कृष्ण प्रजापति
० हलिं नेवाः दबूया न्हूम्ह नायः पदय् सिजन श्रेष्ठ, लिपि गुथिपाखें हनेज्या ।
० ‘बलात्कारया घटना अप्वःगु’ नेपाली कांग्रेस सभापति शेरबहादुर देउवा ।
० ओखलढुंगाया डडुवाडाँडाय् जीप दुर्घटना, खुम्ह सित, मोसा द्ुर्घटनाय् ३,
० ‘थ्व सरकारयात ज्ञानेन्द्रलिसे तुलना यायेमते’ –संचारमन्त्री बास्कोटाया ।
० मध्यपुर थिमिइ नगरपालिकाया स्थापना दिवसय् फोटो प्रदर्शनी ।
हलिं नेवाः दबूया स्वक्वःगु तःमुँज्यां बर्तमान नायः सिजन श्रेष्ठयात हे न्हूम्ह नायः कथं ल्यःगु दु ।
स्वन्हुयंकं जूगु तःमुँज्याया लिपांगु दिं म्हिगः शनिवाः थथे निर्विरोध रुपं वय्कःयात नायः पदय् ल्यःगु खः ।
थ्वया न्ह्यः नायः पदया नितिं उम्मेदवार बियादीम्ह मेम्ह उम्मेदवार दयारत्न शाक्यं थःगु उम्मेदवारी लितकयाः हलिं नेवाः दबूया स्वदँया कार्यकालया नेतृत्व दत्या दत्या पालंपाः यायेगु सहमति जूगुलिं भाजु शाक्यं थःगु उम्मेदवारी लितकयादीगु खः ।
हलिं नेवाः दबूया न्हूम्ह न्वकू पदय् शशी महर्जनयात ल्यःगु दुसा केन्द्रीय दुजलय् नेपाःपाखें शाक्य सुरेन, रश्मिला प्रजापति, सुरेन्द्रभक्त श्रेष्ठ ल्यःगु दु ।
दबूया तःमुँज्या नं म्हिगः शनिवाः बहनी सांस्कृतिक ज्याझ्वः यानाः विधिवत् रुपं क्वचायेकूगु दु ।
०००
नेपाल लिपि गुथिं हलिं नेवाः दबूया स्वक्वःगु तःमुँज्यां निर्वाचित जुयादीपिं न्हूपिं पदाधिकारीपिंलिसें थौं आइतवाः सुथय् छगू ज्याझ्वःया दथुइ म्हसीका कालबिल ज्याझ्वः याःगु दु ।
दबूया न्हूम्ह नायः सिजन श्रेष्ठं हलिं नेवाः दबूपाखें नेपाल लिपि गुथिं न्ह्याकाच्वंगु अभियानयात अमेरिकाय् च्वंपिं नेवाःतय्गु पाखें गुकथं फइ उकथं ग्वाहालि यायेगु नितिं सहलह ब्याकेगु खँ कनादीगु दु ।
उगु ज्याझ्वलय् दबूया बरिष्ठ दुजः दयारत्न शाक्यं दबूया न्हापांगु तःमुँज्याय् लिपि दूगु टि–सर्ट पिकानाः हलिंन्यंकं लिपिया प्रचार यानागु जानकारी बियादिसें उगु टि–सर्ट लिपि गुथियात सुरक्षित यानातयेत लःल्हानादीगु खः ।
अथेहे, ज्याझ्वलय् लिपि गुथिया नायः निरञ्जन ताम्राकारं नेपाल लिपि गुथिं यानाच्वंगु थीथी ज्याया जानकारी बियादिसें दबूपाखें नेवाःतय्गु नितिं थीथी ज्याझ्वः न्ह्याकाः यंकेगु भलसा नं प्वंकादीगु खः ।
०००
पूर्वप्रधानमन्त्री लिसें नेपाली कांग्रेसया सभापति शेरबहादुर देउवां वर्तमान सरकार वयेधुंकाः देसय् हत्या, हिंसा व बलात्कारया घटना अप्वःगु धयादीगु दु ।
सभापति देउवां धयादी, “सरकार सेनायात नं थःगु नियन्त्रणय् तयाः एकदलीय अधिनायकवादी शासन संचालन यायेगु दिशाय् उन्मुख जूगु दु ।”
नेपाली कांग्रेस गुल्मीं सदरमुकाम तम्घासय् ग्वसाः ग्वःगु न्हापांगु जिल्ला सम्मेलनय् पार्टी सभापति देउवां उगु विचाः प्वंकादीगु खः ।
देउवां जनतायात सुशासन बियाः इमिगु आर्थिकस्तर च्वय् थकायेगु पलेसा वर्तमान सरकारं जनतायात कर अप्वयेकूगु द्वपं बियादीगु दु ।
अथेहे, उगु ज्याझ्वलय् नेपाली कांग्रेसया बरिष्ठ नेता रामचन्द्र पौडेलं वर्तमान सरकार संघीयता व संविधानया विरुद्धय् वंगु द्वपं बियादीगु दु ।
नेता पौडेलं वर्तमान सरकार राष्ट्रवादया स्वाहाने गयाः अधिनायकवादया शिखरय् थाहां वनेगु रणनीतिइ दूगु टिप्पणी यानादिल ।
नेपाली कांग्रेसया महामन्त्री डा. शशांक कोइराला व सहमहामन्त्री प्रकाशशरण महत लिसेंया केन्द्रीय नेतापिन्सं सरकारया आलोचना यानादीगु खः ।
०००
पत्रकारतय्त प्रधानमन्त्रीया न्ह्यसः ‘छु छिकपिन्सं मुलुकयात सदां द्वन्द्वय् हे फयेयानाः तयेगु ला ?’
प्रधानमन्त्री केपी शर्मा ओलीं मुलुकयात द्वन्द्वय् फसेयानाः तयेगु कासाय् मजुइत पत्रकारपिन्त सचेत याकूगु दु ।
आइतवाः विराटनगर विमानस्थलय् पत्रकारलिसे खँ ल्हासें प्रम ओलीं पत्रकारं अदालत व सरकार लिसें प्रदेश सरकार व केन्द्र सरकारदथुइ द्वन्द्व याकेत्यंगु द्वपं बियादीगु दु ।
विप्लव समूहया कार्यकर्तायात प्रहरीं गिरफ्तार यायेगु, अदालतं धमाधम त्वःतकेगु जुयाच्वंगु दु नि धैगु पत्रकारपिन्सं न्यंगु न्ह्यसःया लिसलय् ओली धयादी, “छु छिकपिन्सं मुलुकयात सदां द्वन्द्वय् हे फसेयानाः तयेगु ला ? छिकपिनिगु सदां भूमिका थ्व हे ला ? अदालत व सरकारदथुइ ल्वापु याकेगु, प्रदेश सरकार व केन्द्र सरकार दथुइ ल्वापु याकेगु ला ?”
प्रधानमन्त्री ओलीं पत्रकारतय्त रचनात्मक भूमिका म्हितेत सुझाब तकं बियादीगु दु । ओलीं अदालतं थःगु हे कथं ज्या याइगु व सरकारं थःगु हे कथं ज्या यायेगु धयादीगु दु ।
प्रम ओलीं धयादी, “अदालतं मुक्कं प्रमाण मदुसा त्वःतेगु, थ्व कानूनी खँ खः, सरकारं राजनीति नीति, कानून कथं व संविधान कथं ज्या याइगु खः । तर कुनेगु त्वःतेगु खँ अदालतया मिखाय् छुं मगायेत धाःसा त्वःताबिइ ।”
ओलीं अदालत व सरकारदथुया अन्तरविरोध मक्यनेत आग्रह यानादिल
ओली अदालत स्वतन्त्र जुइगु व व शक्ति पृथकीकरणया सिद्धान्त राज्य चलेजूगु धासें संचालन अदालत व सरकार छगू हे मजूगु नं धयादिल
प्रधानमन्त्री ओलीं येँ न्ह्याःगु निन्हुया लगानी सम्मेलन पूर्ण रुपं सफल जूगु धयादीगु दु । सम्मेलनं विश्व बैंकलिसें थीथी विदेशी राष्ट्रपाखें लगानीया प्रतिबद्धता वःगु नं ओलीं धयादिल । तर मुलुक विकासया गतिइ न्ह्यःने वंगु स्वये मफुपिन्सं धाःसा सम्मेलनबारे अनर्गल प्रचार यानाच्वंगु द्वपं बियादिल ।
प्रधामन्त्री ओलीं लगानी सम्मेलनतकया ईयात आधार दँया रुपं कयागु धासें वधुंकाः विकास वर्ष न्ह्याइगु धयादिल ।
मेगु प्रसंगय् प्रधानमन्त्री ओलीं प्रतिपक्ष नेपाली कांग्रेसं संवैधानिक नियुक्तिइ भागबण्डा खोजेयाःगु द्वपं बियादिल । ओलीं सरकार भाग मब्यूगु हुनिं कांग्रेस सरकारविरुद्ध जूगु नं दाबी यानादिल ।
ओलीं धयादी, “औचित्य व गुण दोषया आधारय् मनूयात जिम्मेवारी बिइमाः । भागबण्डा यायेमज्यू धैगु पक्षय् जि दु ।”
सरकारं निर्वाचन आयोगया प्रमुख आयुक्तय् सिफारिस याःम्ह दिनेश थपलिया नं थःगु पार्टीया मजूगु धयादिल ।
ओलीं कांग्रेसया हुनिं हे सरकारं याइगु संवैधानिक अंगय् याइगु नियुक्तिइ आः नं सरकारं माक्व थाय् त्वःतूगु जानकारी बियादिल ।
०००
ओखलढुंगाया मानेभञ्ज्याङ गाउँपालिका–६ स च्वंगु डडुवाडाँडाय् जीप दुर्घटना जुयाः खुम्ह मनूत सीगु दुसा स्वम्ह घाःपाः जूगु दु । सीपिंमध्ये प्यम्ह मिजं व निम्ह मिसा लाःगु दु । इमिगु सनाखत जूगु मदुनि ।
सोलुखुम्बुया सोलुगुम्बां येँय् वयाच्वंगु बा १६ च २२०७ ल्याःया स्कोरपियो जीप मानेभञ्ज्याङ–६ स च्वंगु सतकं ५०० मिटर क्वय् पिपल खुसिइ कुतुंवंगु हर्कपुर प्रहरी चौकीं जानकारी ब्यूगु दु । घाःपाः जूपिन्त वासः यायेगु नितिं येँय् हःगु दु ।
०००
येँ मनपां येँया आपालं थासय् पुनःनिर्माणया ज्याय् समस्या जुयाच्वंगु खँ धाःगु दु । भुखाय् लिपा क्षति जूगु आपालं थासय् पुनःनिर्माण यायेगु ज्या जुयाच्वंसां समस्या जुयाच्वंगु येँ मनपा वातावरण विभागं न्ह्यथंगु दु । विशेष यानाः रानीपुखू, बसपार्क, धरहरा, दरवार हाइस्कुल, काठमाडौं भ्यू टावर थेंज्याःगु थासय् थीथी थासं वयाच्वनीगु सवारी साधनं ल्ह्यया हइगु ध्याचःया कारणं पुनःनिर्माणय् समस्या जुयाच्वंगु विभागया धापू दु ।
येँ मनपाया प्रमुख विद्यासुन्दर शाक्यं पुनःनिर्माणया झ्वलय् प्रयोग जुइगु सामग्री नं ज्या सिधयेधुंकाः निश्चित थासय् तयेत व मेलम्चीया निंतिं पाइप लायेत म्हुयातःगु गाः तन्हु तक अथें त्वःता तयेगु मयासे याकनं ल्हाकाछ्वयेत इनाप यानादिल । अथे हे विभागया प्रमुख हरिकुमार श्रेष्ठं निर्माणया झ्वलय् प्रयोग जुइगु सामग्रीत लाक्वपाक्व थासय् उखेंथुखें वां छ्वयातइगु व अनं पिहां वइगु फोहर सतकय् संचालन जुइगु सवारी साधनं ल्ह्ययाः मेथाय् यंकीगुलिं वातावरणय् तकं उकिं समस्या लाकाच्वंगु धयादिल ।
विशेष यानाः पुनःनिर्माणय् मेलम्ची खानेपानी आयोजनाया पाइप लायेगु ज्यां नं येँय् सतकय् च्वंगु धू सफा यायेत तसकं समस्या जुयाच्वंगु येँ मनपाया धापू दु ।
येँ मनपां थौंकन्हय् थःगु लागाया सतकय् च्वंगु धू सफा यायेत ब्रुमर संचालन यानाच्वंगु दुसा न्यागः ब्रुमरं न्यागू क्षेत्र क्वःछिनाः धू संकलन यायेगु याना वयाच्वंगु दु ।
०००
शिवराज नगरपालिका–५ चन्द्रौटाया राजश्व चेकप्वाइन्टय् दिकातःगु ट्रकय् मोटरसाइकल ठक्कर नयाः छम्ह मनू सीगु दु ।
सीम्ह शिवराज नगरपालिका–१ भलुही निवासी २२ दँया सनी थारु खः पूर्वं पश्चिमपाखे वनाच्वंगु ना ६ ख ४१२६ ल्याःया ट्रक चन्द्रौटा खसीबजारय् च्वंगु राजश्व चेकप्वाइन्टय् दिकातःगु अवस्थाय् लु ४८ प ६९२८ ल्याःया मोटरसाइकलं चान्हय् चन्द्रौटां छेँय् लिहाँ वनाच्वंगु झ्वलय् तीव्रगतिं वयाच्वंम्ह थारु चेक यायेत दिकातःगु ट्रकया ल्यूने ठककर नःगु वडा प्रहरी ज्याकुथि चन्द्रौटां जानकारी ब्यूगु दु ।
दुर्घटनां तच्वकं घाःपाः जूम्ह थारुया संजीवनी सामुदायिक अस्पतालय् वासः यायेगु झ्वलय् सीगु प्रहरीं जानकारी ब्यूगु दु ।
सीम्हेसिगु सीम्ह परीक्षणया नितिं चान्हय् हे शिवराज अस्पताल बहादुरगञ्ज छ्वःगु प्रहरी निरीक्षक महेश्वर उपाध्यायं धयादीगु दु ।
०००
बर्दियाया बारबर्दिया नगरपालिकाय् शनिवाः न्हिनयय् मोटरसाइकल दुर्घटना जुयाः स्वम्ह मनूत सीगु दु ।
नगरपालिका–९ स च्वंगु बनगाईस जूगु दुर्घटनाय् घाःपाः जूम्ह मधुवन नगरपालिका–१ या २१ दँया सुरज चौधरी, १४ दँया कृष्णा चौधरी व २३ दँया खगेन्द्र बस्नेतया वासः यायेगु झ्वलय् कोहलपुर मेडिकल कलेजय् सीगु खः ।
सुरज चौधरीं चलेयाना वःगु भे ८ प ६९६८ ल्याःया मोटरसाइकल व खगेन्द्र बस्नेतं चलेयाना वःगु बा ९१ प ९३७७ ल्याःया मोटरसाइकल थःथवय् ल्वानाः दुर्घटना जूगु जिल्ला प्रहरी बर्दियां जानकारी ब्यूगु दु ।
तच्वकं ब्वाकाहःगु हुनिं मोटरसाइकल ल्वाःगु प्रहरीया प्रारम्भिक अनुसन्धानपाखें सीदूगु दुसा थप अनुसन्धान जुयाच्वंगु प्रहरीं जानकारी ब्यूगु दु ।
०००
संचारमन्त्री गोकुल बास्कोटां प्रेस स्वतन्त्रतायात कयाः वर्तमान सरकारयात पूर्व जुजु ज्ञानेन्द्र शाहलिसे तुलना मयायेत सचेत याकादीगु दु ।
सरकार प्रेस स्वतन्त्रताप्रति प्रतिबद्ध जूगु व छुं नं अवस्थाय् अपहरित जुइके मबीगु मन्त्री बास्कोटां धयादीगु दु ।
आइतवाः येँय् ग्वसाः ग्वःगु ज्याझ्वलय् मन्त्री बास्कोटां धयादी, “स्वतन्त्रताबारे स्पष्ट जूसां ज्यू, अपहरित जुइमखु । ज्ञानेन्द्रलिसे तुलना यानादीमते ।”
मन्त्री बास्कोटां धयादी, “ज्ञानेन्द्रया पृष्ठभूमि व आःया सरकार न्ह्याकाच्वंगु पार्टीया पृष्ठभूमि, निष्ठा, लक्ष्य, उद्देश्य विल्कुल ब्यागलं जू । सुनां जनताया अधिकार खोसेयात, सुनां जनताया अधिकारया नितिं नापनापं ल्वानावःगु दु । न्ह्याबलें थ्व खँ छाय् ल्ह्वनेगु खः ?”
लिपांगु इलय् अनलाइन मिडियातय्के स्वये हे मफइगु विषयवस्तुत वयाच्वंगु धासें मन्त्री बास्कोटां इलय् ब्यलय् मिडियाया आतंकथें खनेदयाच्वंगु टिप्पणी यानादिल ।
बास्तविक पत्रकारत तकं लज्जित जुइगु जुयाच्वंगु धासें मन्त्री बास्कोटां धयादी, “नकतिनि जक सत्तारुढ पार्टीया नायः व पूर्वप्रधानमन्त्री पुष्पकमल दाहालया अमेरिका भ्रमणय् छु गुज्वःगु बुखँ पिथनादिया । थःगु बुखँ स्वयाः थःत हे लाज मजूला ? थःगु धोती खुस्केजूगु मस्यू सरकारयात ख्याउँख्याउँ…, अजू हे चाः बाः ।”
मयःसा कम्युनिष्ट पार्टीया सरकार मयः धायेगु हक दूगु, तर ख हे मखूगु खँ पिमकायेत मन्त्री बास्कोटां आग्रह यानादिल ।
वय्कलं धयादी, “सुनां फेसबुक ट्वीटरय् प्रतिबन्ध तयेगु धाःगु दु ? थनं दां यंकेधुंकाः कर धाःसा पुले माः कि म्वाः ?
०००
मध्यपुर थिमि नगरपालिकाया २३ क्वःगु स्थापना दिवसया लसताय् लाकाः वृहत फोटो प्रदर्शनी जूगु दु । मध्यपुर थिमि नगरपालिका ३ पुलांगु थिमिया कासा ख्यलय् उगु फोटो प्रदर्शनी जूगु खः । नगरपालिकाया स्थापना दिवसया लसताय् लाकाः राससया फोटो पत्रकारपिं रत्नकृष्ण श्रेष्ठ, रमेश गिरी, नवीन पौडेल व न्यूज अफया जगत प्रजापतिया किपा प्रदर्शनी याःगु खः ।
किपा ब्वज्याया संयोजक श्रेष्ठं नगरपालिकापाखें संचालन जुयाच्वंगु विकास निर्माणया ज्या, सम्पदा, थीथी ऐतिहासिक, धार्मिक, सांस्कृतिक महत्वया सम्पदा व उकिया पुनःनिर्माण, जिर्णोद्वार लिसें नगरया थीथी सांस्कृतिक जात्रा, पर्वया नापं थीथी ज्याझ्वःया किपा ब्वज्या यानागु जानकारी बियादिल ।
संघीय मामिला तथा सामान्य प्रशासन मन्त्री लालबाबु पण्डित, प्रतिनिधिसभा सदस्य महेश बस्नेत, ३ नं. प्रदेश सदस्य डा. राजेन्द्रमान श्रेष्ठ, रजनी जोन्छे, प्रतिमा श्रेष्ठ सूर्यविनायक नगरपालिकाया प्रमुख वासुदेव थापा, मध्यपुर थिमि नगरपालिकाया प्रमुख मदन सुन्दर श्रेष्ठ लगायत आपालं जनप्रतिनिधि, कर्मचारी व सर्वसाधारणं उगु फोटो प्रदर्शनीया अवलोकन यानादीगु संयोजक श्रेष्ठं जानकारी बियादिल ।
