राष्ट्रपति भण्डारी अमेरिका भ्रमणय् झाइगु, नेवाः सचेतना सेवा समाज

राष्ट्रपति विद्यादेवी भण्डारी थौं आइतवा अमेरिका झाइगु जूगु दु । मिसापिनिगु स्थिति सम्बन्धी संयुक्त राष्ट्रसंघीय आयोग (सीएसडब्ल्यू) या ६३ क्वःगु बैठकय् ब्वति कायेत नेपाली प्रतिनिधिमण्डलया नेतृत्व यासें राष्ट्रपति भण्डारी अमेरिका झायेत्यंगु खः ।
राष्ट्रपति भण्डारीलिसें महिला, बालबालिका व ज्येष्ठ नागरिकमन्त्री थममाया थापा, प्रतिनिधिसभा महिला व सामाजिक समितिया सभापति निरुदेवी पाल, राष्ट्रपति ज्याकुथिया विज्ञ लक्ष्मीकुमारी कार्की, परराष्ट्र सचिव शंकरदास बैरागी, राष्ट्रपतिया ज्याकुथिया सचिव विनोद केसी, उद्योग–वाणिज्य व आपूर्ति मन्त्रालयया सचिव यामकुमारी खतिवडा, राष्ट्रपतिया ज्याकुथि, परराष्ट्र मन्त्रालय व महिला, बालबालिका व ज्येष्ठ नागरिक मन्त्रालयया बरिष्ठ अधिकारी नं उगु अमेरिका भ्रमण ज्याझ्वःया नितिं अमेरिका वनेत्यंगु खः ।
परराष्ट्र मन्त्रालयया कथं, राष्ट्रसंघीय महासभाया नायः मारिया फर्नाण्डा इस्पिनोसा ग्रेसेसं थ्वहे फागुन २८ गते ग्वसाः ग्वइगु ‘शक्तिइ नारी’ विषयस उच्चस्तरीय बैठकयात राष्ट्रपतिं सम्बोधन याइगु ज्याझ्वः दु
अथेहे, नारी नेतृं विश्वयात गुकथं रुपान्तरण याइ धैगु विषयस नं राष्ट्रपतिं नुगःखँ तइगु क्वःछीधुंकूगु दु ।
भ्रमणया झ्वलय् राष्ट्रपति भण्डारीं सुं सुं उच्चस्तरीय भेटवार्ता तकं याइगु धाःगु दु । परराष्ट्र मन्त्रालयया कथं, राष्ट्रसंघया महासचिव एण्टोनियो गुट्रेस व नायः ग्रेसेसलिसेया नापलायेगु ई नं क्वःछीधुंकूगु दु ।
भ्रमणया झ्वलय् राष्ट्रपति भण्डारीं इष्टोनियाया राष्ट्रपति केस्त्री कालजुलेड व क्रोएशियाया राष्ट्रपति कोलिण्ड ग्राबर किटारोभिचलिसे नं निगू पक्षीय वार्ता याइगु जूगु दु । वहे दिं राष्ट्रपति भण्डारीलिसे आयरल्याण्डया पूर्वप्रधानमन्त्री मेरी रबिन्सं शिष्टाचार नापलायेगु ज्या याइगु परराष्ट्रपाखें सार्वजनिक याःगु विज्ञप्तिइ न्ह्यथनातःगु दु ।
राष्ट्रपतिया ज्याकुथि धलखय् संयुक्त राष्ट्रसंघया नितिं नेपाःया स्थायी नियोगया भ्रमण नं दुथ्याःगु दु ।
राष्ट्रपति विद्यादेवी भण्डारी चैत्र १ गते स्वदेश लिहाँ वइगु ज्याझ्वः तयातःगु दु ।
०००