संवाहक नेपालभाषा बुलेटिन वइगु बैशाखय् लानिपुखूया पुनःनिर्माण ज्या क्वचाइगु

0
92

कृष्ण प्रजापति
० नेकपाया सभा जुइगु थाय् लिक्क बम बिस्फोट ।
० निगू बैंकपाखें २० लख लिकाल, खुम्ह गिरफ्तार ः किर्ते ल्हाःचिंया कमाल,
० थौंनिसें खँ ल्हात प्रधानमन्त्री केपी शर्मा ओलीं, स्वास्थ्यय् निरन्तर सुधार,
० थौंनिसें साग भलिबल : ‘उत्साह व दबाब निगुलिं दु’ –कप्तान अरुणा ।
वइगु बैशाखतकया दुने क्वचाइगु कथं ऐतिहासिक लानिपुखूया पुनःनिर्माण जुयाच्वंगु दु । आः पुखुली हाकूगु चाः तयेगु, पःखाः निर्माण यायेगु व दथु भागय् च्वंगु बालगोपालेश्वर देगः पुनःनिर्माण ज्या जुयाच्वंगु दु ।
२०७२ बैशाख १२ गते ब्वःगु भुखाचं क्षतिग्रस्त लानिपुखू व बालगोपालेश्वर देगः पुनःनिर्माणया ज्याय् स्वदँ लिपा लायेधुंकाः लिपांगु ई राष्ट्रिय पुनःनिर्माण प्राधिकरणं भाला काःगु खः । निर्धा्रित इलय् हे क्वचाइगु कथ ज्यां गति काःगु प्राधिकरणया दाबी दु ।
पुसया लिपांगु वाःतकया दुने पःखाः ग्वयेगु व पुखुली हाकूगु चा तयेगु ज्यां पूर्णता काइगु प्राधिकरणया सम्पदाविज्ञ राजुमान मानन्धरं धाःगु दु ।
अथेहे, बालगोपालेश्वर देगःया पुनःनिर्माणया ज्या तकं तीव्र रुपं जुयाच्वंगु दु । देगःया निर्माणया ज्या आः २० प्रतिशत क्वचाःगु दु । आः देगलय् सिंया ज्या जुयाच्वंगु दु । पःखाःया ज्या ८५ प्रतिशत क्वचाःगु दुसा पुखुया ज्या ४० प्रतिशत क्वचाःगु मानन्धरं जानकारी ब्यूगु दु ।
मानन्धरं धाःगु दु, “बैशाखतकया दुने नागरिकं पुलांगु हे शैलीया लानिपुखू स्वयेखनी । ल्यं दूगु ज्या नं नियमित रुपं जुयाच्वंगु दु ।”
सुरुआतय् येँ महानगरपालिकां पुनःनिर्मा०ा याये धाःसां नं गुबलें पुरातत्व विभागलिसे सा गुबले येँ महानगरपालिकाय् हे आन्तरिक कलह जुयाः स्वदँतक ज्या लिपा लाःगु खः ।
मन्त्रिपरिषया वंगु माघ १४ गतेया बैठकं लानिपुखू व बालगोपालेश्वर देगःलिसें उगु क्षेत्रय् च्वंगु पुरातात्विक संरचनाया पुनःनिर्माण प्राधिकरणयात भाला बिइधुंकाः निर्माणया ज्या न्ह्यःने वंगु खः ।
०००
कास्कीरपोखराया न्हूबजारय् बम बिस्फोट जूगु दु । कास्की–२ या उपचुनावया नितिं सत्तारुढ नेपाल कम्युनिष्ट पार्टी (नेकपा)या चुनावीसभा जुयाच्वंगु इलय् लिक्क बम बिस्फोट जूगु खः ।
प्रदर्शनी केन्द्रय् जुयाच्वंगु सभाय् नेकपा संसदीय दलया नेता सुवासचन्द्र नेम्वाङं सम्बोधन यानाच्वंगु इलय् लिक्क च्वंगु बसपार्कय् बिस्फोट जूगु खः ।
बम बिस्फोटपाखें छुं क्षति धाःसा जूगु मदु । थ्वसिबें न्ह्यः उम्मेदवारी दर्ताया दिं कार्तिक २१ गते नं कास्कीया जिल्ला निर्वाचन ज्याकुथि लिक्क अज्ञात पुचलं बम बिस्फोट याःगु खः ।
०००
गिरोहयाके बैंकया चेकनिसें एटीएमतक, बैंकया कर्मचारी नं अनुसन्धानया घेराय्
थीथी बैंकय् खाता चायेकाः मेपिनिगु ल्हाःचिं नक्कल यानाः लखौं तका दां लिकाःपिं खुम्ह (६ म्ह) मनूया गिरोहयात प्रहरीं गिरफ्तार याःगु दु ।
गिरफ्तारीइ लाःपिं काभ्रेपलाञ्चोक पाँचखाल छेँ जुयाः आः येँया कालिमातिइ च्वनाच्वंम्ह १९ दँया सुभाष श्रेष्ठ, १९ दँया कुमार तामाङ, १८ दँया मनिष घिमिरे व २१ दँया अञ्जन बराल खः ।
अथेहे, बाग्लुङ लगकोट नगरपालिका छेँ जुयाः येँया बुद्धनगरय् च्वनाच्वंम्ह २५ दँया सुमन पौडेल व सिन्धुपाल्चोक जिल्लाया ज्यामिरे छेँ जुयाः आः येँया सुविधानगर च्वनाच्वंम्ह ३० दँया गोविन्द घिमिरे नं गिरफ्तारीइ लाःगु दु ।
जनता बैंकया खातावाल गोपालमान राजबाहकं थःगु खातापाखें तःक्वःमछि यानाः १९ लख ९९ हजार तका दां लिकाःगु मोबाइलय् मेसेज वयेधुंकाः वंगु मंसीर ८ गते प्रहरीयात उजुरी ब्यूगु खः । महानगरीय प्रहरी परिसरया प्रवक्ता होविन्द्र बोगटीया कथं सुचं वयेखतं परिसरया विशेष पुचलं सम्बन्धित बैंकया उच्च पदाधिकारीलिसे सहलह ब्याकूगु खः ।
पीडितया खाता जाँच याःबलय् पीडितयात ब्यूगु चेकबुक पिनेपाखें न्हूगु चेकबुक लिकायेत सफल जुयाः न्हूगु चेकपाखें दां लिकायेत सपफल जूगु सीदूगु दु ।
खोजतलास यायेगु झ्वलय् मंसीर ९ गते पीडितया खातापाखें दां लिकायेत हाकनं चेक ज्वनाः छम्ह मनू जनता बैंक न्यूरोड शाखाय् थ्यंकूगु सुचं प्रहरीं काःगु खः । प्रहरीं उम्ह व्यक्तियात गिरफ्तार यानाः न्यनेकने यायेधुंकाः मेपिं न्याम्ह (५ म्ह) गिरफ्तारीइ लाःगु खः ।
इमिगुपाखें १८ लख ५० हजार नगद, थीथी बैंकया तस्धंगु परिणामय् चेकबुक, खाता चायेकेत तयार दूगु फर्मत, एनआइसी बैंकया भिषा कार्ड, थीथी मनूतय्गु नागरिकताया फोटोकपी, छ्यलाबुला जूगु ल्हाःचिया नक्कलत बरामद याःगु दु ।
खुम्हेसित बैंकिङ्ग कसूरसम्बन्धी मुद्दाय् पाटन उच्च अदालतपाखें म्याद थप यानाः अनुसन्धान जुयाच्वंगु दु ।
अभियुक्तपिन्सं बैंकय् खाता दुपिं थीथी व्यक्तिपिनिगु चेकय् दूगु ल्हाःचिं खुयाः वहे व्यक्तिया नामय् चेक तंगु निवेदन बियास् न्हूगु चेक लिकायेगु व ल्हाःचिं मिलेयानाः लखौं तका दां लिकायेत ताःलाःगु प्रहरीं धाःगु दु ।
आपालं मनूतय्गु नामय् दूगु खाताया सलंसः थान सक्कली चेकतकं कायेत ताःलाःगु खनेदूगु लिसें उपिं खातावालपिनिगु सक्कली भिषा कार्डतकं दयेकाः छ्यलाबुलाय् हःगु खनेदूगुलिं सम्बन्धित बैंकया कर्मचारीपिनिगु मिलेमतो व लापरवाही तकं खनेदूगु जुयाः थुगु विषयस प्रहरीं अनुसन्धान यानाच्वंगु जानकारी ब्यूगु दु ।
इमिसं आःतक गुलि दां लिकायेत ताःलात धैगु सम्बन्धय् सम्बन्धित बैंकतलिसे थुइकेगु व अनुसन्धान यायेगु ज्या जुयाच्वंगु प्रवक्ता बोगटीं जानकारी ब्यूगु दु ।
०००
प्रधानमन्त्री केपी शर्मा ओलीया स्वास्थ्यय् निरन्तर सुधार वःगु वासः यायेगुलि दुथ्याःपिं चिकित्सकपिन्सं जानकारी ब्यूगु दु ।
त्रिभुवन विश्वविद्यालय टिचिङ्ग अस्पतालय् च्वंगु मनमोहन कार्डियोथेरासिक भास्कुलर व ट्रान्सप्लान्ट सेन्टरया कार्यकारी निर्देशक डा. उत्तम श्रेष्ठं प्रधानमन्त्री ओलीं थौं बुधवाः सुथनिसें सामान्य खँ ल्हाःगु जानकारी ब्यूगु दु । अस्पतालं थौं बुधवाः हे सुथय् १०ः३० ता इलय् सार्वजनिक याःगु विज्ञप्तिइ शल्यक्रिया लिपा आः सघन वासः यायेगु नितिं सकतां व्यवस्थालिसें निरन्तर निगरानीइ तःगु दु धकाः धयातःगु दु ।
प्रधानमन्त्री ओलीया मंगलवा एपेन्डिसाइटिसया अपरेशन याःगु खः ।
थ्वहे दथुइ प्रधानमन्त्री ओलीया स्वास्थ्य अवस्था थुइकेत थौं बुधवाः सुथय् नेकपाया महासविच विष्णु पौडेल, उपप्रधान व रक्षामन्त्री ईश्वर पोखरेल, सांसद महेश बस्नेत, नेपाली सेनाया प्रधानसेनापति पूर्णचन्द्र थापा, नेपाल प्रहरीया आईजीपी सर्वेन्द्र खनाल लिसें थीथी ख्यःया मनूतय्गु भीड अस्पतालय् जूगु खः ।
अथेहे, पार्टीया मेपिं नेता व कार्यकता लिसें शुभचिन्तकपिं नं अस्पतालय् थ्यंकूगु नेकपाया नेता व सांसद महेश बस्नेतं जानकारी ब्यूगु दु । स्वास्थ्य लाभया नितिं अस्पताल थ्यंकूपिन्सं प्रधानमन्त्रीया सचिवालयया दुजः व चिकित्सकपिन्त नापलानाः जानकारी काःगु खः ।
०००
खातावालया ल्हाःचिं किर्ते यानाः जनता बैंक व एनआइसी एसिया बैंकपाखें लखौं तका दां लिकाःपिं खुम्हेसित प्रहरीं गिरफ्तार याःगु दु ।
महानगरीय प्रहरी परिसरया प्रवक्ता होविन्द्र बोगटीं थुगु प्रकरणय् खुम्हेसित गिरफ्तार यानागु पुष्टि याःगु दु ।
थुगु विषयस महानगरीय प्रहरी परिसर टेकुइ पत्रकार सम्मेलन यानाः थप जानकारी बिइगु प्रवक्ता बोगटीं जानकारी ब्यूगु दु ।
प्रहरी स्रोतया कथं गिरफ्तारीइ लाःपिन्त थीथी इलय् किर्ते ल्हाःचिंपाखें निगू बैंकं १९ लख ९९ हजार तका दां लिकाःगु सीदूगु दु ।
प्रहरी स्रोतं धाःगु दु, “थःगु चेक तंगु धासें किर्ते ल्हाःचिंपाखें खातावालया न्हूगु चेक काइगु व वहे चेकपाखें रकम लिकायेगु याःगु सीदूगु दु ।
थःगु खातापाखें रकम गायब जूगु धासें खातावालं ब्यूगु उजुरीलिपा इमित गिरफ्तार यानागु अनुसन्धानय् दुथ्याःम्ह प्रहरी अधिकारीं जानकारी ब्यूगु दु ।
थुगु प्रकरणय् बैंकया हे कर्मचारीया संलग्नता दूगु आशंकाय् थप अनुसन्धान जुयाच्वंगु प्रहरीं जानकारी ब्यूगु दु ।
थ्वसिबें न्ह्यः वंगु भाद्र महिनाय् नं थीथी बैंकया एटीएम ह्याक यानाः करोडौं तका दां लिकाःगु खः । उगु प्रकरणय् चिनियाँ नागरिकलिसें नेपाली नागरिकपिं गिरफ्तारीइ लाःगु खः ।
०००
१३ क्वःगु दक्षिण एसियाली खेलकुदया औपचारिक उलेज्या मंसीर १५ गते आइतवाः जुइत्यंगु दु । तर साग अन्तर्गत जुइगु भलिबल कासा धाःसा थौं मंसीर ११ गते बुधवास्निसें न्ह्याइगु जूगु दु ।
थौं बुधवाःनिसें त्रिपुरेश्वरय् च्वंगु राष्ट्रिय खेलकुद परिषदया कभर्ड हलय् जुइगु मिजं व मिसा भलिबबल कासाया सकता. तयारी पूवनेधुंकूगु ग्वसाः खलः समितिं जानकारी ब्यूगु दु ।
भारत बाहेकया कासा दुथ्याःगु देसया टिम नेपालय् थ्यंकेधुंकूगु दु । भारतं मिसा व मिजं भलिबलय् ब्वति कायेगु विषय आःतक नं क्वचायेकूगु मदुनि ।
नेपालं थःगु समूहया न्हापांगु मिसापिनिगु कासाय् थौं बुधवाः बंगलादेशलिसे म्हितीगु जूगु दु । अथेहे थौं बुधवाः हे मिसापिनिगु माल्दिभ्स व पाकिस्तानया भलिबल कासा नं जुइगु जूगु दु ।
निवाः न्ह्यः बंगलादेशय् जूगु एभीसी सिनियर सेन्ट्रल जोन वुमन्स भलिबल च्याम्पियनसिपय् गोलढ मेडल त्याकूगु नेपाली मिसा भलिबल टिमं उकिया लसता न्यायेके मलावं हे घरेलु कोर्टय् १३ क्वःगु साग म्हितेत्यंगु खः । मिसा टोलीयात सेन्ट्रल जोनया उपलब्धीयात ल्यंके नं माःगु दु ।
उकिं घरेलु कोर्टय् म्हितेबलय् उत्साह व दबाब निगुलिं दूगु मिसा टिमया कप्तान अरुणा शाहीं धाःगु दु ।
कप्तान अरुणां धाःगु दु, “घरेलु मेदानय् म्हितेदयाः फुक्क उत्साहित जूगु दु । सेन्ट्रल जोन त्याकाः वयागुलिं उत्साहलिसें दबाब न. महसुस जुयाच्वंगु दु ।”
घरेलु मैदानय् जुइगु कासाय् दर्शकया सकारात्मक व नकारात्मक निगुलिं कथ.या समर्थन वइगु विश्वास कप्तान अरुणा शाहीया दु ।
१३ क्वःगु सागया हे तयारी कथं नेपालं थ्यंमथ्यं स्ववाः थाइल्याण्डया बैंककय् च्वंगु फिभ भलिबल डेपलभमेन्ट सेन्ट्रय् ट्रेनिङ्ग याःगुया लिसें मेत्रीपूर्ण कासा म्हितूगु खः । वधुंकाः बंगलादेशय् सेन्ट्रल जोन म्हितूगु नं कासामिपिंके एक्स्पोजर मिलेजूगु कप्तान अरुणा शाहीया धापू दु ।
कप्तान अरुणां धाःगु दु, “थाइल्याण्डय् ट्रेनिङ्गया लिसें फुक्क कथंया टिमलिसे म्हितागु दु । गुकिं यानाः टिमय् कासाया स्पीड नं अप्वःगु अनुभव जुयाच्वंगु दु । अन विपक्षीया कासा स्वयाः नं आपालं खँ सिइके सयेके खन,
अरुणां घरेलु मैदानय् उत्कृष्ट प्रदर्शन यासें गोल्ड मेडल त्याकेगु आज्जु दुगु खँ धाःगु दु ।
०००
नेपालय् सुर्तीजन्य पदार्थ त्वनीगु हुनि. दँय् दसं २७,००० म्ह नेपाःमि मत्युवरण जुइगु जुयाच्वंगु दु । अथेहे, सुर्ती सेवनया हे हुनिं ब्वलनाच्वंगु नुगःचु ल्वय् (मुटु रोग)या हुनिं दच्छिया दुने १४००० म्ह मनू सिनाच्वंगु तथ्य सार्वजनिक जूगु दु ।
नेपाल विकास प्रतिष्ठानं याःगु छगू अध्ययनं दक्षिण एसियाली मुलुकय् नेपाः सुर्तीजन्य पदार्थया सेवनया ल्याखं निगूगु थासय् लानाच्वंगु क्यंगु दु ।
विश्व स्वास्थ्य संगठन (डब्ल्यू एच ओ) पाखें सुर्तीजन्य पदार्थय् ७० प्रतिशतं कर म्हयेमाःगु मापदण्ड क्वःछ्यूगु दु । तर, नेपालं सुर्तीजन्य पदार्थय् ३० प्रतिशत जक कर कयाः वयाच्वंगु दु । वहे हुनिं नं नेपालय् सुर्तीजन्य पदार्थ अतिकं खपत जुयाच्वंगु अध्ययनं निष्कर्ष पिकाःगु दु ।
नेपाल विकास अनुसन्धान प्रतिष्ठानं सुर्तीजन्य पदाथृ नियन्त्रण ज्याझ्वः वइगु १८ महिनातक न्ह्याकीगु जूगु दु । ज्याझ्वःया मू आज्जु प्रमाणलिसेंया अनुसन्धानया आधारय् सुर्तीजन्य पदार्थया नियन्त्रणया नितिं वकालत यायेगु व नीति निर्माणय् लिच्वः लाकेगु जूगु प्रतिष्ठानया कार्यकारी निर्देशक डा. जयकुमार गुरुङं जानकारी ब्यूगु दु ।
३० प्रतिशत कर म्हःसां नं सुर्तीजन्य पदार्थय् तःगु करपाखें नेपालं दँय् ५ अर्ब्सिबें अप्वः आम्दानी यानाच्वंगु दु । तर, सुर्तीजन्य पदार्थ्विरुद्ध जनचेतनामूलक ज्याझ्वलय् १ करोड नं खर्च याःगु खनेमदु । वहे हुनिं नेपालय् सुर्तीजन्य छ्यलाबुला यानाः मृत्युवरण जुइपिं अप्वः जूगु अध्ययनं निष्कर्ष पिकाःगु दु ।
०००
गुल्मीइ वंगु चान्हय् जीप दुर्घटा जुयाः छम्ह मनू सीगु दुसा प्यम्ह मनू घाःपाः जूगु दु ।
गुल्मी जिल्लाया सत्यवती गाउँपालिका–३ ठूलो लुम्पेकया बुटिसगैराय् रिडीपाखें ठूलो लुम्पेक वनाच्वंगु लु१ज २७८४ ल्याःया जीप दुर्घटनाय् लाःगु खः ।
दुर्घटनाय् सत्यवती गाउँपालिका–३ सिङदीया ६८ दँया ललितादेवी सिंजालीया ज्यान वंगु जिल्ला प्रहरी ज्याकुथि गुल्मीया प्रहरी नायव उपरीक्षक मीनबहादुर घलें धाःगु दु ।
दुर्घटनाय् सत्यवती–३ या २२ दँया राजन राहडी, २२ दँया देवबहादुर बिक, ७ दँया वीरेन्द्र सिंजाली व २३ दँया अनिल बिक घाःपाः जूगु दु । घाःपाः जूपिं प्यम्हेसिगु उद्धार यानाः पाल्पा छ्वःगु प्रहरीं जानकारी ब्यूगु दु ।
प्रहरीं जीप व जीप चालकयात नियन्त्रणय् कयाः अनुसन्धान न्ह्याकूगु दु ।

Loading...
SHARE
Previous article७३ बर्षका हजुरबा बेपत्ता खोजी गर्न सहयोगको अपिल
Next articleराम्रैसँग झुकिए भक्तपुर क्षेत्र नं. १(क)का कार्यकर्ता