संवाहक नेपालभाषा बुलेटिन बलात्कारया द्वपनय् सिद्धबाबायात ज्वन, टिष्टुङ बज्रबाराही १२ वर्षे

0
95

० १३ क्वःगु दक्षिण एसियाली खेलकुद (साग) या तःजिक उलेज्या ।
० आनन्दकुटी विहारय् धर्मोदय सभाया ७६ क्वःगु साधारण सभा ।
० हिमाली बौद्ध गुरु दुचे साङ्गे पेमा रिम्पोचेया मू आतिथ्यताय् ज्याझ्वः ।
० नेकपा २७ वडा कमिटीया ग्वसालय् भिंतुना कालाबिल व सम्मान ।

कृष्णदास महराज धाःम्ह गिरींं वंगु बिहीबाः छाती, मुटु व प्रोस्टेट लिसें मिर्गौलाया पत्थरी जुगलिं वासः यायेगु नितिं अस्पतालय् भर्ना जुगु खः । छम्ह अनुयायी गत कात्तिक ४ गते सिद्धबाबां बलात्कार याःगु धासें प्रहरीइ उजुरी तःगु खः । जिल्ला प्रहरी कार्यालय सुनसरीया प्रहरी नायब उपरीक्षक विनोद शर्माया नेतृत्वय् वंगु टोलीं ज्वंगु खः ।
०००
१३ क्वःगु दक्षिण एसियाली खेलकुद (साग) या तःजिक उलेज्या जुगु दु । थौं आइतवाः सनिलय् निसें न्ह्याःगु उलेज्या स्वधौ तक न्ह्याःगु खः ।
राष्ट्रपति विद्यादेवी भण्डारीं त्रिपुरेश्वरया दशरथ रंगशालाय् १३ क्वःगु सागया औपचारिक उद्घाटन जुगु घोषणा यानादिगु खः ।
ज्याझ्वलय् नेपाःया मौलिक संस्कृति खनेदुगु थीथी ज्याझ्वः न्ह्यब्वःगु खःसा राष्ट्रपति थ्यनेवं मार्चपास पाखें न्ह्याकुगु खः ।
गायक कुन्ति मोक्तान, आनन्द कार्की, ईन्दिरा जोशी, सत्यराज आचार्य र मिलन नेवाः नं साग म्ये हाः न्यंकुगु खः ।
दक्षिण एसियाली ओलम्पिक काउन्सिलया नायः जिवनराम श्रेष्ठ साग मिनी ओलम्पिकया रुपमा जुगु व युवा खेलाडीया नितिं प्रतिभा क्यनेगु अवसर जुगु खँ तयादिगु खः ।
साग कार्यकारी समितिया नायः लिसें राष्ट्रिय खेलकुद परिषदया सदस्यसचिव रमेशकुमार सिलवालं साग म्हे इलय् पूर्वाधार तयार यानाः साग आयोजना यायेत ताः लाःगु खँ तयादिगु खः ।
१३ क्वःगु सागय् ७ देय्या २७ सय सिब्ये अप्वः खेलाडीं ३१७ स्वर्ण, ३१७ रजत व ४८१ कास्यका नितिं १० न्हू तक प्रतिस्पर्धा जुइत्यंगु खः ।
सागया कासा स्वगू शहरया २९ खेलस्थलय् जुइत्यंगु दु । सन् १९८४ य् नेपाः पाखें न्ह्याःगु सागया च्यक्वःगु संस्करण नेपालय् १९९९ व २०१९ नापं यानाः स्वक्वः जुगु दु ।
०००
नेपाःया थकालीगु धार्मिक सस्थाया रुपय् धस्वानाच्वंगु धर्मोदय् सभाया ७६ क्वःगु केन्दीय वार्षिक साधारण सभा मंसिर १५ गते आइतवाःया न्हि आनन्दकुटी विहारय् याःगु दु । सभाया नायो यज्ञमानपति बज्राचार्यजुया सभानायोसुइ न्ह्याःगु थुगु सभाय् अखिल नेपाल भिक्षु महासंघया नायो भिक्षु डा।मैत्री महास्थवीरजुं पंचशील प्रदान याना बिज्यागु खः । थुगु साधारण सभाय् बौद्ध प्रार्थना थेरवादपाखें भिक्षु पञ्ञामूर्ति महास्थवीरजुं, महायानपाखें लामा गुरुपिं टेण्डर लामा, व बज्रयानपाखें बज्राचार्य गुरुपिं राजु बज्राचार्य, सजन बज्राचार्य, व श्री ज्ञान बज्राचार्यजुपिन्सं पाठ याना बिज्यागु खः ।
सभाया महासचिव सासगर मान वज्राचार्यजु लसकुस न्वचु विया न्ह्याःगु थुगु सभाय् ज्याझ्वःया मूपाहां येँया मेयर विद्यासुन्दर शाक्यजुं बोधिमत च्याका उलेज्या यानादीगु खः । थुकथं हे पाहांपिं व धर्मोदय् सभाया पदाधिकारीपिन्सं नं बोधि मत च्याकादीगु खः ।
सभाया थुगु उलेज्या सत्रय् सभाया न्वकु इन्द्र वहादुर गुरुंग, मूपाहां विद्यासुन्दर शाक्य लगायतपिन्सं थःःथःगु नुगः खँ तयादीगु खः । अन्तय् सभाया नायो यज्ञमानपति बज्राचार्यजुं मूपाहां भाजु शाक्यजुयात चैत्य मतिनाया चिं स्वरुप बिया बिज्यागु खः । उलेज्या सत्रय् सभाया न्वकु सुचित्र मान शाक्यजुं सुभाय् देछानादीगु खःसा सभापति यज्ञमान पति बज्राचार्यजुं थःगु नुगः खँ तयाः सभा क्वचायका बिज्यागु खः ।
थुकथं हे थुगु धर्मोदय सभाया थुगु साधारण सभाया निगूगु ब्वय् भोजन धुंकाःन्हयाःगु खःसा थसुगु निगूगु ब्वया सभाय् यज्ञमान पति बज्राचार्य सभापति जुया बिज्यगु खःसा संस्थाया महासचिव सागरमान बज्राचार्यजुं संस्थाया वार्षिक प्रगति प्रतिवेदन न्ह्योब्वयादीगु खः । थुकथं हे लेखापरीक्षण प्रतिवेदन सभाया दांभरिं नामग्याल श्रेष्ठ व ल्यू दांभरिं मयजु निर्मला कंसाकारपिं निम्ह जाना न्ह्योब्वयादीगु खः ।
थुगु ज्याझ्वलय् सम्वन्धन प्राप्त संस्थापिनिगु नं प्रतिवेदन न्ह्योब्वयादीगु खः । ज्याझ्वलय् भिक्षु महासंघया नायो डा। मैन्त्री महास्थवीरजुं लृुम्विनी स्वयम्भू महाचैत्यउ धर्मोदय विहारया विषययात कःघाना व पूर्वमन्त्री डा।केशव मान शाक्यजुं घोषणा पत्रया विषययात कःघाना थःथःगु नुगः खँ तयादीगु खः ।
नाप नापं सभाया थीथी जिल्लाय् दुगु थीथी शाखाया नायोजुपिन्सं नं थःथःगु जिल्लाया प्रगति प्रतिवेदन न्ह्योब्वयादीगु खः । अन्तय् सभापतिया थासं सभानायो यज्ञमान पति बज्राचार्यजु थःगु खँ तसें निगूगु सत्रया सभा क्वचायका बिज्यागु खः । थुगु निगुलिं सत्रया ज्याझ्वः सभाया छ्याञ्जे अशोकनन्द बज्राचार्यजुं न्ह्याकाविज्यागु खःसा ज्याझ्वलय् सभाया बौद्ध दुजःपिनिगु उपस्थिति दुगु खः ।
०००
नांजाम्ह हिमाली बौद्ध गुरु दुचे साङ्गे पेमा रिम्पोचेया मू आतिथ्यताय् आर्यतारा सप्तविधानुत्तर पुजा जुगु दु ।
हिमाली बौद्ध गुरु दुचे साङ्गे पेमा रिम्पोचेया आतिथ्यताय् जूगु उगु पुजाय् नेवाः व हिमाली बौद्ध परम्पाकथं बिस्कं बिस्कं छगू हे इलय् याःगु खः
येँया इतुंबहालय् जूगु पुजाय् नेवाः बौद्धपाखें नीछम्ह वज्राचार्य गुरुजुया नेतृत्व राजगुरुजु मञ्जुश्रीरत्न वज्राचार्यं विधिपूर्वक पुजा सिधयेकाः गुरु रिम्पोचें बौद्ध धर्मया थीथ पक्षयात कयाः प्रवचन बियाबिज्याःगु खः ।
०००
नेपाल कम्युनिष्ट पार्टी २७ वडा शाखा कमिटीया ग्वसालय् म्हिगः शनिवाः ग्रीन पार्टी प्यालेस जमलय् नेपाल संवत ११४० न्हूगु दँया लसताय् लिसें २७ या सँस्कृति, सम्पदा, खेलकुद, शिक्षा, पर्यटन उद्योग, विकास निर्माण व सामाजिक क्षेत्रय् योगदान याःगु संघ संस्थायात सम्मान याःगु दु लिसें २०७५ व ७६ सालमा ंए लेबल व नर्सिग बिषयलय् उतिर्ण विद्यार्थीतय्त सम्मान याःगु खः ।
ज्याझ्वलय् येँ महानगरपालिकाया मेयर बिद्या सुन्दर शाक्यया मू पाहाँ कथं व मू उपस्थिति कथं ३ न. प्रदेशया सांसद केशब स्थापित ३ न. प्रदेशया सह इन्र्चाज दिलीप महर्जन, येँ महानगर समितिया सचिव रविन्द्र श्रेष्ठ, २७ वडाया वडा अध्यक्ष चिनीयामान बज्राचार्य लिसें उगु वडाया वडा सदस्यपिंन्सं सम्मानित ब्यक्तिपिन्त हनापौं व लुमन्ति चिं लः ल्हाःगु खः ।
०००
वंगु झिदँ न्ह्यः ने.स.११३० पोहलाथ्व नवमी न्हिं न्हूगु संविधानय् नेवाः लागायात ‘नेवाः प्रदेश’ नामांकन यायेमाःगु माग यासें येँया दशरथ रंगशालाय् नेवाःतसें याःगु शक्ति प्रदर्शनया लुमन्तिइ व नेवाः आन्दोलनयात निरन्तर न्ह्याकातयेगु आज्जु ज्वनाः वइगु पुस १९ शनिवाः नेवाः देय् दबूया संयोजनय् झिक्वःगु नेवाः एकता दिवस तःजिक हनेत्यंगु दु ।
न्हापांगु नेवाः एकता दिवस थीथी राजनीतिक पार्टीतय्गु भातृ संगठन व जातीय संगठनपिनिगु मंकाः संस्था नेवाः स्वायत्त राज्य मंकाः संघर्ष समितिया ग्वसालय् जूगु खः ।
न्हूगु संविधान जारी जुइधुंकाः प्रदेशया नामांकन मयाःगु व संविधान कार्यान्वयनया झ्वलय् स्वंगू तहया सरकारया चुनाव जुइधुंकूगु स्थितिइ नं नेवाःतय्गु माग नेवाः प्रदेश हे खः धासें थथे निरन्तरता बिइगु नितिं पुस १९ गते गुक्वःगु नेवाः एकता दिवस हनेत्यंगु खः ।
२०७२ असोज ३ गते जारी जूगु नेपाःया न्हूगु संविधानय् नेवाः स्वायत्त राज्य सुनिश्चितता मजूगु व अन्तरिम संविधानय् व्यवस्था दूगु आदिवासी जनजाति व उत्पीडित समुदायया अधिकार तकं क्वपालेगु ज्या जूगुलिं संविधान संशोधन यानाः नेवाः स्वायत्त राज्य सुनिश्चितता यायेमाःगु माग यासें थथे एकता दिवस हनेत्यंगु खः ।
०००
प्राचीन टिष्टुङ बज्रबाराही १२ वर्षे देवीगण प्याखँ येँय् क्वनेज्या जुगु दु । म्हिगः शनिवाया हलुमानध्वखा काल भैरव द्यःया ल्यूनेया दबूलिं थथे क्यनेज्या जुगु खः ।
येँ ३ प्रदेशया सांसद राजेश शाक्य व संस्कृति अभियन्ता एकाराम सिंया कुतलय् थथे बज्रबाराही १२ वर्षे देवीगण नाच येँय क्यनेगु ताः लाःगु खः । बज्रबाराही १२ वर्षे देवीगण प्याखँ टिष्टुङ जक सिमित मयासें थीथी नेवाः लागाय् क्यनेगु आजु कथं उगु ज्याझ्वः जुगु खः ।
०००
गद्यगुरु पं. निष्ठानन्द बज्राचार्यया १६३ क्वःगु बुदिं येँया २३ वडा नकबहीलय् वयकःया झ्वाता दुगु थासय् तःजिक न्यायेकुगु दु ।
म्हिगः शनिवाःनिष्ठानन्द स्मृति गुथिया ग्वसालय् जुगु उगु ज्याझ्वलय् गद्यगुरु पं. बज्राचार्यया झ्वताय् स्वाम्हा क्वखाय् वयकः प्रति श्रदाभाव प्वंकुसें स्वा देछाःगु खः ।
गुथिया नायः प्रा. सुवर्ण शाक्यया सभापतित्वय्ु जुगु उगु ज्याझ्वः पबित्र बज्राचार्यं न्ह्याकादिगु खः ।
०००
नेपाल कम्युनिष्ट पार्टी (नेकपा) व नेपाली कांग्रेस छगः पाँय्म्वःया निगू पाता जूगु व थुपिं निगू पार्टी अलग अलग विचाः ज्वनाः जन्म जूगु खःसां वैचारिक रुपय् जरासन्ध थें प्यपुनाच्वंपिं खः । उगु खँ समाजवादी पार्टीया सहअध्यक्षलिसें प्रतिनिधिसभा सदस्य राजेन्द्रप्रसाद श्रेष्ठं थनया खुसिबुँइ जूगु छगू ज्याझ्वलय् धयादीगु खः ।
महाभारतय् मगधया जुजु वृहद्रथया निम्ह लानिपाखें नं मचा मबुइवं चन्दकौशिक नांया ऋषिं बिउगु बुटि निम्ह लानियात बछि बछि नयेत बिउबलय् निम्ह लानिपाखें जन्म जूम्ह बछि म्ह दुम्ह जरा नांया राक्षसनी नं स्वानाः जरासन्ध जन्म जू थें अलग अलग नांया कांग्रेस व नेकपा छगू हे विचारय् प्यपुनाच्वंगु द्वपं वय्कलं बियादिल ।
संघीयता, समावेशीता व समानुपातिक लगायत आपालं विषयय् कांग्रेस व कम्युनिष्टया विचाः धाःसा छगू हे जूगु वय्कलं धयादिल ।
‘गबलय् तक दश जोड एकया राष्ट्रिय पहिचानसहतिया संघीयता स्थापना जुइमखु, अबलय् तक वर्तमान एकल जातीय राज्य विरुद्ध संघर्ष न्ह्याना हे च्वनी’, वय्कलं धयादिल ।
निगुलिं पार्टीं संघीयतायात सिद्धान्तया रुपय् ग्रहण मयासे राज्यया संरचना व शासन प्रणालीया रुपय् जक ग्रहया याःगुलिं इमिसं संघीयतायात अपांग याःगु नं वय्कलं द्वपं बियादिल ।
०००
संघीय सरकारया नवनियुक्त सहरी विकास राज्यमन्त्री रामवीर मानन्धरं स्कुलय् माध्यमिक तहया शिक्षा पूवंकेत ला १० दँया ई काइ धाःसा राज्यमन्त्री जुयाः पदभार ग्रहण यानागु निन्हुया दुने सकतां अपेक्षा यायेगु उचित जुइमखु धयादिल । वय्कलं राज्यमन्त्री नियुक्त जुयागु छवाः दयेधुंकूसां पदभार ग्रहण यानागु निन्हुजक दुगु व थ्व अवधि दुने तःधंगु हे हिउपाःया आशा यायेगु व्यर्थ खः धयादीगु दु ।
संघीय सरकारय् नवनियुक्त सहरी विकास राज्यमन्त्री मानन्धरं उगु खँ मानन्धर सनाःगू खलः, न्हूसाःपाखें वय्कःयात भिंतुना देछाःगु ज्याझ्वलय् धयादीगु खः । वय्कलं धयादिल, ‘जिं राज्यमन्त्रीया पदभार ग्रहण यानागु निन्हु हे जक दत, दकलय् न्हापां जिं सुनां सुनां भौतिक सुविधा उपभोग यानाच्वंगु दु अले मन्त्रालय अन्तर्गतया छु गुगु निकायय् गुलि कर्मचारी ज्या यानाच्वंगु दु उकिया धल फ्वनागु दु ।’
अनधिकृत रुपं भौतिक सुविधा उपभोग यानाच्वंगु व आवश्यक स्वयां अप्वः कर्मचारी दुसा इमित व्यवस्थापन यायेगु वय्कलं धयादिल । लिसें वय्कलं स्वनिगःयात धाथें स्वये लायक यायेत सहरी सुन्दरता हे कुरुप जुइकथं थाय्थासय् लठ्ठाय् तयातःगु विद्युत, टेलिफोन व केबलया तारयात व्यवस्थापन यायेगु व उकिया निंतिं महानगरपालिकायात निर्देशन बीगु नं वय्कलं धयादिल ।
लिसें स्वनिगलय् खने दयाच्वंगु त्वनेगु लःया समस्या ज्यंकेत लः पाइपया उचित व्यवस्थापन व मर्मत यायेगु निंतिं नं थम्हं पहल यायेगु जुइ धासें थः छगू सरकारया उच्च पदय् थ्यने धुंकाः यक्वसिनं हिउपाःया आशा याइगु स्वाभाविक जूगु तर उगु पदय् थः थ्यंगु मखसे झी सकलें थ्यंगु कथं भाःपियादीत इनाप यासें समस्या ज्वनाः वल धाःसा उकिया उचित संबोधन यायेत थम्हं पहल यायेगु प्रतिवद्धता नं वय्कलं प्वंकादिल ।
येँ महानगरपालिका २३ वडाअध्यक्ष मचाराजा महर्जनं नं नुगः खँ प्वंकादीगु ज्याझ्वलय् सनाःगू खलःया नायःलिसें ज्याझ्वःया सभापति जीवनारायण मानन्धरं हनापौ देछानादीगु ज्याझ्वलय् वय्कःयात नेवाः परम्पराकथं ख्यें सगं बियाः हनापौ लःल्हासे भिंतुना देछाःगु खः ।
ज्याझ्वलय् खलःया छ्याञ्जे उदेन न्हूसाय्मिं लसकुस यानादीगु खःसा दांभरिं लक्ष्मीदास मानन्धरं सुभाय् देछानादीगु खः । राज्यमन्त्री मानन्धर सनाःगू खलःया जः खः ।

Loading...
SHARE
Previous articleपेट्रोल, मट्टितेल र डिजेलको मूल्यवृद्धि
Next articleभक्तपुरमा आज रोज मोक्तान र काउली बुढी आउँदै