कृष्ण प्रजापति
० हलिं नेवाः तःमुँज्याया लसताय् शनिवाः बसन्तपुरं सांस्कृतिक ¥याली ।
० नेकपा विप्लवया कोशी ब्युरो इञ्चार्जलिसें निम्ह गिरफ्तार ।
० बैंकिङ्ग कसुर मुद्दा : १३ म्हेसित अदालतय् हाजिर जुइत नोटिस ।
० निम्ह मिसातय्त वैदेशिक रोजगारी व अपहरणय् नोटिस । व
० यलय् कला महोत्सवया प्रचार, साईकल ¥याली, महोत्सवय् विविध पक्ष । विश्व न्यंकया नेवाःतय्गु अन्तर्राष्ट्रिय संगठन हलिं नेवाः दबूया स्वक्वःगु महाधिवेशन थ्वहे वइगु चैत्र १४, १५, व १६ गते येँय् जुइत्यंगु दु ।
थ्व हे झ्वलय् हलिं नेवाः दिवस चैत्र १६ गते शनिवाः बसन्तपुरं तःजिक संस्कृतिक ¥याली यायेत्यंगु दुसा ज्यापु महागुथि नेपाःया संयोजनय् सांस्कृतिक ¥याली याइगु जूगु दु ।
थ्वहे झ्वलय् म्हिगः सोमवाः ज्यापु महागुथि नेपाः येँ महानगर समितिया ग्वसालय् ६३ त्वाः दथुइ विशेष सहलह मुँज्या जूगु दु ।
येँ महानगर समितिया नायः बावुराजा मर्हजनया सभापतित्वय् जूगु उगु सहलह मुँज्याय् ज्यापु महागुथि नेपाः केन्द्रीय समितिया नायः लोककवि राजभाइ जकःमि हलिं नेवाः तःमुँज्या ग्वसाःखलःया दुजः व महागुथिया न्हापाम्ह केन्द्रीय न्वकू सत्यनारायण डंगोल व ज्यापु संस्कृति विकास कोषया नायः मंगलकृष्ण सिंहपिन्सं विश्वया नेवाःत छधी छपँ जइमाःगु खँय् बः बिसें सांस्कृतिक ¥याली तःजिक झःझः धायेक न्ह्याकेया निंतिं महागुथि विशेष भूमिका म्हितेमाःगु खँय् बः बियादिल । येँ महानगर समितिया न्वकू ज्ञानीबाबु सिहं न्ह्याकादीगु सहलह मँुज्याय् छ्याञ्जे सानुबाबु प्रजापतिं लसकुल न्वचु बियादीगु खः ।
उगु सहलह मुँज्यांय् सांस्कृतिक ¥याली तःजिक यायेगु व ¥याली ज्यापु समुदायया नापनापं सकल नेवाः समुदायया बाजं सहभागी लिसें स्वनिगःया थीथी लागां प्रतिनिधिमुलक सहभागी याकेगु निंतिं विशेष भूमिका म्हितेगु खँय् नं सहलह जूगु दु ।
०००
नेत्रविक्रम चन्द विप्लव नेतृत्वया प्रतिबन्धित नेपाल कम्युनिष्ट पार्टी (नेकपा)या कोशी ब्युरो इञ्चार्ज घनश्याम श्रेष्ठ पुष्करलिसें निम्ह गिरफ्तारीइ लाःगु दु । इञ्चार्ज श्रेष्ठलिसें आकाश शर्मा मोरङं गिरफ्तारीइ लाःगु खः ।
कोशी इञ्चार्ज घनश्याम श्रेष्ठ पुष्कर व आकाश शर्मा गिरफ्तारीइ लाःगु प्रहरीं धाःसा पुष्टि याःगु मदुनि । व, थुकिया विस्तृत विवरण वये ल्यंदनि ।
थ्वसिबें न्ह्यः प्रहरीं नेकपा विप्लवया मध्यकमाण्ड इञ्चार्ज हेमन्तप्रकाश ओलीलिसें गुम्हेसित गिरफ्तार याःगु खः ।
कोशी इञ्चार्ज घनश्याम श्रेष्ठ पुष्कर माओवादी जनयुद्धया इलय् ब्युरो दुजः खः । शान्ति प्रक्रियाय् वयेधुंकाः श्रेष्ठं मिर्मिरे एफएमया प्रशासनिक जिम्मेवारी तकं कःघानादीगु खः ।
०००
सर्वोच्च दालतं बैंकिङ्ग कसुरया द्वपं लाःपिं थीथी फाइनान्सया संचालकतकं यानाः १३ म्हेसित १५ न्हुया दुने अदालतय् हाजिर जुइत सोमवाः सुचं सार्वजनिक याःगु दु ।
येँय् संचालित जनरल फाइनान्सया तत्कालीन दुजः उमेश श्रेष्ठ, तत्कालीन सुपरभाइजर सरस्वती भट्टराई व संगीता कार्कीयात अदालतं १५ न्हुया दुने हाजिर जुइत धाःगु दु । स्वम्ह विरुद्ध सर्वोच्च अदालतय् बैंकिङ्ग कसुरसम्बन्धी मुद्दा विचाराधीन अवस्थाय् लानाच्वंगु दु ।
सर्वोच्च अदालतं जनकपुर–३ धनुषाया शालु गोयन्कायात नं बैंकिङ्ग कसुर ठगीइ अदालतय् हाजिर जुइत धाःगु दु ।
अथेहे, सर्वोच्च अदालतं झापाया शिवनगर नगरपालिका–८ या विकास पौडेल व वविता पन्त पौडेलयात नं बैंकिङ्ग कसुरय् फरार व्यक्ति धासें अदालतया सम्पर्कय् वयेत धाःगु दु ।
धरान नगरपालिका–१७ या नवीन चोङवाङ, काभ्रेपलाञ्चोक खरेलथोकया अर्जुन लामा, निजगढ गाविस–७ बाराया रामहरि घिमिरे व येँ महानगरपालिका–९ सिनामंगलया बाबुकाजी मुल्मीयात सर्वोच्च अदालतं बैंकिङ्ग कसुर यानाः बेपत्ता जूपिं मनूया धलखय् तःगु दु ।
अथेहे, भोजपुर गोगनेया सुमन शाक्य, येँ २९ या अञ्जु पाण्डे पोखरेल व येँ ३३ डिल्लीबजारया केपी शर्मायात नं अदालतं बैंकिङ्ग कसुरया मुद्दाय् १५ न्हु दुने अदालतय् हाजिर जुइत धाःगु दु ।
सर्वोच्चं वैदेशिक रोजगारी व्यवसायी मीना रायमाझीयात नं अदालतया सम्पर्कय् मवःसे बेपत्ता जूगु धासें १५ न्हुया दुने अदालतय् वयेत धाःगु दु ।
येँ महानगरपालिका वडा ल्याः ६ निवासी मीनाया नामय् वैदेशिक रोजगार सम्बन्धी मुद्दा अदालतय् विचाराधीन अवस्थाय् दु ।
अथेहे, ताप्लेजुङ सादेला–६ या गोमादेवी माङयु लिम्बुयात सर्वोच्च अदालतं मानव अपहरण व शरीर बन्धन मुद्दाय् १५ न्हुया दुने अदालतय् हाजिर जुइत धाःगु दु ।
थ्वहे झ्वलय् अदालतं चोरी, जबरजस्ती करणी, कर्तव्य ज्यान मुद्दालिसेंया थीथी कसुर लाःपिं मनूतय्त नं बेपत्ताया हे धलखय् तयाः १५ न्हुया दुने सुचं सार्वजनिक याःगु दु । अथे धलखय् लाःपिं ३८ म्ह दु ।
०००
क्राफ्ट सिटीया प्रचारात्मक अभियान कथं यलय् जूगु वृहत साईकल ¥यालीया उलेज्या कार्यवाहक प्रहरी महानिरीक्षक ठुले राई नं यानादिल ।
यल महानगरपालिका–१६ वडां उगु ¥यालीया ग्वसाःग्वःगु खः ।
प्रहरी अतिरिक्त महानिरीक्षक तकं जुयादीम्ह ठुले राई नं कला, संस्कृति, सम्पदा, इतिहासया संरक्षण यायेगु आज्जुं जुइत्यंगु महोत्सव सुथांलायेमाः धकाः कामना यानादीगु खः ।
यल कला, संस्कृतिया शहर जूगु न्ह्यथनादिसें कार्यवाहक महानिरीक्षक राई नं यलया कला, संस्कृतिया संरक्षणलिसें शान्ति सुरक्षा, अपराध न्यूनीकरणय् समुदायया भूमिका महत्वपूर्ण जुइगु धारणा नं तयादीगु खः । राई नं नेपाल प्रहरीं न्ह्यःने हःगु समुदाय प्रहरी साझेदारी अभियानयात प्रभावकारी यायेत फुक्कसिगु साथ व ग्वाहालि अपरिहार्य जूगु विचाः नं प्वंकादीगु खः ।
उगु ज्याझ्वलय् यल महानगरपालिका–१६ वडाया वडाध्यक्ष निर्मलरत्न शाक्यं हस्तकला नगरीया घोषणायात औचित्य सिद्ध यायेगु पलाःया रुपं महोत्सव यायेत्यनागु धयादिल । वडाध्यक्ष शाक्यं यलया संस्कृति, सभ्यता, कलाया संरक्षण यायेमाःगु दायित्वबोध यासें मेमेगु सरोकारवाला निकाययात न्ह्यलं चायेकेबिइगु नं महोत्सवया मू आज्जु जूगु जानकारी बियादिल ।
यल दरबार लागां न्ह्याःगु उगु ¥याली सौगः, लुँहिति, ओकुबहाः, तंगः, इखालखु, गाःबहाः जुयाः थमेल थ्यंकूगु खः ।
थमेलं येँ व यलया थीथी थासय् चाःहिला हाकनं यल दरबार लागाय् थ्यंकाः उगु साईकल ¥याली क्वचायेकूगु खः । ¥यालीइ सशस्त्र प्रहरीया पूर्व महानिरीक्षक सिंहबहादुर श्रेष्ठलिसें थ्यंमथ्यं स्वसःम्हेसिगु उपस्थिति दूगु खः,
महोत्सवया तयारीया झ्वलय् थौं चैत्र १३ गतेनिसें यलय् जुइगु वृहत कला व सांस्कृतिक महोत्सवया तयारी लिपांगु चरणय् थ्यंगु दु ।
वल्र्ड क्राफ्ट काउन्सिलं यलयात ३५ औं हस्तकला नगरी घोषणा जूगु लसताय् यल महानगरपालिका–१६ वडां वृहत कला व सांस्कृतिक महोत्सव ग्वसाःग्वःगु खः । ‘हस्तकला नगरीया उत्सव, कला संस्कृतिया महोत्सव’ धैगु मू नाराया लिसें उगु महोत्सव न्यान्हुतक न्ह्याइगु जूगु दु ।
महोत्सवया प्रबद्र्धनय् नेपाल हस्तकला महासंघ, यल हस्तकला संघ, यल उद्योग वाणिज्य संघ न्ह्यच्यूगु दु । १६ वडा दुनेया त्वाःयात महोत्सवया ल्यू ग्वसाः खलःया रुपं तःगु दु । हस्तकला महोत्सव मू समारोह समितिया मूछ्याञ्जे सगुण धाख्वाःया कथं नागबहाः त्वाः सुधार समितिया ल्यू ग्वसालय् व वसुवर्ण वचत तथा ऋण सहकारी संस्थाया व्यवस्थापनय् नागबहाः दुने धातुकला, मूर्तिकलाया थ्यंमथ्यं २५ गू स्टल चायेकेगु ग्वसाः ग्वःगु दु ।
नेवाः नसात्वसा व मेमेगु खाद्य परिकार यानाः न्यागू स्टल तइगु जूगु दु । अथेहे, इलाननीइ कलाकारपिनिगु धातुया मूर्तिइ बुट्टा किइगु जीवन्त ब्वज्या जुइ । थ्वहे झ्वलय् नकबहीस च्वंगु लोकाकीर्ति महाविहारय् चीन लिपाया ल्यू लिपिया रुपं दूगु रंजना लिपि लेखन विधिबारे ब्वज्या जुइगु धाःगु दु ।
नकबही त्वाः सुधार समितिया ल्यू ग्वसालय् उगु बही दुने महोत्सव ज्वःछि गेडागुडीया मन्दः ब्वज्या जुइगु जूगु दु ।
दँय् दसं मंसीर पुन्ही सकिमना पुन्हीया दिं नेवाः समुदायया हलिमलि ब्वयेगु धकाः गेडागुडीया मन्दः, द्यःपिनिगु आकृति दयेकेगु परम्परा दु । उगु परम्पराया प्रतिकया रुपं उगु महाविहारय् ब्वज्या यायेत्यंगु खः ।
अथेहे, उगु महाविहारय् दँय् दसं मोहनीया लसताय् जुइगु अष्टमातृका प्याखंया लू क्यनेगु कथं द्यःपिनिगु मुखाकृतिया ब्वज्या नं याइगु जूगु दु ।
महाविहारलिसेंया नकबही दुने सांस्कृतिक ब्वज्या जुइसा नकबहीया फल्चाय् बुंगद्यः दयेकेगु विधिया जीवन्त ब्वज्या नं जुइगु जूगु दु ।
अथेहे, भाष्करदेव संस्कारित लोकाकीर्ति महाविहार न्याखाचुकय् बज्राचार्य पूजाविधिया ग्वाहालिइ मनू जन्मनिसें मृत्यु संस्कारय् यायेमाःगु दशकर्म संस्कारय् व थीथी पूजाविधिइ छ्यलीगु हलंज्वलं ब्वज्या जुइगु जूगु दु ।
थ्वहे झ्वलय् स्वथ त्वाः सुधार समितिया ल्यू ग्वसालय् नेवाः परम्परागत भेषभूषा ब्वज्या, सांस्कृतिक प्याखं लिसें सांगितिक ज्याझ्वः जुइ
धातुया मूर्तिकला, मूर्ति दयेकेगु प्रक्रियाया जीवन्त ब्वज्या नं जुइगु जूगु दु । अथेहे, स्थानीय तंगः तिच्छुगल्लीइ सिजःया थलबल व काय्गुननीइ थीथी पर्वया बोध याकीगु हलंज्वलंया ब्वज्या जुइ ।
पिम्बहालय् च्वंगु ऐतिहासिक जगमदु पुखुली बोटिङ्ग, चिलंच्व स्तूपा जःखः राष्ट्रिय व अन्तर्राष्ट्रिय क्षेत्रय् विशिष्ट योगदान बियादीपिं नेवाः समुदायया व्यक्तित्वपिनिगु किपाः ब्वज्या याइगु जूगु दु ।
महोत्सव ज्वःछि वडाया परम्परागत धिमे बाजा, धाः बाजा, नायःखिं बाजा, नौबाजा मृदंग भजन, लाखे प्याखं लिसेंया थीथी सांस्कृतिक झाँकीत ब्वज्या याइगु जूगु दु ।
अथेहे, क्राफ्ट सिटी, संस्कृति संरक्षण, पर्यटक प्रबद्र्धनया बारे अन्तरक्रिया, दबू बहस ज्याझ्वः जुइगु जानकारी नं ब्यूगु दु ।
महोत्सव ज्वःछि न्हियान्हिथं स्थानीय सांगितिक ब्याण्डया सांस्कृतिक ब्वज्या नं जुइगु जूगु दु ।
०००
इन्द्रेणी सांस्कृतिक समाज (इसास) या ग्वसालय् २०४६ सालया जनआन्दोलनय् सहादत प्राप्त याःपिं सहीदपिनिगु लुमन्ति व ज्ञात अज्ञात सहीदपिनिगु लुमन्तिइ किपुली सांस्कृतिक श्रद्धाञ्जलि ज्याझ्वः जुइगु जूगु दु
उगु ज्याझ्वः चैत्र २३ गते शनिवाः न्हिनसिया १ः३० ता इलय् किपूया १० वडाय् च्वंगु मंगल माध्यमिक विद्यालयस जुइगु जानकारी ब्यूगु दु ।
थुगु खँया जानकारी इसास किपूया नायः वीरप्रसाद भन्सारीं ल्हाःचिं तयाः पिथंगु विज्ञप्तिपाखें ब्यूगु खः ।
सार्वजनिक जूगु विज्ञप्तिइ धयातःगु दु, ‘२०४४ चैत्र २० गते पलिस्था जूगु इन्द्रेणी सांस्कृतिक समाज (इसासं) प्रगतिशील व जनमुखी सामाजिक रुपान्तरणया नितिं सांस्कृतिक अभियान न्ह्याकाः वयाच्वंगु दु । बहुदलीय प्रजातन्त्रया पलिस्थानिसें लोकतान्त्रिक गणतन्त्रलिसें राज्य पुनःसंरचना, संघीयता, समावेशीता, धर्मनिरपेक्षता व समाजवादया नितिं इसासं मद्दिक्क कला साहित्यपाखें जनचेतना अभिवृद्धिइ क्रियाशीलता क्यनाः वयाच्वंगु दु ।’
विज्ञप्तिइ धयातःगु दु, ‘इसासं २०४६ सालया जनआन्दोलनय् सहादत प्राप्त यानादीपिं किपूया प्यम्ह सपूत राजेन्द्र महर्जन, राजमान माली, हिराकाजी महर्जन व लनबहादुर महर्जनलिसें फुक्क आन्दोलनया सहीद व बेपत्ता नागरिकपिनिगु लुमन्तिइ दँय् दसं सांस्कृतिक श्रद्धाञ्जलि ज्याझ्वः ग्वसाः ग्वयाः वयाच्वंगु दु । थुगु दँय् नं २०७५ चैत्र २३ गते शनिवाः न्हिनसिया १ः३० ता इलय् मंगल माध्यमिक विद्यालय किपू १० य् सांस्कृतिक श्रद्धाञ्जलि ज्याझ्वःया ग्वसाः ग्वयागु दु ।’
विज्ञप्तिइ उगु ज्याझ्वलय् सकलसित उपस्थितिया नितिं इनाप यानातःगु दु ।
थौंकन्हय् किपू नगरपालिका १० वडा गुतपौ त्वालय् ज्याकुथि दूगु उगु इन्दे्रणी सांस्कृतिक समाज (इसास)य् सल्लाहकारया रुपं बरिष्ठ जनपक्षीय संगीतकःमिपिं रायन, बदन शर्मालिसें श्याम श्रेष्ठ, हरिगोविन्द लुइँटेल, राजेन्द्र महर्जन, स्नेह सायमि व मातृका पोखरेल च्वनादीगु दु ।
अथेहे, नायः वीरप्रसाद भन्सारी, न्वकू दिलीप महर्जन, छ्याञ्जे रामकृष्ण महर्जन, दांभरी रानीशोभा महर्जन च्वनादीगु दुसा दुजलय् गुज्ये मालाकार, मीना महर्जन व दीपा महर्जन च्वनादीगु दुसा ज्याकुथि छ्याञ्जेया रुपं अशोक भन्सारी च्वनादीगु दु ।
लुमंकेबहःजू, २०४६ सालया जनआन्दोलनया झ्वलय् किपूपाखें सहादत प्राप्त यानादीपिं किपूया प्यम्ह सपूत राजेन्द्र महर्जन, राजमान माली, हिराकाजी महर्जन व लनबहादुर महर्जनया झ्वाताः किपू नगरपालिका ३ वडाया प्रहरी चौकी न्ह्यःने खासिबजारय् पलिस्था यानातःगु दुसा वय्कःपिं प्यम्ह सहीदया नामं हे किपूया ९ वडा नगां च्वय् छुगामय् राराहिल स्कूल चायेकातःगु दु ।
Related
