कृष्ण प्रजापति
० अन्तर्रा्ष्ट्रिय कासा हेरिटेज पेजेन्ट २०१९ या नितिं रोजिन शाक्य नियुक्त,
० भेनेजुएला प्रकरणः नेकपाया अडान, वाह्य हस्तक्षेपया विरोध, कांग्रेस स
० न्हूदँ समारोह समितिं प्रा. शाक्यया मां मदुगुलिं विचाः हायेकल ।
० इतिहासय् न्हापांखुसिः टी–२० अन्तर्रा्ष्ट्रिय क्रिकेट सिरिज नेपालं त्याकल,
० प्रवासी ज्वनेत अमेरिकाय् नक्कली विश्वविद्यालय चायेकल !
थीथी उमेर समूहया सौन्दर्य कासा व फेसन शोया कोरियोग्राफीइ डेढ दशकसिबें ताःहाकःगु ई सक्रियता व निरन्तरता बियादी धुंकूम्ह फेसन कोरियाग्राफर व संचारकःमि रोजिन शाक्य अन्तर्रा्ष्ट्रिय सौन्दर्य कासा हेरिटेज पेजेन्ट २०१९ या नितिं अफिसियल कोरियोग्राफरया रुपं नियुक्त जुयादीगु दु ।
वइगु फेब्रुअरी १२ निसें १७ तारिखतक सिंगापुरय् संचालन जुइगु उगु कासा अन्तर्गत मिस व मिसेज हेरिटेज इन्टरनेशनल २०१९ या विजेता छनौट जुइ । कासा ई प्लानेट प्रा.लि.या ब्यानरय् संचालन जुइत्यंगु खः ।
थ्वसिबें न्ह्यः उगु अन्तर्रा्ष्ट्रिय कासाया न्हापांगु संस्करण नेपालय्, निक्वःगु संस्करण भारत व स्वक्वःगु संस्करण श्रीलंकाय् संचालन जूगु खः । वंगु स्वंगुलिं संस्करणय् नं रोजिन शाक्य हे कोरियोेग्राफर जुयादीगु खः ।
अन्तर्रा्ष्ट्रिय मंचय् हे सिंगापुरय् च्वंगु होटल भिलेज चाङगीइ संचालन जूगु न्हापांगु ‘मिस मर्मेड सिंगापुर २०१६’ य् नं रोजिन शाक्य हे कोरियाग्राफर जुयादीगु खः ।
फेसन कोरियोग्राफी बाहेक नेपालभाषाया समाचार वाचन, फेसन पत्रकारिता, मंचीय ज्याझ्वःया उदघोषण, फेसन व टुरिजम एण्ड हस्पिटालिटी कलेज अध्यापन, पर्सनालिटी ग्रुमिङ, डकुमेन्ट्री स्क्रिप्ट व प्रपोजल लेखन, भ्वाइस ओभर, इभेन्ट म्यानेजमेन्ट लिसेंया क्षेत्रय् थःत निरन्तर सक्रिय यानाः वयाच्वनादीम्ह रोजिन शाक्य २०१८ या अप्रिल ७ य् मलेसियाया क्वालालम्पुरय् संचालन जूगु द इन्टरनेशनल प्रिस्टिज् ब्राण्ड अवार्ड समारोहस बेष्ट आन्टरप्रिनर विधा अन्तर्गत अन्तर्रा्ष्ट्रिय पुरस्कार वेष्ट आन्तरप्रिनर इन मल्टि टास्क पर्सनालिटी अवार्डपाखें सम्मानित जुयादीगु खः ।
आः नकतिनि जक मलेसियाय् क्वचाःगु छगू तःजिगु समारोहया दथुइ अन्तर्रा्ष्ट्रिय पुरस्कारपाखें सम्मानित जुयादीगु खः । वंगु चैत्र २४ अर्थात् अप्रिल ७ तारिखय् मलेसियाया क्वालालम्पुरय् च्वंगु द प्यालेस अफ गोल्डेन हर्सेस् नांया होटलय् संचालन जूगु द इन्टरनेशनल प्रिस्टिज् ब्राण्ड अवार्ड समारोहस बेष्ट आन्टरप्रिनर विधा अन्तर्गत बेष्ट आन्टरप्रिनर इन मल्टि टास्क पर्सनालिटी अवार्डपाखें सम्मानित जुयादीगु खः ।
थुगु विधाय् अन्तर्रा्ष्ट्रिय पुरस्कारपाखे) पुरस्कृत जुयादीम्ह रोजिन शाक्य न्हापाम्हं नेपाःमि खः । वय्कःयात थुगु पुरस्कारया नेपालय् च्वंगु ई प्लानेट प्रा.लिं मनोनित याःगु खः ।
सम्बन्धित विधाय् रोजिन शाक्यं हासिल यानादीगु उपलब्धी, यानादीगु ज्वःमदुगु योगदान व निरन्तरताया उच्च मूल्यांकन यासें उकथंया अवार्डपाखें शाक्ययात सम्मानित याःगु खः ।
एसिया एक्सिलेन्स आन्टरप्रिनर फेडरेशनं वार्षिक रुपं ग्वसाः ग्वयाः वयाच्वंगु उगु अवार्ड समारोहपाखें विश्वया ट्यालेन्ट व्यक्तित्वपिं, थःगु क्षेत्रय् महत्वं जाःगु उपलब्धी हासिल यानादीपि विश्व चर्चित व्यक्तित्वपिनिगु योगदान व उपलब्धीया कदर यासें उगु अवार्ड लःल्हायेगु यानाः वयाच्वंगु दु ।
डेढ दशकसिबें ताःहाकःगु ईया निरन्तरताय् थःत परिष्कृत, परिमार्जित व परिपक्व यासें वयादीम्ह नेपाली फेसन मोडलिङ व सौन्दर्य कासाय् थःत स्थापित यायेत ताःलाःम्ह फेसन कोरियोग्राफर व संचारकःमि रोजिन शाक्य राष्ट्रिय स्तरय् जक सीमित मजूसे अन्तर्रा्ष्ट्रिय क्षेत्रय् नं थःत न्ह्यःने यंकेगु ज्याय् ताःलानादीगु दु ।
नृत्य, अभिनय, उदघोषण, टेलिभिजन ज्याझ्वः निर्माण विधाया अनुभव नं कयादी धुंकूम्ह रोजिन शाक्यं थीथी अन्तर्रा्ष्ट्रिय सौन्दर्य कासाय् सहभागी जुयाः नेपाली प्रतिनिधि पात्रपिनिगु नं गु्रमिङ व सफल उपलब्धी नं हासिल यानादीगु दु ।
वंगु सेप्टेम्बर ६ तारिखय् सिंगापुरय् च्वंगु होटल भिलेज चाङगीइ न्हापांगु मिस मर्मेड सिंगापुर २०१६ जूगु खः ।
उगु कासाया कोरियोग्राफी नेपाःया फेसन कोरियोग्राफर रोजिन शाक्यं यानादीगु खः ।
कासाया कोरियोग्राफी लिसें स्थानीय उदघोषकया लिसेलिसें रोजिनं उगु कासाया संचालन नं यानादीगु खः ।
समुद्री जीवनया संरक्षण व प्रवर्द्धनय् लक्षित उगु कासाया लिपांगु प्रतिस्पर्धाय् १२ म्ह सिंगापुरी मिसापिनिगु सहभागिता दूगु खः । जलपरी अर्थात् मर्मेडया आवरणय् प्रस्तुत जूपिं सहभागी सुन्दरीपिं दथुया कासा छसिंकथं क्याजुअल वेयर पहिरन, न्ह्यसः लिसः चरण, बिकिनी वेयर व ककटेल वेयरया प्रस्तुति लिसें विजेताय चयन यासें क्वचाःगु खः ।
नेपालय् च्वंगु ई प्लानेट प्रा.लि.या शाखा ज्याकुथि ई प्लानेट सिंगापुरं ग्वसाः ग्वःगु उगु कासाय् अड्री चेन विजेता जूगु खः ।
अड्रीं कासाय् बेष्ट ट्यालेन्ट, मिस पपुलारिटी व टप इन्फ्लेन्सर अवार्डय् नं थःत अब्बल क्यंगु खः ।
कासाया फस्ट रनर अपय् एन सी जिन व सेकेन्ड रनर अपय् एस्थर एङ विजेता चयन जूगु खः ।
इपिं छसिंकथं द फेस अफ मर्मेड २०१६ एम्बेस्डर व एम्बेस्डर अफ द इयर २०१६ या रुपं नं चयन जूगु खः । मिस मर्मेड सिंगापुर २०१६ सिंगापुर बुक अफ रेकर्डस् तकं दर्ता जूगु दु ।
रोजिन शाक्यं मिस हेरिटेज इन्टरनेशनल व मिसेज् हेरिटेज इन्टरनेशनल नांया अन्तर्रा्ष्ट्रिय सौन्दर्य कासाया कोरियोग्राफरया रुपं अनुभव मुंकादी धुंकूगु दु ।
०००
सत्तारुढ नेपाल कम्युनिष्ट पार्टी (नेकपां) भेनेजुएला प्रकरणय् थःगु अडान दोहोरे याःगु दु । सोमवाः च्वंगु सचिवालय बैठकं छुं नं देसय् वाह्य हस्तक्षेप जुइमज्यूगु व छुं नं समस्या खनेदःसा अनया हे जनतां शान्तिपूर्ण रुपं समाधान मालेमाःगु धाःगु दु ।
राष्ट्रसंघया वडापत्र व पंचशीलया सिद्धान्तप्रति सदा प्रतिवद्ध जूगु व हरेक देसया सार्वभौमसत्ता स्वतन्त्रता व भौगोलिक अखण्डतायात सम्मान यायेगु नेकपां धाःगु दु ।
सचिवालय बैठकया निर्णय न्यंकूसें प्रवक्ता नारायणकाजी श्रेष्ठं धयादी, “छुं नं देसया आन्तरिक मामिलाय् बाह्य हस्तक्षेप जुइमज्यूगु व छुं नं देसय् छुं नं कथंया समस्या ब्वलन धाःसा उगु देसया जनतां स्वतन्त्रतापूर्वक, शान्तिपूर्ण लँपुपाखें समाधान यायेमाः धैगु मान्यता तयाच्वना ।”
थ्वसिबें न्ह्यः नेकपा नायः पुष्पकमल दाहाल प्रचण्डं ११ गते माघय् विज्ञप्ति पिथनाः भेनेजुएलाय् अमेरिकाया हस्तक्षेप जूगु धासें विरोध प्वंकादीगु खः ।
वधुंकाः अमेरिकां भेनेजुएला प्रकरणय् नेपाल सरकारया आधिकारिका धारणा माग याःगु खः । परराष्ट्र मन्त्रालयं कूटनीतिक भाषाय् तर, प्रचण्डया हे भावय् वक्तव्य सार्वजनिक याःगु खः ।
छुं नं देसया आन्तरिक राजनीतिक समस्या वहे देसया संवैधानिक प्रावधान कथं प्रजातान्त्रिक माध्यम व बाह्य हस्तक्षेप विना समाधान जुइमाःगु सरकारया वक्तव्य खः । वधुंकाः सरकारं नेपालय् च्वंगु कूटनीतिक नियोगया प्रमुखपिन्त सःताः ब्रिफिङ्ग याःगु खः । तर, अमेरिकी राजदूत उपस्थित मजूगु खः ।
विपक्षी नेपाली कांग्रेस लिसेंया थीथी क्षेत्रपाखें भेनेजुएला प्रकरणय् नेकपा व सरकारया आलोचना जूगु खः । कांग्रेसं नेपाःयात अमेरिकां आर्थिक ग्वाहालि यानाः वयाच्वंगुलिं अमेरिकाया विपक्षय् च्वनेमज्यूगु तर्क तःगु खः ।
सत्तारुढ नेकपां धाःसा पार्टीया धारणा दोहोरे यासें सचिवालय बैठकपाखें हे वक्तव्य सार्वजनिक याःगु दु ।
सचिवालय बैठक लिपा प्रवक्ता श्रेष्ठं धयादी, “थुगु पार्टीया विदेश नीति व अन्तर्रा्ष्ट्रिय सम्बन्धया न्ह्यसलय् छुं अन्यौल व द्विविधा मदु । थुगु सम्बन्धय् पार्टीया दृष्टिकोण व नीतित स्पष्ट व स्थिर दु ।”
स्रोतया कथं बैठकय् प्रधानमन्त्री व पार्टी नायः केपी शर्मा ओलीं सरकारया ब्रिफिङ्गय् अमेरिकी राजदूत मवःगु लिसेंया विषयस जानकारी ब्यूगु खः ।
०००
न्हूदँ समारोह समितिया पुलांम्ह नायः लिसें प्राध्यापक सुवर्ण शाक्यया मां मदुगुलिं समारोह समितिं थौं सोमवाः सुथय् विचाः हायेकूगु दु ।
भाजु शाक्यया मां अष्टमाया शाक्य वंगु माघ १८ गते शुक्रवाः १०२ दँय् मदुगु खः ।
समारोह समितिया पुलांम्ह नायः तिर्थराम डंगोललिसें समितिया व्यवस्थापन समितिया दुजःपिं वनाः थथे विचाः हायेकः वंगु खः ।
मदुम्ह अष्टमाया शाक्यया माइलाम्ह काय् ज्योति शाक्य समितिया व्यवस्थापन दुजः नं खः ।
०००
नेपालं न्हापांगुखुसि टी–२० अन्तर्रा्ष्ट्रिय क्रिकेट सिरिज त्याकाः इतिहास च्वःगु दु । युएई विरुद्धया टी–२० सिरिज नेपालं २–१ अन्तरं थःगु पक्षय् लाकूगु खः । थ्वलिसें नेपालं युएई विरुद्धया निगू सिरिज थःगु पक्षय् लाकूगु दु । थ्वसिबें न्ह्यः नेपालं एकदिवसीय सिरिज तकं २–१ अन्तरं थःगु पक्षय् लाकेधुंकूगु दु ।
आइतवाः युएईया आइसीसी एकेदेमिइ म्हितूगु लिपांगु व निर्णायक कासाय् नेपालं युएईयात १४ रनं बुकूगु खः । लिपांगु ओभरय् कासा त्याकेत २० रनया आवश्यकता दूगु अवस्थाय् नेपाःया नितिं बलिङ यायेत वःम्ह ललित राजवंशीं सुरुया निगू बलय् मद्दिक्क विकेट कायेधुंकाः नेपाल थ्यंमथ्यं जित लिक्क थ्यंगु खः । वं ओभरया न्हापांगु बलय् रिजवान व अमिर हयातयात आउट याःगु खः । व ह्याट्रिक यायेगुपाखें धाःसा चुके जुल ।
वा वःगु हुनिं लिच्वः लानाः १० ओभरय् क्वकाःगु कासाय् नेपालं ब्यूगु १०५ रनया विजयी लक्ष्य कःघाःम्ह घरेलु टोली युएई नं निर्धा्रित ओभरय् ८ विकेट गुमेयानाः ९० रन जक मुंकूगु खःसा नेपालं ऐतिहासिक श्रृंखला थःगु पक्षय् लाकेत ताःलाःगु खः ।
नेपालःया जितय् करण केसी, अविनाश बोहरा व ललित राजवंशीं समान निगू निगू विकेट काःगु खः । उत्कृष्ट सुरुवात याःसां नं युएईया मध्य क्रमया ब्याट्सम्यान सनेमफयाः घरेलु टोलीं श्रृंखला बचेयाये मफुत । युएईया शैमान अनवरं ३०, घुलाम सब्बरं २५ व मुहम्मद बुटां ११ रन दयेकूगु बाहेक मेमेपिं कासामिं दोहोरो ल्याः तकं थीमफुत ।
थ्वसिबें न्ह्यः टस बुकाः न्हापां ब्याटिङ याःम्ह नेपालं निर्धा्रित ओभरय् ८ विकेट गुमेयानाः १०४ रन मुंकूगु खः । कप्तान पारस खड्कां १४ बलय् २९ रन मुंकूगु खः । अथेहे सन्दीप जोरां ११ बलय् २८ रन व विनोद भण्डारीं २१ रन मुंकूगु खः । युएईया नितिं मोहम्मद नाविद व सुल्तान अहमदं समान निगू निगू विकेट काःगु खः ।
नेपालं थ्वसिबें न्ह्यः निगू टी–२० श्रृंखला म्हितूसां नं छुं नं श्रृंखला दुतहये मफुनिगु खः । सन् २०१४ स श्रीलंकाय् जूगु हङकङविरुद्धया प्यंगू कासाया २०–२० श्रृंखला नेपालं १–० अन्तरं गुमेयाःगु खः ।
सुरुवाती स्वंगू कासा वा वःगु हुनिं रद्द जूगु खःसा लिपांगु कासाय् नेपाल २ विकेटं स्तब्ध जूगु खः ।
अथेहे, सन् २०१५ स नेपालं नेदरल्याण्डसविरुद्ध प्यंगू कासाया २०–२० श्रृंखला म्हितूगु खः । गन सुरुवाती स्वंगू कासा गुमेयाःगु नेपालं लिपांगु कासाय् सुखद् लिच्वः हःसां नं अन्ततः श्रृंखला ३–१ अन्तरं गुमेयाःगु खः ।
बिहिवाः न्हापांगु २०–२० कासाय् युएईयात २१ रनया लिच्वः लःल्हाःगु नेपालं शुक्रवाः ४ विकेटया जित ल्हातय् लाकाः स्वंगू कासाया श्रृंखला १–१ या बराबरीइ हःगु खः ।
०००
प्रमुख प्रतिपक्षी दल नेपाली कांग्रेसं थौं सोमवाः देय् न्यंकं सरकारविरुद्ध प्रदर्शन यायेगु ग्वसाः ग्वयातःगु दु ।
महँगी, भ्रष्टाचार व सरकारया गुलिखे निर्णयया विरोधय् कांग्रेसं देसव्यापी प्रदर्शन यायेत्यंगु खः ।
नेपाली कांग्रेसया प्रवक्ता विश्वप्रकाश शर्मां महँगी, भ्रष्टाचार व सरकारया थीथी जनविरोधी निर्णयविरुद्ध कांग्रेसं सोमवाः देसव्यापी प्रदर्शन यायेत्यंगु जानकारी ब्यूगु दु ।
प्रदर्शन ७७ गू जिल्लाय् च्वंगु सदरमुकामय् यायेत्यनागु कांग्रेसं जानकारी ब्यूगु दु । प्रदर्शनयात प्रभावकारी यायेत केन्द्रीय दुजपिन्त जिल्ला खटेयानागु कांग्रेसं आम कार्यकर्ता व समर्थकपिन्त थुकी सहभागी जुइत आग्रह याःगु दु ।
येँया हकय् धाःसा न्हिनय् १ ता ईनिसें प्रदर्शन न्ह्याकेगु नेपाली कांग्रेसं जानकारी ब्यूगु दु । थीथी थासं पिकाइगु जुलुस येँया रत्नपार्कया शान्तिबाटिकाय् थ्यंकाः विरोधसभाय् हिलीगु नेपाली कांग्रेस येँया सभापति सबुज बानियां जानकारी ब्यूगु दु । वय्कःया कथं विरोधसभायात येँय् उपलब्ध थीथी नेतापिन्सं सम्बोधन याइगु जूगु दु ।
चिकित्सा शिक्षा विधेयकय् थःपिनिगु सरोकारत कःमघाःगु धासें कांग्रेस रुष्ट जूगु दु । अथेहे, वाइडबडी विमान खरिदय् जूगु घोटालाया निष्पक्ष छानबिनयात नं कांग्रेसं थःगु मू एजेन्डा दयेकाः वयाच्वंगु दु ।
बुढीगण्डकी बहुउद्देश्यीय परियोजना विना प्रतिस्पर्धा चिनियाँ कम्पनीयात बिइगु सरकारी निर्णय व भेनेजुएला प्रकरणय् सरकार व सरकारया नेतृत्वकर्ता दल नेकपां अमेरिकाया विरोध याःगु विषयपाखें नं कांग्रेस असन्तुष्टि जुयाः वयाच्वंगु दु ।
Related
