कृष्ण प्रजापति
० बिस्काः जात्रा जःछि वा जक वयाः थुगुसी ख्वपया बिस्काः जात्रा प्रभावित
० पोखराय् बम निष्क्रिय यायेगु झ्वलय् छम्ह सैनिक घाःपा ।
० बन्दया झ्वलय् सवारी साधनय् मिं, सक्वःदेय् कन्हय्निसें बज्रयोगिनी, व
० नांजाःम्ह पत्रकार पुष्करलाल श्रेष्ठया अन्तिम संस्कार क्वचाःल ।
विश्व सम्पदा दिवसया लसताय् ख्वपय् ख्वप नगरपालिकाया ग्वसालय् थौं सुथय् नगरपालिकाया थःगु हे सभाकक्षय् प्रवचन ज्याझ्वः जुल । प्रवचन ज्याझ्वःया मूपाहां नेपाल मजदुर किसान पार्टीया केन्द्रीय सचिव सांसद प्रेम सुवालं विज्ञान व प्रविधिया विकासयात जनजीवन नापं स्वाना वनेमाःगु तथ्य न्ह्यब्वयादिसें मनू हे फुक्कं खँया निर्णय याइपिं प्राणी जूगु ल्याखं अन्धविश्वासयात बधावा बिये मजिउगु खँ स्पष्ट यानादिल । वय्कलं युनेस्को सिरपा त्याकातःगु ख्वप देय्यात कुतः यात धाःसा अन्तर्राष्ट्रिय पर्यटक लागा दयेकेत थाकु मजुइगु खँ कनादिल ।
ख्वप नगरपालिकाया मेयर सुनिल प्रजापतिं थःपिसं ८५ गू सम्पदाया निर्माण क्वचायेके धुंगु व ३२ गू निर्माणाधिन अवस्थाय् दनिगु कनादिसें लोप जुजुं वनाच्वंगु सम्पदाया नं छगू छगू यायां संरक्षण याना वनेगु कनादिल । उगु ज्याझ्वलय् प्रा. डा. पुरुषोत्तमलोचन श्रेष्ठं नेपालमण्डलया सम्पदातय्सं अन्तिम सास ल्हानाच्वंगु थःत अनुभूति जुयाच्वंगु खँ कनादिसें आः ख्वप नगरपालिका लगायत थीथी संघ संस्था जनाः धमाधम ज्या याना वनेगु खत धाःसा विश्व सम्पदा स्थल कामय जुयाच्वंगु ख्वप देय्यात अझ पर्यटकीय गन्तब्य स्थल दयेके फइगु धारणा न्ह्यब्वयादिल । उगु ज्याझ्वलय् थःगु प्रस्तुति न्ह्यब्वयेगु झ्वलय् ख्वप नगरपालिकाया उपमेयर रजनी जोशीं आः ख्वपयात पुनः निर्माणया लागाय् न्ह्यलुवा नगर दयेकेगु कनादिल ।
ख्वप नगरपालिकाया मेयर सुनिल प्रजापतिया सभापतित्वय् जूगु उगु ज्याझ्वलय् सम्पदा उपशाखाया प्रमुख रामगोविन्द श्रेष्ठं लसकुस यानादीगु खःसा ज्याझ्वः ९ वडा अध्यक्ष रविन्द्र ज्याख्वलं न्ह्याकादीगु खः ।
०००
बारम्बार वा जक वःगु कारणं थुगुसी बिस्काः जात्राया फुक्कं धइथें विधि विधान व पर्वत प्रभावित जूवंगु दु । आपालं वा वःगु हे कारणं इलय् खः ल्वाकेगु जात्रा याये मफुत । अझ छन्हुन्ह्यः जक मखुगु खःसा थुगुसी बाराहीया तिंप्वाः जात्रा हे प्रभावित जुइगु खः । तिंप्वाः जात्रा यःसिं थनेकथं याइगु खः । चैत ३० गते बहनी यःसिं थनेवं बाराही द्यःया थासं पीठय् खतय् तयाः बाराही द्यःयात बिज्याकीगु खः । थ्व जात्रा याइबलय् तां मवंसें खुसिं वनीगु खः । द्वलंद्वः मनूत धुं धुपाँय् च्याकाः वंगु उगु जात्रा क्वचाःगु नीप्यघौ हे मजाबलय् वंगु असार २७÷२८ गते थेंज्याःगु हे तःबाः यानाः खुसिबाः वःगु कारणं खुसि छियाः द्यः यंकेगु सम्भावना हे मदयावंगु खः ।
अथेहे वाः तसकं वःगु कारणं यःसिं थने धुंका भैलः खः व नकीजु खः धयातःम्ह भद्रकालीया खः ल्वाकेगु जात्रा नं मजुल । गःहितिइ निगुलिं खः सालाः हयेकथं भैरव व भद्रकालीया समागम कथं खः ल्वाकीगु खः । तर वा वःगुलिं १ गते खाइसन्हुकुन्हु यायेमाःगु जात्रा वयां सतिकुन्हु २ गते बहनी तकं जुइमफुत । २ गते भैलःखः जक गःहितिइ साला हयेफुगु खःसा नकींजु खः यःसिं ख्यलय् हे लानाच्वंगु इलय् तसकं प्वँ वा वःगुलिं मनूत जात्रा हे त्वता वंगु खः । ३ गते जक नकिंजु खः सालालिं खः जात्रा क्वचायेकूगु दु । आः बल्ल भैलः खतय् च्वंम्ह भैलःखःयात लाकौलाछेँया द्यःछेँय् तयेयंकूगु दु । द्यः अथें भैलःखतय्सं लागुलिं थुगुसी न्हूम्ह बेताल भैरव तःम्ह नारायणप्रसाद खाइतु स्वन्हु तकं द्यः पिया द्यनेमाःगु स्थितिइ वःगु खः ।
भैलः खः न्हापांगु दिं चैत २७ गते नं थाते लाके मफया इनाचोय् हे द्यः पिया द्यनेमाःगु खः । सातिकुन्हु जक सुथय् ९ बजे गःहितिइ थाते लाकूगु खः । भैलःखः सालेगु झ्वलय् वा वःगु कारणं भैलःखःया चक्का च्वनीगु लँय् प्लाष्टिक व फोहरया डंकुर थानाच्वंगु अवस्था वःगु खः । तसकं वा वःगु कारणं महालक्ष्मी व महाकालीया खः जात्रा नं प्रभावित जूगु खः । बिस्काः जात्रां थथे तसकं वा वया थीथी जात्रा प्रभावित जूगुलिं थुगुसी द्यः सगं बीगु दिन थौंकुन्हु छुं नं त्वालं द्यःयात ब्वः छायेगु तकं मयासें जात्रा क्वचाःगु दु ।
थौं थःने व क्वनय् भैलःखः सालेगु ज्या जुयाच्वंगु दु । थ्वयां न्ह्यः थौं हे सुथय् ल्हाः मदुम्ह यःसिं धयातःम्ह तालाक्वः त्वाःया कुम्हातय् यःसिंद्यः क्वथलेगु ज्या जुल । सुथय् साधे १० बजे उगु यःसिंद्यः क्वथःगु खँ धाःगु दु । आः गःहितिइ दिकातःगु भैलःखःयात सालाः थःने व क्वने सालाच्वंगु दु । थौं हे भैलःखः टौमढीइ थाते लाकेवं जात्रा क्वचाइगु व द्यः थहां बिज्याइ । थ्वयां लिपा फुक्कं बिस्काः जात्राया मू पर्वत क्वचाइगु ज्याझ्वः दु ।
०००
कन्हय् ल्हुति पुन्हि, नीनिधाः हितिइ मेला । ल्हुतिइ मेला जुइगु दिं जुयाः ल्हुति पुन्हि धायेगु याःगु खः ।
कन्हय्ं मनूत ल्हुतिइ नीनिधाः हितिइ म्वःल्हुयाः ,ख्वाः सिलाः जामाच्व गःवनेगु याइ ।
’मन्नादी’ देवीया जन्म जूगु बिश्वास कथं मिसातय्सं नीनिधाः हितिइ म्वःल्हुयाः अन हे दुम्ह मन्नादी देवीयात पुज्याःसा पुण्य लाइगु जनबिश्वास दया वयाच्वंगु दु । अथे हे अनया नीनिधाः हितिइ म्वःल्हुइबलय् ल्वय् आदि नाश जुइगु जनविश्वास दु ।
०००
नेत्रविक्रम चन्द्र (बिप्लव) थौ बिहिवाः याःगु नेपाल बन्दया याःगु झ्वलय् छम्ह सैनिक घाःपा जुगु दु । पोखराय् थौं सुथय् तयातःगु बमयात निष्क्रिय यायेगु झ्वलय् थथे घाःपा जुगु खःसा थथे घाःपा जुम्ह सैनिकयात वासः यायेगु नितिं येँ हःगु दु ।
उगु बम पाखें कालीभञ्याङ गण रत्नमन्दिर पोखराया नायक धर्मबहादुर थापाया खव ल्हातय् क्षति जुगु दु ।
थों सुथय् थथे बम पोखराया नदीपुर प्रदेशसभा सःतिगु सतकय् तयातःगु खः ।
०००
नेपाःया न्हापांगु भूउपग्रह ‘नेपाली स्याट–१’ सफलता पूर्वक प्रक्षेपण याःगु दु ।
नेपाली विज्ञान प्रविधिया इतिहासय् दकलय् न्हापां भूउपग्रह थौं बिहिवाः सुथय् २ः३१ बजे संयुक्त राज्य अमेरिकाया भर्जि्निया राज्य पाखें नेपाली स्याटेलाइट अन्तरिक्षमा प्रक्षेपण याःगु खः ।
नेपालं थथे थःगु स्याटेलाइट भूउपग्रहया प्रक्षेपण यायेवं नेपाः स्याटेलाइट प्रक्षेपण याःगु देय्या धलखय् लाःगु दु ।
नेपाःया स्याटेलाइट सफलता पूर्वक प्रक्षेपण याःगु नेपाल विज्ञान प्रविधि प्रज्ञा प्रतिष्ठान (नास्ट) या प्र्वि्धि सङ्काय प्रमुख रवीन्द्रप्रसाद ढकालं जानकारी ब्यूगु दु । वयकःया कथं भूउपग्रह आः आकासय् थ्यंगु व कन्हय् सुथय् ३ः३० बजे आइएसएस डकिङ ‘अन्तर्रा्ष्ट्रिय अन्तरिक्ष केन्द्र’ स्वइगु खँ धाःगु दु ।
०००
विप्लव पुचः नं याःगु थौंया नेपा बन्दया झ्वलय् हेटौँडाय् अज्ञात पुचलं हेटौँडा येँ त्रिभुवन राजपथ लाःगु थाहा नपा वडा नं ४ दामन सतिगु येँ नं हेटौँडा वनाच्वंगुस ना २ च ९०९४ नंया सामान ल्हइगु सवारी साधनय् मिं तयाब्यूगु दु ।
अथे हे हेटौँडा पाखें भीमफेदी जुयाः थाहा नगरपालिका पाखे वनाच्वंगु ना ४ ख ७९६० नंया मिनी ट्रकय् भीमफेदी गाउपालिका–९ गोलमोडय् मिं तया क्षति याःगु दु ।
अथे हे हेटौँडा उपमहानगरपालिका–८ कमानेय् वडा कार्यालय न्हयःनेया सडकय् तयातःगु प्रेसरकुकुर बम व हेटौँडा नारायणगढ सडकखण्डया हेटौँडा उपमहानगरपालिका–१८ या तिनताप्क सडकय् तयातःगु प्रेसरकुकुर बमयात नेपाली सेनाया बम डिष्पोज टोली निष्क्रिय याःगु जिल्ला प्रहरी कार्यालय मकवानपुरं जानकारी ब्यूगु दु । बन्दया कारण जिल्लाया यातायात, कलकारखाना, शैक्षिक संस्था थप्प जुगु दु ।
०००
नेपाः ऐतिहासिक व सांस्कृतिक शहर सक्वय् कन्हय् निसें च्यान्हू तक बज्रयोगिनी जात्रा न्हयाइगु जुगु दु ।
वैशाख ६ निसें न्हाइगु जात्राय निति न्याम्ह थकाली गुर्जु लिसें स्थानीय नगरवासीया पाखें मूल बज्रयोगगिनी द्यःयात दा, ग्वय व स्वयम्भू चैत्य लःल्हाना ब्वनीगु परम्परा दु । थ्व जात्रा स्वद्व न्हयः निसें न्हयागु धर्मग्रठय् न्हयथंनातःगु दु ।
०००
२२ सय मिटरया दुरीइ निगू विश्व सम्पदा क्षेत्र स्वयम्भू व हनुमानध्वाखा दरबार क्षेत्रयात सम्पदा पदयात्रां स्वायेगु गुरुयोजना थौं छगू ज्याझ्वःया दथुइ येँ महानगरपालिकाया मेयर बिद्यासुन्द शाक्य, प्रतिनिधि सभाया सांसदपिं कृष्णगोपाल श्रेष्ठ, ३ न. प्रदेश सभाया सांसदपिं राजेश शाक्य, अजय शाक्यपिं व येँया ३२ गू वडाया वडा अध्यक्षपिन्सं बिमोचन याःगु दु ।
थौं बिहिवाः विश्व सम्पदा दिवस २०१९ या लसताय् लाकाः स्वयम्भू भुइख्यःनिसें हनुमानध्वाखा दरबार क्षेत्रतक ¥याली याःगु खः ।
¥याली सांस्कृतिक बाजा, थीथी सघ सस्थाया ब्यक्तिपिं उपस्थित जुगु खः ।
येँ महानगरपालिकाया सम्पदा व पर्यटन समित व हलुमानध्वखा दरवार संरक्षण कार्यक्रमया ग्वसालय् जुगु थौंया सम्पदा पदयात्रां येँ महानगरया मूर्त व अमूर्त सम्पदातय्गु म्हसीका, पुस्तान्तरण व सम्बर्द्धनया ज्याय् नं सहायकसिद्ध जुइगु विश्वास यासें पदयात्राया २.२ किलोमिटर दुरी दुने दूगु थ्यंमथ्यं २० गू महत्वं जाःगु सम्पदास्थलया अवलोकन यायेगु ज्या नं याःगु खः ।
०००
नांजाःम्ह पत्रकार पुष्करलाल श्रेष्ठया अन्तिम संस्कार थों बुद्धवाः पसुपति आर्यघातय् क्वचाःगु दु । ताःई न्ह्यःनिसें म्हं मफयाः येँया नर्भिक अस्पतालय् वासः याकाः च्वनादीम्ह भाजु श्रेष्ठ थौं सुथय् ११ः३९ ता इलय् मदूगु खः ।
मदुम्ह श्रेष्ठयात वयकःया काय् दिरेकलाल श्रेष्ठ मिं तःगु खः ।
पत्रकार श्रेष्ठयातनेपाःया सिने पत्रकारिताया न्हापांम्ह पत्रकार कथं कायेगु याः ।
नेपाल समाचारपत्रया प्रधान सम्पादक, अथेहे, साधना लय् पौया सम्पादक जुयाः ज्या यानाः वयाच्वनादीम्ह श्रेष्ठ पूर्व प्रेस काउन्सिलया दुजः नं खःसा अथेहे, थीथी सामाजिक संस्थाया आबद्ध व्यक्ति खः ।
वय्कः स्यस्यः समाजया दुजःलिसें नांजाःम्ह टेनिस कासामि नं खः । छुं दँ न्ह्यः जक वय्कःया आत्म वृतान्त सफू कलम पिदंगु खः । गुगु सफू पत्रकारिता ख्यलय् हे अतिकं बय् बय् जूगु सफू खः ।
०००
वंगु चौलाथ्व अस्तमिनिसें न्ह्याःगु येँया ऐतिहासिक तःधंगु जात्रा जनबहाःद्यःया रथजात्राया झ्वलय् म्हिगः मंगलवाः येँया लगमय् च्वंगु मांसिमा स्वचाः चाःहिइका जनबहाःद्यःया जात्रा क्वचाःगु खःसा थौ बुद्धवाः रथं क्वत बिज्याका जन बहालय् बिज्याकुगु दु ।
लगमं निसें तःजिक जात्रा यानाः थथे जनबहालय् बिज्याकुगु खः ।
वंगु चेत्र ३० गते निसें न्ह्यागु जात्रा थौं जनबहालय् जनबहा दः लित बिज्याके धुंकाः थुगु जात्रा क्वचाःगुगु दु ।
०००
नेपाःया कुमारी संस्कृति बारे विदेशय् नं प्रचार यायेगु ताः तयाः पुलांम्ह कुमारी (निवर्तमान) माजु मतिना शाक्य म्हिगः रूसया राजधानी मस्को झाल । वय्कःया लिसें बौ प्रतापमान शाक्य व मां सुनिता शाक्य नं झाःगु खः । वय्कःपिनि थ्व मस्को यात्रा करिब झिन्हुया जुइगु खँ धाःगु दु ।
पुलांम्ह कुमारी माजुयात न्ह्यःने तयाः नेपाःया कुमारी संस्कृति बारे अन चर्चा परिचर्चा याइगु खँ वय्कःया बौ प्रतापमान शाक्यं कनादिल ।
अन पुलांम्ह कुमारी माजुं थः कुमारी जुयाबलय्सिया अनुभव अन कनादीगु नं ज्याझ्वः दु । रूसया लागिं नेपाली राजदूतावासं उगु ज्याझ्वःया आयोजना याःगु खः । वय्कःपिंत अन ब्वनेगु ज्या नं नेपाली राजदूत ऋषिराम घिमिरेया हे पहलय् जूगु खः ।
मस्कोय् अन हे च्वंपिं रूसी संस्कृतिविद् व अध्येतातय् दथुइ कुमारी संस्कृति बारे चर्चा परिचर्चा जुइगु ज्याझ्वः दु । उकी मस्कोय् च्वंपिं मेमेगु देशया विद्वानतय्सं नं ब्वति काइ । अथे हे अन च्वंपिं नेपाःमि सहित वर्तमान कुमारीया किपा न्ह्यःने तयाः पूर्व कुमारीया पुजा यानाः प्रसाद ग्रहण याइगु नं ज्याझ्वः दु । थ्व ज्याझ्वलं विदेशय् नं कुमारी संस्कृति बारे प्रचार जुयाः कुमारी माजु प्रति आस्था अप्वइगु आशा यानातःगु दु ।
