संवाहक नेपालभाषा बुलेटिन बिस्काः जात्राया झ्वलय् थौं महाकाली महालक्ष्मी जात्रा, बोडय् म्ये प्वाः

कृष्ण प्रजापति
० भ्वतया पुल बजाः डुबानय्, न्हूदँ न्यायेकाः येँय् लिहाँ वःपिं समस्याय् ।
० मकवानपुरय् स्वंगू सवारी दुर्घटनाः स्वम्ह सित ।
० जनबहाःद्यः रथजात्रा ः क्वःने याः तःजिक न्यायेकेत सहलह मुँज्या । व
० येँ महानगरं बैशाख ५ गते विश्व सम्पदा दिवस तःजिक हनीगु
बिस्काः जात्राया खुन्हुया दिं थौं ख्वपय् महाकाली व महालक्ष्मीया खः जात्रा जुल । महाकाली व महालक्ष्मीयात तःकेहेँ भाःपिया थःछेँय् सतुगु इलय् हेवाय् चबाय् याःगु धासें निम्ह तःकेहेँ ल्वाइगु प्रतीक कथं महालक्ष्मी लागाय् खः ल्वाकाः जात्रा याःगु खः । जात्रा स्वयेत म्वम्वः मनूत सहभागी जूगु खः ।
खः जात्रा क्वचायेक थः थःगु द्यःछेँय् खतय् तयाः जात्रा याःम्ह महालक्ष्मी व महाकालीयात बिराजमान याकूगु खः । थौं हे थिमिया बोडेय् म्येचय् प्वाः खंकीगु जात्रा क्वचाल । खुदँ न्ह्यःनिसें नियमित कथं दँय्दसं म्येय् प्वाः खंकादीम्ह चन्द्रकृष्ण बाडे श्रेष्टं थुगुसी नं म्येय् प्वाः खंकूगु खः ।
थौं हे सुथय् मध्यपुर लागाया चपाचो, दिगुली व बालकुमारी लागाय् केन्द्रबिन्दु यानाः तःजिक म्ह्वासुसिन्ह जात्रा जुल । जात्राय् सहभागीतय्सं थः थःगु त्वाःया खः कुबिया म्ह्वासुगु सिन्ह तिकावःगु खः । सिंदूर जात्रा नं धाःगु उगु जात्राय् सहभागीतय्सं तिं थानाः मुस्यांप्वाः च्याकाः ब्वति काल ।
बिस्काः जात्राया न्हय्न्हु कुन्हु कन्हय् ख्वपय् ब्रम्हायणी जात्रा जुइ । ब्रम्हायणी द्यःयात ध्वाखासिंनिसें दतात्रय त्वाः तक जात्रा यानाः तयेयंकीगु खः । उगु इलय् स्थानीय भजन खलः, मस्त व मिस्तय्गु तकं सहभागीता दइ । याता खँल्हँय् वा पाइपिसं तूचिकं दान यायेगु कथं थथे जात्रा यानाः मुस्यांप्वाः च्याका वयेगु चलन दुगु खः । आः धाःसा याता खल्हँय्या न्यापित्या नवदुर्गा द्यःया मूबाहां लिकीगु जात्रा याइगु जग्गा ख्वप नगरपालिकां नयेवं अन जात्राय् मत च्याकीपिं अनिवार्य मजुया वंगु दु ।
बिस्काः जात्राया न्हय्न्हुया दिंया लागिं द्यःयात थौं हे पूजा फयेकेगु व माहेश्वरी व ब्रम्हायणी खः ल्वाकेगु जात्रा नं क्वचाल । न्हय्न्हुकुन्ह त्वाः त्वालय् कुहां बिज्याकातःपिं द्यःतय्त द्यः सगं बीगु चलन दु । नापं उकुन्हु छुमाः गणेद्यःया जात्रा नं जुइ । लिपांगु दिं गुन्हुकुन्हु धाःसा थःने व क्वनय् भैलःखः सालाः भैलःद्यःयात बहनी लिबाक थहाँ बिज्याकी ।
०००
मकवानपुरय् जूगु स्वंगू ब्यागलं ब्यागलं सवारी दुर्घटनाय् स्वम्ह मनूत सीगु दुसा १२ म्ह घाःपाः जूगु दु ।
पूर्व–पश्चिम राजमार्ग अन्तर्गत मनहरी गाउँपालिका–७ य् ग१ख ७६२६ नम्बरया बसं न्यासी वनाच्वंम्ह मनूयात ठक्कर बियाः छम्ह मनू सीगु खः । पोखरां वीरगञ्जपाखे वनाच्वंगु उगु बसया ठक्करं ६५ दँया बृद्धया ज्यान वंगु खः । वया म्हसीका सीमदुनि ।
अथेहे, मनहरीया हे खरंगाय् मेगु सवारी दुर्घटना जुयाः छम्ह मनूया ज्यान वंगु खः । हेटौंडापाखे वयाच्वंगु ना१ज ४८६७ नम्बरया सुमो व को३४प ५४९७ नम्बरया मोटरसाइकल ल्वानाः मोटरसाइकल चालक ३१ दँया रवीन्द्रकुमार पोदारया घटनास्थलय् हे सीगु खः । व मोरङयाम्ह खः ।
प्रहरीया कथं घटनाय् सुमोय् सवार ११ म्ह व मोटरसाइकलय् सवार छम्ह यानाः १२ म्ह घाःपाः जूगु दु । घाःपाः जूपिंमध्ये ९ म्हेसिगु हेटौंडाया चुरेहिल अस्पताल व स्वम्हेसिगु चितवन भरतपुरय् वासः जुयाच्वंगु दु ।
उखे, कान्ति लोकपथ अन्तर्गत मकवानपुरगढी गाउँपालिकाया शिखरकटेरीइ दिकातःगु ना८ख ४३२६ नम्बरया टिपरलिसे ना३२प १८४९ नम्बरया मोटरसाइकल ल्वानाः मोटरसाइकल चालक गढीगाउँपालिका धरमपानीया ३५ दँया गोविन्द वमजनया ज्यान वंगु जिल्ला प्रहरी ज्याकुथि मकवानपुरय् प्रहरी निरीक्षक सागरविक्रम रानां जानकारी ब्यूगु दु । वया वासः यायेगु झ्वलय् चितवनय् सीगु खः ।
स्वंगुलिं दुर्घटनाया ठक्कर ब्यूगु सवारी व चालक प्रहरी नियन्त्रणय् दूगु जिल्ला प्रहरी ज्याकुथि मकवानपुरं जानकारी ब्यूगु दु ।
०००
न्ह्याग्गु कथंया विकासया नितिं सकारात्मक सोचया तःधंगु ल्हाः दइ धइगु ताःतुनाः निदँ न्ह्यः नीस्वंगु कर्ण सकारात्मक कोषया वेबसाइट व मोबाइल एप्स आइतवाःनिसें न्ह्याकूगु दु ।
पर्यटन व्यवसायी व सकारात्मक सोचया अभियन्ता च्वमि कर्ण शाक्यया ७६ क्वःगु बुदिंया लसताय् जूगु उगु ज्याझ्वलय् पउत.षिभ नांयागु वेबसाइट न्ह्याकूगु खः ।
ज्याझ्वलय् वेबसाइट डिजाइनर दिपेश शाक्यं खँ तयादीगु खःसा कर्ण सकारात्मक कोषया दुजः अन्तिम गुरुङ, पुलांम्ह गभर्नर दिपेन्द्र पुरुष ढकालपिन्सं नुगःखँ तयादीगु खःसा कर्ण सकारात्मक कोषया संरक्षक कर्ण शाक्यं थः दुने सकारात्मक सोच गथे जुयावल धइगु खँ कनादिसें थः जीवन धुंकाःया जीवन मालाच्वनागु खँ नं कनादिल ।
०००
येँ महानगरपालिकाया सम्पदा व पर्यटन समिति लिसें हनुमानध्वाखा दरबार क्षेत्र संरक्षण कार्यक्रमया मंकाः ग्वसालय् थ्वहे वइगु बैशाख ५ गते बिहिवाः विश्व सम्पदा दिवस तःजिक हनीगु जूगु दु ।
सम्पदा दिवसया लसताय् विश्व सम्पदा लागा स्वयम्भूनिसें मेगु विश्व सम्पदा लागा हनुमानध्वाखा दरबार क्षेत्रतकया सम्पदा लागा दुने सांस्कृतिक ¥याली याइगु जूगु दु ।
लिसें उगु सम्पदा लागाया गुरुयोजना नं छगू ज्याझ्वःया दथुइ विमोचन याइगु जूगु दु ।
सम्पदा व पर्यटन समितिया कजिलिसें येँ महानगरपालिका १८ वडाया वडाध्यक्ष न्हुच्छेकाजी महर्जनं बैशाख ५ गते सुथसिया ७ ता इलय् भुइख्यलय् मुनाः स्वयम्भूनिसें बसन्तपुरतकया सम्पदा लागाय् सांस्कृतिक बाजागाजालिसें ¥याली पिकायेगु जानकारी बियादीगु दु ।
भाजु महर्जनं स्वयम्भुं हनुमानध्वाखातकया निगुलिं सम्पदा लागाय् जुइगु सांस्कृतिक ¥यालीइ ब्वति कायेत सकलसित इनाप यानादीगु दु ।
०००
प्रधानमन्त्री निवासया जग्गा सत्तारुढ नेपाल कम्युनिष्ट पार्टी (नेकपा)या महासचिव विष्णु पौडेलं तकं न्याःगु तथ्य पिहाँ वःगु दु ।
प्रधानमन्त्री व प्रधानन्यायाधीश निवासया हे जग्गा व्यक्तिया नामय् नामसारी जूगु घटना सार्वजनिक जुइधुंकाः उकिया विरोधय् प्रधानमन्त्री निवास बालुवाटार न्ह्यःने सोमवाः प्रदर्शन याःगु दु ।
रवीन्द्र मिश्र नेतृत्वया विवेकशील साझा पार्टीं प्रधानमन्त्री निवासया जग्गा तकं व्यक्तिया नामय् म्यूगु विरोधय् सोमवाः सुथय् छघौ प्रधानमन्त्री निवास न्ह्यःने बालुवाटारय् प्रदर्शन याःगु खः ।
प्रधानमन्त्री निवासया जग्गा हे गम्भीर रुपं अपचलनय् लाःगु बुखँ पिहाँ वयेधुंकाः आःनिसें छुं नं सरकारी जग्गा अपचलन जुइके मबिइत सरकारयात सचेत याकेत प्रधानमन्त्री निवास न्ह्यःने हे विरोध प्रदर्शन यायेमाःगु उगु पार्टीया प्रवक्ता सूर्यराज आचार्यं जानकारी ब्यूगु दु । वय्कलं विरोध प्रदर्शनया माध्यमं भ्रष्टाचारी व विचौलियाया फन्दाय् मलायेत नं सरकारयात दबाब बियागु जानकारी बियादीगु दु ।
प्रवक्ता आचार्यं प्रधानमन्त्री निवासया जग्गा हे अपलचन यायेगु गम्भीर प्रकृतिया घटना पिहाँ वःगु न्ह्यथंसें अथे जुइके मबिइत सरकारयात खबरदारी यायेत नं फुक्क नागरिक समाज, पार्टी व संचारकःमिपिन्त नं आह्वान याःगु दु ।
प्रदर्शनया झ्वलय् ‘बालुवाटार मिइपिन्सं सिंहदरबार नं मिइ, होसिया’, ‘चिल्लाय् दनाः हाले, भ्रष्टाचारया पोल चायेके’, ‘नेतापिनिगु सम्पत्ति छानबिन या’, ‘तःधिकःपिं न्याँ गन दु ? सिंहदरबारपाखे दु’ च्वयातःगु प्लेकार्ड नं ब्वज्या याःगु खः ।
उगु घटना पिहाँ वयेधुंकाः सरकारं नं छवाः न्ह्यः प्रधानमन्त्री निवासया जग्गा मिइत रोक तयेगु निर्णइ याःगु खः । विवेकशील साझा पार्टीं सरकारया उगु निर्णयया लसकुस यासें उगु घटनाया छानबिन यानाः दोषीयात कडा कारवाही यायेत नं सरकारयात दबाब बियाः वयाच्वंगु दु ।
प्रधानमन्त्री निवासया जग्गा सत्तारुढ नेपाल कम्युनिष्ट पार्टी (नेकपा)या महासचिव विष्णु पौडेलं तकं न्याःगु तथ्य पिहाँ वःगु दु ।
०००
बझाङय् सोमवाः सुथय् भुखाय् ब्वःगु दु ।
बझाङ जिल्लाया जयपृथ्वी केन्द्रविन्दु जुयाः ४.८ रेक्टरस्केलया भुखाय् ब्वःगु खः । सुथय् ४ः२७ ता इलय् ब्वःगु उगु भुखाय् बझाङलिसें जःखःया जिल्लाय् महसुस जूगु राष्ट्रिय भूकम्प मापन केन्द्रं जानकारी ब्यूगु दु ।
भुखाचं स्थानीय बासिन्दापिं ग्याःचिकुइ लाःसां नं मानवीय व भौतिक क्षति धाःसा मजूगु बझाङ प्रहरीं जानकारी ब्यूगु दु ।
गोरखाया बारपाक केन्द्रविन्दु जुयाः २०७२ बैशाख १२ गते तःभुखाय् ब्वःगु खः । उगु भुखाय् लिपा ताःईतक लिभुखाय् ब्वयाच्वंगु खः । केन्द्रया कथं सोमवाः सुथय् बझाङ केन्द्रविन्दु जुयाः ब्वःगु भुखाय् न्हूगु भुखाय् जूगु जानकारी ब्यूगु दु ।
०००
जनबहाःद्यः रथजात्राया स्वन्हुया न्हि थौं सोमवाः हनुमानध्वाखां रथ सालाः लगंतक क्वःने याः न्यायेकेत्यंगु दु ।
क्वःने याः तःजिक न्यायेकेगु नितिं थौं सोमवाः सुथय् लगं खलःया ज्याकुथिइ येँ महानगरपालिका, स्थानीयबासी, सुरक्षा निकायलिसें थीथी खलः पुचःया प्रतिनिधिपिनिगु दथुइ सेतो मच्छिन्द्रनाथ रथयात्रा ११३९ व्यवस्थापन समितिया मुँज्या च्वंगु दु ।
उगु मुँज्यां क्वःनेयाः तःजिक न्यायेकेगु नितिं सुरक्षा, ट्राफिक व्यवस्थापननिसें थीथी ज्यायात कयाः सहलह ब्याकूगु खः ।
येँया २१ वडाया वडाध्यक्ष उदय चुडामणि बज्राचार्यया सभापतित्वय् जूगु उगु सहलह मुँज्याय् व्यवस्थापन समितिया दुजःपिं सुजीव बज्राचार्य, उमेश स्थापित, गणपतिलाल श्रेष्ठ, ज्योति शाक्य, राजेश मानन्धर, राम रंजित, येँ महानगरपालिकाया उदय पसखलः व जनसेवा प्रहरी प्रभागया डिएसपी व सुरक्षा निकायया प्रतिनिधिपिं उपस्थित जूगु खः ।
०००
चितवन जिल्लाया थीथी थासय् बि.सं. २०७५ साल दुने जूगु सवारी दुर्घटनाया हुनिं १५५ म्ह मनूत सीगु दु । दुर्घटनाय् लानाः २३५ म्ह मनूत तच्वकं घाःपाः जूगु दु ।
जिल्ला ट्राफिक प्रहरी ज्याकुथि चितवनं ब्यूगु जानकारी कथं वंगु दँ ३०६ गू दुर्घटना जूगु खः । न्हापांगु दँ २०७४ या तुलनाय् दुर्घटना ल्याः, सीपिं व घाःपाः जूपिं अप्वःगु दु । ज्याकुथिया कथं न्हापांगु दँ २८९ गू दुर्घटनाय् १३० म्ह मनूत सीगु खःसा २२३ म्ह तच्वकं घाःपाः जूगु खः ।
ज्याकुथिया प्रमुख प्रहरी निरीक्षक चन्द्रकुमार गिरीं अतिकं सवारी चाप अप्वःगु हुनिं दुर्घटना अप्वःगु धयादीगु दु । चोक चोकय् प्रहरी जनशक्ति परिचानल यायेमफूगु व प्रविधिया अभावया हुनिं दुर्घटना न्यूनीकरण यायेमफूगु प्रहरीया धापू दु । प्रहरीं सवारी चालक अनुशिक्षण, नियम पालना मयाःपिन्त जरिवाना, विद्यार्थी्पिन्त ट्राफिक जनचेतना शिक्षा, ट्याम्पो चालकया स्वास्थ्य परीक्षण, सवारीसाधनया यान्त्रिक परीक्षण, सतकय् याइगु पार्किङ्ग व्यवस्थित यायेगु ज्या यानाच्वंगु वय्कलं धयादीगु दु ।
देसया हे मध्यभागय् लाःगु उगु जिल्लाय् पूर्वपश्चिम राजमार्ग्लिसें पृथ्वी राजमार्ग व नारायणगढ मुग्लिन सतकखण्डय् सवारीया अतिकं चाप जुइगु जुयाच्वंगु दु । ग्रामीण क्षेत्रया पक्की सतक दयेकेधुंकाः युवा ल्यायम्हपिन्सं मोटरसाइकल व गाडी तीव्र गतिइ चलेयाइगु जूगुलिं दुर्घटना अप्वःगु खः ।
०००
२०७६ सालया न्हापांगु दिं बैशाख १ गते आइतवाः न्हिनय् ३ ता इलय् तच्वकं वा वःगु हुनिं न्हूदँ न्यायेकेत काभ्रे थ्यंकूपिं पर्यटकपिं समस्या लाःगु दु । थ्यंमथ्यं बाघौ वःगु वां यानाः अरनिको राजमार्ग अन्तर्गत भ्वत (बनेपा) या पुल बजाः क्षेत्रय् स्वघौ सवारी आवागमन ठप्प जूगु खः ।
जिल्ला ट्राफिक ज्याकुथि काभ्रेया प्रहरी निरीक्षक निशेष चापागाईं नं धयादी, “स्वनिगःया थीथी थासं पर्यटक वःबलय् सतकया व्यवस्थापन यायेत थाकुइ धैगु जिमिगु अनुमान दूगु खः, झन् वा वयाः पुल बजाः डुबानय् लायेधुंकाः येँय् लिहाँ वनीपिन्त समस्या जूगु खः ।”
प्रहरीं भ्वत जुयाः ख्वप वयेगु सतकया विकल्पय् कुशादेवी, ग्वार्खो, नाला ख्वपया सतकं गाडी पास याकूगु खः । पुल बजालय् खुसिबाः दुहाँ वःबलय् छुं ई सवारीसाधन डुवानय् लाःगु खः ।
दँय् दसं भ्वतया पुल बजाः क्षेत्रय् पुण्यमती खुसिं डुवान जुइगु जुयाच्वंगु दु । पुल बजाःया ट्राफिक ज्याकुथिनिसें इलाका प्रहरी तकया सतक खण्डय् पुण्यमती खुसि दुहाँ वःबलय् राजमार्ग पूर्ण रुपं ठप्प जुइगु जूसां नं थुकिया दीर्घकालीन समस्या समाधानय् सम्बन्धित निकायं च्यूताः तःगु मदु ।