संवाहक नेपालभाषा बुलेटिन स्वीगुक्वःगु नेपालभाषा साहित्य तःमुँज्याय् थीथी ब्यक्तित्व सम्मान

0
80

कृष्ण प्रजापति
० एल के सुन्दर, प्रेम के निडर व ओम धौभडेलयात च्वखँय् सिरपाः बिल ।
० न्यय्च्याक्वःगु बिराट नेपालभाषा साहित्य सम्मेलनय् नीम्हेसिया रचना ।
० नेकपां न्हूदँया न्हि खुन्हु बसन्तपुलिइ वनेत कार्यकर्तायात निर्देशन बिल ।
० बस दुर्घटनाय् स्वीच्याम्ह मनू घाःपाः ः मेगु दुर्घटनाय् झिंप्यम्ह सित ।
स्वीगुक्वःगु नेपालभाषा साहित्य तःमुँज्या नःपुखू थथुबही लिक्कया बुरांख्यलय् जूगु छगू समारोहया दथुइ स्थानीय जेष्ठ नागरिक १०० दँया गोपसिं बोय्जूं उलेज्या यानादिल । ज्याझ्वलय् हांश्य कलाकार धु्रवरत्न हाडा व जनताया डाक्टर अशोकानन्द मिश्रयात मूपाहां नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं दोसल्लां न्ययेकाः हना पौ लःल्हासें दां सहित हनेज्या यानादिल ।
ज्याझ्वलय् मूपाहां रोहितं जनताया सेवा याइपिं भिंपिं मनूतय्त सम्मान यायेगु परम्परां मेपिंत नं जनताया सेवा यायेगु प्रेरणा प्राप्त जुइ धयादिसें गुणया पलेसा गुणं हे पुले फत धाःसा जक मनूत मेपिनिगु सेवा यायेत उत्साहित जुइगु धारणा न्ह्यब्वयादिल । नेमकिपाया सचिव सांसद प्रेम सुवालं चीनया वेल्ट एण्ड रोड परियोजनायात अमेरिका लगायतया पश्चिमा देय्तयस्ं गलत रुपं प्रचार यानाच्वंगु न्ह्यथनादिसें मिलिनियम च्यालेन्ज कर्पोरेशनय् नेपाली कांग्रेसं हस्ताक्षार याःगु गलत जूगु कनादिल ।
ख्वप नगरपालिकाया मेयर सुनिल प्रजापतिं ख्वप क्यान्सर अस्पताल ब्यवस्थापनया जिम्मेवारी कयाः ख्वप नगरपालिकां थःगु कर्तब्य प्रस्तुत याःगु खँ कनादिल । ख्वप नगरपालिकाया उपमेयर रजनी जोशीं नेमकिपाया चुनावी घोषणापत्र कथं हे थःपिसं ख्वप नगरपालिकां आः जनताया सेवा यानाच्वंगु खँ कनादिल । वरिष्ठ अधिवक्ता कृष्णप्रसाद भण्डारीं संघीयताया प्रयोग बांलाक मजूगु कारणं जनतायात संघीयता भार जुयाच्वंगु कनादिल । संस्कृतिविद् तेजेश्वरबाबु ग्वंगं जनता म्वासा भाषा म्वाइ धइगु धारणायात हरेक ब्यक्तितय्सं मनन याये फयेकेमाः धयादिल ।
पुलांम्ह न्यायाधीस गौरीबहादुर कार्कीं इमान्दार, निःस्वार्थी व देय् व जनताया सेवा याइपिं नेतातय् खाँचो जुयाच्वंगु कनादिल । संस्कृतिविद् हरिराम जोशीं धर्म, संस्कृति, भाषा, साहित्य व इतिहास जगेर्ना यायेत नं ब्यवस्था व स्थानीय निकायं पहल यायेमाः धयादिल । सम्मानित ब्यक्तित्व डा. अशोकानन्द मिश्रं थः भक्तपुर अस्पतालय् ज्या यानाबलय्या अनुभव न्यंकादिसें थःगु सम्मानं सेवाया लागिं थप प्रेरणा प्राप्त जूगु खँ कनादिल । ज्याझ्वलय् साहित्यकार मोहन दुवाल, डा. सरोज धिताल, कवयित्री इन्दिरा प्रसाई, नरेन्द्र प्रसाईं, सुलोचना मानन्धर, लक्ष्मण राजवंशी, ख्वपया प्रमुख जिल्ला अधिकारी नारायणप्रसाद भट्ट, इन्जिनियर राजदास श्रेष्ठ, पुलांम्ह जर्नेल प्रेमसिं बस्न्यात नापं सच्छिम्ह वक्तातय्सं थःगु नुगः खँ कनादिल ।
साहित्यकार हरिहर तिमिल्सिना, टेक राना, अभय श्रेष्ठ, प्रेम के. निडर लगायतं थः थःगु चिनाखँ न्यंकादीगु सातिकुन्हुया ज्याझ्वलय् दाफा भजन गुरु गोपसिं बोय्जू, खिं गुरु हरिभक्त सुवाल, बासुरी बाजं गुरु काजीलाल बोय्जू व दाफा भजनया म्ये गुरु लक्ष्मीभक्त ब्याञ्जूपिंत मूपाहां रोहितं दोसल्लां न्ययेकाः हना पौ लःल्हासें हनेज्या यानादीगु खः । निन्हुयंकं जूगु साहित्यिक ज्याझ्वलय् पाठ जूगु रचना मध्ये च्वखँ विधाय् एल के सुन्दर न्हाप, प्रेम के निडर लिउ व ओम धौभडेलयात विशेष सिरपा लःल्हात । अथेहे चिनाखँ विधाय् केशव तमखू न्हाप, भक्तलक्ष्मी भासिमा लिउ व सुनिता गाईसी लिया लिउ लाःगु खःसा पृथ्वीकुमार प्रजापतियात धाःसा हःपाः सिरपाः लःल्हाःगु खः । निन्हुयंकं सांस्कृतिक ब्वज्या नं न्ह्यब्वःगु खः ।
०००
विराट नेपालभाषा साहित्य सम्मेलन गुथि ख्वपया ग्वसालय् तलेजु बैंक्वेट राममन्दिरय् न्यय्च्याक्वःगु विराट नेपालभाषा साहित्य सम्मेलन बिराट गुथिया सल्लाहकार डा. योगेन्द्र प्रधानं उलेज्या यानादिल । ज्याझ्वलय् वय्कलं नेवाःतय् तजिलजि व भाय् बल्लागु खनाः छम्ह गिद्दे दृष्टिं स्वइम्ह व्यक्तिया कारणं थनया कला संस्कृतियात झन् जक स्यंकेगु कथं थनयात हे राजधानी यानाः थनया बैभवयात झन् जक हेवाय् चवाय् यानाच्वंगु कनादिल । वय्कलं यदि उम्ह जुजुं नं थःगु राजधानी थःथाय् हे तयाः थनपाखें सांस्कृतिक चीजयात थःगु राज्यय् दुत यंकूगु खःसा स्वनिगःया बैभवशाली सांस्कृतिक सम्पदा सलंसः दँ न्ह्यः हे गण्डकी प्रदेशय् न्यनीगु खँ कनादिल । भाजु प्रधानं बृहत नेपाःया कला संस्कृतिं प्रभावित जुयाः चीन व तिब्बतं बरु थःपिंथाय् उगु कला संस्कृति प्रचार यानाजूगु तर पश्चिमया सिंजा प्रान्त व पूर्वया लिम्बुवान वा किराँत शासकतय्सं थःपिंथाय् उगु कलायात यंकेगु पलेसा थन हे शासन यायेत स्वयाच्वंगुलिं स्वनिगः दुनेया थीथी अमूल्य कला व संस्कृति पिने वनेगु ज्या लिपा लानाच्वंगु व उकिया कारणं आः उगु कलाय् संकटय् लाःगु कनादिल ।
ज्याझ्वलय् नेपाल प्रज्ञा प्रतिष्ठानया प्राज्ञ लक्ष्मी माली, नेपालभाषा एकेडेमीया दाँभरीं समालोचक डा. पुष्पराज राजकर्णिकार, प्रदेश ३ या सांसद डा. राजेन्द्रमान श्रेष्ठ, मधुरा साय्मि, सिद्धिदास प्रतिष्ठानया नायः नरेन्द्रभक्त हाडा, नेपाल साहित्य मन्दिरया नायः तिलकप्रकाश कायस्थ, नेपालभाषा मंकाः खलः यलया नायः ऋषिप्रसाद श्रेष्ठ, संगीत नाट्यकला प्रज्ञा प्रतिष्ठानया कुलपति रायन लिसेंया साहित्यह्यःमिपिं विशेष पाहाँ कथं झायादीगु खः । ज्याझ्वलय् नेपालभाषा कयाः स्नातकोत्तर तहलय् दक्कलय् अप्वः ल्याः हयादीम्ह राकेश महर्जनयात झिद्वः तकाया विराट सुरत्न सिरपा व एस ई ई जाँचय् नेपालभाषा विषयस दकले अप्वः ल्याः हयादीम्ह जगत सुन्दर ब्वनेकुथिया सुकुन्दा श्रेष्ठयात नेपालभाषा पदक सिरपा लःल्हात ।
सम्मेलनय् गोविन्दमान श्रेष्ठ, लक्ष्मी मालि, स्नेह साय्मि, नरेश अमात्य, अमीरमैंया रन्जित, विमलप्रभा बज्राचार्य, शौरभ शाक्य, बसन्त नकःमि, नारद बज्राचार्य, नरेनमान महर्जन, श्याम आशा , लुमन्ति चित्रकार, समाश्री, श्रीराम श्रेष्ठ, ओमकृष्ण श्रेष्ठलगायत खुदँ तिनि दुम्ह सजगता मानन्धर यानाः नीम्हेसियां थः थःगु साहित्य वाचन यानादीगु खः । लोकसंगीत अन्वेषक रामकृष्ण दुवाल, सत्यनारायण मानन्धर, नेपालभाषा एकेडेमीया प्राज्ञ दुजः वीरप्रसाद भन्सारीपिन्सं म्ये न्ह्यब्वयादीगु खः ।
बिराट गुथिया नायः महेन्द्रगोपाल कर्माचारीया सभापतित्वय् जूगु न्यय्च्याक्वःगु बिराट नेपालभाषा साहित्य सम्मेलन दुजः प्रदीपरत्न शाक्यं न्ह्याकादीगु खः । ज्याझ्वलय् बिराटया न्वकू कृष्णलाल गोजाश्रेष्ठं लसकुस यानादीगु खः । जातीय स्वतन्त्रतायात क्वत्यला राष्ट्रया उत्थान जुइ फइमखु धइगु मू नारा थ्वयेकाः न्यय्च्यादँ न्ह्यःनिसें ख्वपया थीथी थासय् मदिकं न्ह्याकाच्वंगु बिराट नेपालभाषा साहित्य सम्मेलन गुथि छगू ऐतिहासिक संस्था खः । थुगुसीया सम्मेलनय् नेवाः जातीया वर्तमान आवश्यकतायात दुवालाः साहित्यकार डा. पुष्पराज राजकर्णिकारं मू न्वचू बियादीगु खः । बिराटया ख्वाःपौ ‘ह्याउँबाला’ नीन्हय्क्वःगु ब्वः नं उगु हे ज्याझ्वलय् मूपाहां डा. योगेन्द्र प्रधान नापं पाहांपिसं मंकाः कथं लोकार्पण यानादीगु खः ।
०००
येँ महानगरपालिकाया मेयर विद्यासुन्दर शाक्य थौं बिहिवाः ब्लू क्रस अस्पतालं डिस्चार्ज जुयादिगु दु । वयकःयात छुं न्हिं न्हयः निसें डेंगुया संक्रमण जूगुलिं अस्पतालय् भर्ना जुयाः वासः याकाच्वनादिगु खः ।
मेयर शाक्ययात उगु अस्पताय् डां.खगेन्द्र बहादुर श्रेष्ठया पुचलं वासः यानादिगु खःसा वयकः यात छु न्हिं छेँ पूर्णरुपं आराम यायेमाःगु खँ धाःगु दु,
०००
ख्वप नगरपालिकाया ब्वनाय् चिनियाँ पत्रकारतय् पुचः ख्वपय् नगरय् थ्यंका वःगु दु । चिनियाँ समाचार समिति सिन्ह्वाया प्रतिनिधिमण्डल म्हिगः मंगलवाः ख्वप थ्यंकाः ख्वप नगरपालिकाया मेयर सुनिल प्रजापतियात नापा लानाः थीथी खँ ब्याकादीगु दु ।
ख्वप नगरपालिकाया कार्यकक्षय् जूगु उगु ज्याझ्वलय् नगर प्रमुख सुनिल प्रजापतिं नेपाः व चीन भिंपिं जःलाखःला जूगु न्ह्यथनादिसें नेपाः सदां चीन नीतिया पक्षय् जुयाच्वंगु कनादिल । चीनया छगू देय् निगू शासन पद्धतियात नेपाःपाखें सतीक स्वयाच्वनागु वय्कलं कनादिल ।
चिनियाँ राष्ट्रपति सी जिपिङं न्ह्यब्वयादीगु एक क्षेत्र एक मार्ग ज्याझ्वः चीनया लागिं जक मखु कि संसारयात हे न्हूगु लँपू क्यनेज्या जूगु न्ह्यथंसें मेयर प्रजापतिं चिनियाँ राष्ट्रपतिया छुं दिं लिपा जुइगु नेपाः भ्रमणं नेपाःमित उत्साहित जूगु खँ नं कनादिल ।
उगु नापा लायेगु ज्याझ्वलय् चिनियाँ पत्रकारतय्सं येँय् थ्यंकाः चीनया ग्वाहालिं निर्माण जुयाच्वंगु बसन्तपुर दरवार लागाय् नं अबलोकन याःगु खः । नेपाल चीन दथुइ कला संस्कृतिया कालबिल अरनिकोया पालाय् झिंप्यंगूगु सदीनिसें न्ह्याना वयाच्वंगु खँय् चिनियाँ पत्रकारतय्सं लसता प्वंकादिल । उगु प्रतिनिधिमण्डलय् पाकिस्तान व हङकङय् ज्या यानाच्वंपिं पत्रकारतय् सहभागीता दुगु खः ।
०००
दँय् दसँ दशमीया न्हिं ख्पप तलेजु द्यःया तुयुम्ह सल ब्वाकेग्ु ज्या चान्हयय् न्हयाका थौं सुथय् क्वचाःगु दु ।
वंगु दशमीया बहनी तलेजु द्यःया तलेजुका प्यम्ह मूल नाइके आचाजु, जोशी व राजोपाध्याय पाखें तान्त्रिक विधि कथं कालरात्रि पूजा, टीका साइत पूजा व विसर्जन पूजा क्वःचायेका चाह्यय सल ब्वाकिगु जात्रा जुइगु तलेजुया मूल नाइके नरेन्द्रप्रसाद जोशी कनादिगु दु ।
जात्रा न्हयाये न्हयः फइ बलि बियाः सल जात्रा कथं ख्वप दे चाहिकेगु याइ । थ्वया लिपा पायाः जात्रा याःगु खः ।
सकसियाः मोहनिया चालं म्हिगः दशमी खुन्हू खःसा थौं बुद्धवाः असं त्वालय् च्वंपिनी धाःसा थौ असं चालं याइ ।
असनय् च्वपिनी दशमिकुन्हु सुलं च्वनाः एकादशि कुन्हु तिनि चालं यायेगु याइगु खः ।
थौं हिनय् २ ताः इलय् असं बाकुननीं असंया उरातयगु पायाः पिकायेगु ज्या याइ । पायाः पिकाइबलय् दक्कले क्वकालिम्ह उराय मचायात नायः यायेगु याइ ।
०००
येँ नं सर्लाहीया मलङ्गावा वनाच्वंगु ना ५ ख ५३४४ नम्बरया रात्रिबस भरतपुर महानगरपालिका–१२ आस्था चोकय् वंगु चाह्यय् १२ः३० बजे दुर्घटनाजुयाः ३८ म्ह घाःपा जुगु दु । छम्ह गम्भीर घाःपा जुगु प्रहरी धाःगु दु ।
प्रहरीया कथं बस अनियन्त्रित जुयाः सडक पेटी दुगु सिमाय् ठक्कर नयाः दुर्घटना जुगु् खः। घाःपा जुपिन्त पुरानो मेडिकल कलेज व भरतपुरया नयाँ मेडिकल कलेजय् वासः यकातःगु दु ।
०००
इन्द्रावती गाउँपालिका–१० य् थौं सुथय जुगु बस दुर्घटना १४ म्ह सिइग दु । भोटसिपा पाखें येँ वयाच्वंगु हेलम्बु यातायातया बा २ ख २७१५ नम्बरया बस दुर्घटना जुगु खः।
घटनास्थलय् न्हययम्ह सिइगु खःसा धुलिखेल अस्पतालमा वासः यायेगु झ्वलय् सिइगु खः। मेपिं बसय् यात्रा यानावपिं ४५ म्ह वासः यानाच्वंगु दु ।
सिन्धुपाल्चोकया इन्द्रावती गाउँपालिका–१० भोटसिपाया बडहरे चोकय् गाडी दुर्घटना जुगु खः । इन्द्रावती गाउँपालिका–९ हेलम्बु यातायातको बा २ ख २७१५ नम्बरया बस सडकं २०० मिटर क्वय् कुतु वंगु खँ प्रहरीं धाःगु दु । क्षतिया थप विवरण अझ वये ल्यं दनिगु जानकारी नं प्रहरी ब्यूगु दु,
०००
बागीश्वरी माविपाखें २०४१ सालंनिसें २०६५ साल तकया एसएलसी पास जूपिं विद्यार्थीतय् मुँज्या म्हिगः न्हिनय् बागीश्वरी मावि च्याम्हसिंहल जुल । उगु मुँज्याय् बागीश्वरी माविया पुलांम्ह प्रधानअध्यापक मोहनप्रसाद प्रजापतिं अन सहभागी सकसितं सगं तिकाः नला स्वां बियाः सम्मान याःगु खः । मुँज्याय् पुलांम्ह प्रधानअध्यापक मोहनप्रसाद प्रजापति नापं वर्तमान बागीश्वरी माविया प्रधानाध्यापक कृष्णप्रसाद धन्छा, सहायक प्रधानअध्यापक ज्ञानसागर प्रजापतिपिसं थः थःगु नुगः खँ कनादीगु खः ।
विद्यार्थीतय् दथुइ जूगु मुँज्याय् थः थःगु अनुभव व अनुभूति नं न्यकेगु ज्या जूगु खः । ज्याझ्वलय् छसिकथं २०४१ सालया विद्यार्थी विश्वबहादुर दुवाल, २०४४ सालया एसएलसी ब्याजया विद्यार्थी कृष्ण प्रजापति, २०४८ सालया एसएलसी ब्याजया विद्यार्थी रुपेश प्रजापति, सत्यराम प्रजापति विकल नपां आपालं विद्यार्थीतय् सहभागीता दुगु खः ।

https://sambahak.com/wp-content/uploads/2019/05/gyalmu-jee-ko-badai.png
Loading...