ख्वप नगरपालिकाया मेयर सुनिल प्रजापतिं आः ख्वप नगर दुनेया फुक्कं स्कुलय् रञ्जना लिपि, प्रचलित नेपाल लिपि व नेपालभाषायात अनिवार्य रुपं लागू यायेगु खँ कनादीगु दु । थौं न्हिनय् समाज सुधार माविया पीच्याक्वःगु बुदिंया लसताय् स्कुलया न्हूगु भवन माहेश्वरीइ जूगु ज्याझ्वलय् मूपाहांया थासं न्ववानादिसें वय्कलं नीदँ लिपा व न्यय्दँ लिपा छु जुइ धइगु सोच विचार यानाः स्कुलय् ब्वनेगु ब्वंकेगु यायेमाः धयादिल । मेयर प्रजापतिं शहीद, राजनीतिक न्ह्यलुवा व ख्वपया किसान आन्दोलनया विषयय् स्थानीय पाठ्यक्रमय् अनिवार्य कथं दुथ्याकाः पुर्खा प्रति गौरव याये सयेकेगु भावना विकास यायेत नगरपालिका लगे जुयाच्वनागु खँ कनादिल ।
ज्याझ्वलय् प्रदेश सभाया सांसद सुरेन्द्रराज गोसाईनं ३ नम्बर प्रदेश सरकार लूट, भ्रष्टाचार व खन्चुवा जूगु न्ह्यथनादिसें ख्वपयात राजधानी यायेगु थेंज्याःगु घोर संघीयता बिरोधी व विकासया खँ ल्हानाः नेमकिपां पीदँ न्यय्दँ न्ह्यःनिसें यानाच्वंगु शिक्षा, स्वास्थ्य व विकासया ज्यायात अपमान यानाच्वंगु द्वपं बियादिल । वय्कलं म्हिता म्हिता सयेकेगु व सयेकु सयेकूं म्हिते दइगु मस्तय्गु अधिकारयात अभिभावकं सम्मान यायेमाःगु व स्कुलं विद्यार्थी अभिभावकया मुँज्या यानाः सुझाव कायेमाःगु खँ कनादिल ।
विद्यालय व्यवस्थापन समितिया नायः कृष्णसागर बासीया अध्यक्षताय् जूगु ४८ क्वःगु स्थापना दिवस, एसइई परीक्षाय् ताःलापिं विद्यार्थीतय्त पदक इनेज्या व सांस्कृतिक ज्याझ्वलय् विद्यालयया पुलांम्ह शिक्षक राम प्रजापतियात मूपाहां मेयर प्रजापति दोसल्लां न्ययेकाः हनेज्या यानादीगु खःसा ज्याझ्वलय् सम्मानित शिक्षक राम प्रजापति व नेपाल क्रान्तिकारी शिक्षक संघया केन्द्रीय कोषाध्यक्ष चक्रबहादुर चाकतू लगायतं न्ववनादीगु खः । थीथी कक्षाय् ताःलाःपिं विद्यार्थीतय्त प्रदेश सांसद सुरेन्द्रराज गोसाईनं सिरपा लःल्हानादीगु खःसा विद्यार्थीतय्सं सांस्कृतिक ब्वज्या न्ह्यब्वःगु खः ।