कृष्ण प्रजापति
० ११ दँया रुपमतीया बलात्कार लिपा हत्या ः प्रहरीं निम्हेसित ज्वन ।
० किपूया सीमानाय् लाःगु भिराडिल पार्कय् जापानी साकुराया वृक्षारोपण ।
० कांग्रेसं थौंनिसें संसद अवरुद्ध मयाइगु, शंखरापुर नगरपालिकाय् १२ जूवा,
० चिकंया मू हाकनं थकाल, वा वया स्वक्वःगु टी–२० कासाय् लिच्व, ! व
० भारतया विहारय् रेल दुर्घटनाः ६ म्ह सित, भेनेजुएला संकट, विश्व स्वंगू,
विराटनगर महानगरपालिका बलुवाईया ११ दँया मिसामचा रुपमती दासया बलात्कार लिपा हत्या जूगु प्रहरी अनुसन्धानं सीदूगु दु ।
हत्या दुथ्याःगु द्वपनय् प्रहरीं विराटनगर ८ या २५ दँया अब्बास अन्सारी व १८ दँया चन्द्र महतोयात गिरफ्तार याःगु दु ।
निम्ह लागू वासः छ्यलीपिं खः । लागू वासःया नसाय् मिसामचाया बलात्कार लिपा हत्या यानाः सीम्ह खुसिइ वांछ्वःगु प्रारम्भिक अनुसन्धानपाखें सीदूगु प्रहरीं जानकारी ब्यूगु दु ।
विराटनगर महानगरपालिका–८ बलुवाईया ११ दँया मिसामचा गुडिया धाइम्ह रुपमती वंगु शनिवाः छेँपाखें जःलाखःलाया छेँय् टिभी स्वःवंगु झ्वलय् तंगु खः ।
कन्हय् कुन्हु सुथय् छेँपाखें थ्यंमथ्यं ५०० मिटर दक्षिण खुसिइ नांगा अवस्थाय् सीम्ह लुयावःगु खः । जःलाखःला महमद नेमाया छेँय् वनेगु झ्वलय् निम्हेस्यां जवरजस्ती यंकाः बलात्कार यानाः सीम्ह खुसिइ वांछ्वःगु प्रहरीया दाबी दु ।
पोष्टमार्टम रिपोर्टं नं बलात्कार लिपा हत्या जूगु खनेदूगु प्रहरी स्रोतया दाबी दु ।
घटना जुइधुंकाः अनुसन्धान न्ह्याकूगु प्रहरीं ११ म्हेसित नियन्त्रणय् काःगु दु । घटना धुंकाः ज्वंपिं निम्हेसिनं घटना स्वीकार याःसां नं प्रहरीं प्रमाण मुंके मफुनि । खुसिइ सीम्ह वांछ्वःगु हुनिं प्रमाण मुंकेत ई काःगु अनुसन्धानय् दुथ्याःम्ह छम्ह प्रहरी अधिकृतं जानकारी ब्यूगु दु ।
जिल्ला प्रहरी ज्याकुथि मोरङया प्रवक्ता डिएसपी घनश्याम श्रेष्ठं घटनाय् दुथ्याःपिं निम्हेसित ज्वनागु खँ धाःगु दु । ज्वंपिन्त आइतवाः हे सार्वजनिक यायेगु तयारी दुगु वय्कलं धयादीगु दु ।
०००
चन्द्रागिरी नगरपालिका–१५ य् च्वंगु किपूया सीमानाय् लाःगु भिराडिल पार्क क्षेत्रय् जापानं हःगु ५० मा साकुरा प्रजातिया सिमा शनिवाः वृक्षारोपण याःगु दु ।
येँ क्षेत्र नम्बर ९ या प्रतिनिधिसभाया सांसद कृष्णगोपाल श्रेष्ठ व नेपाःया नितिं जापानी कार्यबाहक राजदूत योशिका युजोया समुपस्थितिइ उगु वृक्षारोपण ज्याझ्वः जूगु खः ।
जापानया खाइके सहरया लाइफ सेभिङ क्लबया प्रतिनिधि व चन्द्रागिरी नगरपालिकाया प्रतिनिधितय्सं वृक्षारोपण याःगु चन्द्रागिरी नपा वडा नम्बर १५ या वडानायः उत्तमबहादुर राउतं जानकारी बियादीगु दु ।
किपू सीमानाय् लाःगु उगु क्षेत्रयात पर्यटकीय गन्तव्य दयेकेगु ल्याखं जापानी प्रजातिया वृक्षारोपण यानागु वडाध्यक्ष राउतं धयादीगु दु । उगु क्षेत्रयात पर्यटकीय ल्याखं विकास यायेगु ज्याय् जापानी राजदूतावासं माःगु ग्वाहालि यायेगु प्रतिबद्धता प्वंकूगु दु । वडा नम्बर १५ ज्याकुथि व लाइफ सेभिङ क्लब दथुइ उकिया नितिं थःथवय् समझदारी जूगु वडा नायः राउतं जानकारी बियादीगु दु ।
सांसद कृष्णगोपाल श्रेष्ठं उगु क्षेत्रय् याःगु वृक्षारोपणया उच्च स्याहार यायेगु धयादीगु दु । जापानं हःगु उगु विरुवायात थःपिनिगु हे सन्तानया रुपं माया मतिना व सुसाकुसा यायेगु सांसद श्रेष्ठं प्रतिबद्धता प्वंकादीगु दु । उगु क्षेत्रयात पर्यटकीय ल्याखं विकास यायेगु ज्याय् माःगु ग्वाहालि यायेगु नं सांसद श्रेष्ठं बचं बियादीगु दु ।
अथेहे, नेपाःया नितिं जापानी कार्यवाहक राजदूत युजों वडा नम्बर १५ य् च्वंगु भिराडिल क्षेत्रयात पर्यटकीय गन्तव्य दयेकेगु कथं माःगु ग्वाहालि यायेगु प्रतिबद्धता प्वंकादीगु दु । उकिं नेपाः व जापान सरकार दथुया स्वापू बल्लाइगु विश्वास नं वय्कलं कयादीगु दु ।
स्थानीय ज्येष्ठ नागरिक कृष्णबहादुर कार्कीया सभापतित्वय् जूगु ज्याझ्वलय् भिराडिल पार्कया नायः लोकनाथ सिलवाल लगायतं जापानया ग्वाहालियात च्वछायादीगु खः ।
०००
प्रमुख विपक्षी नेपाली कांग्रेसं सदनया अवरोध चीकीगु जूगु दु ।
आइतवाः संसदया बैठक न्हिनय् ३ ता इलय् सःतातःगु खः । बैठकय् विपक्षी दलया नेता शेरबहादुर देउवावं सम्बोधन यानादीगु खः । वधुंकाः संसद सुचारु न्ह्याइ ।
गिरिजाप्रसाद व सुशील कोइरालाया नामय् पलिस्था जूगु अस्पताल केन्द्र सरकार मातहतय् तयेमाःगु माग सम्बोधन जुइधुंकाः कांग्रेसं डा. गोविन्द केसीया जीवन रक्षायात मुद्दा दयेकूगु खः ।
डा. केसीं एकतर्फी रुपं अनसन तोडेयाये धुंकाः कांग्रेसं संसदय् अवरोध मयाइगु जूगु खः । मू सचेतक बालकृष्ण खाँडं संसदीय दलया नेता देउवां सम्बोधन यायेधुंकाः संसद न्ह्याइगु जानकारी ब्यूगु दु ।
थ्वहे दथुइ संसदय् गुकथं प्रस्तु जुइगु धैगु बारे सहलह यायेत थौं आइतवाः हे कांग्रेस संसदीय दलया बैठक नं सःतूगु दु ।
०००
महानगरीय प्रहरी प्रभाग सक्व व प्रहरी चौकी नाङलेभारें शनिवाः सनिलय् येँया चापकोबोटपाखें ८१ ह्जार ८०० तका दांलिसें १२ म्ह जुवाडे ज्वंगु दु ।
शंखरापुर नगरपालिका–१ चापकोबोटय् च्वंगु कृष्णबहादुर थिङया छेँय् जुवा म्हितकातःगु धैगु गोय सुचंया आधारय् प्रहरी पुचलं ज्वंगु महानगरीय प्रहरी प्रभाग सक्वया प्रहरी निरीक्षक लक्ष्मी खनालं जानकारी ब्यूगु दु ।
ज्वंपिं येँ शंखरापुर–१ च्वनीम्ह ५१ द्याया खड्कबहादुर भुजेल, वहे थासय् च्वनीम्ह ४६ दँया सीताराम रिमाल, ५७ दँया बखान तामाङ, ५२ दँया बुदे लामा व ६६ दँया हेमबहादुर बास्तकोटी लिसें १२ म्ह दूगु खनालं जानकारी ब्यूगु दु ।
ज्वंपिन्त थप अनुसन्धान जुयाच्वंगु व प्रचलित कानून कथं मुद्दा न्ह्याकेगु प्रहरीं जानकारी ब्यूगु दु ।
थ्वसिबें न्ह्यः नं महानगरीय प्रहरी वृत्त बौद्ध मातहत जोरपाटी व बौद्धया फूलबारीपाखें तःधंगु रकमलिसें जुवाडे ज्वनाः प्रहरीं मुद्दा न्ह्याकूगु खः ।
०००
सरकारं पेट्रोलियम पदार्थया मू हाकनं थकाःगु दु । शनिवाः चान्हय् १२ ता ईनिसें लागू जुइ कथं पेट्रोल, डिजेल व मचिकनय् नितका नितका दां थकाःगु दु ।
आः पेट्रोलया मू छगू लिटरया ११० तका थ्यंगु दुसा डिजेल व मचिकं ९७ तका दां थ्यंगु दु ।
नेपाल आयल निगमं भारतीय आयल कर्पोरेशनं छ्वयाहःगु न्हूगु मूल्य सूची कथं भा थकाःगु खः ।
निगमयात आः १ अर्ब ६ करोड संचित नोक्सानी दु । थुगुखुसि मू समायोजन लिपा निगमयात १५ न्हुइ १ अर्ब १६ करोड नाफा जुइगु प्रवक्ता विरेन्द्र गोइतं जानकारी ब्यूगु दु ।
अन्तर्राष्ट्रिय बजारय् मू अतिकं दंबलय् नं सरकारं वकथं मू समायोजन याःगु मदु । थःपिं संचित घाटाय् लाःगु तर्क बिसें निगमं मूल्य समायोजन याःबलय् नाफा अप्वयेकाः यंकूगु दु ।
निगमया अधिकारीपिन्सं संचित घाटा पूर्ति जुइधुंकाः सीमित नाफा तयाः मू छक्वलं घटेयायेगु दाबी याःगु दु ।
निगमया आः नकतिनि जक सुरेन्द्र पौडेल प्रबन्ध निर्देशकया रुपं वःगु दु । घाटाय् दूगु उदयपुर सिमेन्टयात नाफा यंकूगु हुनिं हे वयात निगमया जिम्मेवारी ब्यूगु खः ।
तर वया नेतृत्वं नं विगतया थें हे उपभोक्तायात मारय् लाइगु कथं नाफा केन्द्रीत जुयाः मू क्वःछीगु ज्या याःगु धासें उपभोक्तावादीपिन्सं द्वपं ब्यूगु दु ।
निगमं नाफा उच्च तयाः मू अप्वयेके धुंकाः उपभोक्ता थप महंगीया मारय् लाइगु जूगु दु ।
थ्वसिबें न्ह्यः मोहनी स्वन्तिया इलय् घाटा जूबलय् नं मू थमकाःगु धासें निगमया अधिकारीं उगु घाटा पूर्ति जुइधुंकाः वैज्ञानिक तवरं मू समायोजन यायेगु धाःगु दु ।
०००
सामाजिक उद्यमशीलताया विषयस युवातय्त थुइकेगु आज्जु ज्वनाः युथ आन्टेप्रेनुयर्स् क्लबपाखें छगू अनलानई कोर्ष न्ह्याकूगु दु ।
ख्वपया सरस पाठशालाय् शनिवाः छगू ज्याझ्वःया दथुइ थुगु कोर्ष काये धुंकूपिन्त दसिपौ लःल्हायेगु व मकाःपिन्त थुगु कोर्षया विषयस जानकारी बिइगु ज्याझ्वः ग्वसाः ग्वःगु खः ।
सामाजिक उद्यमशीलताया विषयस थुइकुसें युवातय्त स्वरोजगार जुइकेगु व थःथःगु समाजया नितिं योगदान बिइफयेकेगु हे थुगु कोर्षया मू आज्जु खः ।
नेपाःया थीथी थासय् यानाः मुक्कं स्वीन्याम्हेसिन थुगु कोर्ष काये क्वचायेकूगु खः । कोर्ष काये धुंकूपिन्त द अर्गनाइजेसन फर इन्डिजेन्ट टट्स् (त्वा) या संस्थापक नायः इन्द्रप्रसाद खाइतुं दसिपौ लःल्हानादीगु खः ।
ज्याझ्वलय् न्वःवानादिसें खाइतुं थुगु कोर्षपाखें ब्वँमिपिंसं थीथी देय्या स्यनामिपिंपाखें सामाजिक उद्यमशीलताया बारे सयेकेफइगु नापं थःम्हं सःसिउगु खँया बारे थीथी देय्या ब्वँमिपिं नापं अन्तरक्रिया यायेफइगु धयादिल ।
सन् २०१९ या फेब्रअरी महिनातक थुगु कोर्ष कायेफइगु धयादिसें खाइतुं सकसित ध्यबा पुलेम्वाःगु थुगु कोर्ष कायेत इनाप नं यानादीगु खः ।
ज्याझ्वलय् सिम्ला ज्ञावा लामां थुगु कोर्षया विषयस पावर पोइन्ट प्रस्तुतिकरण यानादीगु खः । तालिमय् ब्वति कयादीपिंसं तालिमया विषयस थःथःगु अनुभव ज्याझ्वलय् कनादीगु खः ।
ज्याझ्वलय् सरस पाठशाला, प्रोक्सिमा इन्टरनेशनल ऐकेडेमि, सरस हस्तकला, लियो क्लब अफ सूर्य्विनायक नापं थीथी संस्थाया व्यक्तित्वपिन्स नं थःथःगु नुगःखँ तयादीगु खः ।
थुगु कोर्षया नितिं यूरोपियन युनियनया इरासमस प्लस नांगु ज्याझ्वलं ग्वाहालि याःगु खः । थीथी देय्या च्यागू संस्थात जाना सन् २०१७ य् युथ आन्टेप्रेनुयर्स् क्लब नीस्वंगु खः । थुगु क्लबया नेपाःपाखें नेतृत्व त्वा संस्थां याइगु खः ।
युवातय्त लक्षित यासें थुगु क्लबं न्हापांखुसि सन् २०१८ मार्च महिनाय् सामाजिक उद्यमशीलताया विषयस अनलाईन कोर्ष न्ह्याकूगु खःसा ई कथं अले युवातय्गु माग कथं थीथी कथंया तालिमया ज्याझ्वः न्ह्याकाः वनीगु थुगु संस्थाया योजना दु ।
०००
नेपाः व यूएई दथुइ जुइगु धाःगु स्वक्वःगु व निर्णयक टी–२० कासाय् वा वया व हावलासा त्वयाः पंगः जूगु दु । मद्दिक्क वा वःगुलिसें वाफय् तकं वःगु हुनिं कासा क्वःछिनातःगु इलय् सुरु मजूगु पक्का जूगु दु ।
नेपाली ई कथं न्हिनय् २ः४५ ता इलय् सुरु जुइगु कासाया नितिं २ः१५ य् टस जुइमाःगु खः । तर मदिक्क वा वयाच्वंगुलिं टस लिछ्याःगु दु । पिचया मू कभर तयातःगु दु । मैदानया स्थिति बांलाः जूगुलिं वा दीधुंकाः छुं ई लिपा हे कासा सुरु जुइगु सम्भावना धाःसा दु ।
कासाया नितिं कासामिपिं पेभेलियनतक नं थ्यंकूगु मदुनि । वा वःगु हुनिं कासामिपिं भीआईपी बक्सय् हे च्वनाः प्रतिक्षा यानाच्वंगु दु ।
०००
भारतया विहारय् रेल दुर्घटना जुयाः ६ म्ह मनूत सीगु दु । आइतवाः सुथय् जोगबनीं आनन्द विहार वनाच्वंगु सीमाञ्चल एक्सप्रेसया रेल बैशाली धैगु थासय् दुर्घटना जूगु खः ।
रेलया ९ डिब्ब लिकं फुट्के जुयावंगु खः । पूर्व मध्ये रेलवेया छम्ह अधिकारी राजेश कुमारं दुर्घटनाय् ६ म्ह मनूत सीगु व आपालं यात्रुपिं घाःपाः जूगु जानकारी ब्यूगु दु ।
आपांलं यात्रुपिं डिब्बाय् फसेजूगु खः । इमित सुरक्षाकःमि व स्वास्थ्यकःमिया पुचलं उद्धार याःगु खः । लिसें रेलवेया उच्च अधिकारीपिं नं घटनास्थल थ्यंकूगु दु । रेल दुर्घटनाया हुनि धाःसा सीमदुनि ।
रेलवे विभागं सीपिपिनिगु छेँजःयात म्हतिं न्यागू न्यागू लख तका दां बिइगु व तच्वकं घाःपाः जूपिन्त छगू छगू लख तका दां बिइगु व सामान्य घाःपाः जूपिनिगु निःशुल्क वासः यायेगु घोषणा याःगु दु ।
०००
भेनेजुएला प्रकरणय् विश्व स्वंगू ध्रुवय् विभाजित जूगु दु । अमेरिकां विपक्षी नेता गुवाइडोयात अन्तरिम राष्ट्रपति स्वीकार यायेधुंकाः न्ह्याःगु ध्रुवीकरणय् नेपाल तकं दुथ्याःगु दु ।
आइतवाःतक विश्व स्वंगू ध्रवय् विभाजित जुयाः कारकासय् धाःसा मडूरोया पक्ष व विपक्षय् तःधंगु प्रदर्शन जूगु दु ।
मडूरो थःहे सतकय् क्वाहाँ वयाः अमेरिकी साम्राज्यवाद विरुद्ध ह्याउँगु ध्वाँय् ब्वयेकूगु खः । वयात बहुसंख्यक जनतां साथ ब्यूगु दाबी याःगु दु । थुखे अमेरिकालिसे दक्षिण अमेरिकी ब्राजिल, जर्जिया, युक्रेनं गुवाइडोयात समर्थन याःगु दु ।
बीबीसीया कथं बहुसंख्यक विश्वया मुलुकं मडूरोयात समर्थन याःगु दु । मडूरोयात समर्थन याःगु राष्ट्र रुस, चीन, बेलारुस, क्युबा, निकारागुवा, बोलिभिया, सुरिनाम, इरान, सिरिया व टर्की खः ।
युरोपियन युनियन अन्तर्गतया मुलुकतसें धाःसा भेनेजुएलाय् न्हूगु निर्वाचन जुइमाःगु धाःगु दु । बेलायतलिसें युरोपेली मुलुकं यदि ८ न्हु दुने चुनाव घोषणा मयाःसा गुवाइडोयात समर्थन यायेगु धाःगु दु ।
वर्तमान राष्ट्रपति निकोलस मडूरोयात भारतं तकं समर्थन प्वंकूगु दु । मडूरों निगूगु कार्यकालया नितिं सपथ ग्रहण यायेधुंकाः अमेरिकां वविरुद्ध गुवाइडोयात अन्तरिम राष्ट्रपतिया मान्यता बिइधुंकाः थ्व प्रकरणय् विश्वया ध्यानाकर्षण जूगु खः ।