भाजु पुखू येँया न्हूपुखू स्वयां न्यासः दँ पुलांगु जूगु विज्ञ पुचःया धारणा

कृष्ण प्रजापति
ख्वप । ख्वप नगरपालिका वडा नं. १ य् च्वंगु ऐतिहासिक भाजु पुखू येँय्या लानि पूखू धयातःगु न्हूपुखू स्वयां न्यासः दँ पुलांगु जूगु विज्ञतय्सं पत्ता लगे याःगु दु ।

लच्छिया लागिं धकाः अध्ययन याकेत ख्वप नगरपालिकां प्रा. डा. पुरुषोत्तमलोचन श्रेष्ठया नेतृत्वय् खुला न्ह्यः दयेका बिउगु विज्ञ पुचलं उगु पुखूया स्थलगत अध्ययन यायेधुंकाः थौं सार्वजनिक याःगु प्रतिवेदनय् स्वसः दँ पुलांगु जुइगु अनुमान यानातःगु उगु पुखू च्यासः दँ पुलांगु जूगु प्रमाणत प्रशस्त हे लुयावःगु विज्ञतय्सं धाःगु दु ।
ख्वप नगरपालिकाया सभाकक्षय् थःपिसं तयार याःगु कार्यदलया ८१ पृष्ठ तःपंगु प्रतिवेदन बारे सार न्यंकादिसें प्रा.डा. पुरुषोत्तमलोचन श्रेष्ठं थ्व पुखू ख्वप नगरयात राजधानी नगर कथं विकास यायेगु सुरु जूगु इलय् हे तयार यानाःतःगु जलेश्वरया देगः पुखूया दथुइ तयाः दयेकातःगु सेनां घेरा यानाः बल्लाक निर्माण यानातःगु दरवार लागाया छगू नमूना खः धयादिल ।

ज्याझ्वःया मूपाहां नेमकिपाया सचिव व सांसद प्रेम सुवालं भाषा, संस्कृति व ललितकलाया विकास यायेगु स्थानीय निकायया ज्याय् ख्वप नगरपालिकां ऐतिहासिक भाजु पुखू पुनः निर्माण यानाः नमूना क्यनेत्यंगु खँ कनादिल ।
ख्वप नगरपालिकाया मेयर सुनिल प्रजापतिं सभापतिया थासं न्ववासें २०५९ सालं ख्वप नगरपालिकां सुरु याःगु उगु पुखूया जिर्णोद्वारया ज्या हाकनं थगुने जेठं थःपिं नगरपालिकाय् त्याना वयेधुंकाः छगू प्रतिष्ठाया विपय दयेका ज्या न्ह्याकेत्यनागु खँ कनादिल ।

खुला बिक तयार याःगु प्रतिवेदन तसकं उपयुक्त ढंगं वःगु खँ ख्वपया प्रमुख जिल्ला अधिकारी नारायणप्रसाद भट्टं कनादिल । उगु अन्तक्र्रिया ज्याझ्वलय् पुरातत्व विभागया महानिर्देशक भेषराज दाहाल, गुथि संस्थानया पुलांम्ह महानिर्देशक लक्ष्मणराज ज्ञवाली, गुथि संस्थानया निर्देशक मीनराज चौधरी, संस्कृतिविद् तेजेश्वरबाबु ग्वंगः, स्मारम संरक्षण तथा दरवार हेरचाह अद्दाया प्रमुख कल्पना प्रजापति, प्रेमसिं बस्नेत लगायतं थः थःगु धारणा न्ह्यब्वयादिल ।