संवाहक नेपालभाषा बुलेटिन किड क्वीनया कासामिपिन्सं थौं पशुपतिइ लाखमत च्याकल

0
82

कृष्ण प्रजापति
० नेपालभाषा स्टार म्यूजिक भिडियो अवार्डया टप १० सार्वजनिक याइगु ।
० दिपक बज्राचार्यया लोकंह्वाःगु म्ये ‘मनमगन…’ साग कासाय् न्ह्यब्वइगु,
० निम्ह नेपाःमि मिसाया उद्धार, भारतया कोठीइ थ्यंकेमलात । व
० पोखराया ३३ वडाया वडाध्यक्षया गाडीइ बम मुइकल ।
नेप्लिज फेसन होमं ग्वसाः ग्वयाः वयाच्वंगु ‘कीड क्वीन नेपाल’ १७ क्वःगु संस्करणया कासामिपिन्सं शनिवाः येँया पशुपतिनाथया देगलय् विशेष पूआआजा यासें लाखमत च्याकूगु खः ।
वहे कासाया २२ म्ह धेंधेंबल्लाय् दुथ्याःपिं मिसामचातसें प्रशिक्षणया छगू ब्वया रुपं उगु विशेष पूजाआजालिसें लाखमत च्याकूगु खः ।
७ दँनिसें १३ दँतकया मचापिनिगु व्यक्तित्व विकासया लिसें प्रतिभा प्रस्फुटन यायेगु आज्जुं नेप्लिज फेसन होमं लिपांगु १७ दँनिसें थुगु कासा ग्वसाः ग्वयाः वयाच्वंगु खः ।
उगु कासां आःया पुस्ताया मचातय्त नेपाली कला, संस्कृति, धर्म, भाषा, समाजसेवा आदि विषयस स्यनेत तःधंगु ग्वाहालि याइगु ग्वसाः खलःया नायः हेमा मानन्धरं धयादीगु दु ।
छनोट जूपिं प्रतिस्पर्धी मचात ताःई न्ह्यःनिसें प्रशिक्षणय् व्यस्त जुयाच्वंगु दु । वइगु शनिवाः उपिं मचातसें ट्यालेन्ट शोपाखें थःथःगु प्रतिभा न्ह्यब्वइगु जानकारी नं ग्वसाः खलकं ब्यूगु दु ।
किड क्वनी नेपाल २०१९ या निर्णायक कासा धाःसा मंसीर २१ ग्ते शनिवाः जमलय् च्वंगु राष्ट्रिय नाचघरय् याइगु जूगु दु ।
कासाय् इलिजा गुरुङ, अभिश्री तिवारी, निमिशा श्रेष्ठ, सुप्रिया तामाङ, अदिष्ठा भण्डारी, रेशु पन्त, शान्भी बानियाँ, स्नेहा रजक, निशा बिक, रितिका थापा, मनीषा राई, सुकृति श्रेष्ठ, सुप्रिया विष्ट, यूनिका ढकाल, प्रकृना प्रधानाङ्ग, प्राची किबानायो, स्नेहा प्रजापति, कृष्मा ढुंगाना, श्रेया लजेजु, रोशिका लामा, आयुषा वाइवा व सरु खोटेजुं धेंधेंबल्ला यानाच्वंगु दु,
प्रतिस्पर्धी मचातय्त कोरियोग्राफरपिं प्रजिता श्रेष्ठ, सुजिना श्रेष्ठ व संगीता महर्जनपिन्सं थीथी विधाय् प्रशिक्षण बियाच्वंगु कासाया कजिपिं नितु डंगोल व पल्सा महर्जनं जानकारी बियादीगु दु ।
०००
नेपालभाषा संगीत व संकिपा ख्यलय् छगू बिस्कं पहःया दकले न्हापांगु अवार्ड नेपालभाषा स्टार म्यूजिक भिडियो अवार्डस् २०१९ ज्याझ्वःया टप १० सार्वजनिक यासें टप १० य् लाःपिं कलाकःमिपिन्त दसिपौ लःल्हायेगु ज्याझ्वः मंसीर १३ गते शुक्रवाः यलया बागडोल रिङ्गरोडय् च्वंगु बेखाज् पार्टी भेन्युइ सुथसिया ११ः३० ता इलय् जुइगु जूगु दु ।
संसार क्रियसन्सया ग्वसालय् जुइगु उगु अवार्डस् ज्याझ्वःया कजि कलकार सुरेन्द्र महर्जन तापाख्यःमि खः ।
ग्वसाः खलः संसार क्रियसन्सया प्रमुख स्वतन्त्र संसार महर्जनं बियादीगु जानकारी कथं मंसीर १३ गतेया टप १० दसिपौ लःल्हायेगु ज्याझ्वलय् टप १० य् लायेत ताःलाःपिं सकल कलाकःमिपिन्त मेडललिसें दसिपौ लःल्हाइगु जूगु दु ।
उगु म्यूजिक भिडियो अवार्डया नितिं मुक्कं ५७ पु नेपालभाषाया म्यूजिक भिडियो दुथ्याःगु खःसा उकी ल्ययाः १० पु म्युजिक भिडियो टप टेन कथं ल्यइगु जूगु दु ।
अथेहे, थुगु हे नेपालभाषा स्टार म्यूजिक भिडियो अवार्ड प्रचारप्रसारया नितिं मंसीर २८ गते शनिवाः सुथसिया ११ ता ईनिसें आर्टिष्ट फुटबल म्याच खोकनाया ज्ञानोदय बालबाटिका इन्टरनेशनल स्कूलया कासा ख्यलय् जुइगु जूगु दु । मंसीर १३ गते शुक्रवाःया ज्याझ्वलय् उगु फुटवल कासाया टिम ल्ययेगु ज्या नं जुइगु जानकारी ग्वसाः खलः संसार क्रियसन्सया प्रमुख स्वतन्त्र संसार महर्जनं नेवाः अनलाईनन्यूजयात बियादीगु दुसा वय्कलं १० टेनय् लायेत ताःलाःगु म्यूजिक भिडियो व कलाकःमिपिनिगु भोटिङ्ग कोड नं सार्वजनिक यायेगु जानकारी बियादीगु दु ।
मंसीर १३ गते शुक्रवाःया टप १० नोमिनेशनय् लाःपिन्त दसिपौ लःल्हायेगु ज्याझ्वलय् सकल कलाकारपिन्त अनिवार्य रुपं यलया बेखाज् पार्टी भेन्युइ उपस्थितिया नितिं ग्वसाः खलः संसार क्रियसन्सं इनाप याःगु दु
नेपालभाषा संगीत व संकिपा ख्यलय् आपालं विधाय् अवार्ड लःल्हाइगु ज्याझ्वः कथं थुगु नेपालभाषा स्टार म्यूजिक भिडियो अवार्डस् जुइत ताःलाःगु दु । थ्व धैगु नेपालभाषा संगीत व संकिपा ख्यःया ऐतिहासिक पलाः खः ।
०००
मनमगन…, नांजाःम्ह गायक दिपक बज्राचार्यया थुगु म्ये आः नेपालय् जुइगु दक्षिण एसियाली खेलकुद (साग)य् न्ह्यब्वइगु जूगु दु ।
सशस्त्र प्रहरी बलया मू ज्याकु हलचोकया फुटबल मैदानय् छवाःन्ह्यःनिसें साग कासा ज्याझ्वलय् मनमगन म्येलिसें हुलाप्याखं क्यनेगु नितिं रिहर्सल जुयाच्वंगु दु ।
गायक दिपक बज्राचार्यया अतिकं लोकंह्वाःगु थुगु म्ये खस नेपाली भाषाया नापनापं नेपालभाषालिसें थीथी भासं पिदंगु दु ।
गायक दिपक बज्राचार्यं साग कासाया ऐतिहासिक क्षणय् नेपाःया संस्कृतिलिसें सांस्कृतिक बाजा न्ह्यब्वयेगु नितिं रिहर्सल जुयाच्वंगु जानकारी बियादीगु दु । वय्कलं म्येलिसें नेपाःया संस्कृति, नेपाःया बाजापाखें जीवन्त गुकथं बिइगु धैगु खँय् च्यूताः कयाः थुपालय् थःपिन्सं हालेत्यनागु म्येया ल्यूल्यू सांस्कृतिक महत्वं जाःगु प्याखं जीवन्त यानातयेगु नितिं गुथि खलःया दाजुकिजापिं नाप गाक्व सहलह ब्याकाः च्वनागु लिसें धुन्याँ, पुलुकिसियात थःगु म्येय् जीवन्त रुपं न्ह्यब्वयेगु नितिं सहलह जुइधुंकूगु जानकारी नं बियादीगु दु ।
०००
माइती नेपालया भारत शाखां भारतया राजधानी न्हूदिल्लीया कोठीइ मिइत यंकाच्वंगु अवस्थाय् निम्ह नेपाली मिसाया उद्धार याःगु दु ।
बांलाःगु ज्याय् जागिर नकेगु धासें काभ्रेपलाञ्चोक व झापा छेँ दुपिं निम्ह मिसाया उद्धार याःगु खः ।
माइती नेपालया भारतय् च्वंगु ट्रष्टया सीता अधिकारीया कथं येँ, वीरगञ्ज जुयाः भारतया न्हूदिल्ली थ्यंकूपिं निम्ह मिसाया नेपाली दूतावास भारतीय प्रहरी व समाजसेवी बालकृष्ण पाण्डेया ग्वाहालिं उद्धार याःगु खः । इमित थौं सोमवाः नेपाः लिछ्वयाः हयेगु तयारी दूगु सीता अधिकारीं धाःगु दु ।
०००
पोखरा महानगरपालिका वडा ल्याः ३३ या वडाध्यक्ष शिवप्रसाद आचार्यया गाडीइ बम मुइकूगु दु । छेँय् हे पार्किङ्ग यानाः तयातःगु गाडीइ थौं सोमवाः सथय् २ः३० ता इलय् बम मूगु वडाध्यक्ष आचार्यं जानकारी ब्यूगु दु ।
वडा ल्याः ३३ या वडाध्यक्ष जूसां नं आचार्य वडा ल्याः १७ य् च्वंगु छेँय् च्वनाः वयाच्वंगु खः । वं गाडीइ बम हे मूगु धाःगु दु ।
बम मुयास् गाडीया न्ह्यःनेया ब्व क्षति जूगु दु । बम सुनां मुइकूगु व छाय् मुइकूगु धैगु सीमदुनि । प्रहरीं घटनाया अनुसन्धान यानाच्वंगु धाःगु दु,
०००
१३ क्वःगु दक्षिण एसियाली खेलकुद (साग)या मिजं फुटबलय् भारतं मम्हितीगु सम्भावना अप्वःगु दु । कासामिया नां दताृ मयाकूगुलिं भारतं मम्हितीगु चर्चा जुयाच्वंगु दु ।
थ्वसिबें न्ह्यः हे मिजं व मिसा फुटबलया नितिं ड्र जुइधुंकूगु दु व कासा धलः नं सार्वजनिक जुइधुंकूगु दु । तर आःतक भारतं कासामि दर्ता मयाकेधुंकाः म्हितीगु सम्भावना कमजोर जूगु खः ।
थुकिया बारे नेपाल ओलम्पिक कमिटीया नायः जीवनराम श्रेष्ठं भारतं कासामिपिनिगु नां दर्ता मयाकूगु तर मम्हितेगु बारे अन्तिम निर्णय मजुनिगु जानकारी बियादीगु दु ।
संघीय सांसद तकं जुयादीम्ह भाजु श्रेष्ठं धयादी, “भारतया नां धाःसा इन्ट्री जूगु मदु मिजं फुटबलय् तर इमिगु डिआरएम मिटिङ कन्हय् मंगलवाः दु । आः व मिटिङपाखें भारतया फुटबल टिम वइ मवइगु सीदइ । उगु मिटिङ क्वचायेधुंकाः गुगु कासाय् च्वनेगु व मच्वनेगु लिपांगु निर्णय जुइ ।”
मिजं फुटबलय् पाकिस्तान बाहेक ६ गू राष्ट्रं म्हितीगु पक्का जुइधुंकाः अखिल नेपाल फुटबल संघ (एन्फां) कासा धलः सार्वजनिक यायेधुंकूगु दु । गुकी भारत, श्रीलंकाः व माल्दिभ्स समूह बी दुने दु ।
२०१६ स भारतय् हे जूगु १२ क्वःगु साय् नेपालं भारतयात फाइनलय् बुकाः मिजं फुटबलया स्वर्ण त्याकूगु खः ।
इदि भारतं सहभागिता मक्यनीगु जूसा मिजं फुटबलय् न्यागू राष्ट्र जक जुइ व रायण्ड रोविन लिगया आधारय् कासा जुइ । उकिया नितिं हाकनं ड्र यायेमालीगु जुइ ।
मिसपाखे धाःसा नेपाल, भारत, माल्दिभ्स व श्रीलंका यानाः प्यंगू राष्ट्र जक सहभागी जूगु दु ।
०००
अखिल नेपाल फुटबल संघ (एन्फा)या कारवाहीलय् लाःपिं स्वम्ह आदिवासी जनजातिया राष्ट्रिय कासामि फुटबलरपिं विमल घर्ती मगर, अञ्जन विष्ट व दिनेश राजवंशीपिन्सं घरेलु भूमि थःगु नेपालय् हे जुइगु १३ क्वःगु दक्षिण एसियाली खेलकुद (साग)य् सहभागी जुइमदइगु जूगु दु ।
विश्वकप छनोट अन्तर्गत कुवेतविरुद्धया कासा न्ह्यः नाइट क्लबय् लुइकेधुंकाः एन्फां स्वम्ह कासामिविरुद्ध अनुशासनया कारवाही याःगु दु । थुकियात एन्फां निरन्तरता बिइधुंकाः निगू दशकलिपा नेपालय् जुइत्यंगु साग खेलकुदय् सहभागी जुइगुपाखें स्वम्ह कासामि वञ्चित जुइत्यंगु खः ।
साग टिमया प्रशिक्षक बालगोपाल महर्जनं स्वम्ह कासामिं म्हिती मखुगु व न्हूपिं कासामि टिमय् तयेगु धाःगु दु ।
प्रशिक्षक महर्जनया कथं, कारवाहीलय् लाःपिं स्वम्ह कासामिया थासय् राजेश परियार, प्रेजन गुरुङ व राजीव लोप्चनयात दुथ्याकूगु दु ।
मंसीर ३ गते नेपालं कुवेतविरुद्ध म्हितीगु पक्का जुइधुंकूगु खः । भुटानय् जूगु उगु कासाया नितिं कातिृक ३० गते एन्फां बिदाइ कार्यक्रम याःगु खः ।
यलया कुपुण्डोलय् च्वंगु छगू होटलय् कासामिपिन्त तःगु खः । तर कार्तिक २९ गते हे प्यम्ह कासामि होटलपाखें पिहाँ वल । वधुंकाः इपिं होटलय् लिहाँ मवःसे छक्वलं कार्तिक ३० गते सुथय् एन्फा कम्प्लेक्स थ्यंकूगु खः । उगु चा प्यम्ह कासामि नाइट क्लबय् वनाः मादक पदार्थ सेवन याःगु सीधुंकाः एन्फां इमित कारवाही कथं भुटानय् म्हितःवनीगु टिमपाखें आउट याःगु खः ।
थुकिया बारे एन्फाया अनुशासन कमिटीं अनुसन्धान यानाच्वंगु दु । कमिटीया रिपोर्ट पिहाँ मवःसां नं कारवाहीलय् लाःपिं कासामिपिन्त साग टिमपाखें आउट याःगु खः । इमित गुलि ईतक कारवाही जुइ धैगु विषयस एन्फां आःतक छुं धाःगु मदुनि ।
०००
सरकार विरोधी प्रदर्शनया कारणं छुं ई न्ह्यव निसें अशान्त जुयाच्वंगु हंगकंगय् म्हिगः जूगु स्थानीय चुनावय् कीर्तिमानी ल्याखं मनूतय्सं मतदान याःगु दु । म्हिगः न्हिनय् तकया दुने हे सन् २०१५ य् जूगु चुनावय् पूवंक मतदान याःपिनि ल्याः स्वयां अप्वःसिनं मतदान याःगु खः।
थ्व चुनावयात सरकारया विरोधय् प्रदर्शन यानाच्वंपिं प्रजातन्त्रवादी पक्षधर व हंगकंगया प्रमुख कार्यकारी क्यारी लामया परीक्षण कथं कयातःगु दु ।
प्रजातन्त्र पक्षधरतय्सं न्याला न्ह्यवनिसें सरकार विरोधी आन्दोलन जुयाच्वंगु हंगकंगय् जुयाच्वंगु थ्व चुनावं चीन सरकारयात नं सन्देश बीगु आशा यानातःगु दु । हिंसा जुल धाःसा मतदान केन्द्र बन्द यानाबीफुगु आशंका आइतवाः मतदान याःपिं झ्वःलिं च्वनाः शान्तपूर्वक मतदान यानाच्वंगु दु ।
हंगकंगया जिल्ला परिषदया थ्व चुनावपाखें प्यसलं मल्याक पार्षदत ल्यइ । प्रजातन्त्रवादी अभियानकर्तातय्सं थ्व चुनाव लिपा परिषद् थःपिनि प्रतिनिधित्व अप्व थ्यनीगु आशा यानाच्वंगु दु । जिल्ला परिषद्या पार्षदतय्सं हंगकंगया प्रमुख कार्यकारी ल्ययेगुलिइ विशेष प्रभाव तयेगु यानाच्वंगु दु । जिल्ला परिषद्य् आःतक बेइजिङया समर्थकतय्सं हे बहुमत सिट त्याकेगु यानाच्वंगु दु ।
आः जुयाच्वंगु प्रदर्शन लिपा धाःसा प्रजातन्त्रवादीतय् ल्याः अप्वइगु आशा यानातःगु खः । खय्त ला जिल्ला परिषद्या पार्षदतय्के तसकं म्हो जक शक्ति दइ । अथे जूगुलिं थ्व चुनाव स्थानीय तवरं जुइ । तर चुनावयात सरकारी विरोधी प्रदर्शनकारी व सरकार समर्थकतय् परीक्षणया रुपय् न्ह्यःने वयाच्वंगुलिं थ्व पालय् थुकियात विशेष रुपं स्वयाच्वंगु दु ।

Loading...