संवाहक नेपालभाषा बुलेटिन चैत ७ गते

305

० होलिया दिं बन्दुक क्यनाः लुँ लुटेयात ।
० विप्लवविरुद्ध सेना परिचालन विषयस नेपाली सेनां न्वःवात ।
० होलीकुन्हु न्याम्ह मिसालिसें १९४ म्ह गिरफ्तार ।
० कामना प्रकाशनया प्रधानसम्पादक पुष्करलाल श्रेष्ठया उसाँय् स्यन । व
० पृथ्वीया सतह लिक्क शक्तिशाली उल्का विस्फोट ।
कमलामाई नगरपालिका–६ स्टलबजारय् लुँवहःया तिसा दयेकीम्ह कालिगढयात बन्दुक क्यनाः अज्ञात पुचलं १२० तोला लुँ लुटेयाःगु दु ।
सिन्धुली उद्योग वाणिज्य संघया नायः अम्रेशचन्द्र वैदारं होलिया दिं न्हिनय् उगु घटना जूगुलिं चिन्ता प्वंकूसें राज्यं व्यवसायीयात सुरक्षाया प्रत्याभूति यायेत व लुटपाटय् दुथ्यःपिं मनूतय्त याकनं कारवाही यायेत माग याःगु दु ।
जिल्ला प्रहरी ज्याकुथिया प्रहरी उपरीक्षक चक्रबहादुर सिंहं उगु घटनाय् अनुसन्धान न्ह्यानाच्वंगु जानकारी ब्यूगु दु ।
प्रहरीं घटनाया अनुसन्धान यानाच्वंगु व तत्काल हे छुं धायेमफुनिगु सिंहं धाःगु दु ।
०००
कालिकोट लिसेंया जिल्लाय् नेत्रविक्रम चन्द विप्लव नेतृत्वया नेकपा विप्लव माओवादीविरुद्ध सेना परिचालन जूगु धैगु बुखँत गुलिखे संचारमाध्यमय् वयेधुंकाः नेपाली सेनां न्वःवाःगु दु ।
नेपाली सेनां बिहिवाः छगू विज्ञप्ति सार्वजनिक यासें छुं दिंनिसें वयाच्वंगु टिकाटिप्पणीप्रति थःपिनिगु ध्यानाकर्षण जूगु धाःगु दु ।
नेपाली सेना आः पूर्वनिर्धारित तालिम, सैन्य अभ्यास व स्वास्थ्य शिविरय् केन्द्रीत जूगु विज्ञप्तिइ स्पष्ट याःगु दु ।
सेनाया विज्ञप्तिइ धयातःगु दु, ‘वर्तमान अवस्थाय् नेपाली सेना थःपिनिगु पूर्वनिर्धारित तालिम, सैनिक अभ्यास व स्वास्थ्य शिविरलिसेंया नियमित ज्याय् केन्द्रीत जूगु जुयाः थुज्वःगु बुखँत पाखें भ्रमय् मलायेत नेपाली सेनां आग्रह यानाच्वना ।’
नेपाली सेनां न्ह्यःने धाःगु दु, ‘नेपाली सेना नेपाःया संविधान, सैनिक ऐन व नेपाल सरकारया नीति व निर्देशन कथं संचालन जुइगु संस्था जूगुलिं नेपाली सेना थःपिनिगु जिम्मेवारीप्रति सजग जू । वहे आधारभूत मान्यताय् नेपाली सेना सदां अडिग जूगु तकं स्मरण याकाच्वना ।’
विगत छुं दिं न्ह्यःनिसें आधिकारिक श्रोतं ब्यूगु औपचारिक सुचं बाहेक नं थीथी सैनिक स्रोतया हवाला बिसें छुं संचारमाध्यमतसें नेपाली सेनासम्बन्धी याःगु थीथी भ्रामक व कपोलकल्पित टिकाटिप्पणीत याःगु धासें विज्ञप्तिइ स्पष्ट यानातःगु दु ।
०००
बुधवाः न्यायेकूगु होली पर्वय् उछृङ्खल गतिविधि याःगु द्वपनय् प्रहरीं येँपाखें १९४ म्ह मनूत गिरफ्तार याःगु दु ।
राजधानीया दरबार मार्ग, थमेल, बसन्तपुर, भृकुटीमण्डप, महाराजगञ्ज, न्हूबानेश्वर लिसेंया क्षेत्रं इमित गिरफ्तार याःगु खः ।
येँ प्रहरी परिसर टेकुया डिएसपी होविन्द्र बोगटीं ब्यूगु जानकारी कथं गिरफ्तारीइ लाःपिं न्याम्ह मिसापिं खः । ज्वंपिन्त लिक्क च्वंगु प्रहरी ज्याकुथि तःगु खः ।
प्रहरीं होली पर्वया छुं दिं न्ह्यःनिसें हे विशेष सुरक्षा योजना लागू यासें लाक्वपाक्व रंग इकेगु व च्वपुचां क्ययेकीपिंत थासं थासय् हे ज्वनेगु धाःगु खः ।
ज्वंपिं होहल्ला याःपिं, ल्वापु याःपिं व ड्रिंक एण्ड ड्राइभ याःपिं नं लाःगु येँ प्रहरी परिसरया प्रमुख एसएसपी बसन्तकुमार लामां धयादीगु दु ।
लामाया कथं बुधवाः सनिलय् गिरफ्तारीइ लाःपिंत स्क्रिनिङ याःगु व गम्भीर कथंया ज्याय् दुथ्याःपिंत कसुर कथं मुद्दा न्ह्याकूगु दु ।
०००
बागबजार लागां नक्कली नोटयात सक्कली धकाः ठगी यापिं निम्हसित ज्वंगु दु ।
विशेष सूचनाया आधारय् महानगरीय प्रहरी परिसरया कार्यालयया टोली खोजतलास यायेगु झ्वलय् बागबजारय् च्वंगु छगू होटलं म्हिगः बहनि प्रहरीं ज्वंगु खः ।
थथे ज्वपिं म्याग्दी बखरया ५२ दँया भीमबहादुर मल्ल व ओखलढुङ्गा दियालो छेँ जुयाः ख्वपय् च्वना वयाच्वम्ह मानबहादुर सुवेदी जूगु परिसरं जानकारी ब्यूगु दु । उमिगुपाखें १२ बण्डल नक्कली नोट थें खनेदुगु भ्वंया बण्डल, थीथी रसायन, नोट दयेकेगु नितिं छ्यलिगु कैँची बरामद जूगु खः ।
०००
फागुन शुक्ल अष्टमीया न्हि निसें ख्वपय् न्ह्याइगु होली पुन्हि यौन पर्वया रुपमा ख्वपय् छवाः तक न्यायेकेगु चलन दु ।
भीमसेन गुठीया गाय्जु भीमसेन मन्दिरया पाटीइ च्वनाः अष्टमीनिसें पून्हि तक “भीमसेन देया लज खङ्गलो वानला ल्यासे, बिस्यूवाने म्वायेक सो झाया ला” भीमसेनया लिङ्ग खःनाः लोभय् जुल कि, बिसे वने म्वायेक….” यौन नाप सम्बन्धित म्ये हाला होली पर्व ख्वपय् न्ह्याइ ।
दत्तात्रय देगःया न्ह्यःने प्रसिद्ध भीमसेन देगःया फल्चाय् नेवाः भाषां म्येया लिसें लिसें भीमसेन द्यःयात पुज्यानाः होली पर्व न्ह्यायेकी । भीमसेन देगःया भीमसेनया सिंया लिङ्ग व द्रौपतीया योनीया प्रतीक लंया लिसे यौन समागमया रुपमा छवाः तक ब्वज्या यानाः तइ ।
सिंयाभीमसेनया लिङ्गयात फागुन शुक्ल अष्टमीया न्हिं म्हिगः निम्हेस्या ब्वलय् तयाः ख्वपय् इनाचो, बाचुटोल, जेला, जगाती, बह्मायणी, च्याम्हसिंह जुयाः तचपालस्थित दत्तात्रय देगःया न्ह्यःने ल्यूने लाःगु छेँ पसःलय् दर्शन व पूजा यानाः सनिलय् देगःया पाटीइ खाःगु खः । ख्वपया संस्कृतिविद् ओम धौभडेलया कथं नेवाः परम्परा कथं थुकियात ‘चीर स्वायेगू’ धाई । चीर स्वायेगू अर्थात् लिङ्ग चाःहिकाः होली न्हयाइगु खः । लिङ्गयात स्थानीयवासी पूजा यायेगु, अनि यायेगु व दान दक्षिणा बिइगु परम्परा दु । थथे यात धाःसा व्यापार अप्वः जुइगु विश्वास याइ ।
ख्वप देय् चाहिका भीमसेन देगलय् हइगु लिङ्ग व योनी आकारया प्वाः दुगु ह्याउगु कापः भीमसेनया देगलय् खाइ ।
म्हिगः सुथय् निसें थुकिया पूजा व दर्शन यायेत स्थानीय जनता द्यः थाय् वयेगु याइ । शनिबाः व मङ्गलबाः थुकिया पूजा व दर्शन यायेत तच्वकं हुल जुइ ।
दक्षिण एसियाय् गनं कृष्ण नाप व गनं प्रल्हाद नाप दइगु होली पर्व थन धाःसा भीमसेन नाप स्वापू तयाः न्ह्यायेकेगु परम्परा दुगु संस्कृतकर्मीया धापू दु । चीर स्वायेगू अर्थात् लिङ्ग यःखाये धुंकाः थनया नेवाः समुदाय भीमसेन देगलय् वनाः गुठी भ्वय् नयेगु प्रचलन दयाच्वंगु दनि ।
देगलं खुसि तक लिङ्ग क्वबिइनाः यंकिम्ह मनू नं काय् बुइकिगु धइगु विश्वासया आधारय् लिङ्ग क्वबिइपिनिगु धेधें बल्ला हे जुइगु खः । । भीमसेनया देगः जगतप्रकाश मल्लया इलय् दयेकुगुलिं होलीया थ्व परम्परा नं उगु इलंनिसें न्ह्याःगु जनविश्वास दु ।
०००
चकंद्यः जात्रा म्हिगः बहनि क्वचाल । थँबहीं न्ह्याःगु उगु जात्रा थीथी त्वाः चाहिला चकं द्यःया द्यः छेँय् थँबही यंकुगु खः । चकं द्यःयात असं, न्हाय्कं त्वाः, महाबू , मासंगल्ली, जनबहाः, वंघः, हनुमानध्वाका, यटखा लिसें थीथी थासय् चाहिकेगु याइ ।
अथे हे म्हिगः होली पुन्हिं खुन्हू तःधंगु तिंख्यलय् गुरुमापायात जाः नकुगु दु । किलाधः त्वया ज्यापू समुदाय पाखें इतुबहालं निसें जाः थुयाः तिंख्यलय् वनाः थथे जा नकुगु खः ।
०००
कामना प्रकाशनया नेपाल समाचारपत्र राष्ट्रिय न्हिपौया प्रधान सम्पादक पुष्करलाल श्रेष्ठया यलया भैंसेपाटीइ च्वंगु नेपाल मेडिसिटी अस्पतालया सघन उपचार कक्षय् छुं दिं न्ह्यःनिसें वासः यानाच्वंगु दु ।
थ्यंमथ्यं प्यला न्ह्यः न्हासय् समस्या जूगु हुनिं राजधानीया बयोधा अस्पतालय् न्हाय्या व ब्लू क्रसय् जलास्यँ (किड्नी)या पत्थरीया शल्यक्रिया याःसां नं वय्कःयाके थीथी स्वास्थ्य समस्या खनेदयेधुंकाः पूर्ण रुपं ल्वय् क्वलाःगु मदुनि ।
स्वास्थ्य स्थितिइ समस्या अप्वयावंगु हुनिं श्रेष्ठयात येँया थापाथलीइ च्वंगु नर्भिक इन्टरनेशनल अस्पतालय् वासः यायेगु नितिं भर्ना याःगु खः । छुं दिंया वासः यायेगु झ्वलय् चिकित्सकपिन्सं प्रधान सम्पादक श्रेष्ठयात संक्रमण जूगु आशंका याःगु हुनिं थप वासः यायेगु नितिं नर्भिकं भारतया हरियाणाय् च्वंगु मेदान्त अस्पतालय् रिफर याःगु खः । मेदान्त अस्पतालय् थ्यंमथ्यं निलातक वासः यायेधुंकाः वय्कःयात उगु भाइरसया संक्रमणपाखें मुक्त याकाः येँय् हःगु खः ।
येँय् हयेधुंकाः छुं ई नर्भिक अस्पतालय् हे तयाः वासः याःगु लिसें फिजियोथेरापी लिसेंया विधिपाखें वासः याःगु खःसा स्वास्थ्य अवस्था सामान्य जुयावःगु स्थितिइ छेँय् हे तयाः फिजियोथेरापी लिसेंया विधिं वासः यायेफइगु चिकित्सकपिनिगु परामर्श कथं भैंसेपाटीइ च्वंगु निवासय् तःगु खः थथे प्रधानसम्पाद श्रेष्ठया नियमित वासः यायेगु प्रक्रिया न्ह्यानाच्वंगु इलय् हाकनं वय्कःयात तच्वकं स्वास्थ्य समस्या खनेदयेधुंकाः आइतवाःनिसें नेपाल मेडिसिटी अस्पताल यंकाः सघन उपचार कक्षय् वासः याकाच्वंगु दु । वय्कःया नेपाल मेडिसिटी अस्पतालया सघन उपचार कक्षय् वासः याकाःच्वंसां नं वय्कःया स्वास्थ्य स्थिति जटिल व स्थिर अवस्थाय् हे दूगु वासः यायेगुलिं दुथ्याःपिं चिकित्सकपिन्सं जानकारी ब्यूगु दु ।
थ्वहे झ्वलय् श्रेष्ठया स्वास्थ्य स्थितिप्रति संचारकःमि, पासापिं, थःथितिपिं, राजनीतिक व्यक्तित्व, उद्योगी व्यवसायीलिसें फुक्क शुभेच्छुपिन्सं च्यूताः तसें वय्कःया स्वास्थ्य लाभया कामना यानाच्वंगु कामना प्रकाशनं विज्ञप्तिपाखें जानकारी ब्यूगु दु ।
आर्शिवाद, शुभेच्छा व कामनाया हुनिं प्रधान सम्पादक पुष्करलाल श्रेष्ठयाके ल्वय् प्रतिरोधात्मक क्षमता अप्वयाः हाकनं सक्रिय पत्रकारिता यायेगुलि सक्षम जुइगु अपेक्षा कामना प्रकाशनं तःगु दु ।
०००
पृथ्वीया सतहसिबें छुं किलोमिटर च्वय् वायुमण्डलय् शक्तिशाली उल्का विस्फोट जूगु वैज्ञानिकतय्सं धाःगु दु । नासाया कथं वंगु १८ डिसेम्बरया मध्यान्हय् जूगु विस्फोटपाखें १७३ किलोटन उर्जा उत्पन्न जूगु खः ।
३२ किलोमिटर प्रतिसेकेन्डया बेगय् वायुमण्डलय् दुहाँवंगु पिण्ड पृथ्वीया सतहसिबें २५.६ किलोमिटर च्वय् विस्फोट जूगु खः । टेक्सासया उडल्याण्डय् ग्वसाः ग्वःगु चन्द्रमा व ग्रह विज्ञान सम्बन्धी छगू सम्मेलनय् नासाया वैज्ञानिक डा. केली फास्टं थ्व विस्फोटबारे जानकारी ब्यूगु बीबीसीं धाःगु दु ।
थ्व खँ दकले न्हापां अमेरिकी वायु सैनिकं लुइकूगु खः । इमिसं हे नासाया वैज्ञानिकतय्त विस्फोटबारे जानकारी ब्यूगु खः । वैज्ञानिकतय् कथं उगु विस्फोट उत्तर अमेरिका व एसिया दथुइ व्यापारिक उडान जुइगु रुट लिक्क जूगु खः ।
३० दँया अवधिइ जूगु थ्व निक्वःगु तःधंगु विस्फोट खः । खुदँ न्ह्यः रुसया वायुमण्डल च्वय् थ्वसिबें आपालं गुणा शक्तिशाली विस्फोट जूगु खः । उगु विस्फोट जापानया हिरोसिमाय् अमेरिकां कुतकूगु अणु बमसिबें १० गुणा शक्तिशाली खः । अय्सां बेरिङ सागर च्वय् विस्फोट जूगुलिं उकिया उर्जां आपालं क्षति मजूगु खः ।
डिसेम्बर महिनाय् जूगु विस्फोटपाखें उत्पन्न जूगु उर्जा रुसय् जूगु विस्फोटसिबें ६० प्रतिशत म्हो खः । किं थुकिया आपालं चर्चा मजूगु वैज्ञानिकतय्सं धाःगु दु । वैज्ञानिकया कथं थुज्वःगु तःधंगु विस्फोट दच्छिया अवधिइ निक्वः वा स्वक्वःतक जुइगु जुइ ।
आकासीय पिण्ड पृथ्वीया लिक्क वःसा गुरुत्वाकर्षणया हुनिं तीव्र गतिं पृथ्वीपाखे क्वहाँ वइ व वायुमण्डललिसे घर्षण जुयाः मिँ पिहाँ वइ । थुकियात उल्का कुतुंवःगु धाइ । यदि उगु उल्का पृथ्वीइ लात धाःसा तःधंगु क्षति याइगु वैज्ञानिकतय्गु धापू दु । अय्सां पृथ्वीइ लःया मात्रा अप्वः दूगुलिं प्रतिरक्षाय् आपालं हदतक ग्वाहालि जुइगु जुयाच्वंगु दु ।
सन् २००५ य् अमेरिकी संसदं नासायात सन् २०२० दुने पृथ्वी लिक्कया क्षुद्र ग्रहया ल्याः लुइकेत धाःगु खः । तर उगु ई सीमाय् अपुग जूगु व थप १० दँ ई माःगु वैज्ञानितय्सं आंकलन याःगु खः ।
उल्कापातया कोण व गतिया आधारय् थ्व पृथ्वीया छु क्षेत्रय् कुतुंवइ धैगु लुइकेत वैज्ञानिकत आपालं हदतक सफल जूगु दु । तर, बेरिङ सागर च्वय् जूगु तःधंगु विस्फोट व वंगु डिसेम्बर महिनाय् जूगु लिपांगुखुसिया घटनाया पूर्व जानकारी धाःसा वैज्ञानिकतय्सं तकं मस्यूगु खः । थुकिं पिण्डतय्गु अध्ययनय् थप सुधार आवश्यक खनेदूगु विश्लेषण याःगु दु ।
०००
क्राइस्ट चर्चय् बन्दुकधारीया आक्रमणपाखें ५० म्ह मनूत सीधुंकाः न्यूजिल्याण्डं थःगु विद्यमान बन्दुकसम्बन्धी कानूनय् हिउपाः हइगु जूगु दु ।
क्राइस्ट चर्च शहरया निगू मस्जिदय् वंगु शुक्रवाः ५० म्ह मनूया ज्यान वनेगु कथं बन्दुकधारीं आक्रमण यायेधुंकाः न्यूजिल्याण्डय् बन्दुक कानूनबारे बहस न्ह्याःगु दु । अप्वःसिनं विद्यमान कानून हिलेमाःगु मत जायर याःगु दु ।
थ्वहे झ्वलय् प्रधानमन्त्री जासिन्डा अरडर्नं अर्धस्वचालित ल्वाभःयात प्रतिबन्ध तयेगु योजना सार्वजनिक याःगु दु । बीबीसीया कथं वं अप्रिल ११ तकया दुने व सम्बन्धी न्हूगु कानून लागू जुइगु अपेक्षा याःगु दु ।
प्रधानमन्त्री जासिन्डाया धापू उदृत यासें बीबीसीं धाःगु दु, ‘आक्रमणया खुन्हु लिपा जिपिं सैन्य स्टाइलया अर्धस्वचालित व एसल्ट राइफलयात प्रतिबन्धया घोषणा यायेगु लँपुइ वनेगु जुइ ।’
उगु ल्वाभःलिसे सम्बन्धित पार्टपूर्जाया लिसें फुक्क कथंया उच्च क्षमताया म्यागजिनय् नं न्यूजिल्याण्डं प्रतिबन्ध तःगु दु ।