वैदेशिक रोजगार व्यवसायी संघया नायः रोहन गुरुङया छेँय् जूगु विस्फोटया जिम्मा नेकपा विप्लव पुचलं काःगु दु ।
येँया बसुन्धराय् च्वंगु गुरुङया छेँया ग्यारेजय् पार्किङ यानातःगु ल्याण्डक्रुजर गाडीइ शुक्रवाः सनिलय् बम विस्फोट जूगु खः । विस्फोट लिपा मिँ तकं च्याःगु खः ।
घटनाय् प्यँम्ह मनू घाःपाः जूगु खः । विप्लव पुचः सम्बद्ध युवा संगठन नेपालं विस्फोटया जिम्मा काःगु दु । मध्य केन्द्रीय कमाण्डया छ्याञ्जे शिशिरं विज्ञप्ति सार्वजनिक यासें घटनाया जिम्मा काःगु खः ।
०००
येँया नागार्जुन नगरपालिका–१० कमलपोखरीइ च्वंगु स्यूचाटारय् शंकास्पद वस्तु लुयावःगु दु । प्रहरीं शंकास्प्द वस्तु प्रेसरकुकर बम जूगु आशंका याःगु दु ।
येँ प्रहरी परिसर, टेकुया प्रवक्ता डिएसपी होविन्द्र बोगटीं ब्यूगु जानकारी कथं खुल्ला थासय् ल्हाकातःगु अवस्थाय् प्रेसरकुकरथें जाःगु खनेदूगु वस्तु लुयावयेधुंकाः प्रहरीयात खबर याःगु खः । वधुंकाः प्रहरीं नेपाली सेनाया बम डिस्पोजल पुचःयात खबर याःगु खः ।
प्रवक्ता डिएसपी बोगटीं धयादी, “आः नेपाली सेनाया पुचलं शंकास्पद बस्तु डिस्पोज यायेधुंकूगु दु । थप अनुसन्धान जुयाच्वंगु दु ।
०००
वैदेशिक रोजगार व्यवसायी संघया नायः रोहन गुरुङया छेँय् जूगु शक्तिशाली विष्फोट नेकपा विप्लव पुचलं याकूगु जुइफूगु खनेदूगु आशंका याःगु दु ।
शुक्रवाः सनिलय् गुरुङया छेँया ग्यारेजय् तयातःगु गाडीइ शक्तिशाली विष्फोट जूगु खः । विष्फोटय् लानाः प्यम्ह मनू घाःपाः जूगु खःसा छेँय् पार्किङ यानाः तयातःगु बा १० च ६७८९ ल्याःया ल्याण्ड क्रुजर गाडी क्षतविक्षत जूगु खः ।
स्थानीयबासीया कथं सुुरुइ तसकं विष्फोटया सः वःगु खः, वधुंकाः मिँ च्याःगु खः । वहे झ्वलय् मेगु निगू विष्फोटया सः वःगु खः ।
तर, आःतक विष्फोट गुकथं जुल धैगु मस्यूनिगु प्रहरीं धाःगु दु । केन्द्रीय प्रहरी प्रवक्ता एसएसपी उत्तमराज सुवेदीं धयादी, “विष्फोट जूगु खः । तर, छु प्रकृतिया खः धैगु छुं प्रमाण लुयावःगु मदुनि ।”
माग याःकथं चन्दा मब्यूगु धासें विप्लव पुचलं छुं वाः न्ह्यः नख्खुइ च्वंगु एनसेल ज्याकुथिइ विष्फोट याःगु खः । विप्लव पुचःया कार्यकर्तातय्सं ज्याकुथि दुने तयातःगु बम सुरक्षागार्डं पिने हःबलय् विष्फोट जूगु खः, उगु घटनाय् लानाः लँपु वयाच्वंम्ह लँजुवाः छम्ह सीगु खःसा निम्ह घाःपाः जूगु खः ।
शुक्रवाः सनिलय् वैदेशिक रोजगार व्यवसायी संघया नायः गुरुङया छेँय् शक्तिशाली विष्फोट जूगु खः ।
स्रोतया कथं विप्लव पुचःया कार्यकर्तां रोहन गुरुङयाके नं चन्दा माग याःवंगु खः । थ्यंमथ्यं स्वला न्ह्यः युवा संगठनया नामय् वैदेशिक रोजगार व्यवसायी संघया ज्याकुथिइ पौ छ्वयाः चन्दा माग याःगु खः ।
स्रोतं धाःगु दु, ‘वधुंकाः तःक्वःमछि गुरुङ व विप्लवया कार्यकर्तादथुइ नापलायेगु ज्या जूगु खनेदु । गुरुङं थःपिं आर्थिक संकटय् लानाच्वंगु धासें चन्दा मब्यूगु खः ।’
गुरुङं मलेसियाया रोजगारी बन्द जूगु व सरकारं मेनपावरया धरौटी रकम ६ करोड दयेकेगु प्रस्ताव याःगुलिं आर्थिक संकटय् लाःगु लिसः ब्यूगु खः । माग कथं रकम मबिइधुंकाः विप्लव पुचःया कार्यकर्तां पौं लितबिइत माग याःगु खः ।
चन्दा माग याःगु पौ लितकाःगु छुं दिं दुने हे छेँय् विस्फोट जूगुलिं विप्लव पुचःया हे संलग्नता खनेदूगु दु धकाः धाःगु दुसा उकिया विषयस प्रहरीं अनुसन्धान यानाच्वंगु दु ।
०००
Related
