बौद्ध विद्धान, नेपाःया भिक्षु संघया पुलांम्ह नायः संघमहानायक भिक्षु अश्वघोष महास्थवीरया थौं आइतवाः अन्त्यष्ठी जुल ।
वसपोल भिक्षु वंगु शुक्रवाः ९३ दँय् मदुगु खः । नेपालय् आःतक दुपिं मध्ये दकले थकालीम्ह भिक्षु अश्वघोष महास्थवीर खःसा वसपोल थथे मदयेवं अन्तिम श्रद्धाञ्जलिया नितिं शुक्रवाः हे येँया ढल्कोय् च्वंगु संघाराम विहारय् बिज्याकूगु खः ।
उगु विहारय् वसपोलप्रति थीथी संघसंस्थाया लिसें हनेबहःपिं व्यक्तिपिन्सं भावपूर्ण श्रद्धाञ्जलि देछाःगु खः ।
थौं आइतवाः वसपोलया शवयात्रा न्हिनसिया १ ता इलय् संघाराम विहारं न्ह्याकूगु खःसा वसपोल भिक्षुया शवयात्रा धुंकाः येँया लुतिया कर्ण दीपय् थेरवाद बौद्ध संस्कार कथं दाहसंस्कार यात ।
चैत्र २३ गते बिहिवाः न्हिच्छि अन्तिम दर्शनया नितिं मदुम्ह अश्वघोष महास्थवीरया पार्थिव शरीर संघाराम विहारय् तःगु खः ।
मदुम्ह भिक्षु अश्वघोष महास्थवीरया शवयात्रा व दाहसंस्कार ज्याझ्वलय् ब्वति कायेत बौद्ध संघसंस्था, उपासक उपासिकालिसें सकल सर्वसाधारण व संघसंस्थात सहभागी जूगु खः ।