संवाहक नेपालभाषा बुलेटिन स्वीगुक्वःगु नेपालभाषा साहित्य तःमुँज्या नःपुखुलि थथुबहिली कन्हय् सुरु

0
68

कृष्ण प्रजापति
० बिराट नेपालभाषा साहित्य सम्मेलन गुथिपाखें न्यय्च्याक्वःगु साहित्य तले
० नेकपां न्हूदँया न्हि खुन्हु बसन्तपुलिइ वनेत कार्यकर्तायात निर्देशन बिल ।
० ख्वपय् पायाः जात्रा लिसें सल जात्रा क्वचाल । मोहनिया मू दिन हुलभीड
० बस दुर्घटनाय् स्वीच्याम्ह मनू घाःपाः ः मेगु दुर्घटनाय् निम्ह सित ।
स्वीगुक्वःगु नेपालभाषा साहित्य तःमुँज्या कन्हय् कउलाथ्व द्वादशिनिसें निन्हु तक ख्वपया नःपुखू लिक्क थथु बहिया बुरांख्यलय् न्ह्याइगु जूगु दु । उगु मुँज्या सछिदँ दुम्ह स्थानीय बयोबृद्ध दाफा भजन गुरु गोपसिं बोय्जुं उलेज्या यानादी । ज्याझ्वलय् वरिष्ठ हाँश्य कलाकार धुं्रबरत्न हाडायात नं हनेगु ज्याझ्वः तयातःगु दु । न्हिनय् १ बजे सुरु जुइगु उगु तःमुँज्याय् नेपालभाषा ख्यःया विशिष्ट ब्यक्तित्वलिसें चिकित्सक, डाक्टर, प्राविधिक, पत्रकार व साहित्यकारतय्सं थःपिनिगु अनुभूति अनुभव न्ह्यब्वयादीगु ज्याझ्वः दु । पीदँ न्ह्यः २०३७ सालय् नेपाल संवत् ११०० स बिराट नेपालभाषा साहित्य सम्मेलन गुथिनापं अलग्ग जुयाः न्ह्याकूगु थुगु संस्थां ‘जनता म्वासा भाषा म्वाइ’ धइगु नारा थ्वयेका वयाच्वंगु दु ।
भाषा साहित्यया दबू स्वया नं छगू राजनीतिक दबू कथं न्ह्यानाच्वंगु थ्व नेपालभाषा साहित्य तःमुँज्या साहित्यकार हरिबहादुर श्रेष्ठ उर्फ कामरेड रोहितया ‘साहित्य राजनीतिया ल्वाभः खः’ धइगु धापूपाखें प्रभावित जूगु दु । सहित्य राजनीतिनापं तापाये फइमखु धइगु विशेष धारणा ज्वनाः पीगुदँ तक ख्वपया थीथी थासय् न्ह्याका वयाच्वंगु थुगु संस्थापाखें संस्कृतिबिद् डाक्टर सत्यमोहन जोशी, प्रोफेसर माणिकलाल श्रेष्ठ नापं नेपाल कम्युनिष्ट पार्टीया संस्थापक निरञ्जनगोविन्द बैद्य लगायतया वरिष्ठ ब्यक्तित्वत हनेधुंकूगु दु ।
थुगुसी तःमुँज्याया दबुलिइ पीदँ न्ह्यःनिसें जनताया डाक्टर कथं ज्या याना वयाच्वनादीम्ह डा. अशोकानन्द मिश्र (दारीवाल डाक्टर)यात हनेगु ज्याझ्वः तयातःगु दु । प्रगतिवादी साहित्यया धार ज्वनाः न्ह्यानाच्वंगु थुगु नेपालभाषा साहित्य तःमुँज्यां जनतां थुइकथं च्वयेमाःगु व जनतां थुइकथं हे ख्यालः, नाटक व हुलाप्याखंत क्यनेमाःगु प्रावधान दुथ्याकाः साहित्य नापं थीथी सांस्कृतिक विधाय् धेंधेंबल्ला कासा यानाः सिरपाः बीगु यानाच्वंगु दु । थ्व झ्वलय् थौं ग्वसाखलःपाखें नःपुखू लागां सुकुन्दा ¥याली जुयाच्वंगु दु ।
०००
बिराट नेपालभाषा साहित्य सम्मेलन गुथिया ग्वसालय् न्यय्च्याक्वःगु बिराट नेपालभाषा साहित्य सम्मेलन कन्हय् न्हिनय् १२ बजे ख्वपया तलेजु बैंक्वेट टुरिजम मार्केट राममन्दिरय् जुइगु जूगु दु । बिराट गुथिया नायः महेन्द्रगोपाल कर्माचार्यया सभापतित्वय् जुइगु उगु ज्याझ्वलय् साहित्यकार भाजु मय्जुपिंत जनपक्षीय रचना साहित्य सहभागी जुइत बिराट गुथिं इनाप याःगु दु ।
जातीय स्वतन्त्रतायात क्वत्यला राष्ट्रया उत्थान जुइ फइमखु धइगु मू नारा थ्वयेकाः न्यय्च्यादँ न्ह्यःनिसें ख्वपया थीथी थासय् मदिकं न्ह्याकाच्वंगु थुगु बिराट सम्मेलन साहित्यकार डा. योगेन्द्र प्रधानं उलेज्या यानादीगु जूगु दु । उगु मुँज्याय् बिराटया ख्वापौ ‘ह्याउँबाला’या नीन्हय्गूगु ल्याः बिमोचन जुइत्यंगु दु । नापं मू वक्ता कथं साहित्यकार डा. पुष्पराज राजकर्णिकारं न्वचू बियादीगु ज्याझ्वः दु । बिराट सम्मेलनया लागिं अन्तिम तयारी जूगु खँ बिराट नेपालभाषा साहित्य सम्मेलन गुथिया दांभरी रामगोपल चौगुठी ग्रेस एफ. एम.यात जानकारी बियादिल ।
०००
ख्वप नगरपालिकाया ब्वनाय् चिनियाँ पत्रकारतय् पुचः ख्वपय् नगरय् थ्यंका वःगु दु । चिनियाँ समाचार समिति सिन्ह्वाया प्रतिनिधिमण्डल म्हिगः मंगलवाः ख्वप थ्यंकाः ख्वप नगरपालिकाया मेयर सुनिल प्रजापतियात नापा लानाः थीथी खँ ब्याकादीगु दु ।
ख्वप नगरपालिकाया कार्यकक्षय् जूगु उगु ज्याझ्वलय् नगर प्रमुख सुनिल प्रजापतिं नेपाः व चीन भिंपिं जःलाखःला जूगु न्ह्यथनादिसें नेपाः सदां चीन नीतिया पक्षय् जुयाच्वंगु कनादिल । चीनया छगू देय् निगू शासन पद्धतियात नेपाःपाखें सतीक स्वयाच्वनागु वय्कलं कनादिल ।
चिनियाँ राष्ट्रपति सी जिपिङं न्ह्यब्वयादीगु एक क्षेत्र एक मार्ग ज्याझ्वः चीनया लागिं जक मखु कि संसारयात हे न्हूगु लँपू क्यनेज्या जूगु न्ह्यथंसें मेयर प्रजापतिं चिनियाँ राष्ट्रपतिया छुं दिं लिपा जुइगु नेपाः भ्रमणं नेपाःमित उत्साहित जूगु खँ नं कनादिल ।
उगु नापा लायेगु ज्याझ्वलय् चिनियाँ पत्रकारतय्सं येँय् थ्यंकाः चीनया ग्वाहालिं निर्माण जुयाच्वंगु बसन्तपुर दरवार लागाय् नं अबलोकन याःगु खः । नेपाल चीन दथुइ कला संस्कृतिया कालबिल अरनिकोया पालाय् झिंप्यंगूगु सदीनिसें न्ह्याना वयाच्वंगु खँय् चिनियाँ पत्रकारतय्सं लसता प्वंकादिल । उगु प्रतिनिधिमण्डलय् पाकिस्तान व हङकङय् ज्या यानाच्वंपिं पत्रकारतय् सहभागीता दुगु खः ।
०००
दँय् दसँ दशमीया न्हि.ख्पप तलेजु द्यःया तुयुम्ह सल ब्वाकेग्ु ज्या चान्हयय् न्हयाका थौं सुथय् क्वचाःगु दु ।
म्हिगःदशमीया बहाी तलेजु द्यःया तलेजुका प्यम्ह मूल नाइके आचाजु, जोशी व राजोपाध्याय पाखें तान्त्रिक विधि कथं कालरात्रि पूजा, टीका साइत पूजा व विसर्जन पूजा क्वःचायेका चाह्यय सल ब्वाकिगु जात्रा जुइगु तलेजुया मूल नाइके नरेन्द्रप्रसाद जोशी कनादिगु दु ।
जात्रा न्हयाये न्हयः फइ बलि बियाः सल जात्रा कथं ख्वप दे चाहिकेगु याइ । थ्वया लिपा पायाः जात्रा याःगु खः ।
सकसियाः मोहनिया चालं म्हिगः दशमी खुन्हू खःसा थौं बुद्धवाः असं त्वालय् च्वंपिनी धाःसा थौ असं चालं याइ ।
असनय् च्वपिनी दशमिकुन्हु सुलं च्वनाः एकादशि कुन्हु तिनि चालं यायेगु याइगु खः ।
थौं हिनय् २ ताः इलय् असं बाकुननीं असंया उरातयगु पायाः पिकायेगु ज्या याइ । पायाः पिकाइबलय् दक्कले क्वकालिम्ह उराय मचायात नायः यायेगु याइ ।
०००
येँ नं सर्लाहीया मलङ्गावा वनाच्वंगु ना ५ ख ५३४४ नम्बरया रात्रिबस भरतपुर महानगरपालिका–१२ आस्था चोकय् वंगु चाह्यय् १२ः३० बजे दुर्घटनाजुयाः ३८ म्ह घाःपा जुगु दु । छम्ह गम्भीर घाःपा जुगु प्रहरी धाःगु दु ।
प्रहरीया कथंबस अनियन्त्रित जुयाः सडक पेटी दुगु सिमाय् ठक्कर नयाः दुर्घटना जुगु् खः। घाःपा जुपिन्त पुरानो मेडिकल कलेज व भरतपुरया नयाँ मेडिकल कलेजय् वासः यकातःगु दु ।
०००
मोहनि नखःया मू दिन हथ सुथय् छेँय् छेँय् धुकूथिया मोहनि क्वकया मोहनि सिन्ह तिइ धुंकाः ख्ब ब्रम्हायणी वनीपिनि हुल जूगु दु । सुथय् न्हापां ब्रम्हायणी कुण्डय् म्वः ल्हुया ब्रम्हायणी पीठय् वनाः द्यःया दर्शन याइगु खः । अथेहे न्हिनय् मोहनिया सिन्ह स्वां काये धुंकाः थः छेँजःपिं नापं हाकनं बाजं थानाः ब्वकं छायाः नं द्यइके वनीगु चलन दु । मोहनिया थ्व मेलाय् म्हिगः येँ, यल, ख्वप, भ्वँत, पन्ति व धौख्यनिसें तकं मनूत म्वः म्वः वयाच्वंगु खः ।
ब्रम्हायणीइ लागाय् न्हिनय् तसकं हुलकुल जुयाच्वंगु खः । नवदुर्गा दुत काःगु दुसा सुथय् पायः जात्रा नापं तुयूम्ह सला पित हःगु दु । म्हिगः न्हिच्छिं द्यःया ख्वाःपाः पीठय् तयाः पूजा याःगु खः । अन तसकं हुल जूगु कारणं वालं चिनाः द्यः गणया प्रतिनिधित च्वनाः स्वां प्रसाद बीगु व पूजा फयेगु ज्या जूगु खः । म्हिगः नवदुर्गा गणयात न्हूम्ह नकीया आदेश कथं अन पूजा व द्यःया ख्वाःपाः लः ल्हाये धुंकाः ख्वाःपातय् मतु तयालिं ख्वाःपाः पुयाः द्यः गण आः धमाधम द्यः पीठं दुत हयेत बाछा लायेकाः ख्वप देसय् हःगु खः । न्हिच्छिं पूजा क्वचायेका चछिया दुने ख्वप लाय्कूया ज्या क्वचायेका थौं सुथय् जक द्यः दुत हःगु खः । वया न्ह्यः तुइम्ह सलचायात लाय्कू लागां पित हयेगु व पायः न्ह्याकेगु ज्या जुल । द्यः जात्रा क्वचायेकेवं वंगु चान्हय् म्हयाय्मचापिंत थः यःम्ह मिजंलिसें पय्न वनेगु छुट बीगु चलन दु ।
०००
बागीश्वरी माविपाखें २०४१ सालंनिसें २०६५ साल तकया एसएलसी पास जूपिं विद्यार्थीतय् मुँज्या म्हिगः न्हिनय् बागीश्वरी मावि च्याम्हसिंहल जुल । उगु मुँज्याय् बागीश्वरी माविया पुलांम्ह प्रधानअध्यापक मोहनप्रसाद प्रजापतिं अन सहभागी सकसितं सगं तिकाः नला स्वां बियाः सम्मान याःगु खः । मुँज्याय् पुलांम्ह प्रधानअध्यापक मोहनप्रसाद प्रजापति नापं वर्तमान बागीश्वरी माविया प्रधानाध्यापक कृष्णप्रसाद धन्छा, सहायक प्रधानअध्यापक ज्ञानसागर प्रजापतिपिसं थः थःगु नुगः खँ कनादीगु खः ।
विद्यार्थीतय् दथुइ जूगु मुँज्याय् थः थःगु अनुभव व अनुभूति नं न्यकेगु ज्या जूगु खः । ज्याझ्वलय् छसिकथं २०४१ सालया विद्यार्थी विश्वबहादुर दुवाल, २०४४ सालया एसएलसी ब्याजया विद्यार्थी कृष्ण प्रजापति, २०४८ सालया एसएलसी ब्याजया विद्यार्थी रुपेश प्रजापति, सत्यराम प्रजापति विकल नपां आपालं विद्यार्थीतय् सहभागीता दुगु खः ।
०००
झीगु ख्वप बचत तथा ऋण सहकारी संस्था लि.या ग्वसालय् अण्डर १६ खुल्ला किपा च्वज्या कासा जुइगु जूगु दु । वइगु कार्तिक ९ गते शनिवाः उगु कासा जुइत्यंगु दु । मोहनि व स्वन्ति नखःया लसताय् उगु कासा जुइगु खँ धाःगु दु । ख्वप लाय्कू सम्वन्धी जुइगु कासाय् ब्वति कायेत म्हतिं १००। तका दां दर्ता शुल्क क्वछिनातःगु दु ।
०००
नेपाल कम्युनिष्ट पार्टी (नेकपा)या येँ महानगरया सकल नेता कार्यकर्ता समर्थक सुभेच्छुकपिन्त कार्तिक १२ गते सुथय् ७ बजे नेपाल सम्बत ११४० न्हूदँ क्यनिगु लसताय् येँया बसन्तपुलिं न्ह्याइगु साँस्कृतिक ¥यालीइ ब्वति कायेत निर्देशन ब्यूगु दु ।
म्हिगः जूगु नेकपाया येँ महानगर कमिटीया अगुवा कार्यकर्ता भेलाय् येँ जिल्ला इन्चार्ज साबित्रा भुसालं थुकथं निर्देशन वियादीगु खः ।
नेतृ भुसालं पार्टी केन्द्रीय समितिया ग्वसालय् बिजया दशमि, नेपाल संबत ११४०, स्वन्ति व छठया लसताय् असोज २९ गते भृकुति मण्डपय् जुइगु भिन्तुना कालबिल व चियापानय् नं ब्वति कायेत सकलसित इनाप याःगु दु ।
भेलां नेपाल सम्बत् ११४० न्हूदँ समारोह समिति निस्वनेगु निर्णय नं याःगु दु ।
भेलाय् प्रदेश सभा दुजःपिं बसन्त मानन्धर, नारायण सिलवाल, पार्टी जिल्ला नायः हिमाल शर्मा, महानगर कमिटीया नायः निर्मल देउलां नुगः खँ प्वंकुगु खः ।
०००
देसय् महामारीया रुपं डेंगु ल्वय् ब्वलनाच्वंगु दु । लिपांगु इलय् अतिकं ग्यानापुक खनेदूगु डेंगुया शिकार सर्वसाधारणनिसें मन्त्री तक नं जूगु दु
थ्वहे झ्वलय् आः नकतिनि जक बिहिवाः येँ महानगरपालिकाया मेयर विद्यासुन्दर शाक्ययात नं डेंगुया संक्रमण जूगु दु ।
डेंगुया संक्रमणया लक्षण खनेदयेधुंकाः येँ महानगरपालिकाया मयेयर शाक्य वासः यायेगु नितिं येँया त्रिपुरेश्वरय् च्वंगु ब्लू क्रस अस्पतालय् विहिवाः भर्ना जूगु दु ।
मेयर शाक्ययात ज्वरो खनेदयेधुंकाः अस्पतालय् भर्ना याःगु खः । मेयर शाक्ययात डा. खगेन्द्र बहादुर श्रेष्ठया पुचलं वासः यानाच्वंगु व सामान्य ज्वरो जूसां नं रिपोर्टय् डेंगु पोजेटिभ खनेदूगु श्रोतं जानकारी ब्यूगु दु ।
येँ महानगरपालिकाया मेयर शाक्य विरामी जूसां नं वया सचिवालयं आःतक शाक्यया स्वास्थ्य बारे छुं जानकारी सार्वजनिक याःगु मदुनि ।
०००
नेपाल नागरिक उड्डयन प्राधिकरणं त्रिभुवन अन्तर्रा्ष्ट्रिय विमानस्थलय् महाप्रबन्धक हिलाबुला याःगु दु ।
प्राधिकरणं विमानस्थलया महाप्रबन्धक राजकुमार क्षेत्रीयात बिहिवाः सनिलय् सचिवालय सालाकाःगु खः ।
स्रोतया कथं चिनियाँ राष्ट्रपति सी जिनपिङया आसन्न नेपाल भ्रमणबारे सुचं लीक याःगु द्वपनय् क्षेत्रीयात कारवाही याःगु खः ।
प्राधिकरणया सुचं अधिकृत त्रिलोचन पौडेलं धाःसा नियमित प्रशासनिक प्रक्रिया कथं विमानस्थलया नेतृत्व हिलाबुला जूगु दाबी याःगु दु,
सुरेशमान सिंहयात निमित्त महाप्रबन्धकया जिम्मेवारी ब्यूगु दु ।

https://sambahak.com/wp-content/uploads/2019/05/gyalmu-jee-ko-badai.png
Loading...