक्रो, प्रधानमन्त्री एडवर्ड फिलिप व गृहमन्त्री क्रिष्टोफर केस्टानेरं घटनास्थलया निरीक्षण याःगु खः ।
फ्रान्सीसी ब्रोडकास्टर बीएफएम टीभीया कथं आक्रमणय् स्वम्ह मिजं व छम्ह मिसा प्रहरीया ज्यान वंगु खः । छम्ह मनू घाःपा नं जूगु दु ।
०००
उत्तर कोरियां न्हूकथंया ब्यालेस्टिक क्षेप्यास्त्र परीक्षण याःगु पुष्टि जूगु दु । परमाणु अस्त्र क्वबिइफुगु उगु क्षेप्यास्त्रया परीक्षण उत्तर कोरियां थ्व दँय् जक याःगु झिंछक्वःगु परीक्षण खः । उगु क्षेप्यास्त्र समुद्र क्वं पनडुब्बीपाखें कयेकीगु क्षेप्यास्त्र खः । पनडुब्बीपाखें कयेके जिउगु क्षेप्यास्त्र दुगु धयागुया अर्थ उत्तर कोरियायाके आः सीमा पिने च्वनाः नं क्षेप्यास्त्र कयेकेगु सामथ्र्य दुगु खः ।
दक्षिण कोरिायया कथं थ्व क्षेप्यास्त्र ४५० किलोमिटर तापाक व ९१० किलोमिटर उचाइ कायेधुंकाः समुद्रय् कुतुंवंगु खः । थुकिया अर्थ उगु क्षेप्यास्त्र अन्तर्रा्ष्ट्रिय अन्तरिक्ष केन्द्र दुगु थाय् स्वयां निदुगं च्वय् तक थ्यंगु खः । उत्तर कोरियां न्हापा नं थ्व स्वयां च्वय् थ्यंक थहांवंगु क्षेप्यास्त्र परीक्षण यायेधुंकूगु दु ।
अमेरिकालिसे हाकनं निसशस्त्रीकरण सम्बन्धी वार्ता सुरु यायेगु धाःगु छुं ई लिपा हे उत्तर कोरियां थ्व परीक्षण याःगु खः । बुधवाः स्थानीय ई कथं सुथय् ७ बजे थ्व परीक्षण याःगु खः । उत्तर कोरियाली समाचार संस्था केसीएनएया कथं बाह्य आक्रमणया जोखिम म्होयायेत दयेकूगु पुक्गुक्सङ–३ क्षेप्यास्त्र आकाशपाखे कयेकाछ्वःगु खः ।
थुकी जःलाखःला देय्यात छुं कथंया लिच्वः मलाःगु खँ नं समाचारय् धयातःगु दु ।पनडुब्बली पाखें कयेकीगु क्षेप्यास्त्र जुल धायेवं समुद्रया न्ह्यागु थासं नं कयेकेफइगु जुइ, अले थुकियात काचाक्क लुइके नं फइमखु । रोयटर्सया कथं सन् १९९० या दशकय् दयेकूगु उत्तर कोरियाया पनडुब्बीत ७ हजार किमि तक यात्रा यायेगु क्षमता दु । तर थ्व पनडुब्बी सः धाःसा तसः पिकाइ ।

https://sambahak.com/wp-content/uploads/2019/05/gyalmu-jee-ko-badai.png
Loading...