कृष्ण प्रजापति
० भक्तपुर अस्पतालयात न्हूगु संरचनाय् यंकेगु तयारी सुरु ।
० अविरल यात्राय् ज्ञानु राणायात छगू लख तकालिसें हन ।
० येँ महानगरपालिकायात सरकारया झापट !
० ‘निमया म्हाँ पिनाः सुन्तला सइमखु’ –सहअध्यक्ष राजेन्द्र श्रेष्ठ ।
० प्राधिकरणय् कुलमान वयेधुंकाः १० प्रतिशत विद्युत चुहावट म्हो ।
भक्तपुर अस्पताल विकास समितिं भक्तपुर अस्पतालयात न्हूगु संरचनाय् यंकाः सुविधासम्पन्न भवनया निर्माण ज्या सुरु याःगु दु । डीएफआइडी नांगु अन्तर्राष्ट्रिय दातृ निकायया ग्वाहालिं भक्तपुर अस्पतालया फुक्कं संरचनायात न्हूगु ढंगं पुनःनिर्माण यानाः व्यवस्थापन यायेगु ज्याया थौं उलेज्या जुल । स्वास्थ्य तथा जनसंख्या राज्यमन्त्री डा. सुरेन्द्रकुमार यादवं उगु पुनःसंरचनाया उलेज्या यानादीगु खः । ज्याझ्वलय् वय्कलं दातृ राष्ट्रपाखें थ्व स्वयां न्ह्यः नं सन् २००४ निसें २०१० तक नेपालय् च्वनाः स्वास्थ्य क्षेत्रय् यानादीगु ग्वाहालिया प्रशंया यानादिल ।
भक्तपुर अस्पताल व्यवस्थापन समितिया अध्यक्ष मिलन सुवालं स्वनिगः दुनेया सुविधासम्पन्न अस्पताल खया नं भक्तपुर अस्पतालयात रिफर अस्पताल कथं म्हसीकाच्वंगुलि आः थःपिसं थुकियात उगु धारणां चीकाः महान सम्भावनायात कार्यान्वयनय् वनेत्यनागु खँ कनादिल । उगु ज्याझ्वलय् प्रदेश नंम्बर ३ या सामाजिक विकास मन्त्री युवराज मुनालं आपालं हाथ्या सह यायेमाःसां भक्तपुर अस्पतालं राजधानी लिक्क च्वना नं स्वनिगःया उत्तर व पूर्वी लागाया जनताया सेवा यानाच्वंगु खँ कनादिल ।
थौं स्वयां ११३ दँ न्ह्यः विक्रम संवत १९६१ सालय् चन्द्र डिष्टलरी नामं चायेकूगु थ्व भक्तपुर अस्पतालय् हाल ७५ शैयाया अस्पताल, प्रशुति सेवा नापं अमेरिकी ग्वाहालिं तयार यानाब्यूगु इमर्जेन्सी कक्ष चले जुयाच्वंगु दु । पुनः संरचना निर्माण शुभारम्भ ज्याझ्वलय् अस्पतालया मेडिकल सुपरिटेण्डेण्ट डा. सुधा देवकोटा नापं दातृ संस्था डीएफआइडीया रिचार्ड क्लकं न्ववनादीगु खःसा सुनिल खड्कां डिजाइनया प्रस्तुतिकरण यानादिल ।
०००
टिपरया ठक्करं वंगु चान्हय् येँय् छम्ह मनू सीगु दुसा मेम्ह छम्ह तच्वकं घाःपाः जूगु दु ।
ख्वपया गोठाटार तां (पुल) पाखें पेप्सीकोला पाखे वयाच्वंगु बा५ख ८०८४ ल्याःया टिपरं बा५४प ७२६९ ल्याःया मोटरसाइकलयात खहरेय् ठक्कर ब्यूगु खःसा मोटरसाइकल चालक श्याम विकया ज्यान वंगु खः ।
विक जुगल गाउँपालिका–४ सिन्धुपाल्चोकया स्थायी बासिन्दा जूगु प्रहरीं जानकारी ब्यूगु दु ।
महानगरीय ट्राफिक महाशाखाया कथं ठक्करपाखें घाःपाः जूम्ह बिकयात वासः यायेगु नितिं येँया ट्रमा सेन्टरय् हःगु खःसा वासः यायेगु झ्वलय् सीगु खः ।
मोटरसाइकलय् ल्यूने च्वनावःम्ह निशान विक तच्वकं घाःपाः जूगु दु । वया आः ट्रमा सेन्टरय् वासः जुयाच्वंगु दु ।
दुर्घटना लिपा टिपरया चालक फरार जूगु दु । टिपर नियन्त्रणय् काःगु प्रहरीं चालक मालेगु ज्यायात निरन्तरता बियाच्वंगु दु ।
०००
वि.सं २०५२ सालनिसें मिस नेपाल कन्टेस्ट ग्वसाः ग्वयाः वयाच्वंगु दि हिडन ट्रेजरं थुगुसी अविरल यात्रा नांयागु सांगितिक ज्याझ्वः यानाः नांजाःम्ह म्येहालामि ज्ञानु राणायात नगद छगू लख दांलिसें सम्मान लःल्हागु दु ।
संगीतकार राजु सिंहं संगीत परिचालन याःगु अविरल यात्राया स्वक्वःगु संस्करणय् ज्ञानु राणाया सलय् पिदंगु थ्यंमथ्यं निसःपु म्येमध्ये लोकंह्वाःगु १४ पु म्येयात नेपाल प्रज्ञा प्रतिष्ठानया हलय् जूगु सांगितिक ज्याझ्वलय् न्हयब्वःगु खः ।
अविरल यात्राया स्वक्वःगु शृंखला कथं गायिका ज्ञानु राणायात सम्मान याःगु उगु ज्याझ्वलय् नेपाःया नांजाःपिं २१ म्ह वाद्यवादकपिनिगु अर्केष्टाय् सुरजकुमार थापा, महेन्द्र श्रेष्ठ, विकास राणा, प्राश्ना शाक्य, सरिता शाही व मिना निरौलाथेंज्याःपिं म्येहालामिपिन्सं ज्ञानु राणाया म्ये हालाः साथ ब्यूगु खः ।
ज्ञानु राणा थःम्हेसिनं नं म्ये हाःगु उगु ज्याझ्वःयात मोडल व संचारकःमि सहाना बज्राचार्यं न्ह्याकूगु खः ।
स्वर, संगीत व गायनमार्फत नेपाःया संगीत ख्यलय् ज्वःमदुगु योगदान बियाः इतिहास दयेकेत ताःलाःपिं स्रष्टापिन्त इमिगु जीवनकालय् हे सम्मान यायेगु संस्कृतिया विकासया लागिं अले पुलापिं सर्जकपिन्त न्हूगु पुस्तालिसे स्वाका यंकेगु हे अविरल यात्राया मू आज्जु खः धइगु खँ दि हिडेन ट्रेजरया कजि गोपाल सुन्दरलाल कक्षपतिं कनादिल ।
थ्वसिबें न्हापाया संस्करणय् म्येच्वमि यादव खरेल व संगीतकार दिपक जंगमयात कया अविरल यात्रा न्ह्याकेधुंकुगु दु ।
०००
महानगरपालिका व राष्ट्रिय पुनःनिर्माण प्राधिकरण जानाः पुरातत्व विभागयात झापट नकल । बालगोपालेश्वर देगः ग्रन्थकूट शैलीं मखु, राणाकालीन गुम्बज शैलीं जक दयेकेफइ धकाः धयाः वयाच्वंगु पुरातत्व विभागयात थ्वसिकं तःधंगु झापट छु जुइ ?
लानिपुखू अर्थात् झीगु भासं न्हूपुखू । थ्व सरकारी मखु, थ्व ला येँ महानगरपालिकाय् अधिकार क्षेत्रया खँ जुइमाः धइगु झीगु भावना जक खः
अथे नं थ्व न्हापा सभागृह व सार्वजनिक उद्यान विकास समितिं स्वइगु । राष्ट्रिय सभागृह व रत्नपार्क (आः शंखधर साख्वाः उद्यान) स्वइगु निकाय स्वयेगु नितिं सरकारं विकास समिति दयेकातःगु । उकिं न्हूपुखू नं स्वइगु ।
आः थ्व विकास समिति हे मदयाः केशव स्थापितयात सूर्यबहादुर थापा शाही सरकारया प्रधानमन्त्री जुयाच्वंगु इलय् महानगरपालिकाया अन्तर्गत वयेधुंकल । थुकथं आः न्हूपुखूया अधिकार झीगु भावना व मान्यताया ल्याखं जक मखुसें कानूनी ल्याखं नं येँ महानगरपालिकाया अधिकार क्षेत्र दुने लायेधुंकल ।
न्हूपुखू व बालगोपालेश्वर देगः दयेकेगु सवालय् कंक्रिटया छ्यलाबुला जुल धकाः गुगु विवाद जुल । उकिं गुगु विज्ञ पुचः बुइकल । अले विज्ञ पुचलं बालगोपालेश्वर देगः ग्रन्थकूट शैलीइ दयेकेमाः धाल ।
थुज्वःगु अवस्थाय् न्हूपुखूया बालगोपालेश्वर देगः पुरातत्व विभागं दयेकीगु, मेगु पुखूया ज्या जक महानगरपालिकां दयेकीगु धइगु खँ हे महानगरपालिकाया ज्याखँय् हस्तक्षेप खः । अथे खःसां थ्व खँ स्वीकार्य जुयाच्वन ।
२०७२ सालया माघ २ गते राष्ट्रपति विद्यादेवी भण्डारीं पुनःनिर्माणया अभियान न्ह्याकेगु धकाः शिलान्यास याःसां थ्व सरकारी आयोजना मजूसें महानगरपालिकाया आयोजना जुइमाःगु, अथे नं थ्व खँ स्वीकार्य जुल ।
तर न्हूपुखू व बालगोपालेश्वर देगः दयेकेगु सवालय् कंक्रिटया छ्यलाबुला जुल धकाः गुगु विवाद जुल । उकिं गुगु विज्ञ पुचः बुइकल । अले विज्ञ पुचलं बालगोपालेश्वर देगः ग्रन्थकूट शैलीइ दयेकेमाः धाल ।
आः वयाः राष्ट्रिय पुनःनिर्माण प्राधिकरण उर्फ सरकारयापाखें महानगरपालिका व पुरातत्व विभागयात छक्वलं झापट नकूगु दु ।
थ्वहे खँयात महानगरपालिका व राष्ट्रिय पुनःनिर्माण प्राधिकरण जानाः पुरातत्व विभागयात झापट नकल । बालगोपालेश्वर देगः ग्रन्थकूट शैलीं मखु, राणाकालीन गुम्बज शैलीं जक दयेकेफइ धकाः धयाः वयाच्वंगु पुरातत्व विभागयात थ्वसिकं तःधंगु झापट छु जुइ ?
तर आः वयाः राष्ट्रिय पुनःनिर्माण प्राधिकरण उर्फ सरकारयापाखें महानगरपालिका व पुरातत्व विभागयात छक्वलं झापट नकूगु दु ।
लानिपुखू अर्थात् न्हूपुखू आः राष्ट्रिय पुनःनिर्माण प्राधिकरणं दयेकेगु धकाः सरकारं माघ १४ गते निर्णय यात । माघ २१ गते राष्ट्रिय पुनःनिर्माण प्राधिकरणं थ्व खँ पितहल ।
०००
संघीय समाजवादी फोरम नेपालया सहअध्यक्ष व सांसद राजेन्द्र श्रेष्ठं निमया म्हाँ पिनाः सुन्तला सइमखु धयादिसें आदिवासी जनजाति संघसंस्था आबद्ध सुं नेतापिनिगु कडा आलोचना यानादीगु दु ।
नेता श्रेष्ठं थ्व खँ नेपाल तामाङ घेदुङया संयोजनय् सोनाम ल्होछारया लसताय् ग्वसाः ग्वःगु भिंतुना कालबिल व सांस्कृतिक महोत्सवय् भिंतुना मन्तव्य बियादिसें थ्व खँ धयादीगु खः ।
उगु ल्होसार ज्याझ्वलय् आदिवासी जनजाति महासंघ व तामाङ घेदुङया सुं नेतापिन्सं थःगु मन्तव्य तयेगु झ्वलय् सोनाम ल्होसार लिसें आदिवासी जनजातिया पर्वतय्गु विदा कटौती, पहिचान सहितया संघीयताथें जाःगु विषयतय्गु उत्थान याःबलय् नेपाल कम्युनिष्ट पार्टी व नेपाली कांग्रेसया हे कोटीइ तयाः ससफोयात नं विरोध याःगु सन्दर्भय् वय्कलं खँ ल्ह्वनीपिं व मल्ह्वनीपिन्त नं छगू हे थासय् तयाः आलोचना याःगुलिं आक्रोश प्वंकादीगु खः ।
नेता श्रेष्ठं धयादी, “सहीयात सही व गलतयात गलत धाये मफूगु हे हुनिं आदिवासी जनजातिपिं ल्यूने लाःगु खः ।”
संविधान दयेकूगु इलय् पहिचानविरोधी पार्टीयात भोट बिइगु अले बांलाःगु संविधान निर्माण मजुल, पहिचानसहितया संघीयता प्राप्त मजुल धकाः थःगु पार्टीया आलोचना याइपिन्त लिसः बिसें नेता श्रेष्ठं धयादी, “थःगु पार्टीं त्याकूगु जूसा पहिचानसहितया संघीयता वयेधुंकल । आः नेवाः, ताम्सालिङ आदि पहिचानयुक्त प्रदेश प्राप्त यायेत संघर्षया विकल्प मदु । अष्ट्रेलियाया आदिवासींथें हे ताःई धुनी च्याकाः च्वनेमालीगु नं जुइफु, भारतय् तेलङ्गनां ल्वाःथें ल्वायेमालीगु नं जुइफु ।”
नेता राजेन्द्र श्रेष्ठं थःगु पार्टीं संसदय् तःक्वःमछि संविधान संशोधन व पहिचानसहितया संघीयताया खँ जक मखु गोर्खा राज्य विस्तारलिपा आन्तरिक औपनिवेशिकरणय् लाःपिं उत्पीडित समुदायाया मुक्तिया खँ नं ल्ह्वनागु व आः जुयाच्वंगु हिउँदे अधिवेशनया न्हापांगु दिंया न्हापांगु भाषणय् हे सार्वजनिक विदा कटौतीया विरोधय् न्वःवानागु स्मरण यानादिल
नेता श्रेष्ठं ख्याच्वः बिसें धयादी, “थःम्हं न्वःवानगु खँ यूट्युब लिसेंया सार्वजनिक संजालय् वःगु दु । आदिवासी जनजाति महासंघया नायः व घेदुङया नायः नं छक्वः न्यंसा व स्वःसा बांलाः जुइ ।”
लुमंकेबहःजू, सरकारं वंगु दँ सार्वजनिक बिदा कटौतीया निर्णय याःबलय् ससफो सरकारय् मवःनिगु खः । उगु हे इलय् सांसद श्रेष्ठं पार्टीया पाखें मोहनी व स्वन्तिया मधाःसे एकमुष्ट बिदा छुटेयानाः फुक्क समुदायं थःथःगु नखःचखतय् बिदा कायेगु व्यवस्था मिलेयायेत या आदिवासी जनजाति, मधेसी, थारु फुक्कसिगु मू पर्वय् कटौती याःगु बिदा कायम हे यायेत संसदय् खँ ल्ह्वनादीगु खः ।
सांसद श्रेष्ठं थःगु पार्टीं निगू बुँदे सहमति कथं संविधान संशोधन यायेत प्रधानमन्त्रीयात स्मरण पौ लःल्हायेधुंकूगु धासें सरकारं सहति कथं पहिचान पक्षधर शक्तिया बहुमत वःबलय् संविधान संशोधन यानाः १० जोड १ य् वनेगु नितिं लुखा मचायेकूसा थःगु पार्टी सरकारपाखें पिने च्वनेगु खँ नं प्रष्ट यानादिल ।
०००
चालू आर्थिक दँ २०७५–०७६ या न्हापांगु न्यालाय् १० प्रतिशत विद्युत चुहावट म्हो जूगु नेपाल विद्युत प्राधिकरणं जानकारी ब्यूगु दु । २५.७८ प्रतिशतं १५.४५ प्रतिशतय् चुहावट क्वाहाँ वःगु प्राधिकरणं दाबी याःगु दु ।
कार्यकारी निर्देशक कुलमान घिसिङं प्राविधिक व गैर प्राविधिक चुहावट नियन्त्रणया नितिं मुलुक न्यंकं अभियानया हे रुपं न्ह्याकूगु पलाखं विद्युत चुहावटय् आपालं म्हो जूगु धाःगु दु । घिसिङं धयादी, “जिं २०७३ भाद्रय् जिम्मेवारी कःघानाबलय् विद्युत चुहावट औसतय् २५.७८ प्रतिशत जुयाच्वंगु खःसा वधुंकाः आर्थिक दँ २०७३–०७४ य् म्हो जुयाः २२.९ स क्वाहाँ वःगु खः । अथेहे, आर्थिक दँ २०७४–०७५ य् २०.४५ य् दूगु चुहावटयात म्हो यानाः चालू आर्थिक दँया न्यालाय् १५.४५ प्रतिशतय् सीमित यायेत ताःलाःगु दु ।”
थ्यंमथ्यं १० प्रतिशतया चुहावट नियन्त्रणपाखें वार्षिक थ्यंमथ्यं ७ अर्ब तका दां थप आम्दानी यायेगु प्राधिकरणया कर्मचारीपिन्सं धाःगु दु ।
चालू आर्थिक दँय् विद्युत चुहावट १८.५ प्रतिशतय् क्वकायेगु आज्जु तःगु दु । प्राधिकरणं आज्जुयात पूवंकेत आपालं विद्युत चुहावट जूगु वितरण केन्द्रयात अप्वः व म्हो चुहावट जूगु थासय् म्होया चुहावट नियन्त्रणया आज्जु ब्यूगु दु ।
प्राधिकरणं चुहावट नियन्त्रणया नितिं चोरी नियन्त्रण यायेगु, महशुल बक्यौता असुलीइ कडाइ यायेगु, प्राविधिक चुहावट म्हो यायेत ट्रान्सफर्मर, वितरण लाइन व सबस्टेशनया सुदृढीकरण व थप यायेगु लिसेंया ज्या अभियानया हे रुपं न्ह्याकाच्वंगु दु ।
०००
मनमोहन मेमोरियल मेडिकल कलेज एण्ड टिचिङ् हस्पिटलय् थौं बुद्धवाः निसें हिताची १२८ सिटी स्क्यानया स्वास्थ्यसेवा उपलब्ध जुग दु ।
आधुनिक सुबिधा जाःगु सिटी स्क्यानविधिवत कथं थौं उलेज्या यायेृगु खँ डा. मनोजमान श्रेष्ठं जानकारी बियादिगु दु । येँ महानगरपालिका १५ वडा स्वयम्भु लागाय् चायेकातःगु मनमोहन मेमोरियल मेडिकल कलेज थौं हिनय् २ बजे निसें सनिलय् ५ बजे तक हिताची १२८ सिटी स्क्यानयात कयाः पूवकं जानकारी कायेत इच्छुकपिं वयेफइगु खँ धाःगु दु ।