प्रमं लुटेरा पार्टी धाल, फागुन ३० गते नेपालबन्द घोषणा यात !

नेत्रविक्रम चन्द विप्लव नेतृत्वया नेकपां वइगु फागुन ३० गते नेपालबन्द यायेगु घोषणा याःगु दु ।
नेकपा महासचिव विप्लवं छगू विज्ञप्ति सार्वजनिक यासें थःगु पार्टी नेता कार्यकर्ता गिरफ्तारी, मखूगु मुद्दा, कपिलवस्तुइ जूगु गोली काण्ड, रोल्पा–कपिलवस्तु–कालिकोट लिसेंया जिल्लाय् जूगु अप्रेशनया विरुद्ध वयेगु बिहिवाः फागुन ३० गते आमहड्ताललिसें नेपालबन्दया आह्वान याःगु दु ।
विप्लवं फागुन २४ गते शुक्रवाः पिथंगु विज्ञप्तिइ धयातःगु दु, “प्रचण्ड सरकारं छुं ई न्ह्यःनिसें देय् न्यंकं फाँसिष्ट दमन अभियान तीव्र याःगु दु । दमनया झ्वलय् २३ गते सुथय् ५ ता इलय् कपिलवस्तु शिवराज नगरपालिका वडा ल्याः ९ या अंचलपुरया युवा दुर्गाबहादुर रोकायात छेँपाखें ज्वनाः चौकीइ यंकाः हाकनं सुन्दरीडाँडा जंगलय् यंकाः गोली क्ययेकाः घाःपाः याःगु दुसा देय् न्यंकंपाखें केन्द्रीय दुजः कमरेड बन्धु चन्द, किसान संगठनया नायः राजु कार्की्लिसें सलंसः नेता व कार्यकर्ता्पिन्त गिरफ्तार याःगु दु ।”
अथेहे, पार्टीया महासचिव विप्लवं ल्हाःचिं तयाः पिथंगु विज्ञप्तिइ गांगामय् संकटकालया लू न्ह्यब्वइगु कथं छापा मारेयाःगु, यातना ब्यूगु लिसें मखूगु मुद्दा तयेगु ज्या यानाच्वंगु दु धकाः न्ह्यथनातःगु दुसा उगु विज्ञप्तिइ धयातःगु दु, “जिमिगु पार्टीं थ्व रक्तपिपाशु दमनया घोर भत्सर्ना यानाच्वना । लिसें घाःपाः जूम्ह कमरेड दुर्गा रोकाया याकनं उसाँय् भिनेमा धकाः भिंमनं तुनाच्वना ।”
विज्ञप्तिइ उगु सकतां राज्य आतंक, दमन, गोलीकाण्ड, गिरफ्तारी, मखूगु मुद्दाप्रति फुक्क राजनीतिक शक्ति, मानवअधिकार, नागरिक समाज, बुद्धिजीवीया ध्यान वनेमा धकाः आग्रह यानाच्वना धकाः धयातःगु दु ।
०००