कृष्ण प्रजापति
० संघनायक भिक्षु अश्वघोष महास्थवीरया कन्हय् अन्तिम श्रदाजलि ।
० शनिवाः सुथय् खिउँसे च्वन, स्वनिगलय् वाफय् व वा वल ।
० कीर्तिपुर महिला महोत्सव : थौं शनिवाः लिपांगु दिं चैत्र २४ व २५ गते ।
० रत्न राज्यलक्ष्मी क्याम्पसय् बि.ए. लय् नेपालभाषा न्ह्यानाच्वन । व
० नेवाः अनलाइन न्यूज न्यादँ क्यंगु लसताय् सकसितं सुभाय् देछात ।
संघनायक भिक्षु अश्वघोष महास्थवीर म्हिगः शुक्रवाः न्हिनय् आकाझाकां मन्त । वसपोल भन्ते तोखाय् च्वंगु ग्राण्डी अन्तर्राष्ट्रिय अस्पतालय् मदुगु खः ।
वसपोल मदुम्ह भिक्षुया पार्थिव शरीरयात येँया ढल्कोय् च्वंगु संघाराम विहाय् हःगु दु । कन्हय् कर्णदीपय् वय्कःया अन्तिम संस्कार जुइगु जूगु दु ।
०००
थौं शनिवाः सुथय् लकस अतिकं खिउँसे च्वनाः भच्चा वा फय् व वा वःगु दु ।
मौसम पूर्वानुमान महाशाखां ब्यूगु जानकारी कथं स्वनिगः लिसें देसया आपालं थासय् वा वइगु व वाफय् वइगु अनुमान पायछि जूगु दु ।
मौसम पूर्वानुमान महाशाखाया मौसमविद् सुवास रिमालया कथं सतहय् पूर्वी वायु व च्वय् वायुमण्डलय् पश्चिम वायुया हुनिं स्वनिगःलिसें देसया थीथी थासय् शुक्रवाः सुथय् वा वःगु खःसा शनिवाः सुथय् नं सर्गः खिउँसे च्वना वा फय् व वा वःगु खः ।
मौसम पूर्वानुमान महाशाखां अझ नं छुं दिं हल्कानिसें मध्यम कथंया वा वयातुं च्वनीगु प्रक्षेपण याःगु दु ।
मौसमविद् रिमालं धयादी, ‘सतहय् पूर्वी वायु व च्वय् वायुमण्डलय् पश्चिमी वायु चलेजूगुलिं देसया आपालं भागय् वा वइगु खनेदु ।’
सतहय् चलेजुइगु प्रि–वायु बंगालया खाडीं वइगु व उज्वःगु वायु नं कुबिइगु जलवाष्पं खसु दयेकेत भूमिका म्हितीगु वय्कःया धापू खः ।
वालिसें फय् वइग्ु सम्भावना नं दूगु मौसम पूर्वानुमान महाशाखां अनुमान याःगु दु । थ्वसिबें न्ह्यः वंगु आइतवाः बारा व पर्साय् आकाझाकां धाकुफय् वयाः २७ म्ह मनूत सीगु खःसा आपालं मनूत घाःपाः जूगु व पक्की छेँ तकं ब्वयेकूगु खः ।
अःखः स्वभावया वायु सक्रिय जूगुलिं निन्हु औसतसिबें अप्वः हे फय् वइगु मौसमविद रिमालं धयादीगु दु । तर, बारा व पर्साय् आइतवाः वःगुथें ग्यायेमाःगु फय् वइगु खतरा धाःसा मदूगु जानकारी बियादीगु दु ।
०००
चैत्र २१ गतेनिसें न्ह्याःगु कीर्तिपुर महिला महोत्सव थौं चैत्र २३ गते शनिवाः लिपांगु दिं खः ।
न्हापांगु दिं चैत्र २१ गते बिहिवाः महोत्सव अवलोकन यायेगु नितिं आपालं मनूत किपुली दुहाँ झाःगु खःसा निन्हुया दिं चैत्र २२ गते शुक्रवाः न्हापांगु दिं स्वयां दबल अवलोकनकर्ता्पिं किपू दुहाँ झाःगु जानकारी महोत्सव ग्वसाः खलः किपू नगरपालिकां जानकारी ब्यूगु दु ।
थौं चैत्र २३ गते शनिवाः कीर्तिपुर महिला महोत्सव ११३९ या दकले लिपांगु दिं खः । ग्वसाः खलकं म्हिगः व म्हीग स्वयां थौं आपालं मनूत किपू दुहाँ वइगु अनुमान याःगु दु ।
किपू नगरपालिका पलिस्था जूगु २३ क्वःगु दँ क्यंगु लसताय् किपू नगरपालिकाया ग्वसालय् न्ह्याःगु कीर्तिपुर महिला महोत्सव किपूया १ वडा, २ वडा, ३ वडा व १० वडा पुलांगु बस्ती दुने सकल त्वाःत्वालय् न्ह्यानाच्वंगु दु ।
किपूया मिसापिन्सं उत्पादन याःगु हलंज्वलंया ब्वज्या लिसें थीथी नेवाः नसाया स्टलत प्रत्येक त्वाःत्वालय् किपूया मिसा पुचः व मां पुचःपिं सक्रिय रुपं जानाः तयातःगु दु ।
थ्वलिसें नेवाः समुदायया परम्परागत तनेधुंकूगु कासा, जन्मंनिसें मृत्यु संस्कारय् छ्यलीगु हलंज्वलंलिसें नेवाः म्हसीकाया लूत महोत्सवय् न्ह्यब्वयातःगु दु ।
लिसें किपूया १ वडाय् लाःगु किपूया दकले तःजाःगु थाय् क्वाःच्व (उमामहेश्वर देगः) परिसरय् तःजिक सांस्कृृतिक व सांगितिक ज्याझ्वः नं न्ह्यब्वयातःगु दु ।
थौं शनिवाः थुगु कीर्तिपुर महिला महोत्सव ११३९ या समापन ज्याझ्वः नं जुइ । समापन ज्याझ्वलय् महिला बालबालिका मन्त्रीलिसें किपूया मेयर, उपमेयर, वडाध्यक्ष, वडा दुजःलिसें प्रतिष्ठित व्यक्तित्वपिनिगु उपस्थिति जुइगु जानकारी ग्वसाः खलः कीर्तिपुर नगरपालिकां जानकारी ब्यूगु दु ।
ग्वसाः खलकं कीर्तिपुर महोत्सवया लिपांगु दिं थौं शनिवाः महोत्सव अवलोकनया नितिं सकलसित इनाप याःगु दु ।
०००
किपू नगरपालिकाया २३ क्वःगु पलिस्था दिवसया लसयताय् किपुली चैत्र २१, २२ व २३ गते कीर्तिपुर महिला महोत्सवया ग्वसाः ग्वःगु खः ।
चैत्र २३ गते शनिवाः उगु महिला महोत्सव क्वचायेवं हे युवा सम्मेलनया तयारी किपू नगरपालिकां याःगु दु ।
किपू नगरपालिकां नेवाः अनलाइनन्यूजयात जानकारी ब्यूगु कथं उगु युवा सम्मेलन चैत्र २४ व २५ गते निन्हुयंकं यायेगु तयारी याःगु दु । उगु युवा सम्मेलनया कजि किपू नगरपालिका ६ वडाया वडाध्यक्ष न्हुच्छेबहादुर महर्जन खः ।
किपूया २ वडा द्यःध्वाखाय् च्वंगु कीर्तिपुर अस्पतालया सेमिनार हलय् निन्हुयंकं न्ह्याइगु उगु युवा सम्मेलनय् मूपाहाँ कथं येँ महानगरपालिकाया पुलांम्ह मेयर केशव स्थापित झाइगु जानकारी ग्वसाः खलः किपू नगरपालिकां ब्यूगु दु ।
निन्हुयंकं न्ह्याइगु उगु युवा सम्मेलनय् प्यंगू थीमय् सहलह जुइगु जूगु दु । शिक्षा, जिविको पार्जन, पर्यटन संस्कृति व स्वास्थ्यलिसें महिला–बालबालिका–ज्येष्ठ नागरिकया विषयस दुग्यंक सहलह जुइगु जानकारी किपू नगरपालिकां ब्यूगु दु ।
उगु सम्मेलनया प्यंगू थीमय् सम्बन्धित विषयगत विज्ञपिनिगु उपस्थितिइ वय्कःपिनिगु पाखें विस्तृत रुपं सहलह जुइगु जूगु दु ।
उगु युवा सम्मेलनय् किपू नगर दुनेया १० गू वडां प्रत्येक वडापाखें निम्ह मिजं व निम्ह मिसा यानाः प्यम्ह प्रतिनिधिपिं दुथ्याकीसा गुगलपाखें १० म्ह प्रतिनिधि दुथ्याइगु जूगु दु ।
अथेहे, उगु युवा सम्मेलनय् किपू नगरपालिका समृद्धिया विषयस टक शो जुइगु जानकारी नं ब्यूगु दुसा उगु टक शोलय् किपू नगरपालिकाया मेयर रमेश महर्जन, उपमेयर सरस्वती खड्का, युवा सम्मेलन कजि ६ वडाया वडाध्यक्ष न्हुच्छेबहादुर महर्जनलिसें थीथी व्यक्तित्वपिनिगु सहभागिता दइगु जानकारी नं ग्वसाः खलः किपू नगरपालिकां ब्यूगु दु ।
चैत्र २४ व २५ गते निन्हुयंकं न्ह्याइगु उगु युवा सम्मेलनय् सकलसित सहभागिताया नितिं ग्वसाः खलः किपू नगरपालिकां इनाप याःगु दु ।
०००
रत्न राज्यलक्ष्मी क्याम्पसमा वंगु माघ १५ महिनानिसें निरन्तर रुपय् बि.ए. न्हापांगु व निगुगू तगिं कक्षात सुथसिया करिब ८ ताः इलंनिसें ९ः४५ ताः ई तक्क मदिक्क नेपालभाषा कक्षा न्ह्यानाच्वंगु दु ।
थुगु बिषययात कयाः जुग छगू ज्याझ्वलय्नेपाल भासा अभियान्ता रीदेन महर्जनं थःगु जीवनयाहे दकले तःधंगु एतिहासिक सफलता जूगुलि लसता प्वंकादील । थनतक्क थ्यंकेत सकल नेपालभाषा ब्वनामि पासापिनिगु ज्वमदु योगदान दुगु बिचाः प्वंकादिल ।
अभियान्ता प्रशान्त डंगोलं मातृभाषा ल्यंकातयेत हिचेकिचे मजुसें थुगु अभियानय् सकलसिन पलाः तयेमाःगु विचाः प्वंकादिल ।
राष्ट्रिय कासामि सेर्पाता लिसें थुगु कलेजय् बि।ए। न्हापांगु तगिमय् नेपाल भाषा आखः ब्वनादिम्ह सुमित्रा डंगोलं स्कुलय् नेपाल भासं आखः ब्वने मखंसा थन कलेजय् सुव्यवस्थित ढंगं आखः ब्वंनेखना गर्व जुगु बिचाः प्वंकादिगु दु ।
रत्न राज्यलक्ष्मीका क्याम्पस सहायक गोविन्द आचार्य स्वनिगःया कला कृतिया ल्यंकातयेगु नितिं जक मखु पुनः स्थापना व नेवाः संस्कृतिया मलजल यायेगु नितिं हे थौंस्वया स्वदँ प्यदँ न्ह्यः नेपाल भासा ब्वंकेगु मजूसानं ब्वनामिपिं अप्वया च्वंगु हुनिं हानं कक्षा संचालन यानाःगु जानकारी बियादिल ।
नीन्यादँ न्ह्यःनिसें नेपाल भाषा आखः ब्वंका वयादीम्ह शिक्षक प्रां डा.चन्द्रमान बज्राचार्यं ल्याय्म्ह ब्वनामिपिनीगु पाखें नेवाः न्ह्यलुवाः नेतातय्सं व थौंया नेवाः समाज पाखें वय्कः पिनिगु पाखें ज्ञान कया नेपाल भाषा उत्थानया खँय् पलाः तयेमाःगु दु युवा ब्वनामिपिं सकलसिगु नितिं छगू प्रेरणा स्रोत जूगु दुगु खँ कनादिल ।
अथेहे अभियान तालाकेत नेपाल भासा सेभिङ्ग एडुकेशनल मुभमेन्टया मनिसकुमार श्रेष्ठ, नेपाल भाषा शिक्षक, शिक्षिकापिं नानी हेरा प्रजापति, श्रीमिला सुवाल, मदनसेन बज्रार्चाय, अनेरास्वबियू केन्द्रिय सदस्य व स्ववियू सह सचिव इन्द्रहांग राई, क्याम्पस कमिटी अध्यक्ष व स्ववियूया उपसभापति श्रीकृष्ण उप्रेति स्वबियू नेतापिं, पाटन संयुक्त क्याम्पस, नेपालभाषा केन्द्रिय विभाग, यल, लिसें सकल भाषा अनुरागीपिं विशेष ग्वाहालि, सल्लाह सुझाव कथं न्ह्यानाच्वंगु थुगु कलेजय् थौंकन्हय् मुक्क यानाः २५ म्हति नेपाल नेपाल भासा ब्वनामि दुगु कलेजय् नेपालभाषा ब्वनामिपिं अप्वयाच्वंगु दु ।
०००
थौं शनिवाः हिनयय् ३.३० बजेय् असनय् द्यः ल्वाकुगु दु ।
वटुया लुँमरी अजिमा (वचुगु तपुलि) , टेवहाःया लुँमरी अजिमा (म्हासुगु तपुलि) व कंग अजिमा (ह्याउँगु तपुलि) न्हापां वटुया लुँमरी अजिमा व टेवहाःया लुँमरी अजिमा खतय् तयाः बिज्याकुगु खः ।
थथे असनय् द्यmत बिज्याये धुंकाः कंग अजिमाया द्यखतं स्वचा चाहिला चिलाख हिलाबुला याःगु खः ।
थुकियात हे द्यः ल्वाकेगु धकाः धायेगु याइ । असंया भिंतुना गुथिपाखें चतांमरी ह्वलेगु याःगु खः ।
०००
एड जोन प्रा.लि. पाखें न्ह्याकाच्वंगु नेवाः अनलाइन न्यूज न्यादँ क्यंगु लसताय् नेवाः अनलाइन न्यूजं ग्वाहालि यानादिपिं सकसितं सुभाय् देछागु दु ।
एड जोन प्रा.लि.थौं शनिवाः छगू सुभाय् पौ पित ब्यूसें थथे सुभाय् देछागु खः ।
नेपालभाषाया माध्यमं राष्ट्रिय, अन्तर्राष्ट्रिय लिसें भाषा, जाति, साहित्य कला मनोरजन व संस्कृति ख्यःया बुखँ, विचाः लिसें च्वसू न्ह्यब्वयाः वयाच्वंगु नेवाः अनलाइन न्यूज न्ह्यानाच्वंगु थौं शनिवाः चौलाथ्व पारुया दिं प्यदँ फुनाः न्यादँ क्यन ।
थुकिया दथुइ थुगु न्यूज पोर्टल नेपालभाषाया मू न्यूज पोर्टल जुइत ताःलाःगु दु । नेवाः अनलाइन न्यूज स्वयाः ब्वनादीपिं विज्ञापन बियादीपिं, बुखँ बियादीपिं, च्वसू च्वयादीपिं सकलसित तिबः, ग्वाहालि व हःपालं जक थ्व सफलता चूलाःगु खः ।
थुगु लसताय् वय्कःपिं सकसितं नेवाः अनलाइन न्यूजपाखें आपालं आपाः सुभाय् देछानाच्वना ।
नेपाःया मूलधारया संचारमाध्यमं झीगु भाषा, साहित्य, तजिलजि लिसें मुद्दाय् झीगु थीथी गतिविधि व झीगु सरोकारया मुद्दा न्ह्यमथनीगु जूगुलिं हे झीसं झीगु भाषाया माध्यमं हे पत्रकारिता यानाः वयाच्वनेमाःगु खः । थुकिया नापं डिजिटल युगय् झीगु भाषाया नं डिजिटल पत्रिकाय् म्होति पूवंकेगु नं थुकिया आज्जु खः । थ्वहे मू निजाति खँयात नेवाः अनलाइन न्यूजं कुबियाः न्ह्याः वनाच्वंगु खः ।
नेपालभाषाया पत्रकारिता ख्यःयात अझ तब्या यानाः यंकेत झी अझ नं निरन्तर रुपं न्ह्याः वनेमाःगु दु । थुकिया झ्वलय् थुगु पोर्टलया साइट नं छुं न्हि न्ह्यः तिनि छु भचाः अपग्रेड यानागु जुल ।
नेवाः अनलाइन न्यूजयात अझ ग्यसुग्यंक न्ह्याकाः यंकेगु नितिं सकसिगु ग्वाहालि, तिबः व हःपाः निरन्तर रुपं दयाच्वनी धइगु भलसा कयाच्वना ।
नेवाः अनलाइन न्यूज थन तक थ्यंकेगु नितिं ग्वहालि यानादिपिं सकसितं हानं छकः आपालं आपाः सुभाय् देछानाच्वना । लिसें छु न्हिं लिपा न्यादँ क्यंगु लसताय् ज्याझ्वः यायेगु तयारी जुयाच्वंगु दु ।
०००
मां भाय् पुचः यलया ग्वसालय् शुक्रवाः लिपिविद्, पुरातत्वविद्, बौद्धकलाका अन्वेषक, भाषाथुवाः पं। हेमराज शाक्यया झ्वाता व ल्वं पौ मूपाहाँ यल महानगर प्रमुख चिरिबाबु महर्जन उलेज्या यानादीगु खः ।
हेरारत्न शाक्यया नायःसुइ रामहरि कपालीं न्ह्याकादीगु उगु ज्याझ्वलय् मूपाहाँ महर्जनं पं। हेमराज शाक्यया कृतिया नापं मेमेगु अध्ययनमूलक महत्व जाःगु ज्वलंत मुंकेगु नितिं यलय् सफू धुकू नीस्वनेगु व थुगु शैक्षिक सत्रय् नेपालभाषाया माध्यमं ब्वंकीगु निगू ब्वनेकुथि चायेकेगु नगरसभां क्वःछ्यूगु खँ कनादिल ।
पं हेमराज शाक्यं भाषिक, लिपि, पुरातात्विक, बौद्धिक, अन्वेषण क्षेत्रय् बियादीगु योगदानबारे प्रा। प्रेमशान्ति तुलाधरं चर्चा यानादिल ।
विशेष पाहाँ शताब्दिपुरुष सत्यमोहन जोशी लगायत ज्याझ्लय् ३ नं। प्रदेशया सभासद शोभा शाक्य, नेवाः देय् दबूया नायः नरेश ताम्राकार, नेपालभाषा मंकाः खलः यलया नायः ऋषि प्रसाद श्रेष्ठ, शाक्य सुरेन, हेराकाजी महर्जन, चन्द्र लक्ष्मी शाक्य, राजेन्द्र शाक्य, सुरेन्द्र शाक्य लगायत पत्रकार, साहित्यकारपिसं ब्वतिकायादीगु खः । ज्याझ्लय् ब्वतिकायादीपिं सकसिनं शाक्यया झ्वातालय् स्वां छायादिसें पाहाँपिसं थःथःगु नुगःखँ तयादीगु खः । उगु हे ज्याझ्वलय् झ्वाता दयेकादीम्ह मूतिकार प्रकाश शाक्ययात मूपाहाँ महर्जनं हनापौ लःल्हानादीगु खः ।
Related
