संवाहक नेपालभाषा बुलेटिन लिम्पियाधुरा लिपुलेक मामलायात कयाः ख्वपय् नेमकिपाया बिरोध प्रदर्शन

0
90

कृष्ण प्रजापति
०नेपालभाषा स्टार म्युजिक अवार्ड २०१९ या सहभागीतय्त दसिपौ लल्हात
० अमेरिकाय् ड्रगमाफियाया हमलापाखें खुम्हमचा, स्वम्हमिसालिसें गुम्हसित
० २०७२ बैशाख १२ लिपा ४ रेक्टरस्केल च्वय् ५३५ क्वः लिभुखाय् ब्वल ।
० झक्कु सुवेदी नर्भिक अस्पतालय्, हर्ट अट्याक्ट !
भारतीय सरकारं तयार याःगु न्हूगु राजनीतिक नक्साय् नेपाःया भूभाग लिम्पियाधुरा लागा कालापानी व लिपुलेक नापं भारतय् लाकातःगु विषययात कयाः नेपाल मजदुर किसान पार्टीं बुधवाः सुथय् बिरोध प्रदर्शन यात । कमलविनायकं सुथय् ७ बजे सुरु जूगु उगु जुलुस ख्वप नगर चाःहिलाः सूर्यविनायक चोकय् थ्यंकाः सभाय् हिउगु खः । उगु सभाय् नेपाली भूमि फिर्ता बियेमाःगु नापं कालापानी लागां भारतीय सेना चिकेत माग याःगु दु । भारतीय बिस्तारवादी शक्तिपाखें थथे न्हूगु नक्साय् लिम्पियाधुरा थःपिनि लागाय् तयेवं म्हिगः हे पार्टी सचिव प्रेम सुवालं छगू वक्तब्य पिथनाः उकिया आधिकारिक रुपं बिरोध याःगु खः ।
नेमकिपां पिथंगु प्रेस वक्तब्यय् भारतीय गृह मन्त्रालयं तयार याःगु उगु भारतया न्हूगु राजनीतिक नक्साय् लिम्पियाधुरा (कालापानी व लिपुलेक) नं भारतय् तःगु सम्वन्धय् कार्तिक १८ गते थीथी पत्रपत्रिकाय्् पिथंगु समाचार प्रति नेपाल मजदुर किसान पार्टीया गम्भीर ध्यानाकर्षण जूगु न्ह्यथंसें उकिया वास्तविकता बारे तुरुन्त आधिकारिक धारणा पित बिइत नेमकिपा सरकारयात जोडदार माग यानाच्वना धयातःगु दु । वक्तब्य् नेपाली भूमिइ भारतीय हस्तक्षेप याःगु खँयात मोदीया फासीवादी चरित्र धकाः नं टिप्पणी यानातःगु दु । अथेहे संसदया राज्य ब्यवस्था समितिइ नं भारतीय नक्साया बिरोध जूगु खः । उगु समाचार पिदनेवं थीथी थासय् बिरोध सुरु जूगु दु ।
०००
नेपालभाषा स्टार म्युजिक अवार्ड २०१९ या लागिं नोमिनेशन जूपिं ख्वीगू म्युजिक भिडियोया सहभागीतय्त म्हिगः यलय् छगू ज्याझ्वःया दथुइ दसि पौ लःल्हात । संसार क्रियसनया ग्वसालय् थ्वहे वइगु कार्तिक ३० गते शनिवाः उगु म्यूजिक भिडियोया मू क्रियसन जुइगु जूगु दु । यलय् जुइगु उगु ज्याझ्वलय् आः तकं नेपालभाषा लागाय् दक्कलय् तःधंगु राशीया नगद सिरपाः लःल्हाइगु जूगु दु ।
संसार क्रियसनं बिउगु जानकारी कथं न्हय्म्ह दुजः दुगु निर्णायक समिति दयेकाः आः दुथ्याःगु म्युजिक भिडियोया मूल्यांकन जुयाच्वंगु दु । नेवाः पह वइगु कथं तयार यायेगु कथं प्रतिश्पर्धाय् दुथ्याःगु म्युजिक भिडियो मध्ये सहभागीतय्त म्हसीकेगुगु न्हापांगु अवार्ड ब्वज्या व पत्रकार सम्मेलन दथुइ ग्वसाखलः संसार क्रियशनं थःपिनिगु लोगो नं सार्वजनिक याःगु खः । ज्याझ्वलय् सहभागी पत्रकार व उत्कृष्ट कलाकारतय्त नं खादा क्वखायेक सम्मान याःगु खः । ज्याझ्वलय् यल महानगरपालिकाया २१ वडा अध्यक्ष नेवाः कलाकारतय्गु म्हसीका पिब्वयेगु कथं जूगु थुगु ज्याझ्वः झन् झन् बांलाना वनेमाः धकाः भिन्तुना देछानादिल ।
संसार क्रियसनया अध्यक्ष कलाकार स्वतन्त्र संसार महर्जनया सभापतित्वय् जूगु ज्याझ्वलय् वरिष्ठ सिने पत्रकार विजयरत्न असंबरें उगु म्युजिक भिडियो अवार्डया थीथी पक्षयात कुलादीगु खः । नापं समाजसेवी उज्वलकृष्ण श्रेष्ठं कलाकारतय्गु मेहनतयात च्वछादिल । नेपालभाषा म्युजिक भिडियो लागाय् दक्कलय् तःधंगु व तःगु मछिं विधायात दुथ्याकाः थुगु अवार्ड जुइत्यंगु खः । अनलाइन भोटिङ व एसएमएस भोटिङया आधारय् म्युजिक भिडियोतय्गु मूल्यांकन जुइगु खँ पत्रकार सम्मेलनय् जानकारी बियादीगु खः । ज्याझ्वः २१ वडाया ग्वाहालिं जुइत्यंगु दु ।
०००
उत्तरी मेक्सिकोय् संदिग्घ ड्रग माफियाया हमालय् खुम्ह मचा व स्वम्ह मिसालिसें कम्ती न. गुम्ह अमेरिकी नागरिक सीगु दु ।
उपिं पीडित लुहबारन छेँजःया दुजः खmसा उपिं यक्व दशक न्ह्यःनिसें मेक्सिकोय् च्वंगु मोरमान समुदायपाखें ब्यागलं च्वनाच्वंगु खः । जानकारीकथै उपिं पीडित गाडीया कार्केडय् वनाच्वंगु खः ।
मेक्सिकोया सुरक्षामन्त्रीं उपिं मनूत गलत निशानाय् लाःगु अनुमान नं याःगु दु ।
उत्तर मेक्सिकोया सिनोरा राज्यय् निम्ह ड्रग माफियादथुइ ल्वापू जूगु खः । छम्ह ‘खुआरेज’ ड्रग माफियालिसे स्वाःगु ला लिनिआ व सिनालोआ गिरोहया दुजः ‘लोस चापोस’ दथुइ ल्वापू जूगु स्थितिइ खः ।
न्यूयोर्क टाइम्सलिसेया खँल्हाबल्हाय् स्याःपिं निम्ह मचाया उमेर छदँसिबें नं क्वय् जूगु थःथितिपिन्सं धाःगु दु ।
अमेरिकाया राष्ट्रपति डोनाल्ड ट्रम्पं ट्वीटय् धाःगु दु, “मेक्सिकों अमेरिकाया ग्वाहालिं ड्रग माफियायात कारवाही याःसा धर्तीपाखें इमिगु नामोनिशान हे मदइगु ई वःगु दु । जिमिसं बस् न्हूम्ह राष्ट्रपतिया छगू कल फोन पियाच्वनागु दु ।”
श्रृंखलाबद्ध पोष्टय् ट्रम्पं धाःगु दु, “अमेरिका ड्रग माफियाया हिंसाया समस्यालिसे ल्वायेगुलि ग्वाहालि यायेत तयार दु । थ्व याकनं हे यायेमाःगु ज्या खः ।”
अथेहे, मेक्सिकोया राष्ट्रपति आन्द्रेस म्यानुएल लोपेज ओब्राडोरं मेक्सिकों हमलाया नितिं जिम्मेवार अपराधीयात गिरफ्तार यायेगु नितिं स्वतन्त्र तरिकां पलाः ल्ह्वनेगु धाःगु दु ।
०००
२०७२ साल बैशाख १२ गते गोरखा भुखाय् लिपा नेपालय् ४ रेक्टरस्केलं च्वय् ५३५ क्वः लिभुखाय् ब्वयेधुंकूगु दु । राष्ट्रिय भूकम्पमापन व अनुसन्धान केन्द्रया कथं २०७२ बैशाख १२ गते ब्वःगु भुखाय् लिपा ४ रेक्टरस्केलं च्वय् उगु लिभुखाय् ब्वःगु खः ।
केन्द्रया भूकम्पविद् मुकुन्द भट्टराई नं नेपाः भुखाय्या उच्च जोखिमया क्षेत्र जूगु धाःगु दु । भट्टराई नं धाःगु दु, “तःभुखाय् लिपा इलय् ब्यलय् ब्वइगु लिभुखाचं यानाः तःधंगु भुखाय् ब्वइगु जोखिम म्हो जुइ ।” ४ रेक्टरस्केलसिबें क्वय् ५० हजार क्वःसिबें अप्वः लिभुखाय् ब्वयेधुंकूगु भट्टराई नं धाःगु दु ।
गोरखाया बारपाक केन्द्रविन्दु जुयाः ब्वःगु उगु भुखाचं स्वनिगः, काभ्रेपलाञ्चोक, सिन्धुपाल्चोक, धादिङ, गोरखा, नुवाकोट, रसुवा, दोलखा, मकवानपुर, चितवन, रामेछाप, ओखलढुङ्गा लिसें थीथी जिल्लाय् क्षति याःगु खः ।
भुखाचं आपालं ऐतिहासिक व भौतिक संरचनाय् क्षति जूगुलिसें च्याद्वलं मल्याक्क मनूत सीगु खः ।
लिपांग इलय् मुलुकया पश्चिमी क्षेत्रय् ४ रेक्टरस्केलसिबें च्वय् भुखाय् ब्वःगु केन्द्रं जानकारी ब्यूगु दु ।
०००
वीरगञ्जय् छम्ह अपहरणकारीयात प्रहरीं गोली क्ययेकाः गिरफ्तार याःगु दु । लिसें अपहरणय् लाःम्ह छम्ह मचाया नं सकुशल उद्दार याःगु दु ।
घटना वंगु बहनी वीरगञ्जया हे सिर्सिया खाल्वा त्वालय् जूगु खः । घटनाय् प्रहरीं पर्साया पोखरीया नगरपालिका ८ वडाय् च्वनीम्ह राजकुमार दासयात गोली क्ययेकाः गिरफ्तार याःगु खः । गोली दासया जवगु तुतिइ लाःगु खः ।
छगू राउण्ड गोली क्ययेकाः अपहरणकारी गिरफ्तार याःगु पुष्टि पर्सा प्रहरी प्रमुख सोमेन्द्र सिंह राठोरं याःगु दु । बुधवाः जिल्ला प्रहरी ज्याकुथि पर्साय् पत्रकार सम्मेलन यानाः विस्तृत रुपं जानकारी बिइगु एसपी राठोरं धाःगु दु ।
काभ्रेपाखं छम्ह मचा अपहरण यानाः अभिभावकयाके फिरौती कयाच्वंगु इलय् थ्यंकूपिं प्रहरीयात पेस्तोलं ताकेयाये धुंकाः प्रहरीं दासयात गोली क्ययेकाः नियन्त्रणय् काःगु एसपी राठोरं धाःगु दु । लिसें मचाया सकुशल उद्दार याःगु एसपी राठोरं धाःगु दु ।
गोली कयाः घाःपाः जूम्ह अपहरणकारीया नारायणी अस्पतालय् वासः जुयाच्वंगु दु ।
०००
चिनियाँ मोबाइल अपरेटरपिन्सं थः ग्राहकपिनिगु नितिं फाइभ जी सेवा न्ह्याकूगु दु । थ्वलिसें चीनं प्रविधिइ मेगु छलाङ पार याःगु दु ।
चीनया सरकारी मोबाइल अपरेटर चाइना मोबाइल, चाइना युनिकम व चाइना टेलिकमं बिहिवाः थःगु फाइभ जी फ्लान घोषणा याःगु खः ।
थ्व घोषणा थुज्वःगु इलय् जूगु दु, उगु ई चीन व अमेरिका दथुइ ब्यापार व प्रविधिइ युद्ध जुयाच्वंगु स्थिति खः ।
फाइभ जी न्यागूगु जेनेरेशनया मोबाइल नेटवर्क खः । थुकी इन्टरनेटया गति अतिकं तीब्र जुइगु दाबी याःगु दु ।
चीनं सिबें न्हापा दक्षिण कोरिया, अमेरिका व बेलायतं थुगु हे दँ थःगु देसय् फाइभ जी सेवा न्ह्याकूगु दु ।
बुखाय् जानकारी ब्यूगु कथं थ्व सेवा आः चीनया ५० गू शहरय् न्ह्याःगु दु, गुकिी बेइजिङ व सांघाई नं दु । सरकारी बुखँ ऐजेन्सी सिह्न्वाया कथं फाइभ जी डेटा प्लानया मू १२८ निसें ५९९ युआन तक दु ।
०००
लिपांगु ईया लोकंह्वाःगु सोसल मिडिया प्लाटफर्म टिकटकया मातृ कम्पनी बाइट डान्सं थःगु न्हापांगु स्मार्टफोन सार्वजनिक याःगु दु ।
बाइट डान्सं स्मार्टिसान जियांगुओ प्रो ३ नांया स्मार्टफोन लञ्च याःगु खः ।
कम्पनीं स्मार्टफोन बजारय् हयेगु बुखँ दँया सुरुइ हे सार्वजनिक जूगु खः । लिपांगु इलय् थःगु फ्लागसीप डिभाइसया रुपं बाइट डान्सं स्मार्टिसान जियांगुओ प्रो ३ स्मार्टफोन सार्वजनिक याःगु खः ।
थ्व स्मार्टफोनय् यक्व उत्कृष्ट फिचरत दूगु धाःगु दु । गुकी शक्तिशाली प्रोसेसरया लिसें ल्यूनेया ब्वय् प्यंगः मू क्यामेरा दु ।
चीनय् लञ्च याःगु थुगु फोनया सुरुवाती मू २,८९९ युआन क्वःछिनातःगु दु । गुगु थ्यंमथ्यं ४५ हजार तका दां तू ।
थुगु स्मार्ट फोनय् १०८० गुणा २३४० पिक्सेल रिजोलुसन दूगु ६.३९ इञ्चया फूल एजडी प्लस एमोलेड डिस्प्ले दु ।
थुकी १२ जिबीतकया यार्म दुसा २५६ जिबीया स्टोरेज दु । लिसें फोनय् स्नापड्रागन ८५५ प्लस प्रोसेसर दु ।
थुगु फोनं स्मार्टिसन अपरेटिङ सिस्टमय् ज्या याइ । तर थ्व एन्ड्रोइडया गुगु संस्करणय् आधारित जू धैगु बारे प्रष्ट यानातःगु मदु । २५६ जिबी इन्टर्नल स्टोरेज दुगु फोनय् फास्ट डाटा ट्रान्सफरया नितिं यूएफएस ३.० सपोर्ट उपलब्ध यानातःगु दु ।
फोटोग्राफीया नितिं टिकटकया थुगु फोन उत्कृष्ट जूगु दु । थुकी क्वाड रियर क्यामरा सेटअप दु । अर्थात् ल्यूनेया ब्वय् दुगु क्यामेरा प्यंगः दु । गुगु क्यामेरामध्ये ४८ मेगापिक्सेलया प्राइमरी सेन्सरलिसें १३ मेगापिक्सेलया वाइड एंगल क्यामेरा, ८ मेगापिक्सेलया टेलिफोटो लेन्स व ५ मेगापिक्सेलया म्याक्रो क्यामरा नं दु । थुगु फोनया प्राइमरी क्यामराय् सोनी आईएमएक्स ५८६ सेन्सर दु । अथेहे, थ्व स्मार्टफोनय् २० मेगापिक्सेलया सेल्फी क्यामरा नं दु ।
४ हजार मिलिएम्पिएर आवर क्षमताया ब्याट्री दूगु थुगु फोनया ब्याट्रीं क्विक चार्ज फोर प्लस चार्जिङ्ग सपोर्ट याइ ।
कम्पनीं थ्व फोनया थीथी स्वंगू कथं लञ्च याःगु दु । गुकी न्हापांगु ८ जिबी यार्म व १२८ जिबी स्टोरेजवाला दु, गुकिया मू २८९९ युआन तयातःगु दु । अथेहे, ८ जिबी यार्म व २५६ जिबी स्टोरेजवाला फोनया मु ३१९९ युआन तयातःगु दुसा १२ जिबी यार्म व २५६ जिबी स्टोरेजवाला फोनया मू ३५९९ युआन तयातःगु दु । त्वयुगु व हाकूगु रंगय् उपलब्ध थुगु फोन आः चिनियाँ बजाःया नितिं जक लञ्च याःगु खः ।
०००
नेकपा नेता झक्कुप्रसाद सुवेदीयात हर्ट अट्याक्ट जूगु दु । हर्ट अट्याक्ट जुइधुंकाः येँया नर्भिक अस्पतालय् सुवेदीया वासः जूगु खः ।
येँपाखें सोमवाः दाङ यात्राय् वंम्ह सुवेदीयात थानकोट मथ्यवं हे हर्ट अट्याक्ट जूगु सुवेदीया जिलाजं मधु उप्रेतीं जानकारी ब्यूगु दु ।
दाङ वनेगु झ्वलय् थानकोट मथ्यवं सुवेदी गाडी दुने हे बेहोस जूगु खः । वधुंकाः गाडी येँय् हयाः नर्भिक अस्पताल हयाः वासः याःगु उप्रेतीं धाःगु दु ।
उप्रेतीया कथं, चिकित्सकपिन्सं झक्कु सुवेदीयात मेजर हर्ट अट्याक्ट जूगु जानकारी ब्यूगु दु । चिकित्सकपिन्सं धाःकथं सुवेदीया नुगःया जवपाखेया भल्भ पूर्ण रुपं बन्द जूगु खः । सुवेदीया सोमवाः न्हिनय् हे अपरेशसन ताःलाःगु खः । आः सुवेदीयात आईसीयूस तया वासः यानाच्वंगु दु ।
छेँजःया दुजःपिनिगु कथं सुवेदीयाके थ्वसिबें न्ह्यः नुगःचुया समस्या खनेमदु, बरु स्वला न्ह्यः पत्थरीया अप्रेशन याःगु खः ।
नेकपा नायः प्रचण्डं मंगलवाः सुथय् नर्भिक अस्पताल थ्यंकाः सुवेदीया स्वास्थ्य अवस्थाबारे जानकारी काःगु खः ।
विप्लव पुचलय् आवद्ध काय् सन्तोष सुवेदी प्रयासयात नापलायेत झक्कु सुवेदी दाङ वनेत्यंगु खः । प्रहरीं छुं दिं न्ह्यः दाङय् न्ह्याकूगु अप्रेशनया झ्वलय् सन्तोष गिरफ्तारीइ लाःगु खः ।
नेकपा नेता भक्कु सुवेदी रोल्पायाम्ह खः । जनयुद्धय् प्रत्यक्ष्ँ सहभागी सुवेदी संविधानसभाया न्हापांगु निर्वाचनय् एमालेया तत्कालीन महासचिव माधवकुमार नेपालयात बुकाः चर्चाय् वःम्ह खः ।
प्रतिनिधिसभा दुजः निर्वाचनय् धाःसा व कांग्रेस नेता भीमसेनदास प्रधानलिसे बूगु खः । सुवेदी आः नेकपाया केन्द्रीय सम्पर्क मंचया सहसंयोजक खः ।
०००
नेपाल संवतया प्रणेता शखधर साख्वायात राट्रिय बिभूति घोषणा याःगु लुमन्ति कछलाथ्व दशमी कार्तिक २१ गते तःजिक शखधर दिवस हनेत्यंगु दु ।
नेपाल संवत न्हूदँ राट्रिय समारोह समिति उगु न्हिं येँया १५ वडाय् लाःगु लखुतिर्थय् सुथय् ७ ताः इलय् थथे शखधर दिवस न्यायेकेत्यंगु खः ।
०००
ए डिभिजन क्लब फ्रेन्ड्स सवम्ह ब्राजिलियन खेलाडी अनुबन्धित याःगु दु ।
शहिद स्मारक ए डिभिजन लिग फुटबलया नितिं रेन्ड्सले भित्र्यायो तीन ब्राजिलियन खेलाडीब्राजिलका वाग्नर डी कर्मा, फिलिप डी सुजा व साउलो डी अक्युनो च्वंगु दु । स्वम्ह खेलाडी क्लबय् आबद्ध जुइत मंगलबाः नेपाः वःगु खः ।
खेलाडीतय्त फ्रेन्ड्स क्लबया पदाधिकारी त्रिभुवन विमानस्थलय् लसकुस यामःगु खः । क्लबया कार्यसमिति दुजः राजराम तण्डुकारले ‘ए’ डिभिजन लिगया नितिं क्लबय् दुकाःयागु जानकारी ब्यूगु दु । प्रशिक्षक मार्कस छवाः लिपा नेपाः वयेत्यंगु दु ।

https://sambahak.com/wp-content/uploads/2019/05/gyalmu-jee-ko-badai.png
Loading...