कृष्ण प्रजापति
० येँय् जनबहाःद्यः रथजात्राया तयारी क्वचाल, विप्लव मकवानपुर इञ्चार्ज ।
० नेपालं यू–१९ विश्वकप छनोटय् त्याकल, इन्टरनेट सेवाप्रदायक आन्दोल
० स्ववियु चुनाव जेठया निगूगु वालय् यायेत प्रस्ताव । व
० स्वम्ह चिनियाँ नागरिक ३ किलो लुँलिसें गिरफ्तार ।
बिस्काः जात्राया प्यन्हुया दिं थौं चैत ३० गते ख्वपया तालाक्वः त्वालय् न्हिनय् १२ बजेपाखे ल्हाः मदुम्ह यःसिं थन । यःसिं थने धुंक गःहिति दिकातःगु भैलखःयात खलाँय् लाकेगु ज्या जूगु खः । आः मू यःसिं कथं काइम्ह यःसिं ख्यलय्या यःसिं थनेगु कुतः जुयाच्वंगु दु । थ्व झ्वः च्वयाच्वनागु इलय् तकं यःसिं थनेगु जारी जुयाच्वंगु दु ।
कन्हय् न्हिच्छिं बेताः भैरवद्यःथाय् मिखुंचा स्याना स्याक्वत्याक्व याइ । बहनी यसिं क्वथइ । कंस महाकाली महालक्ष्मी जात्रा, प्यन्हुं ब्रम्हायण जात्रा, न्यान्हुं द्यः सगं बियेगु व खुन्हुं बैशाक ५ गते हाकनं थःने क्वने भैलःखः साला जात्रा क्वचाइ । च्याच्या गुन्हु तक न्ह्याइगु जात्रा द्यः थहाँ बिज्याना क्वचायेकीगु खः । बिस्काः जात्रा शान्तिपूर्ण रुपं न्ह्यानाच्वंगु दु ।
०००
सेतो मच्छिन्द्रनाथ रथयात्रा ११३९ व्यवस्थापन समितिं जनबहाःद्यः रथजात्राया नितिं सकतां तयारी क्वचायेकूगु दु ।
सत्रौं शताब्दीनिसें न्ह्याःगु कथं कयातःगु जनबहाःद्यः जात्रां देसया हे सभ्यताया म्हसीका, धार्मिक सहिष्णुता व राष्ट्रियतायात मजबुत यायेगु पलाः ल्ह्वनाच्वंगु खँ विज्ञप्तिइ न्ह्यथनातःगु दु ।
चैत्र अस्तमि, नवमि व दसमि स्वन्हुतक न्यायेकीगु उगु जात्रा थुगु दँ चैत्र ३० गते शनिवाः सनिलया ५ ता इलय् न्ह्याइगु जूगु दु । येँया जमलय् च्वंगु तीनधारा पाठशालां रथ सालाः असनय् थ्यंकाः याः न्यायेकेगु याइ ।
अथेहे, चैत्र ३० गते शनिवाः हे बहनी १० ता इलय् महामहिम राष्ट्रपतिया असनय् सवारी जुइगु ज्याझ्वः तयातःगु दु ।
अथेहे, बैशाख १ गते सनिलया ५ ता इलय् असनं रथ सालाः हनुमानध्वाखा दरबार क्षेत्र थ्यंकाः याः न्यायेकेगु याइ ।
जात्राया झ्वलय् बैशाख २ गते सनिलया ४ ता इलय् हनुमानध्वाखा दरबार क्षेत्रं रथ सालाः लगमय् थ्यंकाः क्वचायेकीगु ज्याझ्वः दुसा बैशाख ३ गते सनिलया ५ ता इलय् रथं लगमय् च्वंगु जनबहाःद्यःया मां कथं कयातःगु मांसिमा स्वचाः चाःहिइकाः याः न्यायेकेगु याइ ।
थ्वहे झ्वलय् बैशाख ४ गते सनिलया ६ ता इलय् जनबहाःद्यःयात मच्छिन्द्रबहाः देगलय् दत बिज्याकी ।
सेतो मच्छिन्द्रनाथ रथयात्रा ११३९ व्यवस्थापन समितिं सार्वजनिक याःगु विज्ञप्तिइ धयातःगु दु, ‘जनबहाःद्यः जात्रायात व्यवस्थित, सभ्य व भव्य रुपं न्यायेकेत जनस्तरपाखें समिति नीस्वंगु व थ्व समितिया कजि श्री नीलकाजी शाक्य च्वनादीगु दु ।’
उगु समिति अन्तर्गत गणपतिलाल श्रेष्ठया नेतृत्वय् सुरक्षा निकाय समन्वय उपसमिति, उमेश स्थापितया नेतृत्वय् आर्थिक उपसमिति, पंचनारायण महर्जनया संयोजकत्वय् सांस्कृतिक बाजागाजा समन्वय उपसमिति, सत्यनारायण डंगोलया नेतृत्वय् रथ निर्माण निरीक्षण उपसमिति, मचाराजा महर्जनया नेतृत्वय् गुथि संस्थान समन्वय उपसमिति, राजीव राजोपाध्यायया संयोजकत्वय् संचार प्रचार प्रसार उपसमिति, नरेश महर्जनया संयोजकत्वय् घःमाः चुकू व्यवस्थापन उपसमिति क्रियाशील जूगु दुसा समितिया सचिवय् सुजीव बज्राचार्य च्वनादीगु दु ।
जात्रायात व्यवस्थित यायेत रथयात्राया रुटय् लाःगु फुक्क स्थानीय क्लब संघसंस्थां सक्रिय सहभागिता क्यनीगु जूगु दु ।
जात्रायात मर्या्दित यायेत सुरक्षा निकाय, ट्राफिक प्रहरी, येँ महानगरपालिका, नेपाल स्काउट व नेपाल रेडक्रस सोसाइटीया स्थानीय शाखात तयारी अवस्थाय् च्वंगु नं समितिं पिथंगु विज्ञप्तिइ न्ह्यथनातःगु दु
विज्ञप्तिइ धयातःगु दु, ‘गुबलेतक थुज्वःगु जात्रातय्गु अस्तित्व दयाच्वनी, उबलेतक नेपाःया सभ्यता व संस्कृति म्वानाच्वनी ।’
०००
नेपालं आईसीसी यू–१९ विश्वकप क्रिकेट अन्तर्गत एसिया क्षेत्र छनोटय् त्याकूगु दु । नेपालं न्हापांगु कासाय् सिंगापुरयात २१७ रनं बुकूगु खः ।
२८३ रनया हाथ्या ब्यूसें ब्याटिङ याःगु सिंगापुरं ३१ ओभरय् फुक्क विकेट गुमेयानाः ६५ रन जक दयेकूगु खः ।
सिंगापुरयात विशाल अन्तरं बुकाः नेपालं कासाय् शानदार जीत सुरुवात याःगु दु । सिंगापुरया नितिं सुं नं कासामिं बांलाःगु रन दयेके मफुत । निम्ह कासामिं दोहोरो अंकया स्कोर दयेकूसां नं मेमेपिं कासामिं दोहोरो अंक हे मुंके मफुत । सिंगापुरया इशान सवनीं २८ व साई भेनुगोपालं १८ रन दयेकूगु खः ।
सिंगापुरयात अःपुक हे कःघायेत नेपाःया पवन सर्राफं स्वंगू विकेट काःगु खः । अथेहे, सूर्य तमाङ व कुशल मल्लं समान निगू निगू विकेट काःगु खः ।
टस बुकाः न्हापां ब्याटिङ याःगु नेपालं ४६ ओभरय् फुक्क विकेटया क्षतिइ २८२ रन दयेकूगु खः । नेपाःया नितिं कप्तान रोहित पौडेलं सर्वा्धिक ९५ रन दयेकूगु खः । पौडेल शतक दयेकेगुपाखें ५ रनं चुकेजूगु खः । रोहितं १०५ बलय् ७ चौका व १ छक्का प्रहार याःगु खः ।
अथेहे, नेपाःया नितिं रसिद खानं ४८ रन दयेकूगु खःसा पवन सर्राफं ४७ रनया योगदान ब्यूगु खः । कमलसिंह ऐरीं १८ बलय् ३ छक्का व १ चौका प्रहार यानाः ३१ रन दयेकूगु खः ।
न्हापांगु विकेट ३ रन जूबलय् रित गौतमयात गुमेयाःगु नेपालं निगूगु विकेट १८ रन जूबलय् आशिफ शेखयात गुमेयाःगु खः ।
थ्वलिसें दबाबय् नेपाल वःगु खः । तर स्वंगूगु विकेटया नितिं सन्दीप जोरा व रोहितकुमार पौडेलं ९० रनया साझेदारी यासें ब्वां वंगु खः ।
अथेहे, रोहितं भीम सार्की्लिसे जानाः ३६ रनया साझेदारी याःबलय् नेपाःया स्कोर १४४ रन थ्यंगु खःसा न्यागू विकेट पतन जूगु खः । भीम सार्की २६ रनय् आउट जूगु खः ।
अथेहे, रोहित कुमारं रसिद खानलिसे जानाः ७७ रनया साझेदारी याःसां नं नेपालं सिंगापुरविरुद्ध उच्च स्कोर दयेकूगु खः ।
बलिङपाखें सिंगापुरया अथर्भा गुनं प्यंगू विकेट काःगु खः ।
०००
टीभी प्रसारणया अनुमति काःगु कम्पनीयात सरकारं विना प्रतिस्पर्धा इन्टरनेटया नितिं फ्रिक्वेन्सी बिइगु तयारी यायेधुंकाः इन्टरनेट सेवा प्रदायकपिं आन्दोलनय् क्वाहाँ वःगु दु । इमिसं हे संचार व सूचना प्रविधि मन्त्रालयया तयारीयात गलत धासें नेपाल दूरसंचार प्राधिकरणया प्रदेश द्वारय् धर्ना ब्यूगु दु ।
सरकारं विद्यमान विनियमावलीइ हे हिउपाः हयाः दंक फ्रिक्वेन्सी बिइत्यंगु सिइकेधुंकाः इपिं धर्नाय् च्वंगु खः । दँबदँ न्ह्यःनिसें सरकारं थःपिन्त फ्रिक्वेन्सी मब्यूगु व आः वयाः टेलिभिजन प्रसारक संस्थायात ‘खुँ लँपु’पाखें बिइतयंगु धासें इपिं आन्दोलित जुयाः धर्नाय् च्वंगु खः ।
इन्टरनेट सेवा प्रदायकपिनिगु संस्था आइस्पानया नायः भोजराज भट्टं मन्त्रालयया तप्यंगु हस्तक्षेपय् फ्रिक्वेन्सी गैरकानूनी कथं बिइत्यंगुलिं आन्दोलनय् क्वाहाँ वयागु धयादिल । वय्कलं फ्रिक्वेन्सी अक्सन (मोल बढाबढय् लिलामी) यायेमाःगु धयादीगु दु ।
वय्कलं धयादी, “अक्सन यायेबलय् राज्यायात नं फाइदा जुइ । सुयात पोसेयायेगु नितिं हे सरकारं ब्याक डोरपाखें फ्रिक्वेन्सी बिइत्यंगु गलत खः ।”
सरकारं थःपिनिगु माग सुनुवाई मयाःसा चरणबद्ध आन्दोलनय् क्वाहाँ वयेगु ख्याच्वः सेवा प्रदायकपिन्सं ब्यूगु दु ।
इमिसं प्राधिकरणय् ज्ञापन पौ नं लःल्हाःगु दु । फ्रिक्वेन्सी वितरणया मान्यता व अभ्यास अःखःया ज्या मयायेत इमिसं सचेत याकूगु दु ।
०००
त्रिभुवन विश्वविद्यालयं वइगु जेठया निगूगु वालय् स्ववियु निर्वाचन प्रस्ताव याःगु दु । थ्वसिबें न्ह्यः फागुन १४ गते जुइगु धाःगु स्ववियु चुनाव जुइ मफयेधुंकाः न्हूगु तिथि प्रस्ताव याःगु खः ।
बिहिवाः केन्द्रीय स्ववियु निर्वाचन समन्वय समितिं विद्यार्थी संगठनलिसे मंकाः कथं सहलह ब्याकूगु खः ।
सहलहस समिति नायः व त्रिभुवन विश्वविद्यालयया रेक्टर प्रा.डा. सुधा त्रिपाठीं परीक्षा लिसेंया ज्याझ्वः मदूगुलिं जेठया निगूगु वाः स्ववियु निर्वाचन यायेत पाय्छि जुइगु धयादीगु दु । लिसें वय्कलं निर्वाचनया नितिं विश्वविद्यालययात फुक्क विद्यार्थी संगठनतय्गु साथ व समर्थन माःगु नं धयादीगु दु ।
बैठकय् सहभागी अनेरास्ववियु क्रान्तिकारीया कार्यवाहक नायः सुरेन्द्र बस्नेतं धयादी, “केन्द्रीय स्ववियु निर्वाचन समन्वय समितिया पदाधिकारीपिन्सं याकनं हे ठोस तिथि क्वःछीगु धयादीगु दु ।
बैठकय् सहभागी फुक्क विद्यार्थी नेतापिं नं स्ववियु चुनाव यायेत सकारात्मक दु ।”
बैठकय् नेविसंघया प्रतिनिधि सुं नं उपस्थित मजूगुलिं ठोस तिथि घोषणा धाःसा मजुल । नेविसंघ कार्यसमिति आः भंग जूगुलिं बैठकय् प्रतिनिधित्व मजूगु खः ।
बैठकय् नेकपा सम्बद्ध अनेरास्ववियु व अनेरास्ववियु अखिल क्रान्तिकारी व मोहन वैद्य व नेत्रविक्रम चन्द विप्लव लिक्क लाःगु अखिल क्रान्तिकारीया नेतापिं सहभागी जूगु खः ।
अथेहे, नयाँ शक्ति पार्टी लिक्क लाःगु नयाँ शक्ति विद्यार्थी युनियन, संघीय समाजवादी फोरम लिक्क लाःगु समाजवादी विद्यार्थी फोरम, राजपा लिक्क लाःगु विद्यार्थी संगठन, नेमकिपा लिक्क लाःगु क्रान्तिकारी विद्यार्थी संघ, राप्रपा लिक्क लाःगु राप्रविसं, राप्रपा संयुक्त लिक्क लाःगु राप्रविसं (संयुक्त), आदिवासी जनजाति विद्यार्थी महासंघ व नेपाल प्रगतिशील विद्यार्थी युनियनया प्रतिनिधि बैठकय् सहभागी जूगु खः ।
०००
आईसीसी यू–१९ विश्वकप क्रिकेट अन्तर्गत एसिया क्षेत्र छनोट कासाय् सिंगापुरविरुद्ध न्हापां ब्याटिङ यासें नेपालं २८३ रनया विशाल स्कोर मुंकूगु दु । नेपाःया नितिं कप्तान रोहित पौडेलं सर्वा्धिक ९५ रनया योगदान ब्यूगु खः ।
नेपालं थःगु मुक्कं ओभर ब्याटिङ याये धाःसा मफुत । ३०० रन पूवंकेफूगु अवस्थाय् नेपाल ४६ ओभरय् अलआउट जूगु खः । ४६ औ ओभरय् नेपालं ३ विकेट गुमेयाःगु खः ।
कप्तान रोहितकुमार पौडेल सतक दयेकेत चुके जूसां नं नेपाःयात बल्लाःगु स्कोरय् थ्यंकूगु खः । १०५ बलया सामना याःम्ह वं ७ चौका व १ छक्का प्रहार याःगु खः । वय्कः ५ रनं सतक दयेकेगुलिं चुके जूगु खः ।
पौडेलयात पवन सर्राफ, भिम सार्की, रासिद खान व कमल सिंह ऐरीं स्यल्लाःगु बः ब्यूगु खः । रासिद खानं ४७ बलय् ४८ रन दयेकूबलय् रन आउट जूगु खः । ९ औं नम्बरय् वःम्ह ऐरीं १८ बलय् हे ३१ रनया विष्फोटन यानाः म्हितूगु खः ।
सिंगापुरया नितिं अथर्व गुनें सर्वा्धिक ४ विकेट काःगु खः । अथेहे, राउल शर्मां २, विनित मेहतां २ व प्रमेश सांघवीं १ विकेट काःगु खः ।
नेपालं १ विकेट रन आउटया रुपं गुमेयाःगु खः ।
०००
नेत्रविक्रम चन्द विप्लव नेतृत्वया प्रतिबन्धित नेपाल कम्युनिष्ट पार्टी (नेकपा) या मकवानपुर इञ्चार्ज वीरबहादुर घलान (ज्वाला) लिसें निम्हेसित प्रहरीं ज्वंगु दु ।
हेटौंडा उपमहानगरपालिका–८ फायरलाईनपाखें प्रहरीं बिहिवाः बहनी इमित ज्वंगु खः ।
सवारीसाधन चेकिङ यायेगु झ्वलय् मोटरसाइकलय् वःपिं ज्वालालिसें मेम्ह छम्हेसित ज्वंगु प्रहरीं स्रोतं जानकारी ब्यूगु दु ।
प्रहरीं इमित ज्वनागु औपचारिक रुपं धाःसा सार्वजनिक याःगु मदुनि ।
थ्वसिबें न्ह्यः मकवानपुर प्रहरीं विप्लव पुचःया कार्यकर्ता जूगु द्वपनय् प्यम्हेसित ज्वनाः हिरासतय् तयाः थीथी मुद्दा न्ह्याकूगु दु ।
०००
थ्यंमथ्यं ३ किलो लुँलिसें स्वम्ह चिनियाँ नागरिकपिन्त गिरफ्तार याःगु दु ।
त्रिभुवन विमानस्थल प्रहरी व भन्सार ज्याकुथिया पुचलं स्वंगू किलो व ३०० ग्राम लुँलिसें इमित गिरफ्तार याःगु महानगरीय प्रहरी आयुक्तया ज्याकुथि येँया लानिपुखूया डिआईजी शैलेश थापा क्षेत्रीं पुष्टि याःगु खः ।
मलद्वारय् लुँ सुचुकाः हयाच्वंगु इलय् इमित गिरफ्तार याःगु खः । इपिं चीनया कुमिङपाखें येँय् वःगु खः । उपिं मनूतय्त प्रहरीं खि फाकाः लुँ पिकाःगु खः ।
गिरफ्तारीइ लाःपिं फुजियानया झ्याङ्ग जिआंन, गान्सुया माओ इन्गुआ व गान्सुया हे फुमिङ जूगु इमिगु पासपोर्टय् दूगु विवरणपाखें सीदूगु खः । इपिं छाय् नेपाः वःगु खः धैगु सीमदुनि ।
थुकिया विस्तृत अनसन्धान जुयाच्वंगु प्रहरीं जानकारी ब्यूगु दु ।
०००
नेपालय् ‘पब्जी’ कासा प्रतिबन्ध जूगु दु । प्रहरीया केन्द्रीय अनुसन्धान ब्यूरोया विशेष आग्रहस नेपाल दूरसंचार प्राधिकरणं ‘पब्जी’ कासा प्रतिबन्ध याकेब्यूगु खः ।
प्रहरीया आग्रहस प्राधिकरणं थौं बिहिवाःनिसें हे इन्टरनेट सेवा प्रदायकपिन्त ‘पब्जी’ कासा डाउनलोड व म्हितेगु ज्याया नितिं पनेत निर्देशन ब्यूगु खः ।
प्राधिकरणया प्रवक्ता मीनप्रसाद अर्यालं प्रहरीपाखें वःगु इनापया लिधंसाय् उगु कासाय् प्रतिबन्ध तयेत इन्टरनेट सेवा प्रदायकयात निर्देशन बियागु जानकारी बियादीगु दु ।
सरकारया निर्देशन कथं सेवा प्रदायकपिन्सं थःथःगु नेटवर्कय् ‘पब्जी’ कासा डाउनलोड यायेत व म्हिते मजीगु कथं बन्द याइगु जूगु दु ।
‘पब्जी’ कासा मचातय्गु मानसिक समस्या अप्वयेकूगु गुनासो आपालं वयेधुंकाः थथे उगु कासाय् प्रतिबन्ध तःगु खः ।
संचार मन्त्रालय व सूचना प्रविधि मन्त्रालयया निर्देशनय् प्राधिकरणं थ्वसिबें न्ह्यः पोर्न साइटय् नं प्रतिबन्ध तयेत इन्टरनेट सेवा प्रदायकपिन्त निर्देशन ब्यूगु खः । उगु निर्देशनया हुनिं आः नेपालय् पोर्न साइटत प्रतिबन्धित जूगु दु ।
केन्द्रीय प्रहरी अनुसन्धान ब्यूरों ‘पब्जी’ कासाय् प्रतिबन्ध तयेत येँ जिल्ला अदालत न्ह्यःने स्वकृतिया नितिं माग याःगु खः ।
अदालतं मनोचिकित्सकलिसे परामर्श कयाः कासा बन्द यायेत बुधवाः स्वीकृति ब्यूगु खः । वहे अदालतया स्वीकृति कथं ब्यूरों प्राधिकरणयात कासा प्रतिबन्ध तयेगु कथं सेवा प्रदायकपिन्त निर्देशन बिइत पौ छ्वःगु खः ।
