कृष्ण प्रजापति
० बोसीगामय् न्हापांगु राष्ट्रिय ज्ञानमाला सम्मेलन ः भजन सफू विमोचन ।
० शाक्य महाविहार सङ्घय् शुभकाजी शाक्यया नेतृत्वय् न्हूगु कार्यसमिति ।
० निम्ह ल्याय्म्हत एन्टिक ध्यवा म्हसिका बिइगु अभियानय् ।
० येँ मनपाया फुक्कं हे वडाय् विपत व्यवस्थापन समिति निंस्वन । व
० कतारं ल्ह्वन एसियन कप, २२ दँया अलीं त्याकल ‘गोल्डेन बुट’
येँया दक्षिण भेगय् लाःगु बोसीगामय् नेपाल राष्ट्रिय ज्ञानमाला समितिया ग्वाहालिं कीर्तिपुर क्षेत्रीय उससमितिया ग्वसालय् थौं करुणा ज्ञानमाला भजन खलःया व्यवस्थापनय् न्हापांगु ज्ञानमाला भजन सम्मेलन जुल । जुलुमलाल शाक्यया सभापतित्वय् जूगु न्हापांगु ज्ञानमाला सम्मेलनया उलेज्या यानादिसें चन्द्रागिरी नगरपालिकाया मेयर घनश्याम घिरीं परापूर्व कालंनिसें न्ह्यानाच्वंगु संस्कार संस्कृतियात नगरपालिकापाखें तिबः बियाच्वनागु कनादिसें बुद्ध धर्मया प्रचार यायेत ज्ञानमाला भजनपाखें विश्वन्यंकं ग्वाहालि जुयाच्वंगु खँ कनादिल ।
नेपाल राष्ट्रिय ज्ञानमाला समितिया अध्यक्ष रमना श्रेष्ठं विक्रम संवत् १९९४ सालय् नीस्वंगु थुगु ज्ञानमाला समितिपाखें बुद्ध शिक्षायात गुणात्मक रुपं च्वन्ह्याकेगु ज्याय् तिबः बियाच्वंगु खँ कनादिल । भजन गायक उस्ताद भीमबहादुर नकःमियात हनेज्या नं जूगु उगु भजन न्ह्यब्वयेगु ज्याझ्वलय् यपसिमा ज्ञानमाला भजन खलः किपुल्चा, भाजंगाः ज्ञानमाला भजन खलः, गौतमबुद्ध ज्ञानमाला भजन खलः, भास्तिपुर ज्ञानमाला भजन खलः, पालुबुँ ज्ञानमाला भजन खलः, नँगां ज्ञानमाला भजन खलः, श्रीकीर्ति ज्ञानमाला भजन खलः, आनन्दादी ज्ञानमाला भजन खलः, मच्छेगां ज्ञानमाला भजन खलः, करुणा ज्ञानमाला भजन खलः, पवित्रा ज्ञानमाला भजन खलः, अपेक्षा ज्ञानमाला भजन खलः, समग्र ज्ञानमाला भजन खलः व अनमोल इतबुँ ज्ञानमाला भजन खलः यानाः झिंप्यंगु खलकं थः थःगु भजन न्ह्यःब्वःग खः ।
०००
शाक्य महाविहार सङ्घया थौं शनिवाः जूगु न्हापांगु महाधिवेशनं शुभकाजी शाक्यया नेतृत्वय् १५ सदस्यीय न्हूगु कार्यसमिति निंस्वगु दु ।
कार्यसमितिया न्वकु कथं अमीरमान शाक्य व गौतम शाक्य, मूछ्याञ्जे संघरत्न शाक्य, छ्याञ्जे राजेश शाक्य, दांभरी चैतन्यराज शाक्य व ल्यूदाभरी दीलिपरत्न शाक्य निर्विरोध ल्यंगु खः ।
अथे हे दुजलय् विजयरत्न असंबरे, रोशनबहादुर शाक्य, सुरेश शाक्य, आनन्दरत्न शाक्य, धर्मरत्न शाक्य, अमिरकुमारी शाक्य, दुर्गादेवी शाक्य व ज्योति शाक्य च्वनादिगु दु ।
सघपाखें शाक्यवंशया पहिचानया नितिं उत्कृष्ट योगदान याःगुलिं कीर्तिपुण्य महाविहार, लगं बहाःका हर्षमुनि शाक्ययात ‘शाक्य रत्न’ उपाधि व मैत्रीपूर महाविहार, क्वाःबहाःया चक्रेश्वर धूपरत्न शाक्ययात ‘ध्रुबतारा सम्मान’ लःल्हागु खः ।
३ न प्रदेश सांसद राजेश शाक्यं स्वनिगया महाविहारया मौलिक स्वरुपया यायेत व सरकार पाखें नियमित आर्थिक ग्वहालि कमयेत छगू महाविहार व्यवस्थापनि समिति निस्वनेमागु बिचाः प्वंकादिगु खःसा मेम्ह ३ न. प्रदेश सांसद शोभा शाक्यं शाक्य व बज्राचार्यतय्गु थायवाय बहाः व बहीयात त्वता मेथाय् च्ववनेगु जुयाच्वंगु खँय् च्यूता प्वंकादिगु खः ।
महाधिवेशनया सफलताया कामना यासें नदी सङ्गम महाविहार सर्वसङ्घ, खुशिबहीया नायः रत्नमान शाक्य, लुम्बिनी बौद्ध विश्वविद्यालयया पूर्व उपकुलपति प्रा. डा. नरेशमान बज्राचार्य व बौद्ध विहार सङ्घ, ललितपुरया अध्यक्ष पुष्परत्न शाक्यं भिंतुना न्वचु बियादिगु खः ।
न्हूम्ह मूछ्याञ्जे संघरत्न शाक्यं वइगु न्हिं सङ्घ शाक्य व बज्राचार्यतय्गु बहाः तथा बहीया अनुसन्धान यानाः ऐतिहासिक तथ्यत सङ्कलन व अभिलेखीकरण यायेगु, साउन महिनाया गुँला पर्वय् थाइगु धाःबाजाया प्रदर्शन यायेगु, थीथी लागाय् योगदान यापिं २० म्ह शाक्य कुलपुत्र व कुलपुत्रीतय्त ‘राष्ट्रिय शाक्य सम्मान’ लःल्हायेगु शाक्य समुदायया ऐतिहासिक पर्वया ‘शाक्य सङ्गायना’ ग्वसाग्वयेगु जानकारी बियादिगु खः ।
०००
येँया बूढानिलकण्ठ नगरपालिकाया निम्ह ल्याय्म्हतय्सं ‘एन्टिक ध्ववा म्हसिका बिइगु अभियान न्हयाकुगु दु । लेट्स मेक एन्टिक अलाइभ’ धइगु नारा कियाः बुढानिलकण्ठ नगरपालिया– १३ चुनिखेलया सरोज श्रेष्ठ व दिनेश श्रेष्ठ थीथी स्कुलय् वनाः नेपाः व विदेशया ९० गू ध्यवा प्रर्दशनी अभियान न्हयाकुगु दु ।
थथे ध्यवा प्रदर्शनी पाखें सङ्कलन जूगु ध्यवा शैक्षिक गुणस्तर कमजोर जूगु सरकारी बिद्यालयया सुधारया नितिं ग्वहालि यायेगु खँ सरोज श्रेष्ठं कनादिगु दु ।
०००
येँ महानगरपालिकाया ३२ गू वडाय् विपत व्यवस्थापन समिति निंस्वगू दु । स्थानीय तहया कानूनी व्यवस्था कथं उगु समिति गनिंस्वनागु येँमपाया प्रवक्ता ईश्वरमान डङ्गोलं जानकारी बियादिगु दु ।
वडाध्यक्षया संयोजकत्वय् स्वास्थ्य स्वयंसेविका, वडाया मिसा सदस्य व थीथी सदस्य लिसें ११ सदस्य दुगु उगु समिति थःगु लागाय् विपत जोखिम न्यूनीकरण यायेगु नितिं विपतया इलय् सहयोग व बचे जुइगु उपायया सम्बन्धमा ज्या यायेत्यंगु खः । अथे हे अग्नि नियन्त्रण, भुखाय् ब्वबलय् बचे जुइगु उपाय ढया समस्या समाधानया नितिं नं ज्या यायेगु याइ ।
विपतया इलय् आपतकालिन उद्धारया नितिं छुं न्हिं न्हयः येँमनपां स्वनिगःया इमर्जेन्सी स्वापूतय्गु नंबरया पुस्तिका पिकाःगु खः ।
०००
पलाः हे थातेमलाक्क मादक पदार्थ सेवन यानाः तीव्र गतिइ मोटरसाइकल चलेयाःगु द्वपनय् निम्ह प्रहरी निलम्बनय् लाःगु दु ।
निलम्बित जूपिं महानगरीय प्रहरी परिसर येँय् ज्या यानाच्वंम्ह प्रहरी जवान मिलन ढुंगाना व महानगरीय प्रहरी वृत्त सिंहदरबारय् ज्या यानाच्वंम्ह मनोज धमला खः ।
ढुंगाना येँ प्रहरी प्रमुख एसएसपी वसन्त लामाया गाडी ल्यूने च्वनीम्ह सुरक्षागार्ड खः । बिहिवाः सनिलय् अनियन्त्रित रुपं मोटरसाइकल चलेयानावःगु धासें ख्वप प्रहरी परिसय् खबर वःगु खः । वधुंकाः चेकजाँचया झ्वलय् मनहरा खुसिलिक्क इमित गिरफ्तार याःगु खः ।
तर, अन इमिसं ड्यूटीइ च्वंम्ह सईलिसे नं अपशब्द खँग्वः न्वःवाःगु खः । वधुंकाः न्यनेकनेया झ्वलय् इपिं प्रहरी जूगु सीदूगु खः ।
निम्हेसित आः ख्वप प्रहरी परिसरय् तयातःगु दु । इमित अनुसन्धान यानाः गुकथं कारवाही यायेगु धैगु खँ क्वःछीगु येँ प्रहरी प्रमुख लामां धयादीगु दु ।
०००
डा. केसीं अनसन ताडेयायेत आग्रह याःगु नागरिक न्ह्यलुवाः, माथेमा कार्यदल व आवासीय चिकित्सकपिन्त सुभाय् बिसें धयादी, “वय्कःपिनिगु भावनायात सम्मान यासें वय्कःपिनिगु हे रोहवरय् जिं १६ क्वःगु आमरण अनसन क्वचायेकेगु घोषणा यानाच्वना ।”
प्रा.डा. गोविन्द केसीं २४ दिं ताःहाकःगु आमरण अनसन एकतर्फी रुपं क्वचायेकूगु दु । तर, चिकित्सा शिक्षा विधेयकय् सुधारया नितिं न्हूढंगं ल्वानाच्वनेगु प्रतिबद्धता तकं प्वंकादीगु दु ।
चिकित्सा शिक्षा विधेयक प्रतिनिधिसभा व राष्ट्रियसभां साप जुइधुंकूगु अवस्थाय् अनसन जारी यायेगु धैगु असहज अवस्था ब्वलंकेगु जक खः धैगु महसुस यासें व विरामीं दुःख जक भोगेयाइगु व राज्यं बेवास्ता याइगु अवस्था वःगुलिं अनसन तोडेयानागु प्रा.डा. गोविन्द केसीं धयादीगु दु ।
डा. केसीं असिमित सम्बन्धनयात कानूनी बैधता बिइगु कथं पास जूगु विधेयक आःया हे अवस्थाय् स्वीकार्य मजुइगु तकं धयादीगु दु ।
अनसन तोडेयाःगु इलय् डा. केसीं सरकार व प्रधानमन्त्री केपी शर्मा ओलीयाके संस्थागत व व्यक्तिगत इमान व विश्वसनीयता मदूगु धयादीगु दु । लिसें विधेयक पास यायेत सरकारं अधिनायकवादी प्रवृत्ति क्यंगु धासें डा. केसीं धयादीगु दु, “थथे पारित जूगु ऐन जिमिसं स्वीकार्य यायेमखु ।”
डा. केसीं अनसन ताडेयायेत आग्रह याःगु नागरिक न्ह्यलुवाः, माथेमा कार्यदल व आवासीय चिकित्सकपिन्त सुभाय् बिसें धयादी, “वय्कःपिनिगु भावनायात सम्मान यासें वय्कःपिनिगु हे रोहवरय् जिं १६ क्वःगु आमरण अनसन क्वचायेकेगु घोषणा यानाच्वना ।”
डा. केसीं पूर्वप्रधानन्यायाधीश सुशीला कार्की व पूर्वसभामुख दमननाथ ढुंगानाया ल्हातं जुस त्वनादीगु खः ।
०००
सरकारं अष्ट्रेलियाया नितिं नेपाली राजदूत लक्की शेर्पाया राजीनामा स्वीकृत याःगु दु ।
परराष्ट्रमन्त्री प्रदीपकुमार ज्ञवालीं राजदूत शेर्पां ब्यूगु राजीनामा स्वीकृत जूगु जानकारी बियादीगु खः ।
मानव तस्करी, श्रम शोषण लिसेंया थीथी विवादय् लायेधुंकाः राजदूत शेर्पां राजीनामा बियादीगु खः ।
परराष्ट्र मन्त्रालयं राजदूत शेर्पा्लिसे स्पष्टीकरण तकं काःगु खः ।
०००
प्रहरीं येँया त्रिभुवन अन्तर्राष्ट्रिय विमानस्थलया गेटपाखें तस्करीया लुँलिसें न्याम्हेसित ज्वंगु दु ।
महानगरीय प्रहरी वृत्त गौशालाया पुचलं बिहिवाः न्हिनय् ३ ता इलय् वैदेशिक रोजगारीपाखें लिहाँ वःपिन्त लुँया बालालिसें ज्वंगु खः ।
महानगरीय प्रहरी परिसर येँया प्रवत्तःा प्रहरी नायव उपरीक्षक होमिन्द्र बोगटीं विशेष सुचंया आधारय् २५० ग्रामया लुँया बालालिसें न्याम्हेसित नियन्त्रणय् कयागु जानकारी बियादीगु दु ।
ज्वंपिं वैदेशिक रोजगारीय ाझ्वलय् विदेशं लिहाँ वःपिं मनूत खः । अय्सां प्रहरीं इमिगु म्हसीका धाःसा सार्वजनिक याःगु मदुनि ।
०००
एसियन कप फुटबलया उपाधि कतारं न्हापांगुखुसि त्याकूगु दु । युएईइ शुक्रवाः जूगु फाइनल कासाय् जापानयात ३–१ गोल अन्तरं बुकुसें कतारं एसियन कप फुटबलया उपाधि ल्ह्वंगु खः ।
एसियाया महारथी जापानयात बुकाः कतारया अलमोइज अली, अब्दुल अजिज व अक्राम अफिफं गोल याःगु खः । जापानया नितिं मिनामिनों छगू गोल याःगु खः ।
१२ औं मिनेटय् अलमोइजया गोलं कतारं अग्रता काःगु खः । अब्दुल अजिजं २७ औं मिनेटय् मेगु छगू गोल थप याःगु खःसा न्हापांगु हाफय् कतारं दोब्बर अग्रता काःगु खः । जापानं ६९ औं मिनेटय् छगू गोल याःगु खः । उगु गोल मिनामिनों याःगु खः ।
८३ औं मिनेटय् कतारं पेनाल्टी काःगु खः व उकियात अक्राम अफिफं गोलय् परिणत यायेधुंकाः ३–१ गोलअन्तरं कतार त्यायेत ताःलात ।
एसियन कपया कपया इतिहासय् छगू हे कासाय् दकले अप्वः गोल यानाः कीर्तिमान दयेकाः कतारया २२ दँया अलमोइज अलीं गोल्डेन बुट त्याकूगु दु । वं थुगु संस्करणय् ९ गोल याःगु खः ।
वं इरानया लेजेण्ड अली दाइं दयेकूगु कीर्तिमान तोडेयाःगु खः । अली दाइं सन १९९६ स एसियन कपया छगू हे संस्करणय ८ गोल याःगु खः ।
०००
टी–२० त्रिकेट कासाय् थौं शुक्रवाः जूगु कासाय् नेपालं युएईयात बुकूगु दु ।
युएई नेपाःयात १०८ रनया लक्ष्य ब्यूगु खःसा नेपालं १११ रन कयाः युएईयात बुकूगु दु ।
दीपेन्द्र सिंह ऐर व पवन सर्राफं ब्याटिङय् बांलाःगु साझेदारी लिपा नेपालं निक्वःगु टी–२० क्रिकेट कासाय् युएई–दुबईयात ४ विकेटं बुकूगु खः
युएईं १९.२ ओभरय् फुक्क विकेट गुमेयानाः १०७ रन दयेकूगु खः । १०८ रनया लक्ष्य काःगु नेपालं १९.३ ओभरय् ६ विकेट गुमेयानाः १११ रन दयेकूगु खः ।
लिपांगु ओभरया न्हापांगु बलय् पवन आउट जुल । तर दीपेन्द्रं निक्वःगु बलय् छक्का व स्वक्वःगु बलय् चौका प्रहार यानाः ३ ल्यंदुबलय् हे नेपाःया लक्ष्य पूवंकल ।
थ्व विजय लिपा स्वंगू कासाया श्रृंखला १–१ अन्तरं बराबर जूगु दु ।
आइतवाः जुइगु लिपांगु कासाया विजेतां श्रृंखला त्याकीगु जूगु दु ।
०००
नेपाल राष्ट्रिय ज्ञानमाला समिति अन्तर्गत नीस्वंगु कीर्तिपुर–चन्द्रागिरी क्षेत्रीय उपसमितिया ग्वसालय् व करुणा ज्ञानमाला भजन खलः बोसिगांया व्यवस्थापनय् क्षेत्रीय स्तरीय ज्ञानमाला भजन ब्वज्या क्वचाल ।
अथेहे, वाङमय शताब्दी पुरुष संस्कृतिविद् डा. सत्यमोहन जोशी मूपाहाँ कथं झाइगु उगु ज्याझ्वलय् किपू नगरपालिका व चन्द्रागिरी नगरपालिकाया नगर प्रमुखपिं विशेष पाहाँ कथं झाइगु जानकारी नं कजि भाजु शाक्यं बियादीगु दु ।
उगु ज्ञानमाला ब्वज्या ज्याझ्वलय् निर्णायक मण्डलय् रचनापाखे वाङमय शताब्दी पुरुष डा. सत्यमोहन जोशी च्वनादीगु दुसा रचना, संगीत व समूह गायनपाखें संगीत प्रवीण मोहनप्रसाद जोशी, संगीतज्ञ प्रा. धनबहादुर गोपाली व बरिष्ठ गायिका रमना श्रेष्ठपिं च्वनादीगु दु ।