० किपुली थौं चैत्र २१ निसें ‘कीर्तिपुर महिला महोत्सव ११३९’ न्ह्यात ।
० प्रहरीं एसईई न्ह्यसःपौ ‘आउट’ याःपिन्त सार्वजनिक यात ।
० रिपोर्टर्स क्लबया २१ क्वःगु बुन्ही, सिरपाः लःल्हाये ज्या व हनेज्या ।
० यलय् मेयर चिरीबाबु महर्जनपाखें हेमराज शाक्यया झ्वाता उलेज्या । व
० पोखरां पिदंगु न्हापांगु नेवाः संकिपा ‘लमि’ २८ गते गुण सिनेमाय् ।
किपू नगरपालिका पलिस्था जूगु २३ दँ क्यंगु लसताय् किपू नगरपालिकाया ग्वसालय् ‘कीर्तिपुर महिला महोत्सव ११३९’ न्ह्याःगु दु ।
उगु महोत्सव थौं चैत्र २१ बिहिवाःनिसें चैत्र २३ गते शनिवाःतक न्ह्याइगु जूगु दु ।
थौं बिहिवाः उगु महोत्सवया न्हापांगु दिं, उलेज्याया नितिं तयारी जुयाच्वंगु जानकारी किपू नगरपालिकाया संस्कृति पर्यटन विभाग प्रमुख लिसें किपू नगरपालिका २ वडाया वडाध्यक्ष रमेशमान डंगोलं बियादिल ।
भाजु डंगोलं जानकारी बियादी कथं उलेज्या सभा किपूया १ वडाय् च्वंगु किपूया दकले च्वय् लाःगु लागा क्वाःच्वय् जुइगु जूगु दु ।
उगु महिला महोत्सवया उलेज्याय् मूपाहाँ कथं येँ १० नम्बर क्षेत्रया प्रतिनिधिसभा सांसद राजन केसी झाइगु जूगु दु ।
उगु कीर्तिपुर महिला महोत्सव किपूया पुलांगु बस्ती दुने लाःगु वडा ल्याः १, २, ३ व १० य् न्ह्याइगु तयारी जुयाच्वंगु दु । उगु लागाया महिला समूह व आमा समूह सक्रिय रुपं न्ह्यच्यूगु दुसा किपू लागाया मिसातय्सं उत्पादन याःगु थीथी हलंज्वलंया स्टललिसें थीथी त्वालय् थीथी नसाज्वलंया स्टल तयातःगु दु ।
लिसें स्वन्हुयंकं किपू दुनेया सांस्कृतिक बाजागाजाया लिसें लाखे प्याखं व थीथी पुलांगु नेवाः कासाया ब्वज्या नं याइगु जूगु दु ।
कीर्तिपुर महिला महोत्सव ग्वसाः खलः किपू नगरपालिकां सकलसित महोत्सवय् सहभागिताया नितिं इनाप याःगु दु ।
०००
एसईई न्ह्यसःपौ ‘आउट’ यायेगु ज्याय् दुथ्याःपिन्त प्रहरीं थौं बिहिवाः सार्वजनिक यायेगु तयारी याःगु दु ।
जिल्ला प्रहरी ज्याकुथि सप्तरीइ पत्रकार सम्मेलन यानाः आरोपीपिन्त सार्वजनिक यायेत्यंगु खः ।
प्रदेश २ या प्रहरी प्रमुख डिआईजी हरिबहादुर पालया उपस्थितिइ बिहिवाः न्हिनय् २ः३० ता इलय् पत्रकार सम्मेलन यानाः सार्वजनिक यायेगु सप्तरीया डिएसपी भावेष रिमालं जानकारी ब्यूगु दु ।
१४ व १५ चैत्रय् जूगु विज्ञान व सामाजिक विषयया न्ह्यसःपौ ‘आउट’ जूगु खः । उकिया अध्ययन यायेत सीआईबीं अनुसन्धान न्ह्याकूगु खः । अनुसन्धानया झ्वलय् प्रहरीया हे संलग्नातय् किनबेच जूगु लुइकूगु खः सीआईबीया छम्ह उच्च अधिकारीया कथं न्ह्यसःपौ ‘आउट’ यायेगु ज्याय् दुथ्याःगु आशंकाय् इलाका प्रहरी ज्याकुथि कल्याणपुरय् ज्या यानाच्वंम्ह प्रहरी जवान ब्रम्हदेव सुनरैत व दीपेन्द्रकुमार मण्डललिसें च्याम्हेसित गिरफ्तार याःगु खः ।
मद्दिक्क निन्हु न्ह्यसःपौ ‘आउट’ जुइधुंकाः केन्द्र सरकारं प्रदेश २ या एसईई परीक्षाया नियमित तालिका स्थगित यानाः हाकनं परीक्षाया न्हूगु तालिका सार्वजनिक याःगु खः ।
न्हूगु तालिका कथं प्रदेश २ स चैत्र २२ गते शुक्रवाःनिसें परीक्षा न्ह्याइगु जूगुु दु ।
०००
‘सांस्कृतिक व प्राकृतिक सम्पदां जागु शैक्षिक व पर्यटकीय सहर, स्वच्छ–हराभरा–समावेशी व समुन्नत झीगु किपू नगर’ धैगु नारा थ्वयेकाः न्ह्याःवयाच्वंगु किपू नगरपालिकाया २३ क्वःगु पलिस्था दिवसया लसताय् किपू नगरपालिकाया हे ग्वसालय् ‘कीर्तिपुर महिला महोत्सव ११३९’ न्ह्यायेत्यंगु दु ।
चैत्र २१ गते थौं बिहिवाःनिसें चैत्र २३ गते शनिवाःतक न्ह्याइगु उगु ‘कीर्तिपुर महिला महोत्सव ११३९’या उलेज्या ज्याझ्वः किपू नगरपालिका १ वडा क्वाःच्वय् जुइगु जानकारी उगु महोत्सवया ग्वसाः खलःया ग्वाहालिमि राजकमल महर्जनं नेवाः अनलाइन न्यूजयात जानकारी बियादीगु दु ।
भाजु महर्जनया कथं चैत्र २१ गते बिहिवाः सुथसिया ११ ता इलय् ‘कीर्तिपुर महिला महोत्सव ११३९’ या उलेज्या १० नम्बर क्षेत्रया नेपाली कांग्रेसया प्रतिनिधिसभा सांसद राजेन्द्र केसीया ल्हाःतं जुइगु जूगु दु ।
भाजु महर्जनं स्वन्हुयंकं न्हिथं महोत्सव सुथय् ११ ता ईनिसें सनिलया ६ ता ईतक न्ह्याइगु जानकारी बियादीगु दुसा वय्कलं ‘कीर्तिपुर महिला महोत्सव ११३९’ किपूया वडा नम्बर १, २, ३ व १० वडा न्यंकं न्ह्याइगु जानकारी नं बियादीगु दु ।
महोत्सव उलेज्या लिपा सांगितिक व सांस्कृतिक ज्याझ्वः जुइगु जानकारी बिसें महोत्सव ग्वसाः खलः ग्वाहालिमि भाजु राजकमल महर्जनं चैत्र २१ निसें २३ गतेतक स्वन्हुयंकं सांस्कृतिक व सांगितिक ज्याझ्वः जुइगु जानकारी बियादीगु दु ।
चैत्र २१ व २२ गते किपूया १ वडाया क्वाःच्वय् सांस्कृतिक व सांगितिक ज्याझ्वः जुइसा चैत्र २३ गते शनिवाः महोत्सवया लिपांगु दिं किपूया १० वडा चिलंच्व बिहारय् जुइगु ग्वसाः ग्वयातःगु दुसा महोत्सवया समापन ज्याझ्वः नं चिलंच्वय् हे जुइगु जानकारी ग्वाहालिमि महर्जनं बियादीगु दु ।
महोत्सव समापन ज्याझ्वलय् महिला तथा बालबालिका तथा ज्येष्ठ नागरिक मन्त्री मूपाहाँ कथं झाइगु जानकारी ग्वसाः खलकं ब्यूगु दु ।
किपू नगरया मिसापिनिगु प्रतिभा, सीपलिसें किपू नगरया मिसापिनिगु म्हसीका न्ह्यब्वयेगु आज्जुं किपुली ‘कीर्तिपुर महिला महोत्सव ११३९’ ज्याझ्वः जुइत्यंगु खः ।
महोत्सव ज्वःछि किपूया थासं थासय् किपूया मिसापिन्सं उत्पादन याःगु हलंज्वलं ब्वज्याया स्टल, नसाज्वलंया स्टललिसें सकतां मिसा सहभागिताया स्टलत दइगु व त्वाःत्वालय् सांस्कृति झाँकी ब्वज्याया लिसें किपूया म्हसीका दुथ्याःगु हलंज्वलं ब्वज्या जुइगु जानकारी महोत्सव ग्वसाः खलः ग्वाहालिमि भाजु राजकमल महर्जनं नेवाः अनलाइन न्यूजयात जानकारी बियादीगु दु ।
महोत्सवय् हस्तकला, साना उद्योग ब्वज्या, नसाज्वलं स्टल, सांस्कृतिक ब्वज्या, परम्परागत बाजागाजा ब्वज्यायालिसें किपूया १० वडाय् च्वंगु सनस्टार क्लबपाखें मन्दः ब्वज्या, थांका ब्वज्या, सुकू थायेगु प्रत्यक्ष ब्वज्या, लाखे प्याखं, धिमे प्याखं, ऐतिहासिक कासा यकंधाला, छेलि बाकु, खिपः म्हितेगु, घःल्वहँथें जाःगु कासा ब्वज्या, ऐतिहासिक समाः अलः पायेगु, क्वः बुलेगु, ल्येचा (मेहेन्दी तयेगु) ब्वज्या, इही, बाःराथें जाःगु मिसा रीतिरिवाज ब्वज्या, समेबजि व हलमलः पासा ब्वज्या, स्थानीय कृषि उत्पादन ब्वज्यालिसें सांस्कृतिक व सांगितिक कन्सर्ट ज्याझ्वः जुइगु जानकारी ग्वसाः खलः किपू नगरपालिकां ब्यूगु दुु ।
चैत्र २१ निसें २३ तक जुइगु उगु महोत्सवया सांगितिक व सांस्कृतिक कन्सर्ट ज्याझ्वलय् किपूया मिसा संगीतकःमि व कलाकारपिनिगु सहभागिता दइगु जूगु दु ।
किपूया नांजाःपिं म्येहालामिपिं रत्नशोभा महर्जन, रीता महर्जन, दीपा महर्जन, स्वस्ति महर्जन, रानीशोभा महर्जन, प्रमिला महर्जन, मीना महर्जन, वीरमाया महर्जनपिन्सं सांगितिक ब्वज्या याइगु जूगु दु ।
अथेहे, किपूया नांजाःपिं मिजं म्येहालामिपिं राजेश महर्जन नेवाः, सुविन श्रेष्ठलिसें थीथी म्येहालामिपिन्सं सांगितिक ब्वज्या याइगु जूगु दुसा किपूया नांजाःम्ह प्याखं हुलामि शिल्कुमारी महर्जनया मंजुश्री प्याखं, यमुना महर्जनया हुलाप्याखं, पांगाया पुचः प्याखं, सरीता महर्जनया द्यःप्याखंलिसें थीथी कलाकारपिनिगु हुलाप्याखं ब्वज्या जुइगु जूगु दु ।
कीर्तिपुर महिला महोत्सवय् किपूया नांजाःम्ह अन्तर्रा्ष्ट्रिय संगीतकःमि बाँसुरीबादक रमन महर्जनलिसें नांजाःम्ह वाद्यवादक कलाकार राजेन्द्र महर्जन व सारंगीबादक हरिशरण नेपालीया फ्युजन म्यूजिक आर्केष्ट्रा कन्सर्ट, किपूया हे नांजाःम्ह तबलाबादक दिलीप महर्जन किपूया आर्केष्ट्रा फ्युजन म्यूजिक ब्याण्डया कन्सर्ट्लिसें हुलाप्याखं कम्पिटिशन ज्याझ्वः जुइगु जानकारी नं ग्वसाः खलकं ब्यूगु दु ।
कीर्तिपुर महिला महोत्सव ११३९ ग्वसाः खलः किपू नगरपालिकां उगु महोत्सवय् किपूया सकल मिसा पुचः व मां पुचःया सक्रिय सहभागिता दुथ्याइगु जानकारी बिसें महोत्सव अवलोकनया नितिं सकलसित इनाप याःगु दु ।
०००
कामना प्रकाशनया नायः लिसें बरिष्ठ पत्रकार पुष्करलाल श्रेष्ठयात ‘गिरिजाप्रसाद कोइराला स्मृति सिरपाः’ लःल्हात
नेवाः अनलाइनन्यूजया संरक्षकलिसें नेपालभाषाया न्हापांम्ह संकिपा पत्रकार विजयरत्न असंबरे तुलाधरयात विशेष हनेज्या
देसया समसामयिक मुद्दाय् बहस व साक्षात्कार यायेगु आज्जुं पलिस्था यागु रिपोर्टर्स कलबं नकतिनि जक थःगु २१ क्वःगु बुन्ही तःजिक न्यायेकूगु दु ।
प्रधानमन्त्री केपी शर्मा ओलीया मूपाहाँसुइ न्ह्याःगु उगु बुन्ही ज्याझ्वलय् समाजय् थीथी पक्षय् योगदान यानादीपिं व्यक्तित्वपिन्त नं हनेज्या याःगु खः ।
१ लख तका दांलिसेंया ‘गिरिजाप्रसाद कोइराला स्मृति सिरपाः’ कामना प्रकाशनया नायः लिसें बरिष्ठ पत्रकार पुष्करलाल श्रेष्ठयात लःल्हाःगु खः ।
राजधानी राष्ट्रिय न्हिपौया धु्रव लम्साल, क्रियाशील मिसा पत्रकार सम्झना वन लिसेंयापिन्त पुरस्कृत याःगु उगु बुदिं हना ज्याझ्वलय् मूपाहाँ प्रधानमन्त्री केपी ओलीं सिरपाः लःल्हायेगु व हनेज्या यानादीगु खः ।
उगु ज्याझ्वलय् नेवाः अनलाइनन्यूजया संरक्षकलिसेंनेपालभाषाया न्हापांम्ह संकिपा पत्रकार विजयरत्न असंबरे तुलाधरयात वय्कलं संकिपा निर्देशन व संकिपा पत्रकारिता क्षेत्रय् यानादीगु योगदानया कदर यासें विशेष हनेज्या याःगु खः ।
रिपोर्टसं क्लबया नायः ऋषि धमलाया सभानायःसुइ न्ह्याःगु उगु २१ क्वःगु बुन्ही हना ज्याझ्वलय् नेपाल कम्युनिष्ट पार्टीया नायः लिसें पूर्वप्रधानमन्त्री पुष्पकमल दाहाल प्रचण्ड, सूचना संचार व प्रविधिमन्त्री गोकुलप्रसाद बास्कोटा, भारतीय राजदूत मन्जिप सिं पुरी, मन्त्री परिषदया पूर्व नायः खिलराज रेग्मी लिसेंया विशिष्ट पाहाँपिं उपस्थित जुयादीगु खः ।
०००
‘स्थानीय निकायस पौ च्वयेबलय् नेवाः भासं च्वयेगु यायेनु’ धैगु सः थ्वयेकाः मांभाय् पुचः यलया ग्वसालय् पण्डित हेमराज शाकयया झ्वाता उलेज्या ज्याझ्वः याइगु जूगु दु ।
मांभाय् पुचः यलया ग्वसालय् यल महानगरपालिकाया धर्मा्दित्य धर्माचार्य क्यबय् प्राचीन लिपिविद्, पुरातत्वविद्, संस्कृतिविद्, बौद्ध विद्वान पं. हेमराज शाक्यया झ्वाता पं. शाक्यया पुण्य तिथिस यल महानगरपालिकाया मेयर चिरीबाबु महर्जनया ल्हाःतं उलेज्या जुइगु जानकारी ग्वसा खलः मांभाय् पुचः यलया नायः हेरारत्न शाक्यं नेवाः अनलाइनन्यूजयात जानकारी बियादीगु दु ।
नायः भाजु हेरारत्न शाक्यया कथं उगु ज्याझ्वः ने.सं. ११३९ चिल्लागा अमाइ (चैत्र २२ गते) शुक्रवाः सुथसिया ७ः३० ता इलय् यल महानगरपालिका पूच्वय् जुइगु जूगु दु ।
ग्वसाः खलः मांभाय् पुचः यलं उगु ज्याझ्वलय् उपस्थितिया नितिं सकलसित इनाप याःगु दु ।
०००
‘नेवाः संकिपा स्वयेनु, नेवाः नुगः ब्वयेनु’ धैगु नारा थ्वयेकाः नेवाः संकिपा ‘लमि’ क्यनेज्या जुइगु जूगु दु ।
पोखराय् च्वंपिं नेवाःपिन्सं निर्माण याःगु न्हापांगु नेवाः संकिपा ‘लमि’ चैत्र २८ गते बिहिवाः यलया गुण सिनेमा हलय् क्यनेज्याया तयारी जुयाच्वंगु दु ।
नेवाः संकिपा मतिना पुचःया ग्वसालय् क्यनेज्या जुइत्यंगु नेवाः संकिपा ‘लमि’ स्वयेगु नितिं टिकटया मू स्वसः तका (३०० तका) तयातःगु दु ।
ए भि सि डि (अडियो भिडियो क्रिएशन एण्ड डिजाइनिङ्ग) पोखरापाखें संकिपा निर्माण यायेगु नितिं लाय् पाःगु उगु ‘लमि’ संकिपाया स्यनामि यादव दास भोछिभोया खः ।
यलया गुण सिनेमा क्यनेज्या जुइगु पोखराया न्हापांगु नेपालभाषा संकिपा ‘लमि’ स्वयेगु नितिं राजु राजदेव बज्राचार्य (९८४१६०४४०७) व सुरज ब्यञ्जनकार (९८५११६६५५६) पिन्त स्वापू तयेगु नितिं ग्वसाः खलः नेवाः संकिपा मतिना पुचलं नेपालभाषा संकिपाह्यःमिपिन्त इनाप याःगु दु ।
०००
नेकपा नायः पुष्पकमल दाहाल प्रचण्डं रोजगारी सिर्जनाया नितिं शिक्षा नीति सुधार जुइमागु खँ धयादीगु दु ।
बुधवाः येँय् जूगु राष्ट्रिय विकास परिषद्या बैठकयात सम्बोधन यानादिसें पूर्व प्रधानमन्त्री तकं जुयादीम प्रचण्डं रोजगारी सिर्जनाया नितिं शिक्षाय् गुणात्मक सुधार जुइमाःगु धयादीगु खः ।
ब्वनामतःपिंसिबें ब्वनातःपिं जनशक्ति विदेश पलायन जुइगु क्रम अप्वयाच्वंगु धासें प्रचण्डं धयादी, “देय् दुने ज्या यायेगु सिबें विदेशय् वनाः जागिर नयेगु प्रवृत्ति अप्वयाच्वंगु दु व देय् दुने उत्पादनशील जनशक्ति म्हो जुजुं वनाच्वंगु दु । थ्व छु हुनिं जुल धकाः एकचित्त जुयाः विचा यायेगु खःसा मू खँ शिक्षाय् हे दु ।”
प्रचण्डं धयादी, “झीसं २५ दँतकया योजनाय् विचाः यायेबलय् आः गुज्वःगु जनशक्ति तयार यायेगु धैगु खँयात दकले च्वय् तयेमा धैगु जितः ताः ।”
व्यवसायिक शिक्षाय् प्राविधिक शिक्षाय्, उत्पादन बृद्धि व रोजगारी सिर्जना यायेगु शिक्षायात विद्यालयनिसें विश्वविद्यालयतक बिइमाःगु प्रचण्डं धयादीगु दु । वय्कलं धयादी, “झीसं उज्वःगु क्षिा बिइफत धाःसा स्वतः उकिं उत्पादित जनशक्ति नेपाःया वस्तुगत परिस्थिति कथं वं कृषिइ आधुनिकीकरण, कृषिया व्यवासायकरण, कृषिया विविधीकरण यायेगु व कृषिइ आधारित उद्योगत पलिस्था यानाः उत्पादन बृद्धि व रोजगारी सृष्टि यायेगु खँय् केन्द्रीत जुइफइ ।”
विकास परिषद बैठक म्हिगःया निरन्तरता जक जुइ मज्यूगु धासें प्रचण्डं वइगु योजनाय् धनी व गरीबया गा चिइकेगु योजनायात प्राथमिकता बिइमाःगु खँ नं कनादिल ।
म्हिगः आन्दोलन यानाबलय् व जनतायात प्रशिक्षित यानाबलय् थःपिन्सं विभेदया अन्त्य यायेगु धयागु लुमंकूसें प्रचण्डं धयादी, “अझ सरकारया नेतृत्व याःगु नेकपा ला दकले अप्वः वहे विषयस प्रशिक्षण बियाः जनताया नुगः त्याकाः वःगु खः । उकिं झीसं वर्ग विभेद चिइकेगु सामाजिक न्यायलिसेंया समतामूलक समाज निर्माण यायेगु खँयात प्राथमिकताय् तये हे माः झीगु योजनां, झीगु बजेटं, झीगु ज्याझ्वलं ।”
प्रचण्डं सुशासनयात नं प्राथमिकताय् तयेत योजना आयोगयात सुझाव बियादीगु दु । राष्ट्रिय योजना आयोगया आःतकया टिम इनर्जे्टिक व डाइनामिक जूगु धासें प्रचण्डं धयादी, “झीसं सुशासनपाखें प्रभावकारी शासन प्रणाली बिइ धकाः जनतायात धयागु दु । योजना निर्माणया प्रक्रियानिसें फुक्क थासय् थ्व सुशासनया खँ नं अथे हे वयेमाः व जनतां छुं महसुस यायेमाः धाःसा आः न्हूगु चिज वइ ।
Related
